རྒྱལ་དབང་སྐུ་ཕྲེང་དགུ་བའི་སྐབས་ཀྱི་ལོ་རྒྱུས།
རྒྱལ་དབང་སྐུ་ཕྲེང་དགུ་བ་ནི་བློ་བཟང་བསྟན་པའི་འབྱུང་གནས་ངག་དབང་ལུང་རྟོགས་རྒྱ་མཚོ་ཡིན་ལ། ཁོང་རབ་བྱུང་བཅུ་གསུམ་པའི་ཤིང་གླང་སྤྱི་ལོ༡༨༠༥ལ་མདོ་ཁམས་སྨད་ཀྱི་འབྲི་ཆུའི་ཉེ་འགྲམ་ལྡན་མའི་ཡུལ་དུ་ཡབ་བསྟན་འཛིན་ཆོས་སྐྱོང་དང་ཡུམ་དོན་གྲུབ་སྒྲོལ་མ་གཉིས་ཀྱི་སྲས་སུ་སྐུ་འཁྲུངས། རྒྱལ་དབང་བརྒྱད་པ་ཆེན་པོ་དགོངས་པ་རྫོགས་རྗེས་སྔར་སྲོལ་ལྟར་ཡང་སྲིད་འོས་སྤྲུལ་ས་གནས་གང་སར་བརྩད་གཅོད་བྱེད་སྐབས། ཆུང་སྲིད་འདི་པ་ངོ་མཚར་བའི་མཚན་ལྟས་བཟང་པོ་ལྡན་པའི་གནས་ཚུལ་བོད་དུ་རིམ་འབྱོར་ལ་བརྟེན་རྒྱལ་ཚབ་རྟ་ཚག་རིན་པོ་ཆེ་མཆོག་དང་བཀའ་བློན་བཞི་སོགས་བོད་ཀྱི་ཆེ་རྒུ་ཐམས་ཅད་བཀའ་བགྲོས་ཏེ། རབ་བྱུང་བཅུ་བཞི་པའི་མེ་ཡོས་སྤྱི་ལོ༡༨༠༧ལ་འོས་སྤྲུལ་གདན་ཞུར་སྐུ་གོང་མའི་གཟིམ་འགག་རབ་བརྟན་རྒྱ་མཚོ་རྫོང་མདའ་གནང་བ་ལྟར། ཡབ་ཡུམ་སྲས་བཅས་སྐུ་འཁོར་རྣམས་རིམ་གྱིས་ཕེབས་ཏེ་ཚལ་གུང་ཐང་གི་གཙུག་ལག་ཁང་དུ་སྤྱན་དྲངས་ཏེ་ཆིན་གོང་མར་གསེར་སྙན་འབུལ་སྒྲོན་མཛད་དགོས་སྟབས་བཀའ་སྒུག་གནང་། དེའི་ཚེ་འོས་སྤྲུལ་གཞན་རིགས་འགའ་ཡང་བྱོན་པ་བཅས་ལ་བརྟེན་མཐར་རྒྱལ་ཚབ་རིན་པོ་ཆེ་གཙོས་བཀའ་བློན་རྣམ་བཞི་དང་གསོལ་གཟིམ་མཆོད་གསུམ་གྱི་སེར་དཔོན་དང་དྲུང་ཡིག་སོགས་རྩེ་ཤོད་ཀྱི་ལས་ཚན་པ་ཐམས་ཅད་མགྲིན་གཅིག་ཏུ་ཆོས་སྐྱོང་ཆེན་པོ་སྤྱན་དྲངས་ཏེ་ཡང་སྲིད་རིན་པོ་ཆེའི་དོགས་གནས་གསལ་ཆ་དགོས་པའི་བཀའ་ལུང་ནན་ཆགས་ཞུས་པ་དང་། དེ་མཚུངས་པཎ་ཆེན་ཐམས་ཅད་མཁྱེན་པ་མཆོག་ནས་ཀྱང་ལ་མོ་ཚངས་པར་ལུང་ཞུ་གནང་བ་བཅས་ཀྱི་ཞུས་ལན་རྩེ་མཐུན་བཟང་ཕེབས་བྱུང་ཐོག པཎ་ཆེན་ཐམས་ཅད་མཁྱེན་པ་དང་རྒྱལ་ཚབ་ཆེན་པོ་ཆེ། བོད་སྡོད་ཨམ་བན་དང་བོད་ཀྱི་སྐྱ་སེར་དཔོན་རིགས་ཚང་མ་དངོས་བསྐྱོད་ཀྱིས་ཚལ་གུང་ཐང་དུ་ཕེབས་ནས་ཡང་སྲིད་བརྟག་དཔྱད་ངོས་འཛིན་ལེགས་པར་གནང་རྗེས་གོང་མར་གསེར་སྙན་སྒྲོན་འབུལ་ཞུས། རབ་བྱུང་བཅུ་བཞི་པའི་ས་འབྲུག་སྤྱི་ལོ༡༨༠༨ལ་གོང་མའི་བཀའ་ལུང་ཕྱིར་ཕེབས་བྱུང་བསྟུན་པཎ་ཆེན་ཐམས་ཅད་མཁྱེན་པ་བསྟན་པའི་ཉི་མ་མཆོག་གི༨་ཡང་སྲིད་རིན་པོ་ཆེའི་དབུ་སྐྱེས་གཙུག་ཕུད་བཞེས་ཤིང་། སྐུ་ཡོན་འབུལ་བའི་ཡོངས་འཛིན་དུ་འོན་རྒྱལ་སྲས་སྤྲུལ་བའི་སྐུ་རིན་པོ་ཆེ་དང་དེ་མོ་རིན་པོ་ཆེ་གཉིས་བསྐོ་བཞག་གནང་སྟེ་སྐུ་བབ་དང་བསྟུན་པའི་གསན་བསམ་ལ་གཞོལ་བའི་དབུ་ཚུགས། དེ་ནས་རིང་མིན་སྔར་སྲོལ་ཆིབས་བསྒྱུར་ཆེ་མོའི་ཡོ་ལང་གཟབ་རྒྱས་དང་བཅས་ཕོ་བྲང་ཆེན་པོ་རྩེའི་གཟིམ་ཆུང་ཉི་འོད་དུ་ཞབས་སོར་འཁོད་ཅིང་། གཟའ་སྐར་ཕུན་སུམ་ཚོགས་པའི་ཉིན་གསེར་ཁྲི་མངའ་གསོལ་གྱི་མཛད་སྒོ་སྔར་ལུགས་ལྟར་གཟབ་རྒྱས་གནང་བ་དང་། བོད་རྒྱའི་ཆེ་རྒུ་མཐའ་དག་གིས་ལེགས་འབུལ་དང་གསོལ་སྟོན་རྒྱ་ཆེ་བ་གནང་བས་མཚོན་བོད་འབངས་ཐམས་ཅད་དགའ་བདེའི་གནས་སུ་འཁོད་པར་གྱུར།
རབ་བྱུང་བཅུ་བཞི་པའི་ལྕགས་རྟ་སྤྱི་ལོ༡༨༡༠ལ་རྒྱལ་ཚབ་རྟ་ཚག་རིན་པོ་ཆེ་བསྟན་པའི་མགོན་པོ་མཆོག་བསྙུན་རྐྱེན་གྱིས་སྐུ་གཤེགས་པ་གོང་མར་སྙན་ཞུ་དང་བསྟུན་ཡོངས་འཛིན་དེ་མོ་རིན་པོ་ཆེ་ཐུབ་བསྟན་འཇིགས་མེད་རྒྱ་མཚོ་སྲིད་སྐྱོང་དུ་བསྐོ་བཞག་གནང་ཞིང་། ཁོང་སྲིད་སྐྱོང་གི་ཁྲིར་ཕེབས་རྗེས་གཞུང་བསམ་ལྷག་མེད་ཀྱི་མཛད་འཕྲིན་བསྐྱངས་པ་དང་གཞུང་སའི་བསྟན་སྲིད་ཡར་རྒྱས་དང་མངའ་འབངས་བདེ་ཐབས་སོགས་ཀྱི་མཛད་བཟང་ཁོ་ན་སྤེལ་བ་ཡིན་འདུག སྔ་ལོར་རྒྱལ་ཚབ་རྟ་ཚག་རིན་པོ་ཆེ་མ་གཤེགས་གོང་རྩེ་ཕོ་བྲང་ཆེན་པོའི་ཤར་རྒྱུད་ཕོ་བྲང་ཁོངས་རྣམས་ཉམས་གསོ་མཛད་པ་ལེགས་པར་གྲུབ་ཐོག ལྷ་ལྡན་གཙུག་ཁང་ཡང་ཉམས་གསོ་བཅས་གནང་བས་མཚོན་བོད་ཀྱི་གཙུག་ལག་ཁང་དང་རིག་དངོས་རིན་པོ་ཆེ་སྲུང་སྐྱོང་བདག་གཅེས་ཀྱི་མཛད་བཟང་བསྐྱངས། རབ་བྱུང་བཅུ་བཞི་པའི་ཆུ་བྱ་སྤྱི་ལོ༡༨༡༣ལ་པཎ་ཆེན་ཐམས་ཅད་མཁྱེན་པ་མཆོག་གཙང་ནས་གདན་ཞུས་དང་འབྲེལ་དགའ་ལྡན་ཁྲི་ཆེན་ངག་དབང་སྙན་གྲགས་པས་གཙོས་དད་པའི་དགེ་འདུན་དཔོན་སློབ་བཅུ་ཕྲག་ལྷག་གི་དབུས་སུ་ཡང་སྲིད་རིན་པོ་ཆེ་ནས་དགེ་ཚུལ་གྱི་སྡོམ་པ་ཡང་དག་པར་བཞེས་ཏེ་ངུར་སྨུག་རྒྱལ་མཚན་སྒྲེང་བ་རྣམས་ཀྱི་གཙུག་རྒྱན་དམ་པར་གྱུར། དེ་ལྟར་ཡང་སྲིད་རིན་པོ་ཆེ་སྐུ་ན་ཕྲ་ཡང་སྐུ་ཡོན་གསན་བཞེས་ཀྱི་མཛད་སྤྱོད་མངོན་པར་ལེགས་པས་གངས་ཅན་བསྟན་འགྲོར་སྨན་པའི་གཙུག་ནོར་དུ་འགྱུར་བའི་རེ་བ་ཆེ་སྒང་། རབ་བྱུང་བཅུ་བཞི་པའི་ཤིང་ཕག་སྤྱི་ལོ༡༨༡༥ལ་བསྙུན་གཞིས་རྐྱེན་པས་དགུང་གྲངས་བཅུ་གཅིག་སྟེང་ཟིམ་ཁྲི་མཐའ་ཅན་གྱི་ཚུལ་བསྟན། དེ་ནས་གོང་མར་སྙན་ཞུ་གནང་བ་ལྟར་ཡོངས་འཛིན་སྲིད་སྐྱོང་དེ་མོ་རིན་པོ་ཆེ་རྒྱལ་ཚབ་ཏུ་དབང་བསྐུར་ཞིང་ཁོང་གིས་གཙོ་མཛད་དགོངས་རྫོགས་དང་གདུང་རྟེན་གསེར་སྡོང་གསར་བསྒྲུབས་དང་། ཡང་སྲིད་མྱུར་གསལ་གྱི་སྐྱབས་འཇུག་བཅས་ལེགས་པར་གནང་སྟེ་བོད་གངས་ཅན་གྱི་ཆོས་སྲིད་ཐམས་ཅད་ཀྱི་བྱེད་པོ་མཛད། སྐབས་འདི་དག་ལ་དབྱིན་ཇི་བཙན་རྒྱལ་རིང་ལུགས་པས་འཛམ་གླིང་ཡུལ་གྲུ་མང་པོར་བཙན་འཛུལ་བྱས་པར་བརྟེན་རྒྱ་གར་དང་བལ་ཡུལ་འབྲས་ལྗོངས་བཅས་སུ་དབྱིན་ཇིའི་སྟོབས་ཤུགས་སྤེལ་ཡོད་སྟབས། བོད་ལའང་མྱུལ་ཞིབ་པ་མངགས་པ་མ་ཟད་དབྱིན་ཇིས་བོད་ཀྱི་མཐའ་མཚམས་འབྲས་ལྗོངས་དང་གོར་ཁ་བཅས་ལ་དཔུང་འཇུག་བྱས་རྐྱེན།&nbs
