༄༅།།2020ལོའི་ནོ་པེར་བྱ་དགའི་རང་བྱུང་ཚན་རིག་གི་བྱ་དགའ་ཆེན་པོ་གསུམ་ཚན་རིག་པ8ལ་གནང་བ།

ནོ་པེར་བྱ་དགའི་གཞུང་ཕྱོགས་དྲ་ཐོག་ཏུ་སྤེལ་བའི་གནས་འཕྲིན་ལ་གཞིགས་ན། ཉེ་སྔོན། 2020ལོའི་ནོ་པེར་བྱ་དགའི་རང་བྱུང་ཚན་རིག་གི་བྱ་དགའ་ཆེན་པོ་གསུམ་སྟེ་ལུས་ཁམས་རིག་པའམ་གསོ་བ་རིག་པའི་བྱ་དགའ་དང་དངོས་ལུགས་རིག་པའི་བྱ་དགའ། རྫས་འགྱུར་རིག་པའི་བྱ་དགའ་བཅས་ཀྱི་ཐོབ་མཁན་ཡོངས་བསྒྲགས་བྱས་ཤིང་། ཚན་རིག་པ་བརྒྱད་ལ་བྱ་དགའ་རིགས་གསུམ་པོ་འདི་ཐོབ་པ་རེད། ཟླ10བའི་ཚེས5ཉིན་ལ། ཨ་རིའི་ཚན་རིག་པ་ཧར་བེ་ཨལ་ཐེར་དང་ཆ་ལེ་སི་རེ་སི། དབྱིན་ཇིའི་ཚན་རིག་པ་མའེ་ཁོལ་ཧའོ་ཏོན་གསུམ་གྱིས་མཆིན་ཚད་ནད་དུག་ག་པ་རྙེད་པར་གཞིགས་ནས2020ལོའི་ནོ་པེར་བྱ་དགའི་ལུས་ཁམས་རིག་པའམ་གསོ་བ་རིག་པའི་བྱ་དགའ་གནང་བ་རེད། ཟླ10བའི་ཚེས6ཉིན། དབྱིན་ཇིའི་རིག་གཞུང་དངོས་ལུགས་རིག་པ་བ་རའོ་ལྗེ་ཕེན་རོབ་སེ་ཡིས་ནག་དོང་གི་ཆགས་ཚུལ་རྙེད་པ་དང་། འཇར་མན་གྱི་གནམ་དཔྱད་རིག་པ་བ་རེན་ཧར་ཏི་གེན་ཙེལ་དང་ཨ་རིའི་གནམ་དཔྱད་རིག་པ་བ་ཨན་ཏི་རེ་ཡ་ཀའེ་ཙི་གཉིས་ཀྱིས་དགུ་ཚིགས་ཁྱིམ་རྒྱུད་ཀྱི་དཀྱིལ་གནས་སུ་སྤུས་འབོར་ཆེ་བའི་ཚང་ཚིང་འཁྲིགས་པའི་མཁའ་དངོས་ཤིག་ཡོད་པ་རྙེད་པ་བཅས་ལ་གཞིགས་ནས2020ལོའི་ནོ་པེར་བྱ་དགའི་དངོས་ལུགས་རིག་པའི་བྱ་དགའ་གནང་བ་རེད། ཟླ10བའི་ཚེས7ཉིན། ཧྥ་རན་སེའི་སྐྱེ་དངོས་དང་རྫས་འགྱུར་རིག་པ་བ་ཨེ་མཱ་ཉིའུ་ཨེ་ལི་ཞ་ཨར་ཕང་ཅེ་དང་ཨ་རིའི་སྐྱེ་དངོས་དང་རྫས་འགྱུར་རིག་པ་བ་ལྗེ་ནི་ཧྥེར་ཏོའུ་ཏི་ན་གཉིས་ཀྱིས་རྒྱུད་རྒྱུ་ཚོགས་ཀྱི་སྡེབ་སྒྲིག་ཐབས་ལམ་ཞིག་གསར་སྤེལ་བྱས་པ་ལ་གཞིགས་ནས2020ལོའི་ནོ་པེར་བྱ་དགའི་རྫས་འགྱུར་རིག་པའི་བྱ་དགའ་གནང་བ་རེད།
དགུང་སྔོན་དབྱིངས་ཀྱི་སྐར་ཚོགས་ནས་ནག་དོང་དང་། དེ་ནས་ཕྲ་རྡུལ་གྱི་མཆིན་ཚད་ནད་དུག་ག་པ། དེ་ནས་ཚེ་སྲོག་གི་གསང་ཨང་བཟོ་བཅོས་ཐུབ་པའི་རྒྱུད་རྒྱུ་ཚོགས་སྡེབ་སྒྲིག་གི་ཐབས་ལམ་གསར་བ་འདི་ཚང་མ་ཚན་རིག་པས་གསར་རྙེད་བྱུང་བ་ལ་བརྟེན་ནས་མིའི་རིགས་ཀྱི་ཤེས་བྱའི་མཐའ་ཇེ་ཆེར་བཏང་བ་དང་། མི་མང་པོ་ཞིག་གི་ལས་དབང་བསྒྱུར་ཡོད་པ་རེད།