༄༅། །རྣམ་དཔྱོད་འགྲན་ཟླ་བྲལ་བའི་ཤ་ར་བ།

        རྣམ་དཔྱོད་འགྲན་ཟླ་བྲལ་བའི་ཤ་ར་བ། ཞེས་བསྔགས་པ། བྱང་ཕྱོགས་གངས་རིའི་ཁྲོད་འདིར་རྒྱལ་བའི་བསྟན་པའི་སྙིང་པོ་ཇོ་བོ་ཡབ་སྲས་ཀྱི་མན་ངག་བྱང་ཆུབ་ལམ་གྱི་རིམ་པ་སྤེལ་བའི་སླད་དུ་བསམ་བཞིན་དུ་བྱོན་པ། སེམས་དཔའ་ཆེན་པོ་ཤ་ར་བ་གང་དུ་འཁྲུངས་པའི་ཡུལ་ནི། བྱང་རྭ་སྒྲེང་ནས་ཡ་ཚད་ཕྱིན་པའི་ཡུལ་རོམ་པོ་ཞེས་པ་ཡིན་ལ། གནས་དེར་པ་ཆེབ་རོམ་པོའི་རྒྱུད་དུ་ལྕགས་ཕོ་ཁྱིའི་ལོ་ཡུམ་ཕྱུགས་མ་སྐྱོང་བའི་ཕྱིར་རྡོ་ལེབ་ཆེན་པོ་ཞིག་གི་སྟེང་ན་བཞུགས་པའི་དུས་སུ་འཁྲུངས་ཏེ། ཕྱིས་རྡོ་ལེབ་དེ་ལ་ཤ་ར་བ་བལྟམས་ས་ཞེས་གྲགས་ཤིང་། རྡོ་ལེབ་དེའི་སྟེང་ན་ཤ་ར་བ་འཁྲུངས་ནས་ཞབས་བརྐྱངས་པའི་ཤུལ་རྡོ་ལ་ཞབས་རྗེས་ཀྱང་ཡོད་ཅེས་རྗེ་བཙུན་བླ་མ་བློ་བཟང་ཡེ་ཤེས་གསུངས། གནས་དེ་ད་ལྟ་ཀུན་གྱི་ཕྱག་མཆོད་ཀྱི་གནས་སུ་བྱེད་དོ། །
        དེ་ནས་དགུང་ལོ་བཅོ་བརྒྱད་ཀྱི་བར་ཡབ་ཡུམ་གཉིས་ཀྱིས་བསྐྱངས་ཤིང་ཁྱིམ་དུ་ཞུགས། དེར་བཞུགས་རིང་བྱིས་པའི་སྤྱོད་པ་མཐའ་དག་ལས་ངང་གིས་ལོག །སྔར་ཡུན་རིང་པོ་ནས་གོམས་པའི་བག་ཆགས་བརྟས་པས་ཡི་གེ་འབྲི་ཀློག་སོགས་ནི་ཚེགས་མེད་པར་མཁྱེན། དཀོན་མཆོག་མཆོད་པ་སོགས་དགེ་བའི་ལས་ལ་ནི་ངང་གིས་འཇུག །སྐལ་བ་མཉམ་པའི་སེམས་ཅན་གཞན་དག་མཐོང་ན་བྱམས་པའི་མིག་གིས་བལྟ་ཞིང་། བརྩེ་བའི་འཛུམ་གྱིས་བསུ་བ་ལས་གཞན་ལ་ཁྲོ་བ་དང་སྐྱོན་བརྗོད་ལ་སོགས་སྒོ་གསུམ་ཉེས་པར་སྤྱོད་པ་ལ་ནི་ངོ་ཚར་བལྟས་ཏེ་འཇུག་པའི་སྐབས་མེད།
        གཞན་དུ་ན་བསམ་པ་འདི་ལྟ་བུ་དག་འཁྲུངས་པར་ངེས་ཏེ། སྐྱེས་རབས་ལས། བཙོན་ར་འདྲ་བའི་ཁྱིམ་ལ་ནི། །ནམ་ཡང་བདེ་བར་མ་སེམས་ཤིག །ཕྱུག་གམ་ཡང་ན་དབུལ་ཡང་རུང༌། །ཁྱིམ་ན་གནས་པ་ནད་དུ་ཆེ། །གཅིག་ནི་བསྲུང་བས་ཉོན་མོངས་ལ། །གཉིས་པ་འཚེལ་བས་ཤ་ཐང་ངོ༌། །ཕྱུག་གམ་ཡང་ན་དབུལ་ཡང་རུང༌། །གང་ན་བདེ་བ་མེད་གྱུར་པ། །དེ་ལ་དགའ་བར་རྨོངས་པ་ནི། །སྡིག་པའི་འབྲས་བུ་སྨིན་པ་ཉིད། །ཅེས་གསུངས་པ་ལྟར། ཁྱིམ་ན་གནས་པ་ནི་ཉོན་མོངས་པ་དང༌། ཉེས་པར་སྤྱོད་པ་དང་། སྡུག་བསྔལ་དུ་མའི་འབྱུང་གནས་སུ་རིག་ནས། བདག་ནམ་ཞིག་ན་བཙོན་དོང་དང་འདྲ་བའི་ཁྱིམ་གྱི་གནས་འདི་ནས་བྱུང་སྟེ་རྒྱལ་བའི་བསྟན་པ་ལ་ཞུགས་ནས། ཐོས་བསམ་སྒོམ་གསུམ་ལ་འབད་པ་ཞིག་ནམ་འོང་སྙམ་དུ་དེ་འབའ་ཞིག་བསམ་ཞིང་། མདོ་སྔགས་ཀྱི་གསུང་རབ་རྣམས་ལ་ཡང་དང་ཡང་དུ་བལྟ་བ་ལྷུར་ལེན་པར་བྱེད་དོ། །
        དེ་ནས་ཕ་མ་དང་ཉེ་དུ་རྣམས་ཀྱིས་བག་མ་ལེན་པའི་སྦྱོར་བ་བཤམས་པ་ན། རང་ཡུལ་ཉེ་དུ་ནོར་ལོགས་སྤྱོད་གང་ལའང་མ་ཆགས་པར་མཆིལ་སྣབས་བཞིན་དུ་དོར་ཏེ། དགུང་ལོ་བཅོ་བརྒྱད་པའི་དཔྱིད་བྲོས་ནས་ཀླུངས་ཤོད་དུ་ཕེབས་ནས་རབ་ཏུ་བྱུང༌། མཚན་ཡོན་ཏན་གྲགས་སུ་བཏགས། རབ་ཏུ་བྱུང་བའི་ས་དེ་ལ་ཀླུངས་ཤོད་ཆོར་བ་ཞེས་གྲགས། དེར་ཡང་ཉེ་དུ་རྣམས་ཀྱིས་འཛིན་མི་བྱུང་དོགས་ནས་ཀླུངས་ཤོད་ཕྱུར་བུ་ཞེས་བྱ་བ་ན་དགེ་བའི་བཤེས་གཉེན་སྤྱན་སྔ་བ་ཆེན་པོ་མཚམས་དམ་པར་བཅད་པའི་སར་བྱོན། སྤྱན་སྔ་བ་ཆེན་པོས་ཀྱང་བཀའ་གདམས་བསྟན་འཛིན་ཆེན་པོ་ཞིག་ཏུ་འགྱུར་བར་གཟིགས་ནས། དགྱེས་བཞིན་དུ་རྗེས་སུ་བཟུང་ནས་གདམས་པ་དང་རྗེས་སུ་བསྟན་པ་མང་དུ་བསྩལ།
        དེའི་ཚེ་ཤ་ར་བ་ཡོན་ཏན་གྲགས་ཀྱི་ཐུགས་དགོངས་ལ་བཀའ་གདམས་སྐུ་མཆེད་གསུམ་པོ་ལ་ཇོ་བོ་རྗེའི་མན་ངག་ཞུས་ནས། གཙང་ཕྱོགས་སུ་གསང་སྔགས་ཀྱི་ཆོས་མང་པོ་ཞིག་ཞུ་བར་འབྱོན་བཞེད་ནར་མར་འཁྲུངས་ཏེ། དུས་དེའི་ཚེ་གཙང་ན་འབྲོག་མི་ལོ་ཙཱ་བ་དང་རྗེ་འགོས་ལོ་ཆེན་པོ་བཞུགས་ཏེ། གསང་སྔགས་རྒྱུད་སྡེ་བཞིའི་འཆད་ཉན་ཤིན་ཏུ་དར་བ་ཡོད་པས། རྡོ་རྗེ་འཛིན་པ་ཆེན་པོ་དེ་དག་གི་ཞབས་ལ་གཏུགས་ཏེ་རྒྱུད་སྡེ་བཞི་ག་དང༌། ཁྱད་པར་གསང་སྔགས་བླ་མེད་ཀྱི་མན་ངག་རྣམས་ཞུས་ཏེ་སྔགས་ལམ་སྒོམ་པ་ཞིག་གཙོ་བོར་བྱེད་དགོངས་པ་བྱུང༌།
        དེ་ནས་དེ་ཁའི་དབྱར་དུས་དགེ་བའི་བཤེས་གཉེན་པོ་ཏོ་བ་ཆེན་པོ་སྟག་ལུང་ཐང་ན་བཞུགས་པའི་སྤྱན་སྔར་བྱོན། ཆོས་ཀྱི་གསོལ་བ་བཏབ་པ་ན། དགེ་བཤེས་པོ་ཏོ་བ་ཆེན་པོས་ཀྱང་རང་གི་སྲས་ཀྱི་ཐུ་བོ་བསྟན་པའི་བདག་པོར་འགྱུར་བར་གཟིགས་ནས་སྤྱན་གྱི་འབྲས་བུ་ལྟར་བསྐྱངས་ཏེ། དུས་གསུམ་གྱི་རྒྱལ་བ་ཐམས་ཅད་གང་ནས་གཤེགས་པའི་ལམ་པོ་ཆེ། རྒྱལ་བས་གསུངས་པའི་ཆོས་ཕུང་བརྒྱད་ཁྲི་བཞི་སྟོང་པོ་ཐམས་ཅད་ཉམས་ལེན་གྱི་ལུས་གཅིག་ཏུ་དྲིལ་བ་བྱང་ཆུབ་ལམ་གྱི་རིམ་པའི་ཁྲིད་གནང་སྟེ། ཐོག་མར་གང་ཉམས་སུ་བླང་བར་བྱ་བ་དེ་ནས་བཟུང་སྟེ། མཐར་འབྲས་བུ་འགྲུབ་པའི་བར་གྱི་ལམ་གྱི་གྲངས་དང་གོ་རིམ། ལམ་སོ་སོའི་ངོ་བོ་རྣམས་རྒྱལ་བའི་བཀའ་དང་ཤིང་རྟ་ཆེན་པོའི་གཞུང་ནས་འབྱུང་བའི་དྲི་མ་མེད་པའི་རིགས་པས་ཆེས་ཞིབ་པར་མིག་ལ་མངོན་སུམ་དུ་སྣང་བའི་དཔེ་དང་བཅས་ཁྲིད་པར་མཛད་པ་ན། ཤ་ར་བ་ཆེན་པོ་སྔོན་ཡུན་རིང་པོ་ནས་ལམ་ལ་སྦྱངས་པའི་བག་ཆགས་སད་དེ། ལམ་གྱི་གྲངས་དང་གོ་རིམ་ལ་ལྡོག་ཏུ་མེད་པའི་དད་པ་དང༌། ཚིག་ཙམ་མིན་པར་རིགས་པའི་ལམ་ནས་དྲངས་པའི་ངེས་ཤེས་བརྟན་པོ་རྙེད་ནས། རེ་ཞིག་སྔགས་ལམ་མཐོན་པོ་ལ་འཇུག་པའི་རེ་བ་མི་འདུག་སྙམ་ནས་གཙང་དུ་འགྲོ་བའི་འདུན་པ་ལོག །ལམ་མ་ནོར་བར་སྟོན་པའི་དགེ་བའི་བཤེས་གཉེན་འདི་ལྟ་བུ་དང་ལན་ཅིག་མཇལ་བ་འདི་ག་ལ་འདོར་སྙམ་དུ་སྐད་ཅིག་གཅིག་ཀྱང་འབྲལ་མི་ཕོད་པར། དང་པོར་མཇལ་བ་དེ་ནས་བཟུང་། མཐར་དགེ་བཤེས་པོ་ཏོ་བ་ཆེན་པོ་ཞིང་གཤེགས་ཀྱི་བར་ནམ་ཡང་མ་བྲལ་བར། བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ཏེ་ལམ་གྱི་རིམ་པའི་གདམས་ངག་མ་ལུས་པ་བུམ་པ་གང་བྱོར་གསན།
        བར་སྐབས་ཤིག་ཉེ་དུ་རྣམས་དང་། ཡུལ་ཕྱོགས་ཀྱི་མི་མང་པོ་ཞིག་གིས་རང་གི་ཁུ་བོའི་གནས་རོམ་པོ་རེ་ཞེས་པའི་དགོན་གནས་ཞིག་གི་ཆོས་དཔོན་དུ་འབྱོན་དགོས་པར་བསྐུལ་བ་ན། སླར་ཞིག་འབྱོན་ནམ་སྙམ་དུ་དགོངས་པ་བྱུང་བ་ལ། དགེ་བཤེས་པོ་ཏོ་བ་ཆེན་པོས་བསླབ་བཏུས་གསུངས་པའི་སྐབས་བྱང་སེམས་ཀྱི་ལམ་བགྲོད་པའི་བར་ཆད་གནོད་འགྱུར་རྣམས་གསུངས་པའི་ཚེ། ཞལ་ཏ་པའི་གནོད་པ་ཞིབ་ཏུ་གསུངས་པས་ཐུགས་ངེས་བརྟན་པོ་འཁྲུངས་ཏེ། དེ་ནས་ཆོས་དཔོན་དུ་འགྲོ་བའི་སྤྲོས་པ་ཆོད་གསུངས།
        ཐོག་མར་དགེ་བཤེས་པོ་ཏོ་བའི་གྲྭ་པ་བྱིངས་གྲས་ལོ་དགུ་མཛད། དེ་ནས་དགེ་བཤེས་པོ་ཏོ་བ་ཆེན་པོ་ཐུགས་ཤིན་ཏུ་མཉེས་པས་སྐུ་འཁོར་ནང་མ་ལོ་དགུ་མཛད་དེ། ཁྱོན་དགེ་བཤེས་པོ་ཏོ་བ་ཆེན་པོ་ལོ་བཅོ་བརྒྱད་བསྟེན་ཏེ། དེའི་རིང་ལ་བྱང་ཆུབ་ལམ་གྱི་རིམ་པའི་ཁྲིད་མཐའ་ཆོད་པར་གསན་ཏེ། དེ་ཡང་རྗེ་བཙུན་བྱམས་པས་མཛད་པའི་མངོན་པར་རྟོགས་པའི་རྒྱན་བྱང་ཆུབ་ལམ་གྱི་རིམ་པའི་རྩ་བ་མན་ངག་ཏུ་བྱས། དེའི་སྟེང་དུ་མདོ་སྡེ་རྒྱན་དང༌། སློབ་དཔོན་དཔའ་བོས་མཛད་པའི་སྐྱེས་རབས་སོ་བཞི་པ་དང༌། རྒྱལ་སྲས་ཞི་བ་ལྷས་མཛད་པའི་སྤྱོད་འཇུག་དང་བསླབ་བཏུས་གཉིས་དང་ཆེད་དུ་བརྗོད་པའི་ཚོམས་དང༌། བྱང་ས་སྟེ་བཀའ་གདམས་གཞུང་དྲུག་གུང་བསྒྲིགས་ཏེ། བྱང་ཆུབ་ལམ་གྱི་རིམ་པའི་མན་ངག་རྣམས་དམིགས་སྐོར་རེ་རེ་ནས་གཞུང་དྲུག་པོ་དེ་དག་གང་རིགས་ནས་རྒྱས་པར་བཤད།
        གཞན་ཡང་སློབ་དཔོན་འཕགས་པ་ཀླུ་སྒྲུབ་ཀྱིས་མཛད་པ་མདོ་སྡེ་ཀུན་ལས་བཏུས་པ་དང༌། རིན་ཆེན་ཕྲེང་བ་དང་། རྩ་ཤེ་ལ་སོགས་པའི་རིགས་ཚོགས་རྣམས་དང་། སློབ་དཔོན་ཀ་མ་ལ་ཤཱི་ལས་མཛད་པའི་སྒོམ་རིམ་གསུམ་ལ་སོགས་པ་གསུང་རབ་དགོངས་འགྲེལ་དང་བཅས་པ་ཐམས་ཅད་བྱང་ཆུབ་ལམ་གྱི་རིམ་པའི་གདམས་ངག་ཏུ་ངོ་སྤྲད་ནས། སྟོན་པར་མཛད་པས་རྒྱལ་བའི་གསུང་རབ་དགོངས་འགྲེལ་དང་བཅས་པ་འཆད་པ་ལ་མི་འཇིགས་པའི་སྤོབས་པ་ཐོབ།
        རང་དང་གཞན་གྱི་གྲུབ་མཐའ་རྒྱ་མཚོའི་ཕ་རོལ་ཏུ་སོན། སྡེ་སྣོད་གསུམ་དང་། ཤིང་རྟ་ཆེན་པོའི་གཞུང་རྣམས་ཕལ་ཆེར་ཐུགས་ལ་གཟུང་སྟེ། སྐལ་བ་དང་ལྡན་པ་གཞན་དག་ལ་གསུང་རབ་དགོངས་འགྲེལ་དང་བཅས་པ་མཐའ་དག་བྱང་ཆུབ་ལམ་གྱི་རིམ་པར་བསྡུས་ནས་འདོམས་པ་ལ་དབང་འབྱོར་པས། བོད་དུ་སྐྱེས་པའི་མི་ཞིག་ལ་ཤ་ར་བ་ཆེན་པོ་ལས་མཁྱེན་རབ་རླབས་ཆེ་བ་མེད་ཅེས་བཀའ་གདམས་གོང་མའི་གསུང་སྒྲོས་ལས་བྱུང༌། དོན་འདི་དག་ལ་དགོངས་ནས་རྗེ་ཐམས་ཅད་མཁྱེན་པས་ཀྱང༌། རྣམ་དཔྱོད་འགྲན་ཟླ་བྲལ་བའི་ཤ་ར་བ། །ཞེས་བསྔགས་པ་མཛད་དོ། །
        ཤ་ར་བ་ཆེན་པོ་ཉིད་ཀྱི་ཞལ་ནས། དེང་དུས་ཆོས་བྱེད་ཀུན་ཆོས་འཆད་པ་པོ་གང་ན་ཡོད་ཟེར་བ་ཐམས་ཅད་ཀྱི་རྩར་འགྲོ་སྟེ། སྟོན་པ་རིན་པོ་ཆེ་ཡབ་སྲས་ཀྱི་ལུགས་དེ་མིན། དགེ་བཤེས་སྟོན་པས་སྐུ་ཚེ་དེ་ལ་བླ་མ་ལྔ་ལས་མ་བསྟེན། དེ་ཡང་དགེ་བསྙེན་གྱི་སྡོམ་པའི་སློབ་དཔོན་དང༌། ཀློག་ཡིག་སློབ་པའི་སློབ་དཔོན་དང༌། བླ་མ་སེ་བཙུན་དང༌། པཎྜི་ཏ་སྨྲི་ཏི་དང༌། ཇོ་བོ་རྗེ་སྟེ། དེ་རྣམས་ཀྱི་ནང་ནས་ཀྱང་གཞན་རྣམས་ལ་ཆོས་འབྲེལ་རེ་ཙམ་ཡིན། བླ་མ་སེ་བཙུན་པ་ལ་མཚན་ཉིད་ཀྱི་གཞུང་རྣམས་གསན། གཙོ་བོ་ནི་ཇོ་བོ་རྗེ་ཉིད་ལ་བརྟེན་ནས་བྱང་ཆུབ་ལམ་གྱི་རིམ་པ་མཐའ་དག་པར་གསན་ཏེ། ཇོ་བོ་རྗེ་མངའ་རིས་སུ་མཇལ་བ་ནས་མཐར་སྙེ་ཐང་དུ་ཞིང་གཤེགས་པའི་བར་ཇོ་བོ་རྗེ་ཉིད་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ཏེ། མདོ་སྔགས་ཀྱི་གསུང་རབ་དགོངས་འགྲེལ་དང་བཅས་པ་མཐའ་དག་བྱང་ཆུབ་ལམ་གྱི་རིམ་པར་བསྡུས་ཏེ་གསན་ཞིང་། དེ་འབའ་ཞིག་ཐུགས་ཉམས་སུ་བཞེས་པས་བསྟན་པ་ཡོངས་རྫོགས་ཀྱི་བདག་པོར་བྱོན་པ་ཡིན། དགེ་བཤེས་པོ་ཏོ་བ་ཆེན་པོས་ཀྱང་ཁྱིམ་དུ་བཞུགས་སྐབས་སྦ་སྒོམ་ལ་བསྙེན་གནས་ཀྱི་སྡོམ་པ་ཞིག་ཞུས། བླ་མ་དེ་དང༌། དགེ་ཚུལ་གྱི་སྡོམ་པའི་མཁན་སློབ་དང༌། མཚན་ཉིད་ལ་བསླབ་སྦྱོང་མཛད་པའི་སྐབས་ཀྱི་སློབ་དཔོན་དང༌། འབྲོམ་རིན་པོ་ཆེ་རྣམས་མ་གཏོགས་པ་བླ་མ་མ་བསྟེན། དེ་ཡང་གཙོ་བོར་འབྲོམ་རིན་པོ་ཆེ་ཉིད་བསྟེན་ཏེ། དང་པོ་མཇལ་བ་ནས་མཐར་ཞིང་ནམ་གཤེགས་ཀྱི་བར་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ཏེ། བྱང་ཆུབ་ལམ་གྱི་རིམ་པ་ཉིད་ལ་སྦྱངས་པས་བསྟན་པ་ཡོངས་རྫོགས་ཀྱི་བདག་པོར་བྱོན། ཁོ་བོས་ཀྱང་བཀའ་གདམས་སྐུ་མཆེད་རིན་པོ་ཆེ་གསུམ་ལ་བསྟེན་ཅིང་། དེའི་ནང་ནས་ཀྱང་དགེ་བའི་བཤེས་གཉེན་པོ་ཏོ་བ་ཆེན་པོ་ཉིད་ལ་བསྟེན། གཞན་དག་དགེ་ཚུལ་གྱི་མཁན་སློབ་མ་གཏོགས་བླ་མ་གཞན་མ་བསྟེན། དགེ་བཤེས་པོ་ཏོ་བ་ཆེན་པོ་ནི་ལོ་བཅོ་བརྒྱད་ཀྱི་བར་དུ་བསྟེན་ཏེ་མི་མཉེས་པ་སྐད་ཅིག་ཀྱང་བྱེད་མ་མྱོང་གསུངས།
        མཐར་དགེ་བཤེས་པོ་ཏོ་བ་ཞིང་གཤེགས་ནས། དགེ་བཤེས་པོ་ཏོ་བའི་སློབ་མ་ཕལ་ཆེར་ཤ་ར་བའི་རྗེས་སུ་འབྲང་སྟེ། འཁོར་བརྒྱ་ཕྲག་མང་པོ་དང་བཅས་ཀླུངས་ཤོད་དུ་བྱོན་ནས་ཚོགས་བསྡུས། ཡོ་བྱད་གང་བྱུང་ཐམས་ཅད་དགེ་འདུན་ལ་བསྔོས། དེ་ནས་སྙན་པའི་གྲགས་པས་འཛིན་མའི་ཁྱོན་ཀུན་ཁྱབ་སྟེ། བྱང་ཆུབ་ལམ་གྱི་རིམ་པ་རྒྱ་ཆེར་བཤད་པས་ཆོས་གསན་པ་མང་དུས་སུམ་སྟོང་འདུས་པ་བྱུང༌། ཕལ་ཆེར་ཉིས་སྟོང་ལྷག་ཙམ་རྒྱུན་དུ་འདུས། དེ་ཐམས་ཅད་ཀྱང་དགེ་བཤེས་ཤ་ར་བ་ཆེན་པོ་ཉིད་ཀྱི་རྣམ་ཐར་རྗེས་སུ་སྐྱོང་བ་ཤ་སྟག་བྱུང་སྟེ། ཤ་ར་བ་ཆེན་པོ་ཉིད་ཀྱིས་རང་གི་འཁོར་དུ་འདུས་པའི་གདུལ་བྱ་ཐམས་ཅད་ཚུལ་ཁྲིམས་རྣམ་པར་དག་པ་གཞིར་བཟུང་ནས་སྐྱེས་བུ་གསུམ་གྱི་ལམ་གྱི་རིམ་པ་སྒོམ་པ་ལ་སྦྱར། ལམ་གྱི་རིམ་པའི་ཡང་རྩ་བ་བཤེས་གཉེན་བསྟེན་ཚུལ་རྣམ་པར་དག་པ་ཞིག་དགོས་ཞེས་འདོམས་པར་མཛད།
        ཤ་ར་བ་ཉིད་ཀྱི་ཞལ་ནས་ཐེག་པ་ཆེན་པོའི་ལམ་གྱི་རྩ་བ་དགེ་བའི་བཤེས་གཉེན་ཡིན། དགེ་བའི་བཤེས་གཉེན་ལ་མ་བསྟེན་པར་ལམ་གང་ཡང་སྐྱེ་བ་མི་སྲིད་པ་ཡིན། ས་བཅུའི་བྱང་ཆུབ་སེམས་དཔའ་བསྐལ་པ་གྲངས་མེད་གསུམ་དུ་ཚོགས་བསགས་པ་ལ་ཡང་ཕྱོགས་བཅུའི་སངས་རྒྱས་རྣམས་ཀྱིས་ཕྱག་གཡས་པ་དབུ་ཐོག་ཏུ་བཞག་ནས་བྱིན་གྱིས་མ་བརླབས་པར་རྡོ་རྗེ་ལྟ་བུའི་ཏིང་ངེ་འཛིན་ཐོབ་མི་སྲིད་པ་དེ་བཞིན་གཤེགས་པ་དེ་དག་གནས་སྐབས་དེ་ན་དགེ་བའི་བཤེས་གཉེན་བྱ་བར་འདོད་པ་ཡིན། ད་ལྟ་འུ་ཅག་ཐམས་ཅད་ཀ་ཅ་ཁོ་ན་ལ་རྩི་ལ་སྐུ་མཆེད་གསུམ་པོ་ལ་རེས་གསུམ་ག་སྤྱིར་འབུལ་བ་འོང༌། རེས་གཉིས་ལ་འོང་བ་ལ། དུས་དེ་ཐམས་ཅད་ན་གསུམ་ལ་ཕུལ་ན་གཉིས་ལ་འབུལ། གཉིས་ལ་ཕུལ་ན་གཅིག་ལ་འབུལ་གྱི་ང་འདི་འདོད་ཡེ་མི་གསུངས་དེ་ལྟ་བུ་ལ་དད་གསུངས།
        དགེ་བཤེས་ཤ་ར་བ་ཆེན་པོ་དེ། དགེ་བཤེས་པོ་ཏོ་བའི་རྣམ་ཐར་སྐྱོང་བ་མ་གཏོགས་སུ་ལའང་མི་འདུད་སུ་དང་ཡང་མི་ཁོན། གང་དུ་འདུག་ཀྱང་དམའ་ས་འཛིན་རྐྱེན་བཟང་ངན་གང་བྱུང་ཡང་བྱང་ཆུབ་ལམ་གྱི་རིམ་པ་སྒོམ་པ་ཁོ་ན་ལས་ཐབས་གཞན་གང་ཡང་མི་མཛད། སྐུ་མཐོང་བ་དང་གསུང་ཐོས་པ་ཐམས་ཅད་དད་པ་རང་དབང་མེད་པར་སྐྱེ། དད་རྫས་དང་གཤིན་རྫས་གང་བྱུང་ཡང་དཀོན་མཆོག་གི་མཆོད་པ་དང༌། དགེ་འདུན་གྱི་བསྙེན་བཀུར་ཁོ་ན་ལ་གཏོང་བ་ལས་མི་དགོས་པའི་སར་ཡེ་མི་གཏོང༌། མ་དག་པའི་རྫས་ཡེ་མི་འཆང་། གཞན་གྱིས་ཞིང་དང་ཁང་ཁྱིམ་དང་ཕྱུགས་ལ་སོགས་ཕུལ་ཡང་གཏན་ནས་མི་བཞེས། ལན་ཅིག་སྦྱིན་བདག་ཅིག་གིས་ཞིང་རྔས་པའི་ཐོག་ཅོག་ཕུལ་བ་ན། དགེ་འདུན་ལ་ཕུལ། ང་ལ་མི་དགོས། རྩྭ་སོགས་ཆུར་སྐྱོལ། གྲྭ་པ་རྣམས་ཀྱི་རྒྱགས་སྐྱེལ་མིའི་ཁལ་མ་ལ་ཕན་འགྲོ་གསུངས།
        དགེ་བཤེས་པོ་ཏོ་བ་དང་ཤ་ར་བ་གཉིས་པོས་ཐབས་ལྟོ་བཅོས་གང་ཡང་མ་མཛད་པར་ལམ་རིམ་ཁོ་ན་སྒོམ་པར་མཛད་པས། རང་དང་སློབ་མ་རྣམས་ལ་ནད་གདོན་གྱི་འཚེ་བ་ཉུང༌། ལྷ་འདྲེ་མི་གསུམ་བྱམས་པས་ཚེ་རིང་བར་བྱུང༌། དགེ་བཤེས་སྤྱན་སྔ་བ་དང་བྱ་ཡུལ་བ་དཔོན་སློབ་རྣམས་ཐབས་རིམ་མན་ངག་འདི་མི་མཁྱེན་བྱ་བ་མེད་པས། གདུལ་བྱ་རྣམས་ཀྱང་མན་ངག་སྣ་ཚོགས་ལག་ལེན་བྱེད་པ་བྱུང་ཡང་། ནད་གདོན་གྱི་འཚེ་བ་མེད་ཅེས་བཀའ་གདམས་གོང་མའི་གསུང་སྒྲོས་ལས་བྱུང༌།
        ཤ་ར་བ་ཉིད་ཀྱི་ཞལ་ནས། སྤྱིར་ལེགས་ཉེས་ཅི་བྱུང་ཆོས་ལ་བརྟེན་པ། དེའི་ནང་ནས་ཀྱང་འདུལ་བ་ལ་བརྟེན་ན་ལྡབ་ཀྱང་མི་དགོས་པ་ཞེ་གཙང་བ། རྟག་ཐུབ་པ། ཉམས་དགའ་བ། མཐའ་བཟང་བ་ཡིན་གསུངས། ཡང་ཞལ་ནས། རྟེན་དང་བསྲུང་བ་མི་དགོས་པའི་གང་ཟག་གསུམ་ཡིན། དགེ་སློང་ཆོས་གོས་རྣམ་གསུམ་ལས་ཡོངས་སུ་བཟུང་བ་ཐམས་ཅད་སྤངས་ཏེ། ཉེས་པ་ཕྲ་ཞིང་ཕྲ་བས་ཀྱང་མ་གོས་པ་ཞིག་བྱུང་ན་རྟེན་དེ་ཉིད་མཆོད་གནས་ཡིན་པས་མི་དགོས། བྱང་ཆུབ་ཀྱི་སེམས་སྨོན་འཇུག་གཉིས་རྣལ་མར་ཡོད་པ་དེ་སེམས་ཅན་ཐམས་ཅད་ཀྱི་མཆོད་གནས་ཡིན་པས་མི་དགོས། སྔགས་པ་མཚན་ཉིད་དང་ལྡན་པ་སྣང་བ་ཐམས་ཅད་ལྷ་དང་ལྷ་མོར་ཤེས་པ་ལ་མི་དགོས་གསུངས། བཀའ་བརྒྱུད་ཟམ་མ་ཆད་པའི་གདམས་པ་ལ་བརྟེན་ནས་ཤེས་བཞིན་ཆེན་པོས་ཐམས་ཅད་མིག་འོག་ཏུ་ཆུད་པར་བྱས་ཏེ། སྤྱོད་ལམ་རྣམ་བཞིར་ཅི་བྱེད་ཐམས་ཅད་ཐར་པའི་རྒྱུར་དཀར་ལམ་གྱིས་གཏོང་ཤེས་པ་ཞིག་དགོས་གསུངས།
        ཡང་ཞལ་ནས་བྱ་ཡུལ་པའི་བཀའ་བརྒྱུད་འདི་ལ་སྲུང་བ་ཟད་པ་མེད་པ་ཞིག་ཡོད་དེ་འཚེ་བ་ཤིན་ཏུ་མང༌། མི་དབང་དུ་བསྡུ་བའི་ཐབས་ཟད་པ་མེད་དེ་ངན་སྨྲ་དེ་མང་པོ་སྣང༌། ཚེ་སྤེལ་ཐབས་ཁོ་ན་མཛད་དེ་སྐུ་ཚེ་རིང་བ་ཙམ་མ་བྱུང་ལ། པོ་ཏོ་བའི་བཀའ་བརྒྱུད་འདི་བསྟན་པ་རིན་པོ་ཆེ་ཁས་བླངས་ཀྱི་ཆོས་ཁོ་ན་ལས་སྤན་སྤུན་ཡེ་མི་མཛད་དེ་འཚེ་བ་ཉུང་མི་བྱམས་སྐུ་ཚེ་རིང་བར་བྱུང་སྟེ། ཁོ་བོས་ནི་མན་ངག་དེ་མངོན་སུམ་དུ་གོ་བར་བྱུང་གསུངས།
        ལན་ཅིག་ཤ་ར་བ་ཆེན་པོས་ལམ་རིམ་གྱི་ཁྲིད་གནང་བའི་རྗེས་ལ་འདི་སྐད་གསུང་སྟེ། ཁམས་ངན་ཡང་ཆོས་ཀྱིས་ཕན་ན་ཕན་པ་ཡིན་སྙམ་ནས་འབད་དེ་བཤད་པ་ཡིན། ཆོས་ཀྱིས་ཕན་ན་ཕན་པར་བརྩི། གཞན་གྱིས་ཕན་པ་ཏ་ཕ་མས་ཀྱང་འདི་ལྟར་བྱེད་དེ་དེས་ཐར་པ་ལ་ཅང་མ་ཕན། གྲྭ་པ་ཆོས་ལ་མ་མགུ་ནས་སོང་ན་དེ་རང་གི་ཉེས་པར་བརྩི། གཞན་ལ་མ་མགུ་ནས་སོང་བ་རང་གི་ཉེས་པར་མི་བརྩི་གསུངས།
        སྒོམ་པ་ཀློག་འབར་གྱིས་བྱ་ཡུལ་དུ་ཕྱིན་པའི་དུས་སུ་རྩབས་འདྲེན་དུ་བྱུང་བ་ལ། ང་གཅོད་ལུང་བའི་གྲྭ་པ་ལ་རྩབས་འདྲེན་ནམ་ཟེར་ནས་འཐུང་མ་འདོད། དེ་ལ་ཤིན་ཏུ་མཉེས་པར་མཛད། ལན་ཅིག་ཤ་ར་བ་ཆེན་པོ་ལ་སློབ་མ་རྣམས་ཀྱིས་ཕྱོགས་གཞན་ཞིག་ཏུ་འབྱོན་པར་ཞུས་པ་ན། ཆོས་འཕེལ་ན་གང་དུ་ཕྱིན་ཀྱང་ཆོག །གཉེན་ཉེ་དུ་ལ་ཆགས་པའང་མེད། གནས་གཞི་སྡེ་དགོན་ལ་ཆགས་པའང་མེད། ཁོ་བོའི་སྟེང་ན་དབང་ཆེ་བ་གཞན་ངོ་སྲུང་དགོས་པའང་སུ་ཡང་མེད་གསུངས།
        ཤ་ར་བ་ཆེན་པོ་ཐུགས་བསྐྱེད་ཤིན་ཏུ་བཟང་བས། འཁོར་སུམ་སྟོང་ཙམ་འདུས་པ་དེ་ཐམས་ཅད་ཀྱང་ཐོས་བསམ་སྒོམ་པས་དུས་འདའ། ཟས་གོས་གནས་མལ་དང་སྡེ་དགོན་ལ་ཆགས་པ་སྤངས་པ་ཤ་སྟག་བཞུགས། ཆོས་གནང་བ་ཐམས་ཅད་ཀྱང་སྐྱེས་བུ་གསུམ་གྱི་ལམ་གྱི་རིམ་པ་ཉིད་ལ་སྐོར་ནས་དེའི་ཐོག་ཏུ་འབབ་པ་ཁོ་ན་མཛད། ཚོང་དང་བུན་བསྐྱེད་ཀྱིས་ནོར་བསྒྲུབས་ནས་དཀོན་མཆོག་མཆོད་པ་དང་། དབུལ་ཕོངས་ལ་སྦྱིན་གཏོང་བྱེད་པ་བྱུང་ན། ང་ནི་ཁྱེད་ལ་གཏོང་བའི་ཕན་ཡོན་མི་བརྗོད་ཀྱིས་འཛིན་པའི་ཉེས་དམིགས་བརྗོད་པ་ཡིན་གསུངས་ནས་མི་དགྱེས། དབེན་པའི་རི་སུལ་དུ་ཚུལ་ཁྲིམས་རྣམ་པར་དག་པ་ལ་གནས་པ་བྱུང་ན་ཤིན་ཏུ་དགྱེས་ཏེ། དབེན་པའི་རི་སུལ་དུ་དྲང་སྲོང་གི་སྤྱོད་ཚུལ་གྱིས་གནས་པ་ཞིག་བྱུང་ན་གཟོད་ཕས་བུ་གསོས་བྱ་བ་ཡིན་གསུངས།
        རབ་ཏུ་བྱུང་བ་ཞིང་ལས་བྱེད་པ་གཟིགས་ན་ཤིན་ཏུ་མི་དགྱེས་ཏེ། ཤ་ར་བ་ཉིད་ཀྱི་ཞལ་ནས་རབ་ཏུ་བྱུང་བ་བྱ་བ་སོ་ནམ་རྣམ་བཞི་སྤངས་པ་ཞིག་ལ་ཟེར་བ་ཡིན། དགེ་སློང་བྱ་བ་འདོད་པ་སྤངས་པ་ཞིག་ལ་ཟེར་བ་ཡིན། བྱང་ཆུབ་སེམས་དཔའ་བྱ་བ་རང་དོན་སྤངས་པ་ཞིག་ལ་ཟེར་བ་ཡིན། སྒོམ་ཆེན་བྱ་བ་འདུ་འཛི་སྤངས་པ་ཞིག་ལ་ཟེར་བ་ཡིན་གསུངས།
        སེམས་དཔའ་ཆེན་པོ་འདི་ནི་ཇོ་བོ་རྗེས། འཕྲལ་ལ་ཟས་འཚོལ་བྱ་དང་འདྲ། །ཁག་སྟེ་ལངས་པས་གཞིས་རྫོགས་པ། །བྱར་མེད་དེ་ནི་བསྟན་ཡུལ་ཡིན། །ཞེས་གསུངས་པ་ལྟར་ཇོ་བོ་ཡབ་སྲས་ཀྱི་རྣམ་ཐར་གཙང་མ་གཞན་འདྲེས་མེད་པར་སྐྱོང་བ། ཕྱི་རབས་ཀྱི་གདུལ་བྱ་ཀུན་གྱི་སྨོན་གནས་སུ་འོས་པ་ཞིག་བྱུང་སྟེ། ཤ་ར་བ་ཉིད་ཀྱི་ཞལ་ནས། རུག་པའི་ཇོ་བོ་གཞོན་ནུ་གྲགས་བྱ་བ་དེ་དང༌། ལན་ཚ་རབ་ཀྱི་སྒོམ་པ་དབང་ཕྱུག་རྒྱལ་མཚན་བྱ་བ་དེ་གཉིས་ལོ་བདུན་ཅུ་ཙམ་ལ་འདས་པ་ལ། འཚོ་བ་ནི་དགེ་འདུན་གྱི་ནང་ནས་ལེན། སང་གི་བྱ་བ་ནི་དེ་རིང་བྱེད་པ་མ་ཡིན། བྱ་བ་གཞན་གང་ཡང་མེད་པར་དགེ་སྦྱོར་བར་མ་ཆད་པར་འདས་ཏེ་དེ་གཉིས་ཁོ་ན་ལ་སྨོན་གསུངས། ཡང་ན་ནིང་འདས་པ་གྲྭ་པ་ཆོས་མཐུན་དེ་ཆོས་ལས་གཞན་གྱིས་ནི་བློ་མ་སྦགས། དགེ་བཤེས་ལ་ནི་ཡི་དམ་ལྷ་དང་ཁྱད་པར་མེད་པར་ཤེས། སེམས་ནི་བཀོལ་དུ་བཏུབ་དགེ་སྦྱོར་ལས་བྱ་བ་གཞན་ནི་ཅི་ཡང་མེད། དེ་ལྟ་བུ་ལ་སྨོན་གསུངས།
        བོད་སྔ་རབས་སུ་བྱོན་པའི་བཤེས་གཉེན་རྣམས་ལ་སྤྱོད་པ་རྣམ་པར་དག་པ་ཇོ་བོ་ཡབ་སྲས་ཀྱི་དགོངས་པ་ལྟར་བྱེད་པ་མང་བར་བྱུང་ནའང་། ལྟ་བ་རྣམ་པར་དག་པ་ཇོ་བོ་ཡབ་སྲས་ཀྱི་དགོངས་པ་ལྟར་འཕགས་པ་ཀླུ་སྒྲུབ་ཀྱི་དབུ་མ་རིགས་ཚོགས་ཀྱི་དོན་སློབ་དཔོན་སངས་རྒྱས་བསྐྱངས་དང་། སློབ་དཔོན་ཟླ་བ་གྲགས་པས་བཀྲལ་བའི་དབུ་མའི་ལྟ་བ་མཐར་ཐུག་པ་རྟོགས་པ་དཀོན་པར་བྱུང་འདུག་པ་ན། སེམས་དཔའ་ཆེན་པོ་ཤ་ར་བ་འདི་བཞུགས་པའི་དུས་སུ་པ་ཚབ་ལོ་ཙཱ་བས་རྒྱ་གར་དུ་བྱོན་ཏེ། སློབ་དཔོན་ཟླ་བ་གྲགས་པ་ལ་གསོལ་བ་ཤུགས་དྲག་ལ་རྒྱུན་རིང་བ་བཏབ་པས། སློབ་དཔོན་ཟླ་བ་གྲགས་པས་དངོས་སུ་ཞལ་བསྟན་ཏེ་བྱིན་གྱིས་བརླབས་པས་དབུ་མའི་ལྟ་བ་ཐུན་མོང་མ་ཡིན་པ་རྟོགས། བོད་དུ་འཕགས་པ་ཀླུ་སྒྲུབ་ཀྱི་ལྟ་བ་ཐུན་མོང་མ་ཡིན་པ་དེ་དར་ན་ཅི་མ་རུང་སྙམ་དུ་དགོངས་ནས་དབུ་མ་ལ་འཇུག་པ་བསྒྱུར། བོད་དུ་ལུགས་བཟང་དེ་སྤེལ་བའི་འཕྲིན་ལས་མཛད་པ་ན། བླུན་པོ་རྨོངས་པའི་ཁྱུ་དག་གིས་ཆོས་ཐམས་ཅད་རང་བཞིན་གྱིས་མ་གྲུབ་པ་བཏགས་ཡོད་མིང་རྐྱང་ཙམ་གྱི་ཚུལ་དེ་ཐོས་པ་ན། ཆོས་ཐམས་ཅད་རང་བཞིན་གྱིས་མེད་པར་ལྟ་བ་ནི་ཆད་ལྟའོ་ཞེས་སྨྲས་ནས། ཀླུ་སྒྲུབ་ལུགས་བཟང་སྤེལ་བའི་འཕྲིན་ལས་བཀག་པ་ན། དགེ་བའི་བཤེས་གཉེན་ཤ་ར་བས་ཀླུ་སྒྲུབ་ཡབ་སྲས་ཀྱི་དགོངས་པ་ཡིན་མིན་ངས་ཤེས་གསུངས་ནས། པ་ཚབ་ལོ་ཙཱ་བ་ལ་དབུ་མའི་ལུགས་ཀྱི་གཞི་ལམ་འབྲས་གསུམ་གྱི་རྣམ་གཞག་ཇི་ལྟར་ཡིན་དང༌། དབུ་མའི་ལྟ་བའི་དགག་བྱ་གང་ཡིན་དང༌། དེ་འགོག་བྱེད་རིགས་པའི་གཙོ་བོ་གང་ལ་བྱེད་དང༌། དབུ་མའི་ལྟ་བ་སྒོམ་པའི་ཚེ་སྦྱོར་དངོས་རྗེས་གསུམ་དུ་ཇི་ལྟར་བྱེད་ཅེས་དྲི་བ་ཞིབ་ཏུ་བསྐུར་ནས། གྲྭ་གཞོན་ཤེས་རབ་ཅན་གཉིས་པ་ཚབ་ལོ་ཙཱ་བའི་སར་བཏང་བས། པ་ཚབ་ལོ་ཙཱ་བས་དེའི་ལན་དུ་འཕགས་པ་ཀླུ་སྒྲུབ་ཀྱི་དགོངས་པ་སློབ་དཔོན་ཟླ་བ་གྲགས་པས་བཀྲལ་བའི་དབུ་མའི་ལྟ་བ་མཐར་ཐུག་འདི་ཡིན་དང༌། དེ་སྒོམ་པའི་ཚེ་སྦྱོར་དངོས་རྗེས་གསུམ་དུ་ཇི་ལྟར་བྱ་བ་འཕགས་པ་ཀླུ་སྒྲུབ་ཡབ་སྲས་ཀྱི་མན་ངག་འདི་ལྟར་ཡོད་ཅེས་ལན་ཞིབ་ཏུ་ཕུལ་བ། དགེ་བཤེས་ཤ་ར་བ་ཆེན་པོ་དགེ་འདུན་སུམ་སྟོང་ལ་ཉེ་བའི་ཚོགས་དབུར་བཞུགས་ནས་བུར་སྟོན་ཞིག་གསོལ་ལ་ཁད་དུ་ཡོད་པའི་ཐོག་ཏུ་སླེབས་པས། ཚོགས་དབུའི་ས་དེ་ཁར་ལེགས་པར་གཟིགས་པས་སྤྱན་ཆབ་མང་པོ་བྱོན། བུ་རམ་ཕྱག་གིས་གང་གཅོགས་ཤིག་གནམ་དུ་གཏོར་ནས་ཀླུ་སྒྲུབ་ཡབ་སྲས་མཆོད། པ་ཚབ་ལོ་ཙཱ་བ་མཆོད། ཆོས་འདི་འདྲ་ཞིག་གིས་འཁོར་འདས་ཀྱི་ཤན་འབྱེད་པ་ཡིན། ཤེར་ཕྱིན་གྱི་མདོ་སྡེ་རིན་པོ་ཆེའི་དགོངས་པ་འདི་ཡིན་གསུངས་ནས། བཙུན་ཆུང་ལྔ་བཅུ་ཙམ་ཞིག་པ་ཚབ་ལོ་ཙཱ་བ་ལ་དབུ་མ་མཉན་དུ་བཏང༌། དབུ་མའི་ལུགས་བཟང་སྤེལ་བ་ལ་མཐུན་པའི་རྐྱེན་ཟང་ཟིང་མང་པོ་བསྐུར། པ་ཚབ་ལོ་ཙཱ་བ་ལ་བསྔགས་བརྗོད་ཆེ་བར་མཛད་པས་ལོག་པར་རྟོག་པའི་སྨྲ་བ་ངན་པ་རྣམས་རང་ཤུགས་ཀྱིས་འགགས། པ་ཚབ་ལོ་ཙཱ་བ་ལ་འཕྲིན་ལས་ཆེར་འཕེལ་བར་གྱུར་ཏོ། །
        དེ་དུས་པ་ཚབ་ལོ་ཙཱ་བས་རང་ཉིད་ཀྱིས་བསྒྱུར་བའི་དབུ་མ་འཇུག་པ་དགེ་བཤེས་ཤ་ར་བ་ལ་གཟིགས་སུ་ཕུལ་བས། ཤ་ར་བ་ཆེན་པོས་ལེགས་པར་གཟིགས་ཏེ། འདི་ལ་འདི་ལྟར་འོང་ཐང་ཞེས་འགྱུར་སྐྱོན་གང་བྱུང་ཐམས་ཅད་བྲིས་ནས་རྒྱ་དཔེ་ལ་ལྟོས་ཞེས་བསྐུར་བ་ན། པ་ཚབ་ལོ་ཙཱ་བས་རྒྱ་དཔེ་ལ་གཟིགས་པས་ཤ་ར་བས་གང་གསུངས་པ་དེ་ཁོ་ན་བཞིན་དུ་བྱུང་བས། དགེ་བའི་བཤེས་གཉེན་ཤ་ར་བ་ལ་རྒྱལ་བའི་བཀའ་འགྱུར་རོ་ཅོག་ཐུགས་ལ་མངའོ་ཞེས་གྲགས་པ་བྱུང་ངོ༌། །
        དགེ་བའི་གཤེས་གཉེན་ཤ་ར་བ་འདི་ཉིད་བཀའ་གདམས་གླེགས་བམ་ལས་གསལ་བར་ལུང་བསྟན་པ་ཡིན་ཏེ། དད་པ་རབ་ཏུ་བརྟན་པའི་འཁྲུངས་རབས་ལས། དེས་ན་རྒྱལ་པོ་དགེ་བ་དཔལ། །ཁྱོད་ཀྱི་སྲས་ཀྱི་སྲོལ་འཛིན་པ། །ཤ་ར་བ་ཞེས་ཡུལ་ལས་གྲགས། །ཞེས་པ་དང༌། ལུང་བསྟན་གྱི་ལེའུ་ལས། ཡོན་ཏན་གྲགས་པས་ཟབ་གཞུང་རྣམས། །རྫོགས་པར་མཛད་ནས་དར་ཡུལ་མདར། །དག་སྣང་གང་ཤར་དགོན་པ་བཞེངས། །དེ་ནས་ཤ་ར་བ་ཞེས་གྲགས། །ཞང་རྗེ་རོམ་པོའི་མི་རིགས་གཅིག །གཏན་གྱི་དོན་གཉེར་གུས་པས་མཆི། །ཞེས་དང༌། དག་པའི་སྣང་བ་རབ་ཤར་བ། །རྒྱལ་བ་རྒྱ་མཚོ་ལས་འཁྲུངས་ཤིང༌། །མཁས་པ་ང་ནི་ལས་ཅན་རྣམས། །ཕྱོགས་བཞིར་འགྲོ་ཞིང་འདྲེ་ན་ཡང༌། །དབུས་འདིར་ཤར་བ་པ་ཞེས་གྲགས། །འདི་ནི་ཤར་གྱི་མཐའ་འཁོབ་འདུལ། །དེ་ནས་ནུབ་ཕྱོགས་མཐའ་འཁོབ་ཏུ། །ཤར་པ་ཅི་འདྲ་རྩ་ཡུལ་དང༌། །ཞིང་དང་གྲོང་པ་དག་གིས་དབེན། །སྐྱ་བོ་རྒྱ་ཆེན་ཞག་མེད་ཅིག །སྣུམ་ཞིང་སྐལ་བཟང་དུ་མ་སྡུད། །ཅེས་གསུངས་སོ། །
        དེ་ལྟར་སེམས་དཔའ་ཆེན་པོ་ཤ་ར་བས་བསྟན་འགྲོའི་དོན་རྒྱ་ཆེར་མཛད་ནས། མ་འོངས་པའི་གདུལ་བྱ་རྣམས་ཀྱི་དོན་དུ་བྱང་ཆུབ་ལམ་གྱི་རིམ་པའི་ཁྲིད་ཡིག་ཆེ་ཆུང་གཉིས་དང་། དགེ་བའི་བཤེས་གཉེན་པོ་ཏོ་བའི་རྣམ་ཐར་ཚིགས་བཅད་མ་ཞིག་ཀྱང་མཛད། དགེ་བཤེས་ཤ་ར་བ་འདིས་བྱང་ཆུབ་ལམ་གྱི་སྒྲོན་མ་འཆད་སྐབས་ཇི་ལྟར་གསུངས་པ་རྣམས་ཟིན་བྲིས་སུ་བཀོད་པ་ལམ་སྒྲོན་གྱི་འགྲེལ་པ་རྒྱས་ཤིང་ངོ་མཚར་རྨད་དུ་བྱུང་བ་ཞིག་ཀྱང་སྣང་ངོ༌། །
        བདག་ཉིད་ཆེན་པོ་འདིས་ལོ་སུམ་ཅུ་རྩ་དྲུག་ཏུ་ཚོགས་པ་བསྐྱངས་ནས་བསྟན་པའི་བྱ་བ་རྒྱ་ཆེར་མཛད་ཅིང༌། དེ་ཡང་ཇོ་བོ་རྗེ་དཔལ་ལྡན་ཨ་ཏི་ཤའི་མན་ངག་སྐྱེས་བུ་གསུམ་གྱི་ལམ་གྱི་རིམ་པ་ཁོ་ནས་གདུལ་བྱའི་དོན་མཛད་ཅིང༌། རྒྱལ་བའི་བཀའ་དང་ཤིང་རྟ་ཆེན་པོའི་གཞུང་ཐམས་ཅད་སྐྱེས་བུ་གསུམ་གྱི་ལམ་རིམ་ཁོ་ནའི་སྟེང་དུ་འབབ་པར་མཛད། རྐྱེན་བཟང་ངན་གང་བྱུང་ཡང་ཚུལ་ཁྲིམས་རྣམ་པར་དག་པ་བསྲུང་བ་གཞིར་བཞག་ནས། བྱང་ཆུབ་ལམ་གྱི་རིམ་པ་སྒོམ་པ་ཉིད་མཛད་པ་ལས་རང་ཉིད་དང་སློབ་མ་སུ་ལའང་མོ་བོན་གྱི་བཅོས་ཀ་སོགས་ཅབ་ཙུབ་ཡེ་མི་མཛད། དགེ་འདུན་སུམ་སྟོང་འདུས་ཏེ། དེ་ཐམས་ཅད་རྒྱལ་བ་རང་ཉིད་ཀྱིས་ཇི་ལྟར་གསུངས་པའི་ཚུལ་ཁྲིམས་རྣམ་པར་དག་པ་དང་། ལམ་རྣམ་པར་དག་པ་སྒོམ་པ་ལ་སྦྱར་ཏེ། ཐམས་ཅད་རྣམ་ཐར་གཙང་མ་རྒྱལ་བ་རང་ཉིད་དངོས་སུ་བཞུགས་པའི་དུས་ཀྱི་མཛད་པ་རྣམ་ཐར་ཇི་བཞིན་དུ་སྐྱོང་བར་མཛད་དོ། །
        དེ་ལྟར་དགེ་བའི་བཤེས་གཉེན་ཤ་ར་བ་ཆེན་པོས་བསྟན་པའི་དོན་རྒྱ་ཆེར་མཛད་ནས། དགུང་ལོ་བདུན་ཅུ་དོན་གཉིས་པ་ལྕགས་མོ་བྱའི་ལོ་རྒྱལ་གྱི་ཟླ་བའི་ཚེས་ཉེར་དྲུག་ལ་སྐུའི་བཀོད་པ་བསྡུས་ཏེ་དགའ་ལྡན་ཆོས་ཀྱི་ཕོ་བྲང་དུ་ཕེབས་སོ། །དེ་ནས་དེར་ཚོགས་པའི་དགེ་འདུན་རྣམས་ཀྱིས་ཟླ་བ་ཕྱེད་ཀྱི་བར་སྐུ་གདུང་རིལ་པོར་བཞུགས་པའི་མདུན་དུ་རྒྱལ་བའི་ཡུམ་བསྒྲགས་ཤིང་། མཆོད་པ་རྒྱ་ཆེན་ཕུལ། དེ་ནས་སྤུར་སྦྱངས་ཏེ་གདུང་དང་རིང་བསྲེལ་ན་བཟའ་རྣམས་དགེ་འདུན་སྟོང་དང་བདུན་བརྒྱས་བགོས་ཏེ། ཕྱོགས་ཕྱོགས་སུ་ཕྱག་དང་མཆོད་པའི་རྟེན་དུ་བཞུགས་ཤིང༌། སློབ་མ་རྣམས་ཀྱིས་བདག་ཉིད་ཆེན་པོའི་གསུང་ལྟར་ཕྱོགས་ཕྱོགས་སུ་སྒྲུབ་པའི་རྒྱལ་མཚན་བཙུགས་ཏེ་དགོངས་པ་ཡོངས་སུ་རྫོགས་པར་མཛད་དོ། །
        དེ་ལྟར་དགེ་བའི་བཤེས་གཉེན་ཤ་ར་བ་ཆེན་པོ་ལ་སློབ་མ་སྟོང་ཕྲག་མང་པོ་འདུས་པའི་ནང་ནས་འགྲན་པའི་ཟླ་ཐམས་ཅད་དང་བྲལ་བ་བཀའ་གདམས་བསྟན་པའི་སྲོག་ཤིང་དུ་གྱུར་པ་རྒྱལ་བའི་གདུང་འཚོབ་ཆེན་པོ་ནི་སེམས་དཔའ་ཆེན་པོ་འཆད་ཁ་བ་ཡིན་ལ། སེམས་དཔའ་ཆེན་པོ་འདིའི་རྣམ་ཐར་ནི་འཆད་པར་འགྱུར་ལ། གཞན་ཡང་གཏུམ་སྟོན་བློ་གྲོས་གྲགས་ལ་སོགས་པ་འཕྲིན་ལས་རྒྱ་ཆེར་སྤེལ་བའི་བསྟན་འཛིན་དམ་པ་མང་དུ་བྱོན་ནོ། །
        དེ་ལ་གཏུམ་སྟོན་བློ་གྲོས་གྲགས་པ་ནི། ཤབ་སྒོ་ལྔའི་ལྕགས་མཁར་རྩེའི་དབུ་མང་དུ་མེ་ཕོ་ཁྱི་ལ་འཁྲུངས། གདུང་རུས་གཏུམ། རྔོག་ཚོའི་མཁན་པོ་ལྡོག་ཅོད་པ་ཆེན་པོ་ལས་རབ་ཏུ་བྱུང་ཞིང་བསྙེན་པར་རྫོགས། མཁན་པོ་དེ་ཉིད་དང་རྒྱ་འདུལ་འཛིན་ལ་འདུལ་བ་ལེགས་པར་བསླབས་ཏེ་འདུལ་བའི་བཤད་པ་ཡང་མཛད། དེ་ནས་དབུས་སུ་བྱོན་ཏེ་ཤ་ར་བ་ལོ་བཅུའི་བར་དུ་བསྟེན་ཅིང་མཉེས་པར་མཛད་དེ། བཀའ་གདམས་ཀྱི་ཡོན་ཏན་མ་ལུས་པ་ཐུགས་སུ་ཆུད་པར་མཛད། ཤ་ར་བ་མྱ་ངན་ལས་འདའ་ཁར། དགེ་འདུན་ལ་ཞལ་ཆེམས་གནང་བའི་རྗེས་ལ་གཏུམ་སྟོན་བློ་གྲོས་གྲགས་པ་ལ་གཙང་པ་འདུལ་འཛིན་ཞེས་བོས་ཏེ། ཆོས་ཀྱི་འཕྲོ་ཅུང་ཟད་གནང་ནས། ལྷག་མ་སྐྱེ་བ་ཕྱི་མ་ལ་བྱེད་པ་ཡིན་ནོ། །ཁྱོད་ཀྱང་དགེ་སློང་བཞི་སྡེ་རེ་དང་འགྲོགས་ཤིག་ཅེས་གསུངས་ནས་ཤ་ར་བ་ལྕགས་བྱ་ལ་སྐུ་གཤེགས། དེ་ནས་ཆུ་བྱའི་བར་གནས་ཅི་རིགས་པར་བཞུགས་ནས། དེ་རྗེས་སྣར་ཐང་གི་མདའི་ཐང་སྟོང་ལ་ལོ་ར་ཞིག་ཡོད་པར་སྤྱིལ་པོ་མཛད་ནས་འམ་བུ་འདིར་དགེ་སྦྱོར་བྱེད་པ་ཡིན་གསུངས་ཏེ། ཐོག་མར་ཆུ་མོ་བྱ་ལ་ཕེབས། དགེ་སློང་བཞི་སྡེ་དང་བཅས་ཏེ་དགོན་པ་བཏབ་ནས་ལོ་བཅུ་བཞི་བཞུགས། དེ་རྗེས་ལ་སྟོད་བྱང་གི་རྟ་སྡེ་ཆོས་ལུང་དུ་བྱོན་ནས་ཐུགས་དམ་མཛད། དྲུག་ཅུ་རྩ་གཅིག་པ་མེ་ཕོ་ཁྱིའི་ལོ་རྒྱལ་གྱི་ཟླ་བའི་ཉི་ཤུ་གསུམ་ལ་མྱ་ངན་ལས་འདས། འདི་ལ་ཆོས་ལུང་སྐུ་གཤེགས་ཞེས་ཀྱང་གྲགས་སོ། །
        གཏུམ་སྟོན་བློ་གྲོས་གྲགས་ཀྱི་རྗེས་སུ་སྣར་ཐང་གི་གདན་སར་སྡོ་སྟོན་ཤེས་རབ་གྲགས་པ། ཞང་བཙུན་རྡོ་རྗེ་འོད། དཔལ་ལྡན་གྲོ་མོ་ཆེ། ཆོས་ཀྱི་བླ་མ། ཐུགས་རྗེ་ཆེན་པོའི་སྤྲུལ་པ་སངས་རྒྱས་སྒོམ་པ། མཆིམས་ཆེན་མོ་ནམ་མཁའ་གྲགས་སོགས་རིམ་གྱིས་བྱོན་ཏེ། མཆིམས་ནམ་མཁའ་གྲགས་འདིས་སྣར་ཐང་དུ་སྡེ་སྣོད་གསུམ་གྱི་བཤད་པ་རྒྱ་ཆེར་སྤེལ་ཞིང༌། ཤིང་རྟ་ཆེན་པོ་རྣམས་ཀྱི་གཞུང་ཕལ་ཆེ་བ་འགའ་ཞིག་ལ་འགྲེལ་པ། འགའ་ཞིག་ལ་བསྡུས་དོན་མཛད། འདིས་འཛད་པའི་མངོན་པ་མཛོད་ཀྱི་ཊཱིཀ་ཆེན་ངོ་མཚར་རྨད་དུ་བྱུང་བ་ཞིག་ཀྱང་ཡོད་དོ། །བདག་ཉིད་ཆེན་པོ་འདི་འཕགས་པའི་གནས་བརྟན་གྱི་སྤྲུལ་པར་གྲགས་ཤིང་། འདིའི་རིང་ལ་གནས་བརྟན་བཅུ་དྲུག་སྣར་ཐང་དུ་ཡང་ཡང་ཞལ་འཛོམས་པ་བྱུང་ཞིང༌། འགྲོ་མགོན་ཆོས་རྒྱལ་འཕགས་པ་དང༌། བཅོམ་ལྡན་རིག་རལ་དང༌། དབུས་པ་བློ་གསལ་དཔོན་སློབ་སོགས་བསྟན་འཛིན་ཆེན་པོ་མང་པོས་ཀྱང་འདིའི་ཞབས་ལ་གཏུགས་ཤིང༌། གཙོ་བོར་བྱང་ཆུབ་ལམ་གྱི་རིམ་པ་རྒྱ་ཆེར་བཤད་ནས། དཔལ་སྣར་ཐང་བསྟན་པ་མ་ཚང་བ་མེད་པའི་འབྱུང་གནས་སུ་བསྒྲུབས་སོ། །
        འདིའི་རྗེས་སུ་སྣར་ཐང་གི་གདན་སར་སྐྱོ་སྟོན་པ་དང༌། མཁན་ཆེན་ཉི་མ་རྒྱལ་མཚན་པ་སོགས་རིམ་པར་བྱོན་ཞིང༌། རྗེ་ཤེས་རབ་སེང་གེ་དང༌། རྗེ་དགེ་འདུན་གྲུབ་དང༌། འདུལ་འཛིན་བློ་གྲོས་སྦས་པ་སོགས་བསྟན་པའི་ཉི་མ་ཆེན་པོ་མང་དུ་བྱོན་ཏེ། རྗེ་དགེ་འདུན་གྲུབ་པ་ཡབ་སྲས་ཀྱི་བར་དུ་བྱོན་པ་ཐམས་ཅད་ཚུལ་ཁྲིམས་རྣམ་པར་དག་ཅིང༌། སྡེ་སྣོད་ལ་ནང་བྱན་ཆུད་པ། འཆལ་པ་དང༌། དམ་ཉམས་དང༌། འདྲེས་ཁྱེར་གྱིས་མ་བསླད་པ། དགེ་བཤེས་སྟོན་པ་ནས་བརྒྱུད་པའི་རྣམ་པར་ཐར་པ་དྲི་མ་མེད་པ་འཛིན་པ་ཤ་སྟག་ཡིན་ལ། བཀའ་གདམས་གཞུང་པའི་བཤད་སྲོལ་ལ་བརྟེན་ནས་སྐྱེས་བུ་གསུམ་གྱི་ལམ་གྱི་རིམ་པ་འཆད་པ་དང་ཉན་པ་དང་སྒོམ་པ་རྣམས་གཙོ་བོར་འདོན་ཞིང༌། ཤིང་རྟ་ཆེན་པོའི་གཞུང་སྤྱི་དང་ཁྱད་པར་བྱང་ས་དང་མདོ་སྡེ་རྒྱན་སྐྱེས་རབས་དང་ཚོམས། བསླབ་བཏུས་དང་སྤྱོད་འཇུག་སྟེ་གཞུང་དྲུག་པོ་དེ་སྐྱེས་བུ་གསུམ་པོའི་ལམ་གྱི་མན་ངག་ཏུ་རྩལ་དུ་བཏོན་ནས། འཆད་ཉན་མཛད་ཅིང་། བློ་སྦྱོང་དོན་བདུན་མ་དང་། བཀའ་གདམས་ཐིག་ལེ་བཅུ་དྲུག་ལྐོག་ཆོས་སུ་མཛད་དེ་ཉམས་ལེན་མཛད་དོ། །
        དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་དགེ་བའི་བཤེས་གཉེན་ཤ་ར་བ་ཆེན་པོ་ལ་གསོལ་བ་འདེབས་ཤིང་། བདག་ཉིད་ཆེན་པོ་འདིའི་རྣམ་ཐར་ལྟར་བསྟན་པ་ཡོངས་རྫོགས་ཉམས་ལེན་གྱི་ལུས་གཅིག་ཏུ་དྲིལ་བའི་མན་ངག་བྱང་ཆུབ་ལམ་གྱི་རིམ་པར་སྒོམ་པ་ལ་སྐྱེས་བུའི་རྩལ་ཅི་ཡོད་ཀྱིས་འབད་པར་བྱའོ།། །།