རྒྱལ་དབང་དྲུག་པ་ཆེན་པོའི་མཛད་པ་མདོར་བསྔུས།
རྒྱལ་བ་སྐུ་འཕྲེང་དྲུག་པ་ནི་བློ་བཟང་རིན་ཆེན་ཚངས་དབྱངས་རྒྱ་མཚོ་ཡིན་ལ། ཀུན་གྱིས་མཁྱེན་གསལ་ལྟར་རྒྱལ་དབང་ལྔ་པ་ཆེན་པོ་སྐུ་གཤེགས་པ་དུས་ཡུན་རིང་པོར་གསང་རྒྱ་བྱེད་སྟབས་ཡང་སྲིད་འདི་པའི་ངོས་འཛིན་ཡང་གསང་སྟབས་ངང་བགྱིས་པ་ཡིན་ཏེ། རབ་བྱུང་བཅུ་གཅིག་པའི་ཆུ་ཁྱི་སྤྱི་ལོ༡༦༨༢ལ་རྒྱལ་དབང་ལྔ་པ་དགུང་གྲངས་རེ་དྲུག་སྟེང་སྐུ་གཤེགས་ཤིང་འདས་ཁར་སྡེ་སྲིད་སངས་རྒྱས་རྒྱ་མཚོར་ཆོས་སྲིད་ལུགས་གཉིས་གྱི་བྱ་བ་བྱེད་ཚུལ་དང་བོད་ཀྱི་ལ་རྒྱ་སྐྱོང་ལུགས། རྒྱ་སོག་གིས་གཙོས་པའི་ཡོན་བདག་གི་སྣེ་ལེན་དང་བཅས་པར་བསླབ་སྟོན་ཞིབ་པར་བསྩལ་ཐོག སྡེ་སྲིད་ཀྱིས་ཡང་སྲིད་མྱུར་ཕེབས་གྱི་ཞུ་ནན་ལྕི་བའི་ལན་དུ་རེ་ཞིག་གསང་རྒྱའི་ངང་བྱ་བ་ཆེ་ཕྲ་ཐུགས་བློས་མ་ཆོད་པ་མཐའ་དག་ལྷ་མོར་བརྟག་སྒྲིལ་གྱིས་སྡེ་སྲིད་རང་ཉིད་ནས་བསྟན་སྲིད་དང་བོད་འབངས་བདེ་ཐབས་ཀྱི་སླད་དུ་རྒྱལ་དབང་མཆོག་གིས་བགྱིད་པ་ལྟར་སྒྲུབ་དགོས་པའི་ཞལ་ཆེམས་ཀྱི་བཀའ་ནན་ལྕི་བོ་སྡེ་སྲིད་མཆོག་གི་སྤྱི་བོར་བབས་པར་གྱུར། དེ་ནས་རྒྱལ་དབང་མཆོག་སྐུ་གཤེགས་རྗེས་སྡེ་སྲིད་དང་འཁོར་རྣམས་ཀྱིས་གསང་རྒྱ་ཡུན་ཇི་ཙམ་རིང་མཛད་རྒྱུའི་སྐོར་ལ་གདུང་གདུན་དུ་བརྟག་སྒྲིལ་ཕུལ་བས་སྤྲུལ་སྐུ་གདན་འདྲེན་བར་ཟེར་བ་བབས་པ་ལྟར་ལོ་ངོ་བཅོ་ལྔའི་རིང་གསང་རྒྱ་གནང་དགོས་བྱུང་བ་ཡིན་འདུག དེའི་རིང་སྡེ་སྲིད་ཀྱིས་ཐོག་མར་ཞབས་བརྟན་སྒྲུབ་པའི་ཟོལ་གྱིས་དགོངས་རྫོགས་སོགས་ལེགས་པར་བསྒྲུབས་པ་དང་ཆབས་ཅིག ཡང་སྲིད་ངོས་འཛིན་གྱི་བྱ་བ་རྣམས་ཀྱང་མ་བསླུས་པར་ལུགས་མཐུན་ལྟར་བསྒྲུབས་པ་ཡིན་ཏེ། རྒྱལ་བ་དྲུག་པ་ཚངས་དབྱངས་རྒྱ་མཚོ་ནི་ལྷོ་ཁ་མཚོ་སྣ་རྫོང་ཁོངས་མོན་ལ་འོག་ཡུལ་གསུམ་བྱ་བར་ཡབ་བཀྲ་ཤིས་བསྟན་འཛིན་དང་ཡུམ་ཚེ་དབང་ལྷ་མོ་གཉིས་ཀྱི་སྲས་སུ་རབ་བྱུང་བཅུ་གཅིག་པའི་ཆུ་ཕག་སྤྱི་ལོ༡༦༨༣ལ་སྐུ་འཁྲུངས། དགུང་ལོ་གསུམ་ཙམ་ན་ཡང་སྲིད་ཡིན་ལུགས་ཀྱི་གཏམ་མོན་ཡུལ་དུ་གྲགས་ཆེ་བར་བརྟེན་སྔེ་སྲིད་སངས་རྒྱས་རྒྱ་མཚོས་རྒྱལ་དབང་ལྔ་བའི་དབུ་བླ་ཞ་ལུ་མཁན་ཆེན་ནམ་སྡིངས་པོ་ཆེའི་ཡང་སྲིད་དུ་དོགས་གནས་ཡོད་ཁུལ་གྱིས་སྤྲུལ་སྐུ་བདག་གཅེས་དགོས་པའི་བརྡ་མཚོན་དུ་བྱིན་རྟེན་བཅས་གནང་ནས་མཚོ་སྣར་གདན་འདྲེན་དགོས་ཚུལ་གྱི་བཀའ་ལྟར། རབ་བྱུང་བཅུ་གཅིག་པའི་ཤིང་གླང་སྤྱི་ལོ༡༦༨༥ལ་མཚོ་སྣ་རྫོང་དུ་གདན་དྲངས་ཐོག་སྡེ་སྲིད་མཆོག་ནས་ཡབ་ཡུམ་བཅས་ལ་བསྐུར་གཟོས་དགོས་ཚུལ་གྱི་བཀའ་ཡིག་སྔ་ཕྱི་ལན་གསུམ་བསྩལ་རུང་སྐུ་གོང་མའི་ཞང་པོའི་ལོག་མཐོང་གིས་རྫོང་སྡོད་གཉིས་བསླུས་པས་ཞབས་ཏོག་སོགས་ལེགས་པར་མ༌ཞུས་ནས་ལོ་འགར་སྐུ་མཉེལ་ཆེན་པོ་བྱུང་བར་གྲགས། དེ་ནས་སྡེ་སྲིད་ཀྱིས་ཡང་སྲིད་ལེགས་པར་བརྟག་དཔྱད་མཛད་སླད་ཆོས་རྗེ་ཟིལ་གནོན་རྡོ་རྗེ་དང་རྡོ་བ་བསོད་ནམས་རྒྱལ་མཚན་གཉིས་རབ་བྱུང་བཅུ་གཅིག་པའི་མེ་སྟག་སྤྱི་ལོ༡༦༨༦ལ་ཆེད་གཏོང་གིས་མཚོ་སྣར་མངགས་ཏེ་མངོན་ཆུང་བརྟག་དཔྱད་ངོས་འཛིན་ཞུས་པར་ཡིད་ཆེས་གསལ་བོར་རྙེད་ཐོག སྡེ་སྲིད་མཆོག་ནས་ཀྱང་བླ་ལྷར་གསང་ལུང་དང་ཟན་བརྟག་བཅས་རྩེ་མཐུན་བཟང་ཕེབས་བྱུང་བར་བརྟེན་སྐུ་བཅར་དགེ་འདུན་གཉིས་དང་ཕྱག་གཡོག་གཉིས་ནང་གཟན་གཉིས་བཅས་རྒྱུན་འཇོག་གནང་ཐོག ཆོས་སྤྱོད་སོགས་ཀྱང་ཐུགས་འཛིན་གནང་དབུ་ཚུགས། དགུང་ལོ་བརྒྱད་དགུ་ནས་ཕྱག་རྩོམ་ཀྱང་ཐོལ་བྱུང་དུ་མཛད་པར་གྲགས་ཤིང༌། རབ་བྱུང་བཅུ་གཉིས་པའི་མེ་གླང་སྤྱི་ལོ༡༦༩༧ལ་སྣ་དཀར་རྩེའི་བསྟན་འཛིན་ཕོ་བྲང་དུ་ཞབས་སོར་འཁོད་དེ་པཎ་ཆེན་སྐུ་འཕྲེང་ལྔ་བ་བློ་བཟང་ཡེ་ཤེས་དང་མཇལ་འཛོམས་ཀྱིས་རབ་བྱུང་གི་སྡོམ་པ་ལེགས་པར་བཞེས། དེ་ནས་མི་རིང་བར་སྙེ་ཐང་བརྒྱུད་ལྷ་ལྡན་དུ་ཞབས་སོར་འཁོད་དེ་གསང་རྒྱ་ཁྱབ་བསྒྲགས་དང་བསྟུན་བོད་ཟླ་བཅུ་པའི་ཚེས་ཉེར་ལྔའི་དུས་བཟང་ཉིན་གྲུ་འཛིན་གཉིས་པ་གངས་ལྗོངས་ཆོས་སྲིད་ཀྱི་ལྟེ་གནས་ཕོ་བྲང་ཆེན་པོ་པོ་ཏ་ལའི་ཚོམས་ཆེན་སྲིད་ཞི་ཕུན་ཚོགས་སུ་རྒྱལ་བའི་གསེར་ཁྲིར་མངའ་གསོལ་གཟབ་རྒྱས་མཛད།
རབ་བྱུང་བཅུ་གཉིས་པའི་ས་སྟག་སྤྱི་ལོ༡༦༩༨ནས་བཟུང་འབྲས་སྤུངས་སོགས་སུ་ཆོས་འབྲེལ་གྱི་ཐོག་མར་ལྗགས་ལུང་གནང་བ་དང་རིགས་ལམ་གསན་བཞེས་ཀྱི་དབུ་ཚུགས། པཎ་ཆེན་བློ་བཟང་ཡེ་ཤེས་གཙོས་པའི་ཡོངས་འཛིན་དུ་མ་བརྟེན་ནས་སྔགས་ཕྱོགས་གྱི་དབང་རྗེས་གནང་དང་རྒྱུད་ཀྱི་བཤད་པ་སྐྱེད་རྫོགས་ཀྱི་ཁྲིད། མདོ་སོགས་གྱི་ལུང་དང་ལམ་ཁྲིད་བཤད་ལུང་སོགས་གསན་བཞེས་མཛད་པར་མ་ཟད། ས་དགེ་རྙིང་གསུམ་གྱི་བླ་མ་ཚད་ལྡན་མང་པོ་ལས་མདོ་སྔགས་ཀྱི་ཆོས་ཚུལ་མང་པོར་གསན་བསམ་ལེགས་པར་གནང༌། སྡེ་སྲིད་མཆོག་ནས་ཀྱང་སྐུ་ཡོན་གསན་བསམ་སྐོར་ལ་བཀའ་ནན་གྱིས་དོ་དམ་གང་ཆེ་མཛད་ཐོག སྡེ་སྲིད་སྐུ་དངོས་ཀྱིས་ཆོས་སྲིད་དང་ཤེས་བྱའི་གནས་ཀུན་ལ་མཁས་པའི་ཕུལ་དུ་ཕྱིན་པར་ཕན་ནུས་ཆེན་པོ་ཐོན་པའི་ཐུགས་འཁུར་གནང་ཞིང༌། གཞན་ཡང་དགེ་བའི་བཤེས་གཉེན་དུ་མ་ལས་མཚན་ཉིད་དང་སྙན་ངག་རྩིས་སོགས་ལའང་གསན་བསམ་མཛད་པ་བཅས་ལ་འབྲས་རྟགས་བཟང་པོ་ཐོན་པར་བཤད། ཡང་དེང་སང་ལ་ལས་རྒྱལ་བ་འདི་པས་མགུར་གླུ་བརྩམས་པར་འུད་བསྟོད་ཀྱི་ཆེད་དུ་ཁོང་ནི་ཆུང་དུས་ནས་ངལ་རྩོལ་མི་དམངས་ཀྱི་ཁྲོད་དུ་བཞུགས་སྟབས་འདི་འདྲའི་རྩོམ་རིག་མཛད་ཅེས་པ་སོགས་ཀྱི་བཤད་ཚུལ་གང་མང་ཞིག
