༄༅།།ཐེ་གོ་རྒྱལ་ཁབ་ཀྱི་མན་ཀུའུ་གྲོང་ཁྱེར།

མན་ཀུའུ་ནི་ཐེ་གོ་རྒྱལ་ཁབ་ཀྱི་རྒྱལ་ས་ཡིན། ཐེ་གོ་རྒྱལ་ཁབ་ཡོངས་ཀྱིས་ནང་བ་སངས་རྒྱས་ཀྱི་ཆོས་ལུགས་ལ་དད་པ་བྱེད་པ་ཡིན་པས། མན་ཀུའུ་གྲོང་ཁྱེར་དུ་དགོན་པ་བཞི་བརྒྱ་ལྷག་མཆིས། དགོན་པ་དེ་དག་བཟོ་བཀོད་ཤིན་ཏུ་ལེགས་པས་ཉི་འོད་ཀྱི་འོག་ན་སེར་ལམ་མེར་མཆིས། མན་ཀུའུ་ཞེས་པ་ནི་གསལ་བྱེད167ཀྱི་བསྡུས་མིང་ཞིག་སྟེ། མིང་དེའི་དོན་ངོ་མ"ལྷའི་ཕོ་ཉའི་མཁར་རྫོང"དང་། "རླབས་ཆེན་གྱི་གྲོང་ཁྱེར""སྟོན་པའི་གཡུ་སྐུའི་དགོན་པ""ཆགས་འཇིག་མེད་པའི་གྲོང་ཁྱེར""སྟོན་པའི་གཙུག་ཏོར" "རིན་ཆེན་ལེབ་བདུན་གནང་བའི་འཛམ་གླིང་གྲོང་ཁྱེར་ཆེན་པོ""ལྷ་ལ་དབང་བསྒྱར་བའི་བརྗིད་ཉམས་ལྡན་པའི་ལྷའི་ཕོ་བྲང""ལྷའི་བརྒྱ་བྱིན་གྱིས་གནང་ཞིང་ལྷ་དབང་ཕྱུག་གསང་ཁྱེར་ཆེན་པོ"ཞེས་པ་བཅས་ཡིན། ལོ་རྒྱུས་ཀྱི་དུས་ཡུན་རིང་བའི་མན་ཀུའུ་གྲོང་ཁྱེར་དུ་དགོན་གྲྭ་མང་ཞིང་བཟོ་བཀོད་ཕུན་སུམ་ཚོགས་པ་ཡོད་དེ། གསེར་འོད་ལམ་ལམ་དུ་འཕྲོ་བའི་རྒྱལ་པོའི་ཕོ་བྲང་དང་། གསེར་གྱི་རྒྱ་ཕིབས་ལྡན་པའི་གཡུ་སྐུའི་དགོན་པ། རྔམ་བརྗིད་ལྡན་པའི་སྟོན་པ་མྱང་འདས་དགོན་པ། ངོ་མཚར་ངག་རྒྱུན་ལྡན་པའི་གསེར་སྐུ་དགོན་པ། བརྗིད་ཉམས་ལྡན་པའི་ཀྲུན་ཝང་ལྷ་ཁང་བཅས་ནི་ཆེས་གྲགས་སྐད་ཆེ་བའི་ཕུལ་བྱུང་བཟོ་བཀོད་ཡིན། མན་ཀུའུ་ནི་འཛམ་གླིང་ན་ལྷ་ཁང་དང་དགོན་གྲྭ་ཆེས་མང་བའི་གྲོང་ཁྱེར་ཞིག་ཡིན་པས། "ལྷ་ཁང་གི་གྲོང་ཁྱེར"ཞེས་པའི་མཚན་སྙན་ཡོད།
མན་ཀུའུ་གྲོང་ཁྱེར་ནི་ཀྲོ་ཕེ་ཡེ་ཆུ་བོའི་ཤར་ངོགས་དང་ཁ་ཞན་ལོ་ཝན་མཚོ་ཁུགས་ལ་གཏད་དེ་རྫ་ཆུ( རྫ་ཆུ་ནི་མདོ་དབུས་མཐོ་སྒང་ལས་བརྡོལ་ཏེ་ཐེ་གོ་རྒྱལ་ཁབ་ཀྱི་བྱང་རྒྱུད་དུ་སླེབས་ཚེ་ཡན་ལག་བཞི་རུ་གྱེས་པ་དང་། ཐེ་གོ་རྒྱལ་ཁབ་ཀྱི་དཀྱིལ་དབུས་སུ་སླེབས་ཚེ་ཡན་ལག་བཞི་རུ་གྱེས་པའི་རྫ་ཆུ་སླར་ཡང་ཆབས་ཅིག་ཏུ་འདུས་ཏེ་མན་ཀུའུ་གྲོང་ཁྱེར་བརྒྱུད་དེ་ཐེ་གོ་མཚོ་ཁུགས་ནས་རྒྱ་མཚོར་འདྲེས་པ་ཡིན) རྒྱ་མཚོར་འདྲེས་སའི་མཚམས་ན་ཆགས་ཤིང་། གྲོང་ཁྱེར་ཡོངས་སུ་མི་གྲངས་ཁྲི་ཚོ790ལྷག་ཡོད་པས། ཐེ་གོ་རྒྱལ་ཁབ་ཀྱི་ཆབ་སྲིད་དང་དཔལ་འབྱོར། རིག་གནས། ཆོས་ལུགས། ཚན་རྩལ། སློབ་གསོ། འགྲིམ་འགྲུལ་བཅས་ཀྱི་ལྟེ་བ་ཡིན་པར་མ་ཟད། ཐེ་རྒྱལ་ཁབ་ཀྱི་སྲིད་འཛིན་རྒྱལ་སའང་ཡིན།
མན་ཀུའུ་གྲོང་ཁྱེར་ནི་རྒྱལ་སྤྱིའི་བྱ་འགུལ་སྤེལ་སའི་ལྟེ་གནས་ཤིག་ཀྱང་ཡིན་ཏེ། ལོ་རེར་གྲོང་ཁྱེར་དེ་རུ་རྒྱལ་སྤྱིའི་ཚོགས་འདུ་སུམ་བརྒྱ་ཡས་མས་འཚོགས་བཞིན་འདུག