ཞི་ཅིན་ཕིང་གིས2023ལོའི་འཛམ་གླིང་མཉམ་སྦྲེལ་དྲ་བའི་ཚོགས་ཆེན་ཝུའུ་ཀྲིན་རྩེ་ཚོགས་ཀྱི་མགོ་རྩོམ་མཛད་སྒོར་བརྙན་ལམ་ནས་ཤིས་ཚིག་ཕུལ།

       ཞི་ཅིན་ཕིང་གིས་བསྟན་དོན། 2015ལོར། ངས་སྐབས་གཉིས་པའི་འཛམ་གླིང་མཉམ་སྦྲེལ་དྲ་བའི་ཚོགས་ཆེན་མགོ་རྩོམ་མཛད་སྒོའི་སྟེང་འཛམ་གླིང་མཉམ་སྦྲེལ་དྲ་བའི་འཕེལ་རྒྱས་བཅོས་སྐྱོང་གི་རྩ་དོན་བཞི་དང་འདོད་ཕྱོགས་ལྔ་བཏོན་ནས། དྲ་བའི་བར་སྟོངས་ཀྱི་ལས་དབང་གཅིག་མཐུན་ཚོགས་པ་འཛུགས་སྐྲུན་དར་སྤེལ་དུ་བཏང་ཞིང་། འདུ་ཤེས་འདིར་རྒྱལ་སྤྱིའི་སྤྱི་ཚོགས་ཀྱིས་ངོས་ལེན་རྒྱ་ཆེར་དང་ཧུག་ཐག་གིས་དང་ལེན་ཐོབ། མིག་སྔའི་འཛམ་གླིང་ནི་ཟང་ཟིང་རྙོག་འཛིང་དང་། ལོ་བརྒྱའི་རིང་བྱུང་མ་མྱོང་བའི་འགྱུར་ལྡོག་བྱུང་བཞིན་ཡོད་པས། ཅི་ལྟར་འཕེལ་རྒྱས་ཀྱི་དོན་ཆེན་ཐག་གཅོད་དང་བདེ་འཇགས་ཀྱི་དཀའ་ངལ་སེལ་བ། དཔལ་ཡོན་དཔྱད་གཞིར་འཛིན་པར་ཤུགས་སྣོན་པ་བཅས་ནི་ང་ཚོ་ཐུན་མོང་ལ་འཕྲད་པའི་དུས་རབས་ཀྱི་ཞིབ་འཇུག་བྱ་གཞི་ཡིན། མཉམ་སྦྲེལ་དྲ་བ་ནི་ཉིན་བཞིན་འཕེལ་རྒྱས་ཀྱི་སྒུལ་ནུས་གསར་བར་སྐུལ་འདེད་དང་བདེ་འཇགས་ཀྱི་ས་ཁོངས་གསར་བར་སྲུང་སྐྱོང་བྱེད་པ། དཔལ་ཡོན་དཔྱད་གཞིར་འཛིན་པའི་སྟེགས་བུ་གསར་བར་འགྱུར་བཞིན་ཡོད་ལ། དྲ་བའི་བར་སྟོངས་ཀྱི་ལས་དབང་གཅིག་མཐུན་ཚོགས་པ་འཛུགས་པ་ནི་དུས་རབས་ཀྱི་ཞིབ་འཇུག་བྱ་གཞིར་དྲི་ལན་འདེབས་པའི་དགོས་ངེས་ཀྱི་གདམ་ག་ཞིག་ཡིན་པ་དང་། རྒྱལ་སྤྱིའི་སྤྱི་ཚོགས་ཀྱི་ཐུན་མོང་འབོད་སྒྲའང་ཡིན། ང་ཚོས་བརྗེ་རེས་གཏིང་ཟབ་དང་དངོས་བརྩོན་མཉམ་ལས་བྱས་ཏེ། ཐུན་མོང་ཐོག་དྲ་བའི་བར་སྟོངས་ཀྱི་ལས་དབང་གཅིག་མཐུན་ཚོགས་པ་འཛུགས་སྐྲུན་དེ་དུས་མཚམས་གསར་བར་སླེབས་པར་སྐུལ་འདེད་གཏོང་དགོས།
       ང་ཚོས་འཕེལ་རྒྱས་སྔོན་ལ་འཇོག་པ་དར་སྤེལ་བཏང་ནས། སྔར་བས་ཀུན་ཕན་དར་རྒྱས་ཀྱི་དྲ་བའི་བར་སྟོངས་འཛུགས་སྐྲུན་བྱེད་དགོས། གྲངས་ཀའི་ཁྱབ་ཁོངས་ཀྱི་རྒྱལ་སྤྱིའི་བརྗེ་རེས་མཉམ་ལས་གཏིང་ཟབ་དང་ཚན་རྩལ་གྲུབ་འབྲས་གཞན་སྒྱུར་ཇེ་མགྱོགས་སུ་གཏོང་དགོས། ཆ་འཕྲིན་ཅན་གྱི་ཞབས་ཞུ་ཁྱབ་གདལ་ཇེ་མགྱོགས་སུ་གཏོང་བ་དང་གྲངས་ཀའི་བར་ཁྱད་ཇེ་ཆུང་དུ་བཏང་སྟེ། མཉམ་སྦྲེལ་དྲ་བའི་འཕེལ་རྒྱས་ཁྲོད་དམངས་འཚོར་འགན་སྲུང་དང་ལེགས་བཅོས་བྱས་ནས། སྔར་ལས་མང་པའི་རྒྱལ་ཁབ་དང་མི་དམངས་ཀྱིས་མཉམ་སྦྲེལ་དྲ་བའི་འཕེལ་རྒྱས་གྲུབ་འབྲས་མཉམ་སྤྱོད་བྱེད་དུ་འཇུག་དགོས།        ང་ཚོས་དཔལ་ཡོན་དཔྱད་གཞིར་འཚིན་པ་དར་སྤེལ་བཏང་ནས་སྔར་ལས་འདྲ་མཉམ་ཁོང་ཡངས་ཀྱི་དྲ་བའི་བར་སྟོངས་འཛུགས་སྐྲུན་བྱེད་དགོས། དྲ་ཐོག་གི་བརྗེ་རེས་གླེང་མོལ་ལ་ཤུགས་བསྣན་ཏེ་རྒྱལ་ཁབ་སོ་སོའི་མི་དམངས་བར་གྱི་ཤེས་རྟོགས་མཛའ་བརྩེར་སྐུལ་སྤེལ་བྱེད་པ་དང་། དཔལ་ཡོན་མི་འདྲ་བའི་ཁོང་ཡངས་མཉམ་ལས་ལ་སྐུལ་འདེད་བཏང་སྟེ། སྔར་ལས་ལྷག་པར་མིའི་རིགས་ཡོངས་ཀྱི་ཐུན་མོང་རིན་ཐང་ལྟ་བ་དར་སྤེལ་གཏོང་དགོས། དྲ་བའི་དཔལ་ཡོན་འཛུགས་སྐྲུན་ལ་ཤུགས་བསྣན་ཏེ། སྤུས་ལེགས་དྲ་བའི་རིག་གནས་ཐོན་རྫས་ཐོན་སྐྱེད་རྒྱུད་སྒྲོག་ལ་སྐུལ་འདེད་གཏོང་བ་དང་། མིའི་རིགས་ཀྱི་ཕུལ་བྱུང་དཔལ་ཡོན་གྲུབ་འབྲས་འགྲེམ་སྟོན་གང་ལེགས་བྱས་ཏེ། ཧུར་ཐག་གིས་དཔལ་ཡོན་རྒྱུད་འཛིན་འཕེལ་རྒྱས་ལ་སྐུལ་འདེད་གཏོང་བ་དང་། ཐུན་མོང་ཐོག་དྲ་བའི་བསམ་པའི་ཁྱིམ་གཞིས་འཛུགས་སྐྲུན་བྱེད་དགོས།
       ཞི་ཅིན་ཕིང་གིས་མཇུག་མཐར་ནན་གྱིས་བསྟན་དོན། ཆ་འཕྲིན་གསར་བརྗེའི་རླབས་རྒྱུན་ལ་འགོག་ཐབས་མེད་པར་མདུན་སྐྱོད་བྱེད་བཞིན་ཡོད་ལ། དྲ་བའི་བར་སྟོངས་ཀྱིས་མིའི་རིགས་ཀྱི་མཛེས་སྡུག་གི་མ་འོངས་པར་ཕུགས་རེ་ཚད་མེད་བསྐྲུན་ཡོད། ང་ཚོས་ལག་གདང་མཉམ་སྦྲེལ་གྱིས་དྲ་བའི་བར་སྟོངས་ཀྱི་ལས་དབང་གཅིག་མཐུན་ཚོགས་པ་འཛུགས་སྐྲུན་བྱས་ཏེ། མཉམ་སྦྲེལ་དྲ་བས་སྔར་ལས་ལྷག་པར་འཛམ་གླིང་གི་རྒྱལ་ཁབ་སོ་སོའི་མི་དམངས་ལ་བདེ་སྐྱིད་བསྐྲུན་པ་དང་། ཐུན་མོང་ཐོག་མིའི་རིགས་ཀྱི་མཛེས་སྡུག་གི་མ་འོངས་པ་གསར་སྐྲུན་བྱེད་དགོས།
       2023ལོའི་འཛམ་གླིང་མཉམ་སྦྲེལ་དྲ་བའི་ཚོགས་ཆེན་གྱི་ཝུའུ་ཀྲིན་རྩེ་ཚོགས་ཟླ11པའི་ཚེས8ཉིན་ཀྲེ་ཅང་ཝུའུ་ཀྲིན་དུ་འཚོགས་པ་དང་། བརྗོད་དོན་ནི་ཁོང་ཡངས་དང་ཀུན་ཕན། མཉེན་ཤུགས་ལྡན་པའི་གྲངས་ཀའི་འཇིག་རྟེན་འཛུགས་སྐྲུན་བྱེད་པ་སྟེ། ལག་གདང་མཉམ་སྦྲེལ་སྒོས་དྲ་བའི་བར་སྟོངས་ཀྱི་ལས་དབང་གཅིག་མཐུན་ཚོགས་པ་འཛུགས་དགོས་ཞེས་པ་དེ་ཡིན། །