རོ་སྒྲུང་ལེའུ་བཞི་བ། རྒྱལ་པོ་ཁྱི་སྤྲུལ་གྱིས་ཆུང་མ་བཙལ་བ།

      དེར་ཤིང་སྡོང་གི་ཙར་ཕྱིན། བླ་མ་ཀླུ་སྒྲུབ་སྙིང་པོ་ཡིན། ། ང་རང་རྒྱལ་བུ་བདེ་སྤྱོད་བཟང་པོ་ཡིན། ། རལ་གྲི་ངར་མོ་རྡོ་ཆོད་ཡིན། ། དྲ་བ་ལྕགས་ཀྱི་མོག་དགུ་ཡིན། ། ཏོག་མ་སེང་ལྡེང་སྨུག་པོ་ཡིན། ། ཞགས་པ་འཕྲུལ་གྱི་ཨ་ལོང་ཡིན། ། མར་ཟན་ཟོས་པས་འཛད་མེད་ཡིན། ། རོ་ཁོག་བབ་བམ་ཤིང་སྡོང་གཅོད། ། ཅེས་ཟེར་ནས་རལ་གྲི་ཚག་ཚག་པ་བརྒྱབ་པས། རོ་ཁོག་དེ་བབས་བྱུང་སྟེ། ཏོག་མ་དེས་བརྡུངས། དྲ་བ་དེའི་ནང་དུ་བརྫངས། ཞགས་པ་དེས་བསྡམས་ནས་རྒྱབ་ཏུ་ཁུར་ཡོང་བ་དང་། གོམ་པ་བཅུ་ཙམ་སླེབས་པའི་ཚེ། རོ་ན་རེ། རྒྱལ་བུ་རྒྱལ་བུ་ཟེར་གྱི་འདུག་སྟེ། རྒྱལ་བུས་རྒྱུས་ཡོད་བསམས་ནས་གཏམ་ཁ་མ་བླངས་པར་མགོ་ཕར་རིལ་ཚུར་རིལ་བྱས་པ་དང་། རྒྱལ་བུ་ལས་ཟད་པ་ཁྱོད་འདྲའི་ཁ་ནས་གཏམ་ཡོང་བཟོ་མི་འདུག ངས་སྒྲུང་ཞིག་བཤད་ཀྱི་ཉོན་ཨང་ཟེར། ལུང་པ་ཆེན་པོ་ཆེན་པོ་ཞིག་ན་རྒྱལ་པོ་ཞིག་ཡོད་འདུག རྒྱལ་པོ་དེ་ལ་འཁོར་དང་ལོངས་སྤྱོད་ཕུན་སུམ་ཚོགས་པ་ཡོད་ཅིང་། སྐྱེ་ས་རིགས་རྒྱུད་མཉམ་པའི་ཇོ་མོ་སྟེར་མཁན་ཡོད་ཀྱང་། རྒྱལ་པོ་དེས་མི་དཔྱད་མཁྱེན་པས། ཡུལ་གཞན་ཞིག་ན་རྒན་རྒོན་གཉིས་ལ་བུ་མོ་བསོད་ནམས་ཅན་གསུམ་ཡོད་པས་བླངས་ན་སྟེར་ཏེ། བསོད་ནམས་ཆེ་བ་མཉམ་པ་ལ་སུ་སྤྱང་གྲུང་འཛོམས་པ་བརྟག་དགོས་བསམས་ནས། རྒྱལ་པོས་ཁྱི་རྒན་ཞིག་ཏུ་བརྫུས་ནས་སྤྱང་གྲུང་བརྟག་དུ་བྱོན་ནོ། ཁོང་ཚོའི་ཡུལ་དེར་སླེབས་རྗེས་ཁལ་གཅིག་ཁུར་ནས་རྒན་རྒོན་དེའི་སྒོ་རྩར་ཕྱིན་པ་དང་། རྒན་མོ་ཆུ་ལེན་པ་དང་ཐུག  ཁྱི་རྒན་གྱིས་མ་རྒན་མོ། ངའི་ནས་ཁལ་གཅིག་པོ་འདི་ཉར་རོགས་གྱིས་དང་བྱས་པས། རྒན་མོ་ན་རེ། ནས་ཉར་རོགས་བྱེད་དང་ཟེར་ན་ཉར་ཆོག་ཟེར། ཁྱི་རྒན་དེས་ང་རང་གི་ནས་འདི་ནམ་ལེན་དུ་འོང་ཡང་ངོ་བོ་དགོས་ཟེར་བས་རྒན་མོས་ནམ་ལེན་དུ་འོང་ཟེར་བར། ནམ་ཡོང་ངེས་པ་མེད་ཟེར་ནས་ཁྱི་རྒན་ལོག་ཕྱིན། དེ་ནས་ལོ་ཁ་ཤས་སོང་ཡང་ཁྱི་དེ་ནས་ལེན་དུ་མ་ཡོང་། རྒན་མོ་ན་རེ། རྒད་པོ། ཁ་གསང་ནས་བཅོལ་བའི་ཁྱི་དེ་ནི་ཁྱི་རྒན་གཡང་རལ་ཉིལ་ལེ་བ་གཅིག་འདུག ཁྱིའི་ཚེ་ནི་ལོ་དགུ་ལས་མེད། ད་ཙམ་རང་ཤི་བ་ཨེ་ཡིན་ཟེར། ཁ་སང་ངོ་བོ་དགོས་ཟེར་བྱུང་སྟེ། ངོ་བོ་རང་མི་དགོས་ཡོང་། སྣོད་དོག་པ་ལས་ཆང་ཚོས་བྱས་པར། རྒད་པོ་ན་རེ། ཁ་སང་ངོ་བོ་དགོས་ཟེར་བས་བཞག་པ་ཨེ་དྲག་ཟེར། རྒན་མོས་ནས་བཟང་པོ་འདུག་པས་སྐྱིན་པ་ལྡབ་་འགྱུར་འཇལ་བས་གོ་ཆོད་ཡོང་ཟེར། དེ་ནས་ཞག་ཁ་ཤས་སོང་བ་དང་། ཁྱི་དེ་ཆུ་མིག་ཁར་ཡོང་བ་དང་བུ་མོ་ཆེ་ཤོས་ཆུ་ལེན་པ་དང་ཐུག་སྟེ། ཁྱིས་བུ་མོ་ལ་སྨྲས་པ། འ་འུ་འ་འུ་བུ་མོ་ཁྱོད་ཀྱི་ཨ་མ་ལ་ངས་ཁ་སང་བཅོལ་བའི་ནས་དེ་དགོས་གྱིས་དང་བྱས་པས། བུ་མོས་ཨ་མ་ལ། ཁྱི་རྒན་དེ་ནས་དགོས་ཟེར་སླེབས་འདུག་བྱས་པ་དང་། འོ་ན་ནང་དུ་བོས་མི་ཡོང་བ་ཟེར། ཨ་མས་ཁོ་ནང་དུ་བོས། ཨ་ཕོ་ཁ་སང་ནས་བསྒུགས་པས་སླེབས་མ་བྱུང་། ནས་དེ་སྣོད་ཆས་དགོས་པ་བྱུང་ནས་ངེད་རང་གི་ནས་དང་འདྲེས་སོང་བྱས་པས། ཁྱི་རྒན་གྱིས་འདྲེས་ཚར་ཡང་ངའི་ནས་བསྒྲུག་པས་ཆོག་ཟེར། དེ་ནས་ཁྱི་ན་རེ། ནས་དེ་འདྲ་ལྡབ་བྱུང་ཡང་ངའི་ངོ་མ་མ་བྱུང་ན་མི་ལེན་ཟེར་བར། རྒན་མོས་ཁ་སང་ནས་དེ་ལས་མགྱོགས་ཙམ་མི་ཡོང་བ་བྱས་པར། ཁྱི་ཁོས། ང་ནི་ནམ་ཡོང་མེད་པས་ཞོག་བྱས་པ་ཡིན། ད་ཁྱོད་རང་གི་ནས་ངོ་བོ་སྤྲད་རྒྱུ་མེད་པས་ན་ང་ལ་བུ་མོ་གཅིག་སྟེར་དགོས་བྱས་པར། ངོ་ཚབ་མ་ལོན་ན་བུ་མོ་སྟེར་ཆོག་ཟེར་ནས་བུ་མོ་ཆེ་བ་དེ་ཁོ་ལ་བྱིན། བུ་མོ་དེ་ཁོས་ཁྲིད་ནས་བགྲོད་པའི་ལམ་བར་ཆུ་ཆེན་པོ་ཞིག་འདུག་པ་ལ། བུ་མོ་རང་ངས་འཁུར་ཆོག་བྱས་ནས་བུ་མོ་དེ་ཁྱིའི་སྒལ་པར་ཁུར་ནས་ཆུ་ལས་བསྒྲལ། ཁྱི་དེས་བུ་མོ་དེ་གྲུང་པོ་ཡོང་བ་མི་འདུག་བསམས། དེ་ནས་གྲོགས་པོ་ཞིག་གི་ནང་དུ་ཕྱིན་པ་དང་། ནང་དེ་ན་ཐབ་གདན་ཆས་དང་བཅས་བཟའ་བཏུང་གང་དགོས་ཀྱང་འདུག་གོ། དེར་ཁྱིས་བུ་མོ་ལ་སྨྲས་པ། ཤ་མར་བུ་མོ་རང་ཡང་ཟོ། ང་ལ་ཡང་གནང་། བུ་མོ་རང་གདན་ཐིང་སྐྱིད་པོ་གྱིས་བྱས་པ་དང་། བུ་མོའི་བསམ་པར་ཁྱི་རྒན་འདི་དང་འགྲོགས་ན་དགའ་རབ་འདུག་བསམས་ནས་མོ་རང་རྒྱགས་ཚད་ཟོས། ཁྱི་ལ་ཁྱི་ལྟོ་བསྐྱལ། མོ་རང་གདན་གསུམ་བརྩིགས་བཏིངས། ཁྱི་ལ་གདན་མཐིལ་མེད་གཅིག་བཏིངས་པ་དང་། ཁོའི་བསམ་པ་ལ་བུ་མོ་འདི་ལྐུགས་མ་ལག་པས་ཐེག་ཚད་ཅིག་ཡོང་བ་འདུག་བསམ་པ་སེམས་ཤར། བསོད་ནམས་ཆེན་པོ་ཡོང་བ་འདུག་སྟེ་དེ་ལས་གྲུང་བ་ཞིག་བྱུང་ན་དགའ་བསམས་ཏེ། ཁྱིས་བུ་མོ་རང་ཨ་མ་འཕྲད་དུ་འགྲོ་བའི་གྲབས་གྱིས་ཟེར་ནས་ཤ་ཁོག་གཅིག་ཁུར་ཏེ་ཁོང་གཉིས་ཨ་མ་འཕྲད་དུ་ཕྱིན་ནོ། ནང་དུ་སླེབས་པ་ཨ་མས་བུ་མོ་སླེབས་སམ་སྐྱིད་པོ་བྱུང་ངམ་ཟེར། བུ་མོས་སྐྱིད་པོ་བྱུང་ཟེར། ཨ་ཕོ་ཁྱི་རྒན་གར་སོང་ཟེར། ཁོ་མདོ་ན་ཡོད་ཟེར། ཨ་མས་ཁྱོད་རང་གཏི་ཐུག་པ་ལས་མི་འདུག ནང་དུ་བོས་མི་ཡོང་བ་ཟེར་ནས་ཨ་མ་ཕྱིར་དོན་ཏེ། ཨ་ཕོ་ཁྱི་རྒན་བྱོན་པ་ལེགས་བྱས་པས། འ་འུ་ཨ་མ་རྒན་མོ་ཁམས་བཟང་ངམ་ཟེར། དེར་ཁྱི་རྒན་ནང་དུ་བོས་ཏེ་ཁྱི་རྒན་གྱིས་རྒན་རྒོན་གཉིས་ལ་སྨྲས་པ། ང་ལ་ཁྱོད་ཀྱི་བུ་མོ་བར་མ་དེ་སྟེར་རོག་ས་བྱས་པར། ད་ཨ་ཕོ་ཁྱི་རྒན་ལ་སྟེར་རོགས་ཟེར་ན་སྟེར་དགོས་ཟེར་བྱིན་ནོ། ཁོང་གཉིས་མཉམ་དུ་ཕྱིན་ཏེ། ཆུ་དེའི་ཙར་སླེབས་པ་དང། འ་འུ་བུ་མོ་རང་ངས་འཁུར་བྱས་པས། ཨ་ཕོས་ང་ཁུར་བས་ཡོང་དོགས་མེད། ཨ་ཕོས་ངའི་གོས་དང་ཟོན་པ་གཉིས་འཁུར་རོགས་གྱིས་ཟེར་མགོ་སྦྲེལ་ནས་བསྐུར་རོ། དེར་ཁོའི་བློ་ལ་ཨ་ཅག་ལས་དྲག་པ་ཞིག་ཡོང་བ་འདུག་བསམས། གྲོགས་ནང་དུ་ཡར་ཁྲིད་པ་དང་། དེར་སླེབས་རྗེས་བུ་མོ་ཁྱོད་རང་ཤ་མར་ཟོ། གདན་ཐིང་། ང་ལ་ཡང་གནང་བྱས་པས། བུ་མོས་ཤ་རུས་ཕྱེ་མར་དང་རུས་པ་རྣམས་ཁྱི་ལ་བྱིན། མོ་རང་ཞིམ་པ་དང་ཚོ་བ་རྣམས་ཟོས་པས། ཁོའི་བསམ་པར་བུ་མོ་འདི་ཨ་ཅེ་ལས་དྲག་པ་ཞིག་ཡོང་བ་འདུག་སྟེ། ད་དུང་གདམ་ཁ་བྱ་རྒྱུ་ཡོད་པས་བུ་མོ་ཆུང་བ་དེ་སྤྱང་གྲུང་འཛོམས་ལོད་བལྟ་དགོས་བསམས། ཡང་བུ་མོ་དེ་ལ་ཁྱི་རྒན་གྱིས་སྨྲས་པ། བུ་མོ་རང་ཤ་ཁོག་གཅིག་ཁུར་ནས་ཨ་མ་འཕྲད་དུ་ཕྱིན་པ་དྲག་བྱས་ནས་ཁྱི་རྒན་དང་མཉམ་དུ་ཕྱིན་ནོ། སྒོ་རྩར་སླེབས་འཕྲལ་བུ་མོ་ནང་དུ་ཕྱིན་པ་དང་རྒན་རྒོན་གཉིས་ན་རེ། བུ་མོ་སླེབས་སམ་སྐྱིད་པོ་བྱུང་ངམ། ཨ་ཕོ་ཁྱི་རྒན་གར་སོང་ཟེར། བུ་མོས་ང་སྐྱིད་པོ་བྱུང་། ཁྱི་རྒན་མདོ་ན་ཡོད་ཟེར། ཨ་མས་ངེད་རང་གི་བུ་མོ་འདི་གཉིས་ལྐུགས་མར་འདུག ནང་དུ་བོས་མ་ཡོང་བ་ཟེར། ཨ་མས་འབོད་དུ་ཕྱིན་ནས་ཨ་ཕོ་ཁྱི་རྒན་བྱོན་ནམ་བྱས་པས། འ་འུ་མ་རྒན་མོ་ཁམས་བཟང་ངམ་ཟེར། དེར་ཁོ་ནང་དུ་བོས། ཁྱི་རྒན་ན་རེ། ཁྱོད་ཀྱི་བུ་མོ་ཆུང་ཤོས་དེ་ང་ལ་སྟེར་རོགས་ཟེར་བར། རྒན་རྒོན་གཉིས་ན་རེ། སྐྱིད་པོ་ཡོང་བ་འདུག་པས་སྟེར་དགོས་ཟེར། བུ་མོ་ཆུང་ཤོས་ཀྱང་བྱིན་ནས་ཁོ་གཉིས་བསྡེབས་ནས་ཕྱིན་ནོ། ཆུ་ཆེན་པོ་དེའི་རྩར་སླེབས་པ་དང་། བུ་མོ་རང་ངས་འཁུར་བྱས་པས། མོ་ན་རེ། ང་ཁྱོད་ཀྱི་ཁུར་བས་ཡོང་དོགས་མེད། ཁྱེད་ཁྱི་ཡིན་ཡང་ཨ་མས་ང་ཁྱེད་ལ་བྱིན་ཟིན། ཁྱེད་ཁྱོ་བོ་བཟའ་དཔོན་ཡིན་པས་ན་ངས་ཁྱེད་འཁུར་དོགས་རུང་མི་ཐེག་པ་འདུག་ལགས་ཟེར། དེར་ཁྱི་ཁོ་སེམས་གཏིང་ནས་མགུ་སྟེ། འོ་ན་ཁྱེད་ཀྱི་རྐང་པའི་ལྷམ་ངས་འཁུར་ཆོག་བྱས་པས། ལྷམ་ཁྱེད་ལ་བཀལ་བས་ཡོང་དོགས་མེད་ཟེར་ནས་འཁུར་དུ་མ་བཅུག་གོ། དེར་ཆུ་དེ་བརྒལ་ནས་གྲོགས་ནང་དུ་སླེབས་པ་དང་ཐབ་གདན་ཆས་དང་བཅས་པ་འདུག་པ་ལ། ཁྱི་ཁོ་ན་རེ། བུ་མོ་རང་ཡང་ཤ་མར་ཟོ། ང་ལ་ཡང་བྱིན་བྱས་པས། མོས་ཤ་རྣམས་བཙོས། མར་རྣམས་བཞུ་མར་བཅོས། རང་ཉིད་ཀྱིས་ཟས་པ་ལྟར་ཁྱི་ཡང་སྟེར་བས། ཁོ་དགའ་ནས་བུ་མོ་སྨྲས་པ། ཨ་ཅེ་གཉིས་པོས་ནི་ང་ལ་སྟེར་གྱི་མེད། བུ་མོས་སྟེར་བ་དགའ་རབ་ཡིན་བྱས་པས། བུ་མོས་སྨྲས་པ། སྟེར་རྒྱུ་བྱུང་བ་ནི་ཁྱེད་རང་གི་དཔལ་འབྱོར་ཡིན་བྱས་པ་དང་། རྒྱལ་བུ་ཁྱི་སྤྲུལ་གྱི་བསམ་པ་ལ། བུ་མོ་འདི་བསོད་ནམས་ཨ་ཅེ་གཉིས་དང་མཉམ་ལ། འདི་སྤྱང་སྒྲུང་འཛོམས་པ་ཡོང་བ་འདུག ད་གཏན་གྱི་འདུན་མ་དེ་ལེགས་འདུག་བསམས་ནས་ཞེ་མགུའོ། དེའི་ནུབ་མོར་གདན་མཐུག་པ་རྣམས་ཁྱི་ལ་བཏིངས། སྲབ་པ་རྣམས་མོ་རང་གིས་བཏིངས་ནས་ཉལ་ལོ། སང་སྔ་མོ་ནས་ལངས་ཏེ་ཁྱི་ལུད་རྣམས་དང་ཨ་ཅེ་གཉིས་ཀྱིས་བཏང་བའི་མི་གཙང་བ་རྣམས་ཕྱག་བདར་བྱས་ཏེ་ཁམས་བདེ་སིང་ངེ་བ་ཞིག་བཟོས། དེར་རྒྱུན་རེང་བསྡད། དེའི་རིང་བུ་མོ་དེ་ལ་ཁྱི་གུ་གསུམ་སྐྱེས་སོ། དེར་རྒྱལ་པོ་ཁྱི་སྤྲུལ་གྱིས་མོ་ལ་སྨྲས་པ། གྲོགས་པོའི་སར་ནི་གཏན་དུ་སྡོད་པའི་གནས་མ་ཡིན། ད་སྡོད་ས་སྤོས་པ་དྲག་ཟེར། བུ་མོས་སྨྲས་པ། ཁྱི་གུ་འདི་རྣམས་རང་མགོ་མ་ཐོན་བར་གཞན་དུ་ཕྱིན་ཀྱང་སྐྱིད་པོ་ཨེ་ཡོང་མི་ཤེས་པས་འདི་གར་བསྡད་ན་དགའ་ཟེར། ཁྱི་རྒན་ཁོ་ན་རེ། འདིར་སྡོད་ཡུན་རིང་ན་སྐྱིད་པོ་མི་ཡོང་བས་ད་ལྟ་ནས་ཕྱིན་ན་དྲག་ཟེར། བུ་མོས་ཐབ་གདན་འདི་ཚོ་གང་འདྲ་བྱས་ན་དྲག་ཟེར་བར། ཐབ་གདན་གྲོགས་པོས་ཉ་ར་བྱས་ཡོང་ཟེར་ནས་འགྲེམས་སོང་། ཁོང་གཉིས་དེ་ནས་ཐོན་ཏེ་གང་ཙམ་ཕྱིན་ཙ་ན། ལུང་པ་ཞིག་གི་ཕུ་ན་འབྲོག་པ་མང་པོ་ཡོད་པ་མཐོང་། ཁྱི་ན་རེ།  ངས་རུ་བ་ཡ་ནས་སློང་མོ་འདྲ་བྱས་ཟེར་འགྲོ་གྲབས་བྱས་པས། བུ་མོས་ང་ཚོ་བསྡེབས་ནས་ཕྱིན་པ་དྲག རུ་བའི་ཁྱི་མང་པོས་ རུབ་བརྒྱབ་ནས་ཁྱེད་བསད་ན་ཁྱི་གུ་འདི་དག་ནི་ཆུང་། ཡུལ་དུ་ལོག་པ་ལ་ནི་ངོ་ཚ། ངེད་མ་བུ་ག་འདྲ་བྱེད་བྱས་པས། ཨའུ་ཙེ་སྣང་དག་ཅི་ཡང་མི་ཡོང་།  ཁྱོད་རང་ཁྱི་ཁྲུག་རྣམས་ཁྱེར་ནས་ག་ལེར་ཤོག་ཟེར་སོང་ངོ་། མོས་རྗེས་ལ་ཕྱིན་ཙ་ན། སྒང་གཤོང་ཞིག་ནས་མིག་གིས་མ་མཐོང་། བུ་མོས་གྱེན་ལ་འཛེགས་ནས་འགྲོ་སྐབས། རྐང་རྗེས་ཁྲ་ལམ་མེར་མཐོང་རྒྱུ་ཡོད་ཅིང་། སྒང་ཞིག་ནས་མར་བབས་ཡོང་ཙ་ན་གཤོང་ཞིག་ན་ཁྱི་ལྤགས་དེ་ཐ་རེ་ཐོ་རེར་བཏང་། ཁྲག་དམར་འཛར་རེ་འདུག་པ་མཐོང་། བུ་མོའི་བསམ་པ་ལ་འདི་འདྲ་བའི་ལས་ཤིག་ཡོང་བསམས་པ་མ་བྱུང་། གྲོགས་ནང་དེར་སྡོད་མི་དྲན་པ་སུ་འདྲས་ཁྲིད། ད་ཡུལ་དུ་ལོག་འགྲོ་བ་ལ་ནི་མི་ལ་ཁྱི་གུ་སྐྱེས་པས་ངོ་ཚ། སྤྲང་དུ་འགྲོ་བ་ལ་ནི་མི་ལ་ངོ་ཚ་བསམས་ནས། ཁྱི་ལྤགས་དེ་རྣམས་བྲང་འོག་ཏུ་བཙུད་དེ་ངུ་ཡིན་བསྡད་པས། དར་ཅིག་ནས་རྟ་པ་ཚོ་ཞིག་དཔོན་མོ་ལགས་ཟེར་མར་བྱུང་སྟེ། ཡུལ་འདི་ན་ང་མིན་པ་བུད་མེད་མི་འདུག་བསམས་ངུ་མཚམས་བཞག་སྟེ་མགོ་ཡར་བཀྱགས་པས་བལྟས་པས། རྟ་པ་དེ་རྣམས་སྔས་མགོར་ཡོང་ནས་དཔོན་མོ་ལགས་བཞེངས་པ་ཞུ་ཟེར། མོས་རྟ་པ་ཚོ་ལ་སྨྲས་པ། དྲུང་པ་རྣམས་ཀྱིས་སུ་དང་ནོར།  བདག་ལ་ཁྱོ་བོ་ཁྱི་རྒན་ཞིག་ཡོད་པ་དེ་རུ་བའི་ཁྱིས་རུབ་བརྒྱབ་ནས་འདི་ན་བསད་འདུག་ཞུས་པས། མ་ནོར་ལགས་བཞེངས་པར་ཞུ་ཟེར་ལག་པ་ནས་འཐེན་ནོ། མོའི་བསམ་པ་ལ་འདི་སུ་དང་ནོར། ངའི་ཁྱོ་བོ་ཁྱི་རྒན་ནི་བསད་འདུག་བསམས་པ་དང་། དེར་མོ་ཡར་ལངས་པས་མོ་ལ་རྒྱན་ཆ་ལུགས་རྣམས་ལེགས་པར་སྤྲས། ད་སྲས་ལྕམ་སྲིང་ག་ན་ཡོད་ལགས་ཟེར། ང་ལ་ནི་ཁྱི་གུ་གསུམ་ལས་མེད་སུ་དང་ནོར་བྱས་པས། འདི་རང་དགོས་ལགས་ཟེར་རྟ་པ་དེའི་པང་དུ་ཁྱེར། དེར་ཡོད་ཚད་རྟ་ལ་བཞོན་ནས་རྒྱལ་པོའི་ཕོ་བྲང་དུ་བྱོན་པ་དང་། རྒྱལ་པོ་དེ་གསེར་ཁྲི་ལ་བཞུགས། བློན་པོ་རྣམས་ཀྱིས་མཐའ་ནས་བསྐོར། རྒྱན་དང་ཆ་ལུགས་ལེགས་པར་སྤྲས། བུ་མོ་དེ་ལ་གཡུ་ཁྲི་ཞིག་བརྒྱབ་ནས་དེའི་སྟེང་དུ་སྡོད་བྱས་པ་དང། མོའི་སེམས་ལ་ང་ལ་ནི་ཁྱོ་བོ་ཁྱི་རྒན་ཞིག་ལས་མེད། འདི་ནི་རྒྱལ་པོ་མཚར་སྡུག་ཆེ་ལ་འོད་ཆགས་པ་ཞིག་འདུག་བསམས་ཏེ་ལབ་ངོ་མ་ཤེས་པར་ཀྲོང་ངེར་བསྡད་པས། རྒྱལ་པོས་བུ་ཚ་མིང་སྲིང་ག་ན་ཡོད་གསུངས་པ་དང་། ཁུར་མཁན་དེ་ཚོས་ཁྱི་གུ་རྣམས་རྒྱལ་པོའི་ཕྱག་ཏུ་ཕུལ་བ་དང་། ཁྱི་གུ་གསུམ་གྱི་སྤྱི་གཙུག་ནས་ཐང་ཙམ་བྱས་པ་དང་། ཁྱི་གུའི་པགས་པ་ཟུ་ལུ་ལུ་བུད་ནས་སྲས་པོ་མཚར་སྡུག་ཅན་གཉིས་དང་། སྲས་མོ་གཅིག་དང་གསུམ་བྱུང་ངོ་། རྒྱལ་པོས་འདི་རྣམས་ང་འདྲའོ་གསུངས། ངས་སྤྲུལ་པ་བྱས་པ་ཡིན་བུ་མོ་གཡུ་ཁྲི་ལ་སྡོད་གསུངས་པ་དང་། བུ་མོ་རབ་ཏུ་དགའ་ཞིང་ཧ་ལས་ནས་ཕྱག་བྱས་གཡུ་ཁྲི་ལ་བསྡད། ཡུལ་དེའི་དཔོན་མོ་བྱས། ཕ་མ་རྒན་རྒོན་ཡང་དེར་བོས། རྒྱལ་འབངས་རྣམས་སྔར་ལས་བདེ་ཞིང་སྐྱིད་པ་བྱུང་ཞིང་། བུ་མོ་དེ་བསོད་ནམས་ཆེ་བར་ཐག་ཆོད་པ་ཞིག་བྱུང་བ་ཡིན་པར་གདའ་བྱས་པས། རྒྱལ་བུ་བདེ་སྤྱོད་བཟང་པོའི་ཞལ་ནས། བུ་མོ་དེ་ཨ་ཅེ་གཉིས་ལས་ཀྱང་སྤྱང་གྲུང་འཛོམས་ལ་བསོད་ནམས་ཆེ་བ་ཞིག་བྱུང་འདུག་བྱས། རོ་ལ་གཏམ་ལན་ཤོར། རོ་ན་རེ། རོ་ལ་གཏམ་ཟེར་བྱ་ཁྲ་ཧུར་ཟེར། ལྡན་ལྕག་མེ་བུས་པ་འདྲ་བ་གསུམ་བརྒྱབ་ནས་རོ་དེ་རྡུལ་འཕྱུར་རེ་ལོག་སོང་ངོ་། རྒྱལ་བུའི་བསམ་པ་ལ་བླ་མས་རོ་ལ་གཏམ་ལན་མ་བྱེད་གསུངས་བྱུང་སྟེ་ངས་རོ་ལ་གཏམ་ཤོར། ད་རོ་མེད་པར་ཕྱིན་ན་བཀའ་བཀྱོན་ཡོང་བསམས་ནས་དུར་ཁྲོད་དེ་རུ་ཕྱིན་ནོ། །