སློབ་དཔོན་འཕགས་པ་ཀླུ་སྒྲུབ་ཀྱིས་མཛད་པའི《སྐྱེ་བོ་གསོ་ཐིགས》།

རེས་འགའ་རྩྭ་བཞིན་ཞུམ་པར་བྱ། །
རེས་འགའ་མེ་བཞིན་སྦར་བར་གྱིས། །
རེས་འགའ་གངས་རི་ལྟ་བུར་གྱིས། །
རེས་འགའ་དམག་ལ་ངར་བ་བཞིན། །
གཞན་གྱི་ཡུལ་ན་གནས་པ་དང་། །
གཞན་གྱི་འཚོ་བས་འཚོ་བའི་ཚེ། །
ཇི་ལྟ་བུར་ནི་བརྙས་གྱུར་ཀྱང་། །
ཁོ་རོག་འདུག་པས་བདེ་བ་འཐོབ། །
སྐྱེ་བོ་ངན་པ་ཡུན་རིང་བསྟེན་བྱས་ཤིང་། །
བཟའ་བཏུང་ཞིམ་པོ་མང་པོས་ཕན་བཏགས་ཀྱང་། །
ཕན་མེད་གྲོགས་པོས་ངན་པ་སྤྱོད་གྱུར་ཏེ། །
དཔེར་ན་ཁྲོན་པར་ལྷུང་བའི་མི་བཞིན་ནོ། །
མི་གང་བློ་ནི་གཡོ་ཞིང་འགྱུར་བྱང་བ། །
དེ་ཡི་མཛའ་ཤེས་བརྟག་པར་མི་གྱུར་ཏེ། །
རབ་ཏུ་ཉོན་མོངས་མི་དེ་ཅི་འདྲ་ན། །
ཤིང་ཤུན་ཚོས་ཀྱིས་རས་དཀར་བཙོས་པ་བཞིན། །
གལ་ཏེ་བློ་ལྡན་མཁས་པས་དགྲ་བོ་དག །
རབ་ཏུ་མི་དགའ་བར་ནི་བྱེད་འདོད་ན། །
ཚིག་རྩུབ་མི་སྨྲ་རབ་ཏུ་ངག་འཇམ་གྱིས། །
དེས་ནི་དེ་ལ་གནོད་པ་ཆེན་པོར་འགྱུར། །
རྒྱ་མཚོ་དང་ནི་རི་རབ་གླིང་ལ་སོགས། །
འཇིག་རྟེན་པ་རྣམས་བདག་གི་ཁུར་གྱི། །
ཇི་ལྟར་བྱས་པ་མི་གཟོ་གང་ཡིན་པ། །
དེ་ནི་བདག་གི་ཁུར་ཆེན་དག་ཏུ་འབྱུང་། །
མི་གང་སེམས་ནི་མི་རྒོད་ཅིང་། །
བྱས་པ་གཟོ་དང་བྱས་པ་ཚོར། །
བྱས་པ་ཆུད་གཟོན་མི་བྱེད་པ། །
དེ་དག་མཁས་པས་རབ་ཏུ་བསྔགས། །
ཆོས་འདི་བྱམས་པ་བདེ་བ་སྟེ། །
འཇུག་ངོགས་བདེ་བའི་ཆུ་ཀླུང་བཞིན། །
གྲོགས་ལ་འཁུ་བ་མེད་པ་དང་། །
ང་སྙེམས་ང་རྒྱལ་ཟད་པ་བདེ། །
ཁེངས་དང་ཟོལ་བྱེད་ང་རྒྱལ་ཆེ། །
སྡིག་པའི་གྲོགས་པོ་བསྟེན་པ་དང་། །
སྟོབས་ལྡན་རྣམས་ལ་རྒོལ་བྱེད་པ། །
དེ་དག་ཡིད་ནི་བདེ་མི་འགྱུར། །
དེ་ཕྱིར་ཁེངས་པར་མི་བྱ་སྟེ། །
ཁྲོ་བ་རྣམ་པར་སྤང་བར་བྱ། །
ཁེངས་དང་ཁྲོ་བ་འོང་གྱུར་ན། །
དེ་དག་རྣམས་ཀྱིས་གྲགས་པ་འཇོམས། །
གང་ཞིག་རྒན་དང་བྱིས་པ་ནད་པ་དང་། །
ཉམ་ཆུང་ཐབས་དོར་དེ་བཞིན་དམན་པ་དང་། །
རྒྱལ་པོས་སྤངས་དང་སྐྱབས་མེད་པ་དག་ལ། །
སྙིང་རྗེ་མེད་པ་དེ་དག་མིར་མི་རུང་། །
རང་གི་ཡུལ་འཁོར་གནས་སྤངས་ཏེ། །
གཞན་གྱི་ལྗོངས་སུ་ཕྱིན་པ་ན། །
ཚིག་ངན་སོ་སོར་ཟློས་པ་ལ། །
བཟོད་པ་ཆེན་པོ་བསྐྱེད་པར་བྱ། །
དཀའ་ཐུབ་ཚུལ་ནི་བཟོད་པ་ཡིན། །
གཙོ་བོའི་ཚུལ་ནི་དཀའ་སྤྱོད་ཡིན། །
ཤར་བའི་ཚུལ་ནི་དཀའ་བཟློག་ཡིན། །
བུད་མེད་ཚུལ་ནི་དཀའ་ཐུབ་ཡིན། །
དེ་ལྟར་མ་ཡིན་རང་བཞིན་ངན་པའི་མི། །
བྱམས་ལ་ལན་མེད་གཞན་གྱིས་ཕན་བྱས་བརྗེད། །
སྡང་བས་གནོད་པ་ཇི་སྙེད་བྱས་གྱུར་ཀྱང་། །
སྡང་ཐབས་བྱས་པ་དེ་ཡང་ཆུ་བཞིན་འཐུངས། །
ཚེ་དང་ལོངས་སྤྱོད་གཉེན་བཤེས་ཀུན་དེར་དཀོན། །
དེ་དག་རྒུད་པ་ཤིན་ཏུ་རྙེད་པར་སླ། །
དེ་ཕྱིར་སེམས་ཅན་དམས་པར་གྱུར་པའི་ཚེ། །
ཁྭ་བཞིན་མུ་ཅོར་མི་སྨྲ་ཁ་རོག་འདུག །
གལ་ཏེ་ནོར་མེད་བདག་གི་ཕྱོགས་ཉུང་ལ། །
མཛའ་བཤེས་ཕྱོགས་ཀྱི་སྟོབས་ཀྱང་ཆུང་གྱུར་ཞིང་། །
དགྲ་བོའི་ཕྱོགས་ཀྱི་སྟོབས་ཚུལ་ལྡན་པའི་ཚེ། །
ཚིག་རྩུབ་མི་སྨྲ་ཁ་རོག་འདུག་པར་བྱ། །
ཡ་རབས་ཚུལ་མེད་ཁེངས་པས་ང་རྒྱལ་ཤིན་ཏུ་ཆེ། །
གཡོ་སྒྱུ་དད་མེད་ཁྭ་བཞིན་ཤིན་ཏུ་མུ་ཅོར་སྨྲ། །
གཟུ་ལུམ་ཕྲག་དོག་རྐམ་དང་ཁྲེལ་མེད་ངོ་ཚ་བྲལ། །
མི་དེ་བུར་གྱུར་ཀྱང་ནི་གཞན་བཞིན་སྤང་བར་བྱ། །
དེ་ལྟ་བུ་ཡི་དམན་ཞིང་ངན་པ་དེ། །
མཐོན་པོའི་སར་མི་དྲང་ཞིང་དེར་མི་བཞག །
ས་དེར་བཞག་ཀྱང་དྲེགས་དང་ཁེངས་མི་ཐུབ། །
དཔེར་ན་པགས་པ་སྔོན་པོའི་ཝ་དང་འདྲ། །
སྐྱེ་བོ་རྨོངས་པ་འགའ་ཞིག་ནི། །
ལོག་པའི་ཆོས་ལ་རབ་ཞེན་པ། །
འདོད་པའི་དོན་དེས་བསླུས་འགྱུར་ཏེ། །
རུས་སྦལ་སོ་ཡིས་བྱ་བསླུས་བཞིན། །
རབ་ཏུ་མི་གཟོའི་སྐྱེ་བོ་རྣམས། །
སྡུག་བསྔལ་འབྱུང་བའི་རྒྱུ་དག་ལ། །
དང་བླངས་དོན་དུ་གཉེར་བྱེད་པ། །
གཅན་གཟན་གལ་སྒོར་འཇུག་པ་བཞིན། །
དྲེགས་པའི་ལོང་བ་འགའ་ཞིག་ནི། །
རང་གི་སྐྱོན་རྣམས་མི་བསམས་པར། །
ཡོན་ཏན་ཕྲ་མོས་རབ་མགུ་བ། །
ཁྲོན་པའི་སྦལ་པ་ཇི་བཞིན་ནོ། །
རྨོངས་པའི་ལོང་བ་འགའ་ཞིག་ནི། །
ཆོས་ཀྱི་དེ་ཉིད་མ་རྟོགས་པར། །
ལོག་པའི་ཆོས་ཀྱིས་རབ་མགུ་བ། །
བླུན་པོས་ནོར་བུ་ལེན་པ་བཞིན། །
ཤིན་ཏུ་བླུན་པ་ལ་ལ་དག །
འཆི་བའི་རྣམ་པ་རབ་བརྗེད་ནས། །
བྱ་བ་མང་པོ་རྩོམ་བྱེད་པ། །
བདུད་ཀྱིས་བསླུས་པར་ཤེས་པར་བྱ། །
འགྲོ་བ་བཟང་པོ་བཟང་མོ་ལ། །
གང་ཞིག་རབ་ཏུ་ཆགས་བྱེད་པ། །
སྲོག་ཆགས་མེ་ལ་མཆོང་བ་བཞིན། །
འདོད་པས་འཕུང་བར་འགྱུར་བ་ཡིན། །
རྟ་དང་མ་ཧེ་གླང་པོ་སོགས། །
གང་ཞིག་དེ་ལ་ཆགས་བྱེད་པ། །
འདོད་པ་ཅན་གྱི་སྐྱེས་བུ་ཡིས། །
རྨི་ལམ་ནོར་རྙེད་བསླུས་པ་བཞིན། །
སྡིག་པའི་ལས་ལ་རབ་དགའ་ཞིང་། །
དགེ་ལ་དྲན་པར་མི་བྱེད་པ། །
འཇིག་རྟེན་དག་ལ་རབ་ཏུ་ཆགས། །
དུག་དང་འདྲ་བའི་སྐྱེས་བུ་དེ། །
འདིར་ཡང་སྡུག་བསྔལ་ཆེན་པོ་ཅན། །
ཕྱི་མ་མནར་མེད་རབ་ཏུ་འཇིགས། །
བར་དོར་སྲིད་པའི་ལས་རྣམས་དྲན། །
གསལ་བའི་མེ་ལོང་རབ་འཇིགས་པས། །
ལས་ཀྱི་དགེ་སྡིག་རྣམ་པར་ཕྱེ། །
རང་འདོད་གནས་སུ་གནས་དབང་མེད། །
མི་འདོད་སར་ནི་རྣམ་པར་ཁྲིད། །
ལས་ཀྱི་རྒྱུ་འབྲས་མི་བསླུ་བ། །
ཕོ་མོ་མཐོང་བའི་རྣམ་པའམ། །
གཞན་ཡང་རབ་ཏུ་གྲངས་མང་ལྟོས། །
དེ་ཕྱིར་དམ་པའི་སྐྱེས་རྣམས་ཀྱིས། །
རྒྱུན་དུ་འཆི་བ་དྲན་པ་ར་བྱ། །
རང་གིས་ཅི་བྱས་ལས་རྣམས་བགྲང་། །
ཡུད་ཙམ་པ་ཡི་ཚེ་འདི་ལ། །
ཐང་གཅིག་འདུག་པའི་བློ་ཅན་ཏེ། །
དེ་ནི་ཤིན་ཏུ་འཁྲུལ་བ་སྟེ། །
མཁའ་འགྲོ་མ་ཡི་རྫུ་འཕྲུལ་བཞིན། །
དེ་ཕྱིར་རྟག་པའི་སེམས་མི་བསྐྱེད། །
ངན་སོང་གསུམ་པོ་དྲན་པར་བྱ། །
སྲོག་གཅོད་ལ་སོགས་ལུས་ཀྱི་ནི། །
ཉེས་པ་རྣམ་པར་བསྡམ་པར་བྱ། །
རྫུན་སོགས་ངག་གི་ཉེས་པ་སྤང་། །
དེ་བཞིན་ཡིད་ཀྱི་ཉེས་པ་སྤང་། །
མ་ལུས་རབ་ཏུ་བསྡམ་པར་བྱ། །
དེ་ནི་སྐྱེས་བུ་དམ་པའི་ཚུལ། །
རབ་ཏུ་ཚ་ཞིང་གྲང་བ་ཡི། །
དམྱལ་བ་ཉི་མ་གཅིག་བཞིན་དྲན། །
བཀྲེས་སྐོམ་དག་གིས་རིད་པ་ཡི། །
ཡི་དྭགས་རྣམས་ཀྱང་དྲན་པར་བྱ། །
རྨོངས་པའི་སྡུག་བསྔལ་རབ་མང་བའི། །
བྱོལ་སོང་ལྟ་ཞིང་དྲན་པར་བྱ། །
དེ་རྒྱུ་རྣམ་སྤང་བདེ་རྒྱུ་འབད། །
ཐོབ་དཀའ་འཛམ་གླིང་མི་ཡི་ལུས། །
དེ་ཐོབ་དུས་སུ་ངན་སོང་རྒྱུ། །
རབ་ཏུ་བསྒྲིམས་ཏེ་བཅད་པར་བྱ། །
འདིར་བདག་མི་ཡི་ལུས་ཐོབ་ནས། །
ཕྱི་མར་སྨོན་ལམ་འདེབས་བྱེད་པ། །
དེ་ནི་བླུན་པོ་ལེ་ལོ་ཅན། །
ངན་སོང་གནས་སུ་རབ་འགྱོད་དེ། །
གྲོ་བཞིན་སྐྱེས་ཀྱིས་རྡོ་འཇོག་གི །
ཡི་དྭགས་མཐོང་བ་ཇི་བཞིན་ནོ། །
འདི་ཡི་ཚེ་ནི་མ་ངེས་པས། །
དེ་རིང་སང་ངམ་ཟླ་བའམ། །
ལེ་ལོའི་རྣམ་པས་འཆི་འགྱུར་ཏེ། །
དེ་ཕྱིར་དགེ་ལ་བརྩོན་པར་བྱ། །
དམ་པའི་ཆོས་ལ་རབ་འཇུག་ན། །
རིགས་ངན་གཤམ་མོ་ལྟ་བུ་དང་། །
འཁོར་ལོས་བསྒྱུར་བའི་རྒྱལ་པོ་ཡང་། །
བྲན་མོ་བཙུན་མོར་ཐུབ་པས་གསུངས། །
དམ་པའི་ཆོས་ལ་མི་འཇུག་ཅིང་། །
འཇིག་རྟེན་ཁྲེལ་ལྟས་མི་སྲུང་བ། །
ཤིན་ཏུ་སྨད་ཅིང་བཤུང་འགྱུར་ཏེ། །
བྷི་ར་ལི་བའི་དཀའ་ཐུབ་བཞིན། །
རི་བྲག་འདོམ་གང་སོགས་ཡོད་ཟབ། །
དེ་ལའང་རབ་ཏུ་སྲུང་བྱེད་ན། །
ཤིན་ཏུ་གཏིང་མེད་གྱུར་བ་ཡི། །
གཡང་སར་ལྷུང་བ་ཅིས་མི་སྲུང་། །
ཡུངས་འབྲུ་ཙམ་གྱི་རྨ་ཁུང་ཡང་། །
ཤིན་ཏུ་བསྒྲིམས་ཏེ་འཆོས་བྱེད་ན། །
འཚོ་མེད་ཚལ་བར་འགས་པ་ཡི། །
རྨ་དེ་ཅི་ཕྱིར་འཆོས་མི་བྱེད། །
ཉིན་པར་འགའ་ཟུང་ཙམ་དུ་ཡང་། །
ཟས་སྐོམ་གྱིས་དབུལ་མི་བཟོད་ན། །
བར་གྱི་བསྐལ་བ་ལ་སོགས་སུ། །
ཟས་གོས་མི་མྱོང་ཅི་ཕྱིར་བཟོད། །
རང་ལུས་དག་ལ་ཚེར་མ་ཡི། །
རྩེ་མོའང་བཟོད་པར་མི་འགྱུར་ན། །
གཞན་གྱི་ལུས་ལ་མཚོན་དག་གིས། །
སྲོག་དང་འབྲལ་བ་ཅི་ཕྱིར་བཟོད། །
རྨ་འབུ་དུག་རྡེའུ་ཤིང་སྲིན་དང་། །
ས་བོན་མྱུ་གུ་སྡོང་སྐྱེས་དང་། །
དེ་བཞིན་ངན་པའི་མི་རྣམས་ནི། །
རང་རྟེན་ཁོ་ན་འཕུང་བ་སྒྲུབ། །
ཕྱི་མ་ཤེས་མ་མཛངས་མའི་ཚུལ། །
ཉོན་མོངས་དགྲ་ཐུལ་དཔའ་བོའི་ཚུལ། །
ཆགས་པ་མེད་པ་ཆོས་བྱེད་ཚུལ། །
མཁས་པའི་ཚུལ་ནི་རྟོགས་པ་ཡིན། །
རྟོགས་པའི་ཚུལ་ནི་བྱེད་པ་ཡིན། །
འགྱོད་པ་མེད་ནི་སྦྱིན་པའི་ཚུལ། །
ཚུལ་ཁྲིམས་ཚུལ་ནི་མ་བཅོས་པ། །
བཟོད་པའི་ཚུལ་ནི་ཆོས་ཉིད་ཤེས། །
བརྩོན་འགྲུས་ཚུལ་ནི་འཆི་བ་དྲན། །
བསམ་གཏན་ཚུལ་ནི་གཡེང་བ་མེད། །
རྣམ་པར་འབྱེད་ཤེས་ཤེས་རབ་ཚུལ། །
སངས་རྒྱས་འདོད་པ་དད་པའི་ཚུལ། །
རྟོག་པ་ཆུང་བ་རྣལ་འབྱོར་ཚུལ། །
ཟང་ཟིང་གཉེན་བྲལ་སྒོམ་མཁན་ཚུལ། །
ཕན་སེམས་ཆེ་བ་སྒྲིན་པའི་ཚུལ། །