རྒྱལ་དབང་སྐུ་ཕྲེང་བརྒྱད་པའི་སྐབས་ཀྱི་གནས་ཚུལ།（གཉིས་པ）
རབ་བྱུང་བཅུ་གསུམ་པའི་ཤིང་སྦྲུལ་སྤྱི་ལོ༡༧༨༥ཙམ་ལ་བལ་བོའི་གོར་ཁ་རྒྱལ་པོས་བོད་ལ་བཙན་འཛུལ་བྱས་པས་གོར་བོད་བར་འཁྲུག་པ་ལངས་ཏེ་བོད་ཁའམ་ཡམ་བུ་དང་པར་ཏན། སྦག་གོན་ཞེས་བལ་བོའི་རྒྱལ་ཁབ་ཆེ་ཆུང་གསུམ་ཡོད་པ་ཚང་མས་བོད་དང་ཚོང་ཟོག་རྟེན་བཞེངས་ལ་སོགས་པའི་འབྲེལ་བ་ཤིན་ཏུ་ཆེ་ཞིང་། བལ་བོད་བར་ཡང་བལ་ཊམ་ཞེས་པའི་བལ་བོས་བཟོས་པའི་ཊམ་ཀའམ་རྒྱུག་དངུལ་བོད་དུ་འགྲོ་རྒྱུགས་ཡོད་བཅས་ཀྱིས་བོད་བལ་བར་འབྲེལ་མཐུན་ཟབ་པོ་ཡོད་པ་ལགས། རབ་བྱུང་བཅུ་གསུམ་པའི་ས་གླང་སྤྱི་ལོ༡༧༦༩ལ་གོར་ཁའི་རྒྱལ་པོས་བལ་ཡུལ་རྒྱལ་ཁག་གསུམ་མམ་བལ་ཡུལ་གླིང་གསུམ་དུ་གྲགས་པ་ཡོངས་རྫོགས་དཔུང་སྟོབས་ཀྱིས་གཅིག་གྱུར་བྱས་ཏེ་བལ་ཡུལ་དུ་གོར་ཥའམ་གོར་ཁ་ཞེས་པའི་རྒྱལ་རབས་གསར་དུ་བཙུགས། དེ་ནས་གོར་ཁའི་རྒྱལ་པོ་དག་རིམ་གྱིས་ཧམ་སེམས་ཇེར་ཆེར་སོང་སྟེ་འབྲས་ལྗོངས་དང་བོད་ཀྱི་མངའ་འོག་ས་ཆ་མང་པོ་འཕྲོག་པའི་བཙན་འཛུལ་གྱི་སྦྱོར་བ་བཤམས། དེའང་ཐོག་མར་རབ་བྱུང་བཅུ་གསུམ་པའི་ས་སྤྲེལ་སྤྱི་ལོ༡༧༨༨ལ་གོར་ཁའི་དམག་གིས་དཔུང་འཇུག་བྱས་ནས་གཙང་སྐྱིད་རོང་དང་གཉའ་ནང་རྫོང་ཁ་བཅས་བཙན་བཟུང་བྱས། དེར་བོད་དམག་དང་བོད་སྡོད་ཨམ་བན་བཅས་ཀྱིས་འགོག་རྒོལ་ཏོག་ཙམ་བྱས་ཀྱང་རྒྱའི་དམག་དཔོན་གྱིས་གོར་ཁའི་ལྐོག་དངུལ་ཟོས་པའི་རྐྱེན་ལས་ཞྭ་དམར་སྤྲུལ་སྐུ་བརྒྱུད་གོར་བོད་གྲོས་མོལ་ཡོང་བ་བྱས་ཐོག བོད་ནུས་མེད་ཀྱི་ཚུལ་ལ་གཞིགས་ནས་གོར་ཁས་བོད་ཀྱི་ས་ཆ་བཙན་བཟུང་ཡོད་པ་ཕྱིར་སྤྲོད་པར་ས་རིན་རྒྱལ་དངུལ་འབོར་ཆེ་བ་སྤྲོད་དགོས་པའི་ཆ་རྐྱེན་འོས་མེད་བཏོན་པ་རྣམས་ཁས་ལེན་བྱས་ཏེ། ལོ་གཅིག་ཙམ་གྱི་དངུལ་ཡང་སྤྲད་ཀྱང་ཕྱིས་སུ་བོད་གཞུང་དང་རྒྱལ་དབང་མཆོག་གིས་ཞལ་ལེན་མ་མཛད་པས། གོར་ཁས་སླར་ཡང་བཙན་འཛུལ་བྱས་པར་མ་ཟད་བོད་ཀྱི་བཀའ་བློན་རྡོ་རིང་བསྟན་འཛིན་དཔལ་འབྱོར་དང་མདའ་དཔོན་གཡུ་ཐོག་པ་བཀྲ་ཤིས་དོན་གྲུབ་གཙོས་པའི་བོད་རྒྱའི་དཔོན་རིགས་འགའ་བཅས་མི་ཚབ་ཏུ་གསོན་འཛིན་བཙན་ཁྲིད་བྱས་ཤིང་སྔར་ལས་ལྷག་པའི་དམག་ཤུགས་བཏང་སྟེ་གཙང་ཁུལ་གྱི་ས་ཆ་མང་པོ་བཟུང་ཐོག གཙང་བཀྲ་ཤིས་ལྷུན་པོའི་དགོན་དུ་འཕྲོག་བཅོམ་དང་བོད་མི་སེར་ལ་མནར་གཅོད་ཚད་མེད་བཏང་བ་དང་། པཎ་ཆེན་སྐུ་ཕྲེང་བདུན་པ་བསྟན་པའི་ཉི་མ་མཆོག་ལྷ་དར་ཕེབས་ཏེ་བྱོལ་བཞུགས་མཛད་དགོས་པ་སོགས་བྱུང་། གནས་ཚུལ་དེ་དག་གོང་མ་ཆན་ལུང་གིས་མཁྱེན་རྟོགས་བྱུང་རྗེས་བཀའ་ལུང་བཙན་པོས་སི་ཁྲོན་ཕྱོགས་ཀྱི་བོད་དམག་བཅས་དཔུང་ཚོགས་ཆིག་ཁྲི་བདུན་སྟོང་ལྷག་བཅས་བོད་དུ་བཏང་ནས་གོར་དམག་སྐད་ཅིག་ཉིད་ལ་ཕྱིར་བསྐྲོད་བཏང་ནས་སྔར་ཤོར་བའི་བོད་ཀྱི་ས་ཆ་ཐམས་ཅད་ཕྱིར་བླངས་པར་མ་ཟད། གོང་མའི་དམག་གིས་གོར་ཁའི་ཡུལ་དབུས་བར་དུ་དཔུང་འཇུག་བྱས་པས་གོར་དམག་རྣམས་ཕམ་ཉེས་ཚབས་ཆེན་བྱུང་བས་གོར་རྒྱལ་ཡང་དཔའ་ཞུམ་སྟེ། དེ་སྔོན་མི་ཚབ་ཏུ་བཙན་ཁྲིད་བྱས་པའི་དཔོན་རིགས་རྣམས་ཚུར་སྐྱེལ་གྱིས་ཞི་བའི་ཆིངས་མོལ་ཡོང་བའི་རེ་བ་བཏོན་ཐོག་གོར་ཁས་བོད་གཞུང་ལ་ལོ་རྒྱུན་གྱི་དཔྱ་ཁྲལ་དང་གོང་མར་འཚམས་ཞུ་མངགས་རྒྱུ་སོགས་ཁས་བླངས་པས་མཚོན། གཡུལ་ལས་རྣམ་པར་རྒྱལ་བའི་ངང་རྒྱུ་ནོར་ཟས་གསུམ་དང་ས་ཆ་མི་སྡེ་དང་བཅས་པ་ཚང་མ་ཕྱིར་ལེན་ལེགས་པར་མཛད་པས་མེས་རྒྱལ་གཅིག་གྱུར་དང་བོད་མཐའ་མཚམས་བདེ་འཇགས་བཅས་བཏང་སྟེ་བཙན་འཛུལ་པར་འོས་བབ་ཀྱི་རྡུང་རྡེག་དྲག་པོས་མ་རུངས་ཚུར་རྒོལ་རྣམ་ཚར་བཅད་ལ། ཐེབས་འདིའི་དམག་སཁྲུག་གི་གནས་ཚུལ་རྣམས་དང་གོང་མའི་བཀའ་ལུང་བཅས་ལྷ་སར་རྡོ་རིང་བསླངས་པ་ད་ལྟ་ཀླུ་རྫོང་རྒྱབ་ཏུ་ཡོད་པ་དེའོ།། ཡང་རེབ་འདིའི་གོར་བོད་དམག་འཁྲུག་གི་རྒྱུ་རྐྱེན་ལ་གཅིག་ན་བོད་བལ་བར་དུ་འགྲོ་རྒྱུག་བདེ་སྤྱོད་བཞིན་པའི་གོར་ཊམ་གསར་རྙིང་དང་ལྷད་རྫུན་བཟོས་པའི་དོན་རྐྱེན་དང་། གཉིས་སུ་བོད་བལ་ས་འབྲེལ་ཡུལ་གྲུའི་ཚོང་ཟོག་དཔྱ་ཁྲལ་བསྡུ་ལེན་གྱི་ཁ་མཆུ་རྩོད་པ་དང་། གསུམ་དུ་ཞྭ་དམག་སྐུ་འཕྲེང་བཅུ་པ་ཆོས་གྲུབ་རྒྱ་མཚོས་ནང་རུལ་བྱས་པའི་རྐྱེན་ཡིན་ཟེར་བ་དོན་དངོས་ནི་གོར་རྒྱལ་གྱི་ང་རྒྱལ་ཁེངས་དྲེགས་དང་ས་མཐའི་བླུན་རྗེའི་རང་མཚང་མངོན་དུ་ཕྱོགས་ཏེ་བོད་དང་གོང་མའི་མངའ་ཞབས་ཀྱི་ས་ཆར་བཙན་འཛུལ་བྱེད་རྒྱུའི་ཧམ་སེམས་ཀྱི་རླུང་གིས་གོར་དམག་ཕྱེ་མ་ལེབ་རྒན་རྣམས་འཁྲུག་ཆེན་མར་མེའི་འོད་ལ་ལྕེབ་ཏུ་བཅུག་པ་གདན་མི་ཟའོ།།
ཡང་ཀརྨ་ཞྭ་དམར་བའི་སྐུ་འཕྲེང་སྔ་མ་རྣམས་ཀྱང་དགེ་ལུགས་པར་སྡང་བར་བྱས་ལ་སྐུ་འཕྲེང་འདི་པ་ནི་པཎ་ཆེན་སྐུ་ཕྲེང་དྲུག་བའི་གཅུང་དུ་གཏོགས་ནའང་གཅེན་པོའི་རྒྱུ་ནོར་ལ་རྔམས་པའམ་གང་ལྟར་ཕྱི་གྱོད་ནང་འདྲེན་བྱས་པ་ཡིན་འདུག་པས། གོར་བོད་དམག་འཁྲུག་བརྒྱབ་ནས་གོར་ཁ་ཕམ་རྗེས་རང་ཉིད་ཀྱང་ནོངས་འགྱོད་ཀྱིས་རང་སྲོག་བཅད་པར་བཤད་ལ་དེ་ནས་བཟུང་བོད་གཞུང་དང་ཆིན་གོང་མས་ཀརྨ་ཞྭ་དམར་བའི་སྐུ་སྐྱེས་ངོས་འཛིན་མི་ཆོག་པ་བྱས་སོ།། ཡང་གོར་བོད་དམག་འཁྲུག་འདི་བོད་ཀྱི་ལོ་རྒྱུས་སྟེང་གི་ཚིག་ཚོགས་མང་པས་འབྲིར་མི་ལང་བས་ཤེས་འདོད་དག་གིས་གཞན་ལ་གཟིགས་པར་ཞུའོ།།
དེ་ལྟར་སྐབས་དེ་དག་ལ་བོད་དུ་ཕྱི་དགྲ་མང་དག་ནང་བུ་བྱུང་སྟབས་ཐོག་མར་ཕྱིའི་དགྲ་བོ་གོར་ཁའི་བཙན
