༄༅།།ཞི་ཅིང་ཕིང་གིས་ཟླ་དཔྱད་འདུ་འགོད་ཀྱི་ཟླ་བའི་ལྷ་མོ་ཨང་ལྔ་བ་རྟགས་ཅན་གྱི་ལས་འགན་ཕུན་སུམ་ཚོགས་པོའི་ངང་ལེགས་གྲུབ་བྱུང་བར་རྟེན་འབྲེལ་ཞུས་པ།

      ཟླ12ཚེས17ཉིན་གྱི་ཆུ་ཚོད་དང་པོ་དང་སྐར་མ59ཡི་ཐོག ཟླ་བའི་ལྷ་མོ་ཨང་ལྔ་བ་རྟགས་ཅན་གྱི་ཕྱིར་ལོག་འཕྲུལ་ཆས་ཀྱིས་ཟླ་བའི་གོ་ལའི་མ་དཔེ་འཁྱེར་ནས་ནང་སོག་སི་ཙི་ཝང་ཆིའི་སྔོན་གཏན་འཁེལ་བའི་ས་ཁོངས་སུ་བདེ་འཇགས་ངང་བབས་པས། ཟླ་དཔྱད་འདུ་འགོད་ཀྱི་ཟླ་བའི་ལྷ་མོ་ཨང་ལྔ་བ་རྟགས་ཅན་གྱི་ལས་འགན་ཕུན་སུམ་ཚོགས་པོའི་ངང་ལེགས་གྲུབ་བྱུང་བ་རེད། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུ་ཡི་ཀྲུའུ་ཞི་བཅས་ཡིན་པའི་ཞི་ཅིང་ཕིང་གིས་རྟེན་འབྲེལ་གློག་འཕྲིན་བཏང་ཞིང་། ཁོང་གིས་ཏང་ཀྲུང་དབྱང་དང་། རྒྱལ་སྲིད་སྤྱི་ཁྱབ་ཁང་། ཀྲུང་དབྱང་དམག་ཨུ་བཅས་ཀྱི་ཚབ་ཞུས་ནས་ཟླ་དཔྱད་འདུ་འགོད་ལས་འགན་བཀོད་འདོམས་པུའུ་དང་ཟླ་བའི་ལྷ་མོ་ཨང་ལྔ་བ་རྟགས་ཅན་གྱི་ལས་འགན་ནང་ཞུགས་མཁན་བློ་མཐུན་ཡོངས་ལ་སྤྲོ་སེམས་འཁོལ་བའི་རྟེན་འབྲེལ་ཞུས་པ་དང་ལྷག་བསམ་ཟོལ་མེད་ཀྱི་འཚམས་འདྲིའང་གནང་བ་རེད།       ཞི་ཅིང་ཕིང་གི་རྟེན་འབྲེལ་གློག་འཕྲིན་ནང་། ཟླ་བའི་ལྷ་མོ་ཨང་ལྔ་བ་རྟགས་ཅན་གྱི་ལས་འགན་དེ་རང་རྒྱལ་གྱི་རྙོག་འཛིང་ཆེ་ཤོས་དང་ལག་རྩལ་བར་བརྒལ་ཆེ་ཤོས་ཀྱི་འཇིག་རྟེན་འཕུར་སྐྱོད་མ་ལག་གི་འདུ་འགོད་ཞིག་ཡིན་པའི་ངོས་ནས། རང་རྒྱལ་གྱིས་སའི་གོ་ལའི་ཕྱི་རོལ་གྱི་ནམ་མཁའི་ཁམས་ནས་མ་དཔེ་བླངས་ཏེ་ཕྱིར་ལོག་བྱེད་ཐེངས་དང་པོ་དེ་རེད་ལ། འདི་ནི་རྒྱལ་ཡོངས་ཀྱི་སྒྲིག་སྲོལ་ལེགས་ཆ་གསར་བ་འདོན་སྤེལ་གྱིས་འགག་སྒྲོལ་དཀའ་སེལ་བྱས་ནས་ཐོབ་པའི་གྲུབ་འབྲས་གལ་ཆེན་གཞན་ཞིག་ཀྱང་རེད། དེ་ཐོག་ནས་ཀྲུང་གོའི་འཇིག་རྟེན་འཕུར་སྐྱོད་ཀྱི་བྱ་གཞག་འཕེལ་རྒྱས་ཤུགས་ཆེན་ཕྱིན་ནས་མིའི་རིགས་ཀྱིས་ཟླ་བའི་གོ་ལ་གྲུབ་རྐྱེན་དང་ཉི་མའི་ཁྱིམ་རྒྱུད་རིམ་འགྱུར་གྱི་ལོ་རྒྱུས་ལ་ཚན་རིག་དང་མཐུན་པའི་ངོས་འཛིན་བྱེད་ཟབ་ཏུ་གཏོང་ཆེད་ལེགས་སྐྱེས་འབུལ་རྒྱུ་ཡིན་པ་མཚོན་ཡོད། ཁྱེད་ཚོའི་གཟེངས་སུ་ཐོན་པའི་མཛད་རྗེས་མེས་རྒྱལ་དང་མི་དམངས་ཀྱིས་དུས་ནམ་ཡང་བརྗེད་མི་སྲིད་ཅེས་བསྟན་པ་རེད།        ཟླ་བའི་ལྷ་མོ་ཨང་ལྔ་བ་རྟགས་ཅན་གྱི་ལས་འགན་ལེགས་གྲུབ་བྱུང་བ་ལས། རང་རྒྱལ་གྱིས་ཐེངས་དང་པོ་ཟླ་ངོས་ཀྱི་མ་དཔེ་འཚོལ་བསྡུ་དང་ཐུམ་རྒྱག་པ་དང་། ཟླ་ངོས་སུ་འཕུར་སྐྱོད། ཟླ་བའི་གོ་ལའི་འཁོར་ལམ་སྣོལ་འདུ་འབྲེལ་མཐུད་ཐུབ་པ། མ་དཔེ་འཁྱེར་ནས་ཕྱིར་ལོག་པ་སོགས་ཀྱི་ཐད་ཚད་བརྒལ་ཆེན་པོ་བྱུང་ཞིང་། དེ་དག་བདེ་བླག་ངང་ལག་བསྟར་བྱས་པ་ལས་རང་རྒྱལ་གྱི་ཟླ་དཔྱད་འདུ་འགོད་ཀྱིས“བསྐོར་དང་། བབས།  ལོག”བཅས་གོམ་སྟབས་གསུམ་གྱི་འཆར་འགོད་དུས་བཀག་ལྟར་ལེགས་གྲུབ་བྱུང་བ་མཚོན་ཡོད།