རོ་སྒྲུང་ལེའུ་དྲུག་པ། རྒྱལ་བུ་ཞར་བས་རྒྱལ་སྲིད་བཟུང་བ།

ཐབས་ལས་མཁས་པའི་ཡོན་ཏན་གྱིས་གྲི་བཟང་པོ་གཞལ་ཚད་རི་བ་ཐོབ་
པར་བརྟེན་ནས་རྒྱལ་བུ་ཞར་བས་རྒྱལ་སྲིད་བཟུང་བ།

      ཡང་རྒྱལ་བུས་ཤིང་སྡོང་གི་རྩར་ཕྱིན། བླ་མ་ཀླུ་སྒྲུབ་སྙིང་པོ་ཡིན། ། ང་རང་རྒྱལ་བུ་བདེ་སྤྱོད་བཟང་པོ་ཡིན། ། རལ་གྲི་ངར་མ་རྡོ་ཆོད་ཡིན། ། དྲ་བ་ལྕགས་ཀྱི་མིག་དགུ་ཡིན། ། ཏོག་མ་སེང་ལྡེང་སྨུག་པོ་ཡིན། ། ཞགས་པ་འཕྲུལ་གྱི་ཨ་ལོང་ཡིན། ། མར་ཟན་ཟོས་པས་འཛད་མེད་ཡིན། ། རོ་ཁོག་བབ་བམ་ཤིང་སྡོང་གཅོད། ། ཅེས་བྱས་པས། རོ་དེ་བབས་བྱུང་སྟེ་ཏོག་མ་དེས་བརྡུངས། དྲ་བའི་ནང་དུ་བརྫངས། ཞགས་པ་དེས་བསྡམས་ནས་ཁུར་ཕྱིན་པ་དང་། རྒྱལ་བུ་རྒྱལ་བུ། ལམ་ཐག་རིང་བས་ཡང་ན་ཁྱོད་ཀྱིས་སྒྲུང་ཞིག་ཤོད། ཡང་ན་ངས་སྒྲུང་ཞིག་བཤད་ཀྱི་བྱས་པ་དང་། རྒྱལ་བུས་རྒྱུད་ཡོད་བསམས་ནས་ལན་མ་བཏབ་པས། རོས་སྨྲས་པ། རྒྱལ་བུ་ལས་ཟད་ཁྱོད་འདྲའི་ཁ་ནས་གཏམ་ཡོང་བཟོ་མི་འདུག ངས་སྒྲུང་ཞིག་བཤད་ཀྱི་ཉོན་ཨང་ཟེར། ལུང་པ་ཞིག་ན་རྒྱལ་པོ་ཞིག་ཡོད་པར་འདུག རྒྱལ་པོ་དེ་ལ་སྲས་གཉིས་འཁྲུངས། ཆེ་བ་དེ་ཞར་བ་ཞིག་ཡིན་ཞིང་། སྲས་ཆུང་བ་དེ་སྤྱང་པོ་རང་ཞིག་བྱུང་བ་ཡིན་པར་འདུག ཆུང་བ་དེས་རྒྱལ་ས་བཟུང་། ཆེ་བ་དེར་ཟུར་དུ་གཞིས་ཀ་ཞིག་སྤྲད། ཆེ་བ་དེ་སེམས་བཟང་པོ་ཞིག་ཡོད་པས། ནུབ་ཅིག་རྒྱལ་བུ་ཞར་བ་ལ་གྲི་བཟང་པོ་ཞིག་ལག་ཏུ་ཐོབ་པའི་རྨི་ལྟས་བྱུང་ཞིང་། ནངས་གཅིག་ཏུ་སོང་བ་དང་ཡུལ་དེ་ན་ཕྱུག་པོ་ཞིག་ཡོད་པ་དེས་ཆང་བུམ་གང་དང་། གྲི་གཅིག་ཁུར་ནས་དེར་བྱུང་། རྒྱལ་པོ་ལ་ཕྱག་ཚལ་ཞུས་ནས་གསོལ་བ། བདག་གི་ཕ་མེས་ཀྱིས་བཞག་པའི་ནོར་གྱི་ནང་ནས་གྲི་འདི་ལས་དྲག་པ་མི་འདུག་ལགས། རྒྱལ་པོ་རང་གི་ས་གཞིས་མི་ཐེག་པ་འདུག་པས་གྲི་འདི་དང་ས་གཞིས་བརྗེས་ན་ང་ལ་ཡང་ཕན་ཐོགས་པ་ཞིག་ཡོང་བ་འདུག་པ་བདག་ལ་ལུང་བསྟན་བྱུང་བ་ཡིན་ཟེར། རྒྱལ་པོས་ཁྱོད་ལ་ལུང་བསྟན་ཇི་ལྟར་བྱུང་གསུངས་པར། བདག་གཉིད་ལ་སོང་བའི་རབ་རིབ་ཅིག་ལ་ཁྱོད་ཀྱི་གྲི་འདི་ལུང་པའི་ཕུའི་རྒྱལ་པོ་ཆེན་པོ་ལ་ཚོངས་ཤིག་ཟེར་བ་བྱུང་ཞུས་པས། རྒྱལ་པོ་རང་གི་རྨི་ལྟས་དང་མཐུན་པར་འདུག་གོ་བསམས་ནས། རྒྱལ་པོས་གྲི་ཉོས་ཤེང་ཞིང་རྣམས་ལོ་དུས་བྱས་ནས་གྲི་ལ་འཇལ་ལོ། ཕྱུག་པོ་དེ་དགའ་ནས་ལུང་པའི་མདའ་ལ་ཕྱིན། རྒྱལ་པོ་ཡང་རལ་གྲི་དེ་བྱུང་བས་མནལ་ཁུགས། ཐུགས་ཤིན་ཏུ་བདེ་ལ་ལོང་བ་དེ་ཡང་སངས་བྱུང་ངོ་། ཡང་ནུབ་ཅིག་ལ། ལ་འདི་འཕགས་པའི་ས་ན་རྒྱལ་བུས་དོན་ཆེན་པོ་འགྲུབ་ཅེས་པའི་རྨི་ལྟས་བྱུང་བས་རྒྱལ་པོས་གྲི་སྐེད་པར་གཟེར། ལ་ཁ་དེར་འཕགས་ནས་གཟིགས་པས། མི་མང་པོ་དམར་ཕུང་ཕུང་དུ་ཡོད་པ་མཐོང་། སྟོན་མོ་ཆེན་པོ་ཞིག་ཡོད་དམ་བསམས་ནས་རྒྱལ་བུས་ལ་ལས་བབས་ཏེ་དེར་བྱོན་པ་དང་། མི་ཚོགས་ཀྱི་ཁྲོས་ན་ཤོ་རྒྱག་མཁན་མང་པོ་ཡོད་པ་དེར་བལྟས། དེ་ཚོའི་ཁྲོད་ནས་མི་གསུམ་ཤོ་ཤོར་སོང་སྟེ། ལུང་པའི་མི་བྱིངས་རྣམས་ནས་ཁོང་ཚོར་ཟས་སྣ་ཚོགས་པ་སྟེར་བ་དང་། ཉི་འབྲེལ་རྣམས་ཚོགས་ནས་ངུ་དི་རི་རི་བྱེད་འདུག་པ་ལ། རྒྱལ་པོས་དེ་ཚོའི་རྩར་ཕྱིན་ནས་མི་གསུམ་པོས་ཉེས་པ་ཅི་བྱས་པ་ཡིན་གསུངས་པར། མི་རྣམས་ན་རེ། མི་འདི་རྣམས་ཀྱིས་ཉེས་པ་གང་ཡང་བསགས་མེད་དོ། ངེད་ཀྱི་ལུང་པ་འདིའི་རྒྱལ་པོ་ལ་སྲས་མོ་ཞིག་འཁྲུངས། རྒྱལ་པོ་ཡབ་ཡུམ་གཉིས་གྲོངས་ནས་སྲས་མོའི་ཐུགས་ལ་གདོན་ཞུགས། བློན་པོ་ནང་འཁོར་རྣམས་ཟས་ཚར། ད་ལུང་པའི་མིའི་ནང་ནས་ཞག་རེ་ལ་མི་གསུམ་རེ་སྤྲོད་དགོས་ཀྱི་ཡོད་པ་ཡིན་ཟེར། རྒྱལ་པོའི་ཐུགས་དགོངས་ལ། འདི་ཚོ་ལ་ནི་སེམས་ཁྲལ་དཔག་ཏུ་མེད་པ་འདུག ང་ལ་ནི་སེམས་ཁྲལ་བྱེད་མཁན་མེད་དགོངས་ཏེ། ངས་ཁྱེད་ཚོའི་ཚབ་ལ་འགྲོ་གསུངས། དེར་མི་རྣམས་དགའ་ནས་མི་གསུམ་པོ་དང་བཅས་ཉེ་འཁོར་རྣམས་ཀྱི་ཕྱག་བཙལ་ལོ། ཟས་ཞིམ་ལ་མངར་བ་རྣམས་རྒྱལ་བུ་ལ་དྲངས་སོ། རྒྱལ་བུས་ཕོ་བྲང་དེར་ཡར་བྱོན་པ་དང་། ཕོ་བྲང་དེའི་ཐེམ་སྐས་ནང་དུ་སླེབས་སྐབས་མི་སྐད་དང་ཁྱི་སྐད་གང་ཡང་མེད་ཅིང་། ཉིས་སྐས་ཆེན་པོ་གཅིག་འདུག་པ་དེ་ལ་འཛེགས་ཕྱིན་པས། ཚོམས་ཆེན་དེའི་ནང་ན་རོ་མགོ་མེད་པ་གཡས་ན་བརྒྱ་བརྒྱད་ཙམ། རྐང་པ་མེད་པ་གཡོན་ན་བརྒྱ་བརྒྱད་ཙམ་འདུག་པ་ན། རྒྱལ་པོའི་ཐུགས་དགོངས་ལ་འདི་ཙམ་བསད་ནས་ཟ་མཁན་དེ་ག་ན་ཡོད་བསམས་ནས་ཁང་རྩེ་ལ་ཡར་འཛེགས་ཕྱིན་པས། སྒོ་ཞིག་ཁྲིག་གེར་བརྒྱབ་འདུག་པ་དེ་ཕྱེ་ནས་འཛུལ་སྐབས། ཁང་མིག་ཀ་བ་བརྒྱད་པ་ཞིག་གི་ནང་གཡུ་ཁྲི་ལེགས་པ་ཞིག་གི་སྟེང་ན་བུ་མོ་ལྟ་ན་སྡུག་ཅིང་འོད་ཆགས་པ། ལོ་དྲུག་གསུམ་བཅོ་བརྒྱད་དུ་སླེབས་པ། གཉན་གྱི་ཐུལ་བ་གྱོན་པ་ཞིག་འདུག་པ་མཐོང་། གཞན་ཕྱོགས་ལ་བལྟས་པས་སྒོ་ལྕགས་མ་བརྒྱབ་པའི་སྒོ་གཅིག་ཀྱང་མི་འདུག་སྟེ་དེ་རྣམས་ཟ་བའི་འདྲེ་དེ་ག་ན་ཡོད་བསམས་ནས་སྟེང་དུ་ཕྱིན་པས་སུ་ཡང་མེད་ཅིང་། དེར་གཡུ་ཁྲི་ཁའི་དཔོན་མོ་ལགས། དཔོན་མོ་ལགས་ཟེར་མགོ་ནས་བཏེགས་ཀྱང་ཨ་ལན་མི་སྟེར། སྣ་ནས་དབུགས་འབྱིན་མིན་བལྟས་པས་དབུགས་ཡོད་ལ་མེད་ཅིག་འདུག་གོ། དེར་འདྲེ་ནི་ཐུག་རྒྱུ་མི་འདུག ཁས་ནི་བླངས་ཚར་བསམས། ཐབ་ཁ་དེ་ན་ཕར་ཕྱིན་པས་ཤ་མར་གཏུབ་འཕྲོ་རྣམས་རྡུལ་ཆགས་འདུག་པས་ཤ་མར་རྣམས་བཏོན། འཛའ་ར་མགོ་བོ་ཙམ་ཞིག་བརྫིས། མར་ཁུ་མང་རབ་ཅིག་སྦྱར་ནས་མོའི་ཁྲི་མགོ་རུ་ཟ་བཞིན་བསྡད་དོ། དེར་ཉི་མ་ཕྱེད་ཡོལ་སོང་བ་དང་ཁྲི་ཁ་ནས་བུ་མོ་དེས་ཨ་ལོག་ཅིག་སྒྱུར་བྱུང་སྟེ། ཁོས་མིག་ཧུ་རེར་བལྟས་པས་གྲི་ཁོ་ཡང་འཕགས་ཙམ་ཞིག་བྱས། ཁོའི་བསམས་པ་ལ་བུ་མོ་འདི་ལས་སླ་བ་འདུག་སྟེ། ཟ་བའི་འདྲེ་དེ་ག་ན་ཡོད་བསམས་ནས་བསམ་བློ་གཏོང་གིན་བསྡད། ཉི་མ་ལ་ལ་བཞུད་པ་དང་ཡང་མོས་ཨ་ལོག་ཅིག་སྒྱུར་བྱུང་། དེར་ཁོའི་གྲི་ཡང་འཕགས་ཙམ་ཞིག་བྱས། དེ་ནས་མོ་ག་ལེར་ལངས་བྱུང་བ་དང་། གདུང་མའི་སྲུབ་ནས་ཏིང་ཏིང་ཟེར་བའི་སྐད་གཉིས་བྱུང་འཕྲལ་མོའི་སྣ་ནས་སྦྲུལ་གཉིས་རྙང་ཙམ་བྱས་བྱུང་ངོ་། སྦྲུལ་མཐོང་བ་དང་རྒྱལ་བུ་སྐྲག་སྟེ་ལངས་པས་གྲི་ན་རེ། རྒྱལ་བུ་སྡོད་ཟེར། གྲི་ཁ་འཕག་འཕག་བྱས་བྱུང་བ་དང་སྤྲུལ་གཉིས་ཕྱིར་དོན། རྒྱལ་བུ་རྒྱལ་ལོ་ཞེས་གྲི་དེ་ཤུབས་ནས་དོན་ཏེ་སྦྲུལ་གཉིས་ཀྱི་སྐེ་བཅད། དེར་བདུད་ཕོ་བདུད་མོ་རྣམས་ཐུལ་བ་དང་། བུ་མོ་དེ་རྒྱལ་བུའི་རྩར་ཡོང་ནས་དྲུང་པ་དྲུང་པ་ཟེར། རྒྱལ་བའི་མགོ་ནས་བཏེགས། རྒྱལ་བུ་ལངས་པ་དང་གྲི་ཡང་ཤུབས་ན་སླེབས་འདུག་གོ། བུ་མོས་རྒྱལ་བུར་སྨྲས་པ། སྦྲུལ་གྱི་སྐེ་ཁྱེད་རང་གི་གྲིས་བཅད་ནས་ཆད་དུམ་རྣམས་གྲིའི་ཡུ་བའི་མཚམས་ན་མར་སོང་ཟེར། རྒྱལ་བུས་གྲི་ལག་ཏུ་བླངས་ཏེ་ཕྱེད་ཙམ་བཏོན་ནས་སྦྲུལ་ཨེ་འདུག་བལྟས་པས། གྲི་དེས་རྒྱལ་བུར་སྨྲས་པ། ཕོ་བདུད་མོ་བདུད་རྣམས་ད་གིན་ནས་བཏུལ་ཟིན། སྦྲུལ་གྱི་དུམ་བུ་ཡང་ད་གིན་ནས་ཟོས་ཟིན་ཟེར། བུ་མོས་རྒྱལ་བུར་སྨྲས་པ། ཁྱེད་ལ་ཡུལ་ཡོད་དམ་མེད། ངའི་ལུང་པའི་མི་ནི་མིན་པར་འདུག་བྱས་པ་དང་། རྒྱལ་བུ་མིག་ཧུ་རེར་བལྟས་ནས་ལན་མ་བཏབ་པའི་མཚམས་སུ་གྲིས་སྨྲས་པ། ཡུལ་ཡོད་པས་སྐྱེ་ས་བྱུང་བ་ཡིན། ཁྱེད་རང་གཉིས་མཐུན་པར་གྱིས་ཤིག་བྱས་པས། བུ་མོས་སྨྲས་པ། གྲི་བཟང་པོ་འདི་ཕ་མེས་ཀྱི་དངོས་པོ་ཡིན་ནམ། གང་ནས་བྱུང་ཞུས་པར། གྲི་བཟང་ངན་སུ་ལའང་ལབ་མི་དགོས། འགྲོ་ན་ལུས་ལ་འདོགས་པ་ཡིན། ཉལ་ན་སྔས་མགོར་འཇོག་པ་ཡིན། ། སྡོད་གནས་བསྲུང་བའི་སུང་མ་ཡིན། ། དཀའ་བ་བརྟེན་པའི་བརྟན་མ་ཡིན། ། དེའི་སང་ཉིན་ལུང་པའི་མི་རྣམས་ཚོགས་ནས་ཤོ་རྒྱག་པའི་འགོ་ཚུགས་པ་དང་། རྒྱལ་བུ་བྱོན་ནས་ཤོ་མ་རྒྱག་པར་ནང་དུ་ཤོག་གསུངས། མི་རྣམས་ཀྱི་སེམས་ལ་མི་དེ་ནི་ངོ་མི་ཤེས། ཁ་སང་གོ་ཆོད་བྱུང་སྟེ། དེས་བློ་བྲིད་བྱས་ཨེ་ཡོང་བསམས་ཐེ་ཚོམ་ཡོད་པ་ལ། གཅིག་ན་རེ། མི་བློ་ཡངས་ཆེ་བ་ཞིག་ཁོའི་རྩར་ཕྱིན་པ་དྲག་ཟེར་ནས་བློ་ཡངས་ཆེ་བ་ཞིག་ལ་ཡོངས་ཀྱིས་ཞུ་བ་གསོལ་ནས་ཁྱོད་སྔོན་ལ་འགྲོ་རོགས་གྱིས་ཟེར། ཁོས་ག་ལེར་སྔོན་ལ་ཕྱིན། ནང་དུ་འཛུལ་བ་དང་དེར་ཁོ་རང་ཚོའི་ཡུལ་གྱི་རྒྱལ་མོ་དེ་དང་ཁ་སང་གི་མི་དེ་མིན་པ་སུ་ཡང་མེད་པས། ཁོ་བྲེད་དེ་དངངས་ནས་མཆི་མ་སྣ་གོང་དུ་ལྷགས་ཏེ་རྒྱལ་མོ་ལ་ཕྱག་བཙལ་བས། རྒྱལ་མོ་ན་རེ། ང་ལ་མ་འཚལ་རྒྱལ་པོ་རིན་པོ་ཆེ་ལ་ཕུལ་ཅིག་བྱས་པས། རྒྱལ་པོར་ཕྱག་བཙལ་ལོ། ཁོ་ཕྱིར་དོན་ཏེ་མི་རྣམས་ལ་གོང་གི་ལོ་རྒྱུས་རྣམས་ཞིབ་པར་སྨྲས་པ་དང་། མངའ་འོག་གི་མི་རྣམས་དགའ་སྟེ་ཚུར་བརྒྱུགས་ཡོང་བས། སྙོམས་ཆུང་རྣམས་རྡོག་ལམ་དུ་སོང་། དེར་རྒྱལ་བུ་དང་རྒྱལ་མོའི་རྩར་སླེབས་པ་དང་བྱིངས་རྣམས་ཀྱིས་ཕྱག་བཙལ་ལོ། ལུང་པའི་མི་དྲག་པ་རྣམས་ཀྱིས་སྔར་གྱི་བློན་པོ་རྣམས་ཀྱི་ཚབ་བྱས། རྒྱལ་པོ་དང་རྒྱལ་མོ་གཉིས་ཀྱིས་ཡབ་ཡུམ་བྱས། རྒྱལ་བུ་དེས་རྒྱལ་སྲིད་བསྐྱངས། རྒྱལ་འབངས་ཀུན་སྔར་ལས་དར་ཞིང་རྒྱས་པ་བྱུང་བ་ཡིན་པར་གདའ། རྒྱལ་པོས་ལ་རྒྱབ་ཀྱི་ཕྱུག་པོ་ལ་ལོ་དུས་བྱས་པའི་ཞིང་རྣམས་གཙང་མར་བྱིན། རྒྱལ་སྲིད་གཉིས་ཀ་ཕྱོགས་གཅིག་ཏུ་བསྒྲིལ་ནས་ཁྱད་མེད་པར་བསྐྱངས་སོ་ཞེས་ཟེར་བས། རྒྱལ་བུས་སྨྲས་པ། རྒྱལ་བུ་ཞར་བ་ཅི་ཡང་མི་ཤེས་པ་དེ་ལ་བསོད་ནམས་སྟོབས་ཀྱིས་དེ་འདྲ་བྱུང་འདུག་ཟེར་བ་ཁ་ནས་ཤོར་བ་དང་། རོ་ལ་གཏམ་ཟེར་བྱ་ཁྲ་ཧུར་ཟེར། ལྡན་ལྕག་མེ་བུས་པ་འདྲ་བ་གསུམ་བརྒྱབ་ནས་རོ་དེ་རྡུལ་འཕྱུར་རེ་ལོག་སོང་ངོ་། བླ་མའི་ཞལ་ནས་རོ་ཁོས་ཅི་ཟེར་ཡང་ཁྱོད་རང་གཏམ་ལན་ཚིག་གཅིག་ཀྱང་མ་འཇལ་གསུང་གི་འདུག་ཀྱང་། ང་སེམས་ཡེངས་པས་ལན། རོ་མེད་པར་ལོག་ཕྱིན་ན་བླ་མའི་བཀའ་བཀྱོན་ཡོང་བསམས་དུར་ཁྲོད་དེར་ཕྱིན་ནོ། །