དགའ་ལྡན་ཕོ་བྲང་གི་སྐབས་སུ་ཁྲིམས་ཡིག་གཏམ་འབེབས་བྱས་པའི་སྐོར།

  ཏྰ་ལའི་བླ་མ་སྐུ་ཕྲེང་ལྔ་བ་དང་ཕྱག་མཛོད་བསོད་ནམས་རབ་བརྟན།  སོག་པོ་གུ་ཤྲི་ཧན་སོགས་ཀྱིས་གཙང་ཕམ་པར་བྱས་ཏེ་དགའ་ལྡན་ཕོ་བྲང་གི་སྲིད་གཞུང་གསར་དུ་བཙུགས་པ་དང་།  སྲིད་དབང་སྲ་བརྟན་གྱི་ཆེ་དུ་ཏྰ་ལའི་བླ་མས་ཁྲིམས་ཡིག་ཞལ་ལྕེ་བཅུ་གསུམ་ཞེས་པ་ཞིག་ཁྱབ་བསྒྲགས་གནང་འདུག་ཀྱང་དོན་དུ་གཙང་སྡེ་སྲིད་ཀྱི་ཁྲིམས་ཡིག་ཞལ་ལྕེ་བཅུ་དྲུག་དང་གཅིག་པར་སྣང་བས་འདིར་མ་བཀོད།  དེའི་རྗེས་སུ་གནས་དུས་ཀྱི་དགོས་མཁོ་དང་བསྟུན་ནས་སྡེ་སྲིད་སངས་རྒྱས་རྒྱ་མཚོས《བླང་དོར་གསལ་བར་སྟོན་པའི་དྲང་ཐིག་དྭངས་ཤེལ་མེ་ལོང》ཞེས་པ་ཞིག་རྩོམ་སྒྲིག་མཛད་ཡོད་པ་དང་།  འདིར་ཁྲིམས་ཡིག་དེ་ལ་དོན་ཚན་ཉེར་གཅིག་ཡོད་པ་དེའི་དོན་ཚན་སོ་སོ་མདོར་གསལ་དུ་དགོད་པར་བྱའོ།།

དང་པོ།  སྲིད་སྐྱོང་བའི་ས་སྐྱོང་དེའི་བྱ་གཞག་གི་གཙོ་བོ།  གཉིས་པ།  ལས་ཚན་བཅུ་གསུམ་གྱི་འོས་འགན་སྐོར།  གསུམ་པ།  བློན་པོའམ་ཕྱིང་སང་དུ་གྲགས་པའི་འོས་འགན།  བཞི་བ།  དམག་དཔོན་དང་མདའ་དཔོན་གཉིས་འཐུས་ཤོར་གྱི་འོས་འགན།  ལྔ་བ།  ཁྲིམས་ཀྱི་ཞལ་ལྕེ་གཅོད་པའི་སྔོན་དུ་ཞིབ་བཤེར་བྱེད་རྒྱུའི་འོས་འགན།  དྲུག་བ།  མགྲོན་གཉེར་གྱི་འོས་འགན།  བདུན་པ།  དྲུང་ཡིག་གི་འོས་འགན།  བརྒྱད་པ།  དངོས་རྫས་བདག་གཉེར་བྱེད་སྟངས་ཀྱི་སྐོར།  དགུ་བ།  རྒྱལ་པོའི་བྱ་བཞག་ཕྲ་ཞིབ་ཐམས་ཅད་རྩིས་ཀྱི་གཏན་ལ་འབེབས་དགོས་པའི་སྐོར།  བཅུ་བ།  རྟ་མཛོའི་དཔོན་གྱིས་བགྱིད་པའི་རིམ་པ།   བཅུ་གཅིག  རྩེ་ཞོལ་ལྷ་སས་མཚོན་པའི་ཉེ་སྐོར་གྱི་གཉེར་བ་དང་།  མི་དཔོན་བཅས་ཀྱིས་བགྱིད་འོས་ཀྱི་རིམ་པ།  བཅུ་གཉིས།  གསོལ་གཟིམས་ཕྱག་ཚང་པས་མཚོན་པའི་ནང་སྐོར་གྱི་བགྱི་བ།  བཅུ་གསུམ།  བཟོ་རིགས་འུ་ལག་དང་བཅས་པའི་དོ་དམ་པའི་བགྱི་བ།  བཅུ་བཞི།  སྡོམ་གཅོད་པའམ་འགག་པ་རྣམས་ཀྱི་འོས་འགན་སྐོར།  བཅོ་ལྔ།  དཀོར་གཉེར་དུ་གཏོགས་པ་རྣམས་ཀྱིས་བགྱི་པའི་འོས་འགན།  བཅུ་དྲུག  བྱང་རིགས་ཀྱི་རྡ་རོ་ཁ་དང་།  རྩྭ་ཤིང་།  ཁང་པ།  གདན་སོགས་ཕྲན་ཚེགས་ཀྱི་གཉེར་པའི་འོས་འགན།  བཅུ་བདུན།  ཕྱོགས་སུ་མངགས་པའི་ཚོང་དཔོན་དང་གསེར་ཡིག་པའི་འོས་འགན།  བཅོ་བརྒྱད།  ཡོང་སྡུད་པའི་རིམ་པའི་སྐོར། 

བཅུ་དགུ།  བཀར་རྒྱ་ཉིས་གཤོར་བགྱི་བའི་རིམ་པ།  ཉི་ཤུ་བ།  རྫོང་སྒོ་སོ་སོའི་རྫོང་སྡོད་ཀྱི་དཔོན་པོ་དག་གིས་བསྲུང་བྱ་དང་བསྒྲུབ་བྱ་གང་དང་གང་གཏན་འབེབས་བྱས་པའི་སྐོར།  ཉེར་གཅིག  གཞིས་གཉེར་གྱིས་བགྱིད་དགོས་པའི་རིམ་པ་སོགས་ཀྱི་རྩ་ཁྲིམས་སམ་ཤེས་བྱ་གཏན་འབེབས་བྱས་པ་ཞིག་ཡིན།  ཁྲིམས་ཡིག་འདིའི་ནང་དོན་ཞིབ་ཏུ་ཤེས་འདོད་ཡོད་པ་རྣམས་ཀྱིས་《དྭངས་ཤེལ་མེ་ལོང་》ཉིད་ལ་གཟིགས་ན་འཐུས་ཀྱང་།  སྡེ་སྲིད་སངས་རྒྱས་རྒྱ་མཚོ་ལྟ་བུ་ཆོས་སྲིད་གཉིས་ཀ་ལ་ཤིན་ཏུ་མཁས་པ་ཞིག་གིས་ཁྲིམས་ཡིག་འདི་ལྟ་བུ་ཞིག་བརྩམས་ཞེས་པ་ནི་ཡིད་ཆེས་དཀའ་འོ།།

བོད་ཀྱི་ལོ་རྒྱུས་སྤྱི་དོན་པདྨ་རཱ་གའི་ལྡེ་མིག་ལས།