སྔོ་ཚ་ཆོས་སྐུའི་མཛད་རྣམ་རགས་རིམ་ཙམ་བཀོད་པ།

        སྔོ་ཚ་ཆོས་སྐུ་ནི། རྔོག་ཞེ་སྡང་རྡོ་རྗེའི་བརྒྱུད་འཛིན་གྱི་དངོས་སློབ་ཆེད་དུ་འཕགས་པའི་རིམ་གཉིས་ཀྱི་རྣལ་འབྱོར་པ་ཞིག་ཡིན་ཡང་། ཁོང་གི་རྣམ་ཐར་འཁོད་པའི་ཆོས་འབྱུང་དང་ལོ་རྒྱུས་དེ་སྔར་མཇལ་སྐལ་དུ་མེད་པས། འདི་ཡང་ལོ་རྒྱུས་ཀྱི་སྟོང་ཆ་ཞིག་མིན་ནམ་སྙམ་སྟེ། ད་ཐེངས་ཕྲན་གྱིས་དམ་པ་ཁོང་གིས་མཛད་པའི་སྙིང་པོ་ཀྱཻ་རྡོ་རྗེ་རིན་པོ་ཆེའི་རྒྱན་དང་འདྲ་བའི་བཤད་པ་ཞེས་པའི་ཆོས་མཆོག་འདིར་མཇལ་བའི་སྐབས་དང་བསྟུན་ནས། ཡིག་ཆ་དག་ལ་ཁོང་གི་མཚན་ཙམ་འཁོད་པ་རྣམས་གུང་བསྒྲིགས་ཏེ་ས་དཔྱད་མ་སྟོང་ཙམ་གྱི་རྣམ་ཐར་ཞིག་འབྲི་བའི་ཁུལ་དུ་བླངས་པ་ཡིན།
རྣམ་ཐར་དངོས།         དེ་ཡང་ལྷོ་རོང་ཆོས་འབྱུང་ལས། “མདོ་སྡེའི་སློབ་མ་སྔོ་ཚ་ཆོས་སྐུ། རྔོག་ལུགས་ཚང་བར་བྷོ་དེ་ཨ་སེང་ལས་ཆད་པར་ཡོད། དེས་ཕག་མོ་གྲུ་པ༼༡༡༡༠-༡༡༧༠༽འམ༼པའི་སློབ་མ༽གླིང་རས༼འབྲུག་པ་བཀའ་བརྒྱུད་ཀྱི་སྲོལ་གཏོད་པ་པོ་གླིང་རས་པདྨ་རྡོ་རྗེ། ༡༡༢༨-༡༡༨༨༽ དེས་རྒྱ་རས༼འགྲོ་མགོན་གཙང་པ་རྒྱ་རས་པ་ཡེ་ཤེས་རྡོ་རྗེ།༡༡༦༡-༡༢༡༡༽། དབོན་བྱང་ཆུབ། མེར་འགོ་བ་ནས་སངས་རྒྱས་དབོན། ཡང་གཙང་པ་རྒྱ༼རས༽། དེས་དབོན་བྱང་ཆུབ། དེས་འཛིན་སྟོན་རྣལ་འབྱོར་ལ། དེས་རྗེ་བཙུན་སངས་རྒྱས་དབོན་ལ་ཀྱེ༼ཀྱཻ༽རྡོར་ལུགས་དང་། དུད་སོལ་མའི་སྐོར་རྣམས་རིམ་པ་ལྟར་བརྒྱུད་ནས་ད་ལྟ་བར་མ་ཆད་པར་ཡོད། རྒྱ་ཚ་རྡོ་སེང་དང་། ཆོས་སྐུ་གཉིས་ཀ་ལས་སྔོ་ཚ་དཀོན་མཆོག་དཔལ་ནས་དྲན་སྟོན་མཐའ་བྲལ། དྲན་སྟོན་ཤེས་རབ། མན་ལུང་གུ་རུ། མན་ལུང་ཀུན་མཁྱེན་ནས་བརྒྱུད་ཅེས་”རྔོག་ལུགས་དགྱེས་རྡོར་གྱི་བརྒྱུད་མ་ཆད་པ་ལེགས་པར་དར།         གཙང་གི་བནྡེ་སྔོ་ཚ་ཆོས་སྐུ་ཁོང་གིས་མཛད་པའི་གསུང་ཆོས་རྔོག་གི་ཆོས་སྐོར་ཞེས་པའི་དེབ་ཕྲེང་གི་ནང་དུ་ད་སྐབས་བཞུགས་པ་སྙིང་པོ་ཀྱཻ་རྡོ་རྗེ་རིན་པོ་ཆེའི་དྲ་བའི་བཤད་པ་ཞེས་པའི་པོད་གཅིག་ཡོད་པ་དང་། གཞུང་འདི་བརྩོམས་པའི་དགོས་པ་ནི། དེ་ཡང་གཞུང་འདིའི་རྩ་བའི་དམ་བཅའི་སྐབས་སུ། སྙིང་པོའི་རྒྱུད་རྒྱལ་དགྱེས་པ་རྡོ་རྗེ་ལ། །མཚོ་སྐྱེས་མིང་བཟང་ཤཱནྟི་ལ་སོགས་པའི། །གྲུབ་ཐུབ་མཁས་སུ་དེ་དང་མཁས་ལས་ཀྱང་། །འདི་དོན་ཕྱོགས་རེ་ཙམ་ལས་མ་རྟོགས་པས། །བླ་མའི་མན་ངག་ཉི་མའི་འོད་འདྲ་འདིས། །འགྲེལ་པ་སྐར་མ་ཟླ་འོད་ནུབ་པར་བྱས། །དེ་ཕྱིར་སློབ་མ་མཆོག་གིས་གསོལ་བཏབ་ནས། །རིན་ཆེན་རྒྱན་འདྲ་ཚིག་གི་རྒྱན། །ཞེས་གསུངས་པ་ལྟར་དེ་ཡང་རྗེ་ལྷོ་བྲག་པས། རྒྱུད་དགྱེས་པ་རྡོ་རྗེ་མ་གཏོགས་པ་་་་ཞེས་རྗེ་མར་པའི་རྒྱུད་ཆེན་བཅུ་གསུམ་ལས་ཁྱད་དུ་འཕགས་པ་འདི་ཉིད་ཀྱི་བརྒྱུད་འཛིན་པ་གཙོ་བོར་རྔོག་སློབ་བརྒྱུད་དང་བཅས་པ་ཡིན་ཞིང་། བླ་མའི་མན་ངག་ཉི་མའི་འོད་འདྲ་འདིས། །འགྲེལ་པ་སྐར་མ་ཟླ་འོད་ནུབ་པར་བྱེད། །ཅེས་གསུངས་པར་ལྟར་སྐབས་དེར་དགྱེས་རྡོར་རྔོག་ལས་བརྒྱུད་པ་འདི་ཉིད་ཁུངས་བཙུན་ཞིང་འགྲེལ་བཤད་ཧ་ཅང་ལེགས་པས། བརྒྱུད་ཚུལ་གཞན་དང་འགྲེལ་བཤད་གཞན་པ་དག་བག་ལ་ཁུམ་པ་ལྟར་བྱས་པས་གངས་རིའི་ལྗོངས་སུ་རྒྱུད་བཤད་འདི་ཉིད་ཉི་འོད་ལྟར་གསལ་བར་སྣང་། དེ་ལྟ་བུའི་ཁུངས་བཙུན་ཞིང་བརྒྱུད་ཚུལ་ལེགས་པ་འདི་ཉིད་བཤད་སྒྲོས་གཞན་གྱིས་མ་ལྷད་པའི་སྒོ་ནས་སློབ་མ་མཆོག༼བྷོ་དེ་ཨ་སེང་དང་སྔོ་ཚ་དཀོན་མཆོག་དཔལ༽གིས་གསོལ་བ་བཏབ་པ་བཞིན་ཁོང་གིས་མཛད་པར་གསལ། ཕྲན་གྱིས་བལྟས་པའི་དཔེ་ཆ་དེ་ནི་འབྲས་སྤུངས་གནས་བཅུ་ལྷ་ཁང་ནས་ཐོན་པའི་དབུ་མེད་ཕྱག་བྲིས་སྐྱར་པར་མ་དེ་ཡིན་ཞིང་། བསྡོམས་པས་ལྡེབ་མ་༩༩ཡོད། འདིའི་ཡིག་གཟུགས་ལ་བལྟས་ན་གསང་ཕུའི་ཡིག་གཟུགས་སམ་དེ་ལས་བྱུང་བའི་འབྲི་ཚུགས་ཤིག་མིན་ནམ་སྙམ། བསྟན་བཅོས་འདིའི་མཇུག་བྱང་དུ་“ཆོས་སྨྲ་བའི་བཙུན་པ་ཞང་གི་བན་དྷེ་རྡོ་རྗེ་དབང་ཕྱུག་བདག་གི་ཐུགས་དམ་གྱི་ཕྱག་དཔེ་ལགས་སོ”ཞེས་མཆན་གྱི་ཚུལ་དུ་བྲིས་མཛད་འདུག་ཀྱང་། ཁོང་གིས་ཆོས་འདིའི་བརྒྱུད་པ་བགྲང་སྐབས་སྔོ་ཚ་ཆོས་སྐུ་ལས་བརྒྱུད་ཚུལ་བྲིས་མི་འདུག །འདིའི་ནང་དུ་ཁ་སྐད་དང་བརྡ་རྙིང་ཧ་ཅང་མང་བར་མ་ཟད་བརྡ་སྤྲོད་ཀྱི་འགྲོ་ལུགས་མི་མཐུན་པ་ཁ་ཤས་འདུག་པ་ལས། མཚོན་དོན་ཙམ་བཀོད་ན། གཞུང་དེ་ཉིད་ལས“ཤེས་རབ་ཆེ་བ༡༼ཞིག༽བཞུགས”ཞེས་པ་སོགས་ཚིག་ཕྲད་ཅིག་དང་ཞིག །ཤིག་གསུམ་འཇུག་ཡུལ་རྗེས་འཇུག་ལ་མི་ལྟོས་པ་ཁྱད་མེད་དུ་༡འདི་ཁོ་ན་བྲིས་འདུག །ཡང་དེ་ཉིད་ལས་“སློབ་དཔོན་ལ་མ་འདལ༼མཎྜལ༽ཕུལ་ཞིང་གདོང་གཡོགས་བཅིངས་ཏེ་ཡོལ་བའི་ནང་དུ་བཅུག་སྟེ་དལ༼དཀྱིལ་འཁོར༽གྱི་སྒོ་བཞི་ལས་འཇུག་པ་བྱ་”ཞེས་མཎྜ་ལ་མ་འདལ་དང་དཀྱིལ་འཁོར་ལ་དལ་དང་ད་ལ་ཅི་རིགས་བྲིས་འདུག །
        གསུང་ཆོས་འདི་ནི་སྔོན་གྱི་སྐྱེས་ཆེན་རྣམས་ཀྱིས་བསྟན་བཅོས་རྩོམ་ཚུལ་ལྟར་ཀླད་ཀྱི་དོན་དང་གཞུང་གི་དོན། མཇུག་གི་དོན་ཏེ་དོན་ཚན་གསུམ་གྱི་ཁོངས་སུ་གཏོགས་ཤིང་། ཀླད་ཀྱི་དོན་ལ་དང་པོ་གཞུང་འདིའི་བླ་མ་བརྒྱུད་པའི་རིམ་པ་དང་འབྲེལ་ཏེ་རང་ཉིད་ལས་འཕྲོ་བཟང་པོའི་མཐུ་དང་བསོད་ནམས་བསགས་པའི་སྟོབས་ལས། ཆེར་དུ་འཕགས་པའི་ཆོས་མཆོག་འདི་ཉིད་ཐུབ་ཚུལ་དང་། རྒྱུད་འདིའི་སྟོབས་ལས་བདག་གཞན་ཀུན་གྱིས་ཟག་མེད་ཀྱི་དོན་རྟོགས་ནས་འགྲོ་བའི་དེད་དཔོན་འགྱུར་བའི་ཐུགས་སྨོན་གནང་ཡོད། དེ་ནས་མཆོད་བརྗོད་དང་། དེ་ནས་རྒྱུད་ཀྱི་ཆེ་བ་དང་འབྲེལ་ཏེ་རྩོམ་པ་དམ་བཅའ་མཛད་ཡོད། དེ་ནས་རྒྱུད་ཀྱི་རྒྱལ་པོ་དཔལ་དགྱེས་པ་རྡོ་རྗེ་འདི་ཉིད་རྒྱུད་གང་གཏོགས་ངོས་བཟུང་བ་དང་། ཕུན་སུམ་ཚོགས་པའི་གླེང་གཞི་བསྟན་པ། སྡུད་པ་པོ་གང་གིས་བསྡུས་པ། མི་ཡུལ་དུ་སུས་གདན་དྲངས་པ། རྒྱུད་འདི་ཕྱིན་ཅི་མ་ལོག་པ་སུས་ཤེས་ཚུལ། རྒྱུད་ཀྱི་བསྡུས་པའི་འཐད་པ་དང་དྲུག་བཤད་ཅིང་། དེ་ནས་གཞུང་དངོས་ལ་བརྟག་པ་དང་པོ་ལ་ལེའུ་བཅུ་གཅིག་དང་བརྟག་པ་གཉིས་པ་ལ་ལེའུ་བཅུ་གཉིས་ཡོད། མཇུག་ཏུ་བརྟག་པའི་མཚན་བཤད་པ་དང་སྦྱར་བྱང་སྨོན་ཚིག་དང་བཅས་པའི་སྒོ་ནས་མཇུག་བསྡུས་ཡོད་ཅིང་། གཞུང་འདི་འགྲེལ་བཤད་གནང་སྐབས་མ་ཧཱ་མཱ་ཡ། གུར། གདན་བཞི། སམྦྷི་ཊི་སོགས་ཀྱི་ལུང་རིགས་ཟུང་ལྡན་གྱིས་དགག་བཞག་སྤང་གསུམ་དང་འབྲེལ་བའི་སྒོ་ནས་དགྱེས་པ་རྡོ་རྗེའི་དོན་གསལ་ཞིང་ལེགས་པར་འཆད་ཡོད་པས། ཁོང་ནི་ལུང་རིགས་ཀྱིས་ཕྱུག་པའི་མཁས་གྲུབ་ཡ་མ་བྲལ་བའི་སྐྱེས་ཆེན་དམ་པ་ཞིག་ཡིན་པ་ངང་གིས་རྟོགས་ནུས་སོ། །
        ཞེས་བོད་ལྗོངས་ལྷོ་གྲོ་བོ་ལུང་བོད་བསྟན་གསུང་རབ་པར་ཁང་ཆེ་མོ་ནས་རྗེ་སྔོ་ཚ་ཆོས་སྐུ་ཁོང་གིས་མཛད་པའི་ཆོས་མཆོག་འདི་ཉིད་མཇལ་བའི་སྐལ་བ་ཐོབ་པས། བརྗེད་ཐོའི་ཚུལ་དུ་དབུས་འགྱུར་ཉི་མའི་གྲོང་ནས་བོད་རབ་བྱུང་བཅུ་བདུན་པའི་ལྕགས་གླང་སྟེ་ཕྱི་ལོ་༢༠༢༡/༥/༢༣ཉིན་ངལ་གསོའི་གོ་སྐབས་དང་བསྟུན་ཏེ་ལྷུན་གྲུབ་རྣམ་རྒྱལ་གྱིས་བྲིས།