ཕ་རི་སིའི་ཨོ་རྩལ་འགྲན་ཚོགས་མཇུག་འགྲིལ་བ།

       ས་གནས་དེ་གའི་དུས་ཚོད་ཟླ8པའི་ཚེས11ཉིན། སྐབས33པའི་དབྱར་དུས་ཨོ་རྩལ་འགྲན་ཚོགས་དེ་ཕ་རི་སིའི་ཧྥ་ལན་ཞིའི་ལུས་རྩལ་ཐང་དུ་མཇུག་འགྲིལ་ཡོད།

       མཇུག་སྒྲིལ་མཛད་སྒོའི་འགོ་ཚུགས་མ་ཐག ཨོ་རྩལ་དཔལ་འབར་གྱི་མེ་དལ་བུར་ཡལ་བ་དང་བསྟུན་ནས་ཧྥ་རན་སིའི་ཆུ་རྐྱལ་ལུས་རྩལ་པ་མར་ཧྲང་གིས་ཉར་ཚགས་བྱས་པའི་དཔལ་འབར་གྱི་མེ་སོན་སྲུང་སྐྱེལ་བྱས་ཏེ་ཧྥ་ལན་ཞི་ལུས་རྩལ་ཐང་དུ་བསྐྱོད་ཡོད།

       ཧྥ་ལན་ཞི་ལུས་རྩལ་ཐང་གི་གར་སྟེགས་ནི་འཛམ་གླིང་ས་ཁྲའི་བཟོ་དབྱིབས་སུ་ཇུས་འགོད་བྱས་ཡོད་ལ། རྒྱང་རིང་ནས་བལྟས་ན་མཁའ་དབྱིངས་སུ་ནམ་འཕང་གཅོད་པའི་ཞི་བདེའི་ཕུག་རོན་ཞིག་དང་གཉིས་སུ་མི་སྣང་། དེ་རྗེས“གླིང་ཆེན་ལྔ”སོ་སོ་ནས་ཨ་ལོང་རེ་བསྒྲེངས་ཏེ་ཨོ་རྩལ་འགྲན་ཚོགས་ཀྱི་ཨ་ལོང་ལྔ་གྲུབ་ཡོད།

       མཇུག་སྒྲིལ་མཛད་སྒོའི་ཐོག་ལུས་རྩལ་པ་ཚོ་འཐུས་མི་ཚོགས་པའི་དབྱེ་མཚམས་བརྒལ་ནས་མཉམ་དུ་ཚོགས་རའི་ནང་དུ་འཛུལ་བ་དང་། ལྗིད་འདེགས་ཨོ་རྩལ་གྱི་ཨང་དང་པོ་ལི་ཧྥ་པིན་དང་བུད་མེད་དབྱུག་ཀྱོག་སྤོ་ལོ་རུ་ཁག་གི་རུ་དཔོན་ཨོའུ་ཙི་ཞ་གཉིས་ཀྲུང་གོའི་ལུས་རྩལ་འཐུས་མི་ཚོགས་པའི་དར་ཆ་འཁྱེར་མཁན་ཡིན་པའི་ངོས་ནས། ལག་ཏུ་སྐར་ལྔའི་དར་དམར་འཁྱེར་ཏེ་ཚོགས་རའི་ནང་བསྐྱོད་ཡོད། ཡུལ་དངོས་སུ་སྤྲོ་སེམས་ཀྱི་རྣམ་པས་ཡོངས་སུ་ཕྱུག་ཅིང་། དྲ་གྲོགས་ཚོས“མིག་དབང་འཕྲོག་ཤོས་ཀྱི་ཀྲུང་གོའི་དམར་མདངས”ཞེས་དགའ་འབོད་བྱེད་བཞིན་མཆིས།

       སྐབས་འདིའི་ཨོ་རྩལ་འགྲན་ཚོགས་ཀྱི་ཀྲུང་གོའི་ལུས་རྩལ་འཐུས་མི་ཚོགས་པར་གསེར་གྱི་རྟགས་མ40དང་། དངུལ་གྱི་རྟགས་མ27 ཟངས་ཀྱི་རྟགས་མ24བཅས་ཐོབ་པ་དང་། ཁྱོན་བྱ་དགའི་རྟགས་མ91ཐོབ་ནས་མངའ་ཁོངས་ཕྱིར་ཨོ་རྩལ་འགྲན་ཚོགས་ནང་ཞུགས་པའི་གྲུབ་འབྲས་ཡག་ཤོས་བཏོད་ཡོད།

       སྐད་གྲགས་ཅན་གྱི་དབྱུག་ལྡེམ་རོལ་ཆའི་རུ་ཁག་དང་རོལ་མོ་བ་སོགས་མང་པོ་ཞིག་གིས་ངོ་མཚར་ཆེ་བའི་འཁྲབ་སྟོན་བྱས་པ་དང་། དེ་གར་ཡོད་པའི་ལུས་རྩལ་པ་དང་ལྟད་མོ་བ་ཚོས་རབ་དགའི་རོལ་རྩེད་ལ་ཞུགས་ནས་ཁོང་ཚོར་ཐོབ་པའི་གྲུབ་འབྲས་དང་མཛའ་བརྩེ་ལ་རྟེན་འབྲེལ་ཞུས་ཡོད།

       མཇུག་སྒྲིལ་མཛད་སྒོའི་ཤིས་ཚིག་སྒྲོན་པའི་བར་སྐབས་སུ། རང་རྒྱལ་གྱི་ཕིང་ཕང་སྤོ་ལོའི་ལུས་རྩལ་པ་སུན་དབྱིན་ཧྲ་ཨ་ཤེ་ཡའི་ལུས་རྩལ་པའི་འཐུས་མི་ཡིན་པའི་ངོས་ནས་གར་སྟེགས་ཐོག་ཕེབས་ཡོད། ཐེངས་འདིའི་ཨོ་རྩལ་འགྲན་ཚོགས་སྟེང་སུན་དབྱིན་ཧྲ་ལ་གསེར་གྱི་རྟགས་མ་གཉིས་དང་དངུལ་གྱི་རྟགས་མ་གཅིག་བཅས་བྱ་དགའ་གསུམ་ཐོབ་ཡོད།

       རྒྱལ་སྤྱིའི་ཨོ་ལིམ་ཕིག་ཨུ་ཡོན་ལྷན་ཁང་གི་ཀྲུའུ་ཞི་པ་ཧོ་ཡིས་ཤིས་ཚིག་ནང་། འདི་ནི་མི་རྣམས་ཧང་སངས་དགོས་པའི་ཨོ་རྩལ་འགྲན་ཚོགས་ཤིག་ཡིན་ཏེ། སྐབས་འདིའི་ཨོ་རྩལ་འགྲན་ཚོགས་ནི་སེ་ན་གཙང་པོ་དང་འདྲ་བར་མི་རྣམས་ཧང་སངས་དགོས་པ་དང་ཡིད་དབང་འཕྲོག་པ་ཞིག་རེད་ཅེས་གསུངས།

       ཨོ་རྩལ་འགྲན་ཚོགས་ཀྱི་དར་ཆ་དེ་ཕ་རི་སིའི་གྲོང་ཁྱེར་འགོ་འཛིན་གྱིས་རྒྱལ་སྤྱིའི་ཨོ་ལིམ་ཕིག་ཨུ་ཡོན་ལྷན་ཁང་གི་ཀྲུའུ་ཞི་པ་ཧོ་བརྒྱུད་དེ། 2028ལོའི་ཨོ་རྩལ་འགྲན་ཚོགས་གཉེར་མཁན་ལུའོ་ཧྲན་ཅི་གྲོང་ཁྱེར་གྱི་འགོ་འཛིན་གྱི་ལག་ཏུ་སྤྲད་པ་དང་། དབྱར་དུས་ཀྱི་ཨོ་རྩལ་འགྲན་ཚོགས་དེ་དངོས་སུ་ལོ་ཧྲན་ཅིའི་དུས་ཚོད་ལ་སླེབས་པ་རེད།

       སྐབས་དེར་ཐང་མུའུ་·ཁེ་ལུའུ་སི་གློ་བུར་དུ“གནམ་ནས་བབས”ཏེ་ཉེན་ཁ་ཆེ་བའི་གློག་བརྙན«མི་སྲིད་པའི་འགན་འཁྲི»ཞེས་པའི་དུམ་ཚན་ཞིག་འཁྲབ་སྟོན་བྱས་པ་དང་། ཁོང་གིས་ཨ་ལོང་ལྔའི་དར་ཆ་བླངས་རྗེས་སྔོན་ལ་སྦག་སྦག་བཞོན་ནས་ཕ་རི་སིའི་ཁྲོམ་གཞུང་དུ་བྱ་འཕུར་བ་ལྟར་བརྒྱུགས་པ་དང་། དེ་རྗེས་གནམ་གྲུར་བསྡད་དེ་ལུའོ་ཧྲན་ཅི་ནས་ཐུར་དུ་བབས་པ་མ་ཟད། “ཧའོ་ལེ་ཝུའུ”རི་སྟེང་དུ་ཨོ་རྩལ་འགྲན་ཚོགས་ཀྱི་ཨ་ལོང་ལྔའི་དར་ཆ་བཀལ་ཡོད་པ་རེད།

       མཇུག་ཏུ། རྒྱལ་སྤྱིའི་ཨོ་ལིམ་ཕིག་ཨུ་ཡོན་ལྷན་ཁང་གི་ཀྲུའུ་ཞི་པ་ཧོ་ཡིས་སྐབས33པའི་དབྱར་དུས་ཨོ་རྩལ་འགྲན་ཚོགས་དེ་ཧྥ་རན་སིའི་ཕ་རི་སིར་མཇུག་བསྒྲིལ་བའི་ཁྱབ་བསྒྲགས་གནང་བ་དང་། གླིང་ཆེན་སོ་སོའི་འཐུས་ཚབ་ལུས་རྩལ་བ་རྣམས་ཀྱིས་མཉམ་དུ་ཕུ་བཏབ་ནས་ཨོ་རྩལ་དཔལ་འབར་གྱི་མེ་བསད་ཡོད་པ་རེད།