དགེ་འདུན་ཆོས་འཕེལ་གྱི་ཀླུ་སྒྲུབ་དགོངས་རྒྱན།

     དབུ་མའི་ཟབ་གནད་སྙིང་པོར་དྲིལ་བའི་ལེགས་བཤད་ཀླུ་སྒྲུབ་དགོངས་རྒྱན་ཞེས་བྱ་བ་བཞུགས་སོ། །བདུད་ཀྱི་མཚོན་ཆ་རྩུབ་མོ་དག་ལ་འཇམ་མཉེན་མེ་ཏོག་ལན་དུ་སྦྱིན། །ལྷས་བྱིན་ཁྲོས་པའི་སྒྱོགས་རྡོ་འཕངས་ཚེ་མི་སྨྲའི་བརྟུལ་ཞུགས་དང་དུ་བླངས། །རང་གི་དགྲ་ལ་སྡང་མིག་ཙམ་ཡང་བལྟ་བར་མི་ནུས་ཤཱཀྱའི་སྲས། །འཇིགས་རུང་འཁོར་བའི་དགྲ་ཆེན་སྐྱོབས་པའི་གྲོགས་སུ་ཤེས་ལྡན་སུ་ཡིས་བཀུར། །དགེ་ལེགས་ཞི་བསིལ་བདུད་རྩིའི་འབྱུང་གནས་ཐར་པའི་ལམ། །འདུན་པས་ཕྲ་ཞིབ་མ་ནོར་མཚོན་པ་སྲིད་པའི་མིག །ཆོས་རྗེ་སྨྲ་བའི་སེང་གེ་མཆོག་ནི་འདིའོ་ཞེས། །འཕེལ་འགྲིབ་མེད་པར་རིགས་སྨྲ་ཚོགས་ཀྱིས་རྟག་ཏུ་གུས། །གང་གི་མཁྱེན་པའི་ཉི་མའི་དཀྱིལ་འཁོར་ཀུན་ཏུ་བཟང་པོའི་མཁའ་དབྱིངས་ནས། །སྐྱེས་སྦྱངས་ཤེས་རབ་དམན་པ་ཁོ་བོའི་སྙིང་གི་པདྨོའི་དགའ་ཚལ་དུ། །རིགས་པའི་འོད་ཟེར་ལན་སྟོང་འཁྱིལ་བའི་ལེགས་བཤད་གེ་སར་འཛུམ་པའི་དཔལ། །སྲིད་གསུམ་མཁས་པའི་བུང་བས་དོན་རྒྱུད་སྦྲང་རྩི་མངར་མོར་ལོངས་སྤྱོད་ཅིག །རང་ཅག་གིས་ཡིན་མིན་ཐག་བཅད་པ་ཐམས་ཅད་ཀྱང་། རང་གི་སེམས་ལ་ཇི་ལྟར་ཤར་བ་བཞིན་ཐག་བཅད་པ་ཙམ་ལས། རྩ་བ་གཞན་ཅི་ཡང་མེད། འདིའི་རྒྱུ་མཚན་གྱིས། འདི་ཡོད་དམ་མེད་ཅེས་དྲིས་པ་ན། ཕ་རོལ་པོས་ཡོད་ཅེས་ལན་བཏབ་པ་ཡང་དོན་ལ་ཁྱོད་ཀྱི་སེམས་ལ་འདི་ཡོད་མེད་གང་དུ་ཤར་ཞེས་དྲིས་པ་ཡིན་ལ། ལན་བཏབ་པ་ཡང་། ངའི་སེམས་ལ་ཡོད་པ་ཡིན་པར་ཤར་ཞེས་སྨོས་པ་ཙམ་ཡིན། དེ་བཞིན་དུ་ལེགས་ཉེས་བཟང་ངན་མཛེས་མི་མཛེས་སོགས་ཅི་དང་ཅི་དྲིས་པ་ཐམས་ཅད་ཀྱང་། དོན་ལ་ཕ་རོལ་པོའི་བསམ་ཚུལ་གོ་བའི་ཆེད་དུ་དྲིས་པ་ཤ་སྟག་ཡིན་ལ། ཕ་རོལ་པོས་དེ་ལ་ཐག་བཅད་ནས་ལན་བཏབ་པ་ཡང་། དོན་ལ་ཁོ་རང་གི་སེམས་ལ་འཆར་ཚུལ་ལྟར་ཐག་བཅད་པ་ཙམ་ཡིན་གྱི། རྒྱུ་མཚན་གཞན་ནི་ཅི་ཡང་མེད། དེའི་ཕྱིར་གང་ཟག་གཉིས་ཀྱི་བསམ་ཚོད་ཕན་ཚུན་མ་མཐུན་པ་དེ་སྲིད་དུ་ཁོ་རང་གཉིས་རྩོད་པ་བྱེད་པ་ཡིན་ལ། གཉིས་ཀ་ཁ་མཐུན་པའི་ཚེ་ཁ་མཐུན་པའི་དོན་དེ་ག་ཡིན་པ་དང་། ཡོད་པ་དང་། ཤེས་བྱ་དང་། ཚད་མ་ལ་སོགས་པའི་གྲས་སུ་འཇོག་པ་ཡིན་ནོ། །དེ་ལྟར་ཁ་མཐུན་མཁན་ཅི་ཙམ་མང་བ་དེ་ཙམ་དུ་ཁ་མཐུན་པའི་དོན་དེ་འགངས་དང་གནད་ཆེ་རུ་འགྲོ་ཞིང་། དེ་ལ་ཁ་མི་མཐུན་པའི་ལྟ་བ་གང་ཡིན་ལོག་ལྟ་དང་། འཁྲུལ་ཤེས་སོགས་སུ་བྱེད་པ་ཡིན་ནོ། །ཁ་མཐུན་ལུགས་དེ་ཡང་། རེས་འགའ་ནི་ལུང་ཙམ་ཞིག་ལ་ཐུག་ནས་མཐུན་པ་ཡོད། དཔེར་ན་ཁ་ཆེ་གཉིས་ཀྱིས་རྔ་མོང་གི་ཤ་ཟ་ཆོག་མི་ཆོག་ལ་རྩོད་པ་བྱས་པའི་མཐར། གོ་རའི་ནང་དུ་རྔ་ཤ་ཟ་བའི་གནང་བ་ཐོབ་པ་མཐོང་བའི་ཚེ་གཉིས་ཀ་ཡང་། དེ་ཟ་ཆོག་པའི་སྟེང་དུ་ཁ་མཐུན་པ་བཞིན་ནོ། །རེས་འགའ་ནི། རྩོད་མཁན་གཉིས་ཀྱི་རིགས་པ་ཞིག་ལ་ཐུག་ནས་གཉིས་ཀ་ཁ་མཐུན་པ་ཡང་ཡོད་དེ། དཔེར་ན་ལ་ཕར་རྒྱབ་ན་མེ་ཡོད་མེད་རྩོད་པ་ན། ལའི་ཁར་དུ་བ་མཐོང་ནས་གཉིས་ཀ་ཁ་མཐུན་པ་ལྟ་བུ། གང་ལྟར་ཡང་གཉིས་ཀའི་དབང་པོ་མངོན་སུམ་དུ་མཐོང་བ་ན། རྩོད་པ་མེད་པར་ཁ་མཐུན་པ་ནི་སོ་སོའི་སྐྱེ་བོ་ཐམས་ཅད་ལ་ཡོད་དོ། །འོ་ན་ཐམས་ཅད་ཁ་མཐུན་པ་ཞིག་ལ་རྩ་བ་བཅོལ་ནས་ཤེས་བྱའི་རྣམ་གཞག་ཁས་བླངས་པ་མི་བསླུ་བ་ཡིན་ནམ་སྙམ་ན། དེ་ཡང་མིན་ཏེ། དཔེར་ན་ཡུལ་གཅིག་གི་མི་ཐམས་ཅད་ཀྱི་མིག་ལ་མཁྲིས་ནད་ཀྱི་སྐྱོན་ཡོད་པའི་ཕྱོགས་གཅིག་ཏུ་སླེབས་ན། ཡུལ་དེའི་མི་ཐམས་ཅད་ཀྱང་། དུང་དཀར་སེར་པོ་ཡིན་པ་ལས་དཀར་པོ་མེད་པ་ཁ་མཐུན་མོད་ཀྱི། དེ་ཙམ་གྱིས་དུང་དཀར་སེར་པོ་ཡིན་པར་འཇོག་མི་ནུས་པ་ཡིན་ནོ། །དེ་ལྟར་མི་བརྒྱ་ཕྲག་འགའ་ཞིག་ཁ་མཐུན་པ་ཙམ་གྱིས་ཀྱང་། དོན་དེ་ཡོད་པ་ཐག་མི་ཆོད་ལ། ཁྲི་དང་སྟོང་ཁ་མཐུན་པས་ཀྱང་ཐག་མི་ཆོད། མིའི་འགྲོ་བ་ཐམས་ཅད་ཁ་མཐུན་པས་ཀྱང་ཐག་མི་ཆོད། ཁམས་གསུམ་གྱི་སོ་སྐྱེ་ཐམས་ཅད་ཁ་མཐུན་པས་ཀྱང་ཐག་མི་ཆོད་པ་ཡིན། དེས་ན་རང་ཅག་རྣམས་ཀྱིས་ཡོད་མེད་ཡིན་མིན་གང་ཐག་བཅད་པ་ཐམས་ཅད་ཀྱང་རང་རང་གི་བློ་ལ་ཤར་ལུགས་བཞིན་དུ་ཐག་བཅད་པ་ཙམ་ཡིན་ལ། དེ་འདྲ་བའི་བློ་ལ་འཆར་ཚུལ་ཕན་ཚུན་མཚུངས་པའི་སོ་སོའི་སྐྱེ་བོ་བརྒྱ་སྟོང་ཕྲག་དུ་མ་ལྷན་ཅིག་ཏུ་ཚོགས་པ་ན། གང་ཐག་བཅད་པའི་དོན་ནི། རྩ་བ་བརྟན་ཅིང་འགྱུར་དུ་མེད་པ་ཞིག་ཏུ་གྱུར་ནས། དེ་དང་མི་མཐུན་པར་སྨྲ་བ་རྣམས་ལ་སྐུར་འདེབས་དང་། ཆད་ལྟ་སོགས་སུ་དྲིལ་སྒྲོག་པ་ཡིན་ནོ། །དེས་ན་རང་ཅག་གིས་ཡོད་མེད་སྨྲས་པ་རྣམས་ནི་དོན་ལ་རང་རེའི་བློ་ངོ་ལ་འཆར་རྒྱུ་ཡོད་པའི་གྲས་རྣམས་ཡིན། མེད་པ་དང་མི་སྲིད་ཅེས་སྨྲས་པ་རྣམས་ནི་རང་ཅག་གི་བློ་ངོ་ལ་འཆར་མ་ཐུབ་པའི་གྲས་རྣམས་ཡིན། ཡོད་མེད་གང་ཡང་མ་ཡིན་པའི་ཆོས་ཉིད་ཀྱང་སྔ་མའི་གྲས་མ་ཡིན་གྱི། ཕྱི་མའི་གྲས་ཡིན།དེ་ལྟར་ཁ་མཐུན་པའི་ཕྱོགས་མང་བ་དེས། ཕྱོགས་ཉུང་ངུ་དེ་རྫུན་དུ་གཏོང་བའི་དཔེ་ངོ་མཚར་ཅན་ཞིག་སློབ་དཔོན་ཟླ་བ་གྲགས་པས་ཀྱང་གསུངས་ཏེ། བཞི་བརྒྱ་པར། དེ་ཉིད་ཕྱིར་ན་འཇིག་རྟེན་ཀུན། །སྨྱོན་པ་ཡིན་ཞེས་ཅིས་མི་འཐད། །ཅེས་པའི་ཐད་ཀྱི་འགྲེལ་བ་ལས། སྔོན་ཡུལ་ཞིག་ན་རྩིས་མཁན་ཞིག་ཡོད་པ། རྒྱལ་པོའི་དྲུང་དུ་སོང་ནས་ད་ལྟའི་ཉིན་བདུན་པ་ལ་ཆར་པ་ཞིག་འབབ་པ་དེའི་ཆུ་ཁ་ལ་སོང་ཚད་ཀུན་སྨྱོན་པར་འགྱུར་རོ། །ཞེས་སྨྲས་སོ། རྒྱལ་པོས་དེ་ཐོས་ནས་རང་གི་ཆུ་བཏུང་བའི་ཁྲོན་པའི་ཁ་ལེགས་པར་གཡོགས་ནས་ཆར་པའི་ཆུ་ནང་དུ་མི་འཆོར་བར་བྱས། འབངས་རྣམས་ཀྱིས་ནི་དེ་འདྲ་མ་ནུས་པས་ཐམས་ཅད་ཀྱི་ཁ་ལ་ཆུ་དེ་སོང་བས་ཀུན་ཀྱང་སྨྱོན་པར་སོང་། རྒྱལ་པོ་གཅིག་པུ་སེམས་རྣལ་དུ་གནས་ནས་བསྡད། དེར་ཡུལ་མི་ཀུན་གྱི་བསམ་ཚུལ་བརྗོད་ཚུལ་དང་། རྒྱལ་པོའི་བསམ་ཚུལ་བརྗོད་ཚུལ་མི་མཐུན་པར་སོང་བས་ཐམས་ཅད་ཀྱིས་རྒྱལ་པོ་ལ་སྨྱོན་པ་ཞེས་སྨོད་པས། མཐར་རྒྱལ་པོ་ཡང་འུ་ཐུག་ནས་ཆུ་དེ་བཏུང་བས་ཀུན་དང་མཐུན་པར་གྱུར་ཏོ། །ཞེས་གསུངས་སོ། །དེས་ན་རང་ཅག་ཐོག་མ་མེད་པ་ནས་མ་རིག་པའི་སྨྱོ་ཆུ་བཏུང་བཏུང་བའི་སྨྱོན་པ་ཆེན་པོ་ཞིག་གིས། ཡོད་མེད། ཡིན་མིན་ཐག་བཅད་པ་ལ་ཡིད་བརྟན་ཅི་ཡང་མེད་ཅིང་། སྨྱོན་པ་དེ་འདྲ་བརྒྱ་སྟོང་ཁྲི་འབུམ་ཁ་མཐུན་ཀྱང་ཁུངས་བཙུན་དུ་འགྲོ་རྒྱུ་ཅི་ཡང་མེད།   གལ་ཏེ་རང་རེས་ཐག་བཅད་པ་ལ་ཡིད་རྟོན་མེད་དུ་ཆུག་ཀྱང་། སངས་རྒྱས་ཀྱིས་ཐག་བཅད་པའི་རྗེས་སུ་འབྲངས་ནས་མི་བསླུ་བ་ཡིན་སྙམ་ན། འོ་ན་སངས་རྒྱས་མི་བསླུ་བར་ཐག་གཅོད་མཁན་སུ་ཡིན། དེ་མི་བསླུ་བར་ནི་ཀླུ་སྒྲུབ་ལ་སོགས་པའི་མཁས་གྲུབ་ཆེན་པོ་རྣམས་ཀྱིས་ཐག་བཅད་དོ་ཟེར་ན། འོ་ན་ཀླུ་སྒྲུབ་མི་བསླུ་བར་སུས་ཐག་བཅད། དེ་ནི་རྗེ་བླ་མས་ཐག་བཅད་དོ་ཟེར་ན། འོ་ན་རྗེ་བླ་མ་མི་བསླུ་བར་སུས་ཤེས། དེ་ནི་ཁོ་བོ་ཅག་གི་བཀའ་དྲིན་མཚུངས་མེད་བླ་མ་དམ་པ་ཆེ་གེ་མོས་ཐག་བཅད་དོ་ཞེ་ན། འོ་ན་ཁྱོད་ཀྱི་བླ་མ་དམ་པ་ལ་བརྟེན་ནས་མི་བསླུ་བ་ནི་ཁྱོད་རང་གི་བློས་ཐག་བཅད་པར་འདུག་པས། དོན་ལ་སེང་གེའི་དཔང་པོ་ལ་སྟག སྟག་གི་དཔང་པོ་ལ་གཡག དེའི་དཔང་པོ་ལ་ཁྱི། ཁྱི་ཡི་དཔང་པོ་ལ་བྱི་བ། བྱི་བའི་དཔང་པོ་ལ་འབུ་བཙུགས་འདུག་པས་ཐམས་ཅད་ཀྱི་དཔང་པོ་མཐར་ཐུག་དེ་འབུ་ལ་བྱེད་པར་འདུག དེས་ན་གང་ཐག་བཅད་ཚད་ཀྱི་རྩ་བ་མཐར་ཐུག་ཞིབ་ཏུ་བཅད་ཚེ་རང་རང་གི་བློ་ལ་ཐུག་པ་མ་གཏོགས་གཞན་ཅི་ཡང་མི་སྣང་།   འོ་ན་རང་གི་བློས་ཐག་བཅད་པ་དེ་ག་རང་ལ་ཡིད་བརྟན་རུང་ངམ་སྙམ་ན། དེ་ཡང་མིན་ཏེ། རང་རེའི་བློ་འདི་ནི་རེས་འགའ་ནོར་བ་འདྲ་བ། རེས་འགའ་ཐིག་པ་འདྲ་བ་མོ་མ་ངན་པའི་མོ་བཞིན་དུ་རྟག་ཏུ་བསླུ་བཞིན་པ་མྱོང་བས་གྲུབ་པས་སུ་ཞིག་གིས་ཡིད་བརྟན་ཐུབ། སྔ་དྲོ་ཡིན་པ་ཐག་བཅད་པ་མང་པོ་ཕྱི་དྲོ་མིན་པར་ཐག་ཆོད། ཚེ་སྟོད་ལ་ཡིན་ཐག་བཅད་པ་རྣམས། ཚེ་སྨད་ལ་མིན་ཐག་ཆོད་པ་ཡོད། ཁ་ཆེ་འབུམ་ཕྲག་གཅིག་གིས་བདེན་པར་ཐག་བཅད་པ་རྣམས། ནང་པ་འབུམ་ཕྲག་གཅིག་གིས་རྫུན་པར་ཐག་གཅོད། དེ་རེ་རེ་ལ་ཡང་རང་རང་གི་ལུང་དང་རིགས་པ་རྡོ་རྗེ་ལྟ་བུ་བསྒྱུར་དུ་མི་བཏུབ་པ་རེ་ལ་རྩ་བ་བརྟེན་ས་ཡོད། དེ་རེ་རེས་ཀྱང་རང་རང་གི་སྟོན་པ་དེ་བསླུ་མེད་ཀྱི་སྐྱབས་གནས་མཐར་ཐུག་ཏུ་ཁས་ལེན། འོ་ན་གང་བདེན་པར་སུ་ཞིག་གིས་ཐག་གཅོད་དགོས།   གལ་ཏེ་མི་མང་ཁ་མཐུན་པ་ཙམ་གྱིས་མི་ཆོག་གིས། ཚད་མའི་སྒོ་ནས་ཐག་གཅོད་དགོས་སོ་ཞེ་ན། འོ་ན་ཚད་མ་བྱ་བ་ཅི་འདྲ་ཞིག་ཡོད། མིག་གིས་ཅེ་རེ་མཐོང་བའི་ཀ་བ་འདི་ཚད་མས་གྲུབ་པ་དང་དེ་ལྟར་མཐོང་བའི་བློ་དེ་ཚད་མ་ཨེ་ཡིན། ཡིན་ན་བློ་དེ་མི་བསླུ་བ་ཇི་ལྟར་ཐག་གཅོད་དགོས། ཀ་བ་ཡོད་མེད་ཐག་མ་ཆོད་བར་དུ་བློ་འདི་ཚད་མ་ཡིན་མིན་མི་ཤེས། བློ་འདི་ཚད་མ་ཡིན་མིན་ཐག་མ་ཆོད་བར་དུ་ཀ་བ་ཡོད་མེད་མི་ཤེས་པས། ནམ་ཞིག་ན་ཐག་ཆོད།   ཀ་བ་ཡོད་པའི་རྒྱུ་མཚན་མིག་གིས་མཐོང་རྒྱུ་ཡོད། ལག་པས་རེག་རྒྱུ་ཡོད། གྲོགས་ཀྱིས་བལྟས་ན་ཡང་མཐོང་རྒྱུ་ཡོད་པའི་རྒྱུ་མཚན་འདི་ཡིན་སྙམ་ན། སྔར་སྨོས་པ་ལྟར་མིག་དང་ལག་པ་གཉིས་ཁ་མཐུན། དེའི་སྟེང་དུ་གྲོགས་པོ་ཡང་ཁ་མཐུན་པས་ཐག་བཅད་པར་འདུག་མོད། དེ་འདྲ་ལ་ཡིད་བརྟན་ཅི་ཞིག་ཡོད། གལ་ཏེ་མིག་འཁྲུལ་སྲིད་ན། དེའི་སྟེང་དུ་ལག་པ་དང་། གྲོགས་པོ་གཉིས་འཁྲུལ་མི་སྲིད་པའི་རྒྱུ་མཚན་ཅི་ཞིག་ཡོད། མཁྲིས་ནད་ཅན་གཉིས་ཀྱིས་དུང་སེར་པོ་མིག་གིས་མཐོང་རྒྱུ་ཡོད། ལག་པས་རེག་རྒྱུའང་ཡོད། གཉིས་ཀ་སེར་པོ་ཡིན་པ་ལ་ཁ་ཡང་མཐུན་མོད། དོན་ལ་ཐམས་ཅད་ནོར་བ་མ་ཡིན་ནམ།   དེས་ན། ཡོད་མེད་ཡིན་མིན་གྱི་རྣམ་གཞག་བརྒྱ་ཕྲག་དུ་མ་བྱས་ཏེ་འདི་རྣམས་ཐག་གཅོད་མཁན་ང་མིན་གྱི། སངས་རྒྱས་ཡིན། ཀླུ་སྒྲུབ་ཡིན། ཤིང་རྟ་ཆེན་པོ་ཡིན་སོགས་གཏམ་རྫིག་པོ་སྣ་ཚོགས་སྨྲ་མོད་མཐར་གཏུག་ཚེ། སངས་རྒྱས། ཀླུ་སྒྲུབ། ཤིང་རྟ་ཆེན་པོ་སོགས་རང་གི་བློ་འདི་ཙམ་གྱིས་ཐག་བཅད་པར་འདུག་ཅིང་། རང་བློ་འཁྲུལ་བ་མེད་པ་མཁས་པ་སུས་ཀྱང་ཁས་མི་ལེན་པས། ད་ནི་ཐམས་ཅད་ཀྱི་རྩ་བ་རུལ་བ་མ་ཡིན་ནམ།   དེས་ན་འཁོར་བའི་ཡུལ་འདིར་ཇི་སྲིད་གནས་པ་དེ་སྲིད་དུ་ཐག་བཅད་ཚད་ཐམས་ཅད་ཡིད་བརྟན་མེད་པའི་བློ་འདི་ལ་ཡིད་བརྟན་བྱས་ནས་ཐག་གཅོད་པ་ཙམ་ལས་ཐབས་གཞན་ཅི་ཡང་མེད་པ་བདེན་མོད་ཀྱི། འདི་ཙམ་ཞིག་གིས་ཆོས་ཉིད་མཐར་ཐུག་གི་ངོ་བོ་དང་། འཇིག་རྟེན་ལས་འདས་པའི་ཆོས་བསམ་ཡུལ་ལས་འདས་པ་མིང་དང་བྲལ་བ་ཐམས་ཅད་ལ་རེ་རེ་བཞིན་བསམ་བློ་གཏོང་ཚུལ་རེ་བཟོས། མིང་རེ་རེ་བཏགས་ནས་ཐག་གཅོད་པ་ཧ་ཅང་མ་ཐལ་ལམ།   དེས་ན་ཀུན་རྫོབ་ཀྱི་ཆོས་རྫུན་གྱི་རང་བཞིན་ཅན་འདི་དག་ནི་རྫུན་གྱི་འབྱུང་གནས་སུ་གྱུར་པའི་རང་བློ་འདིས་ཐག་གཅོད་པ་ཙམ་ཞིག་ལས་འོས་མེད་པ་ཐོག་ཏུ་བབ་མོད། དོན་དམ་པའི་བདེན་པ་འཚོལ་བ་ལ་སྙིང་ནས་བརྩོན་པ་དག་གིས་ནི། རྫུན་མཁན་གྱི་སེམས་འདི་ཐག་རིང་པོ་ལ་མི་སླེབས་པ་འདི་ཐོག་མར་ཤེས་དགོས་ལགས།   མདོར་ན་རང་ཅག་གི་བློ་འདི་འཁྲུལ་པ་མེད་པ་དང་། བསླུ་བ་མེད་པའི་རྒྱུ་མཚན་མཐར་ཐུག་ཞིག་སྟོན་རྒྱུ་ཡོད་ན་འཁྲུལ་མེད། བསླུ་མེད་གཞན་མང་པོ་ཞིག་ཀྱང་འཇོག་ནུས་མོད། རང་བློ་འཁྲུལ་བ་མེད་པའི་རྒྱུ་མཚན་ནི་ཨུ་ཚུགས་དང་། ཡུས་ཆེ་ཙམ་ལས་མེད་ཅིང་། ཟླ་བས་འཇུག་འགྲེལ་དུ། གང་གི་ཕྱིར། བདེན་པ་ཡིན་པ་དེའི་ཕྱིར་བདེན་པ་ཡིན་ནོ། །ཞེས་སྨྲ་བ་དེ་ཙམ་ཞིག་གིས་བདེན་པར་མི་འགྱུར་ལ། གསུངས་པ་བཞིན། མ་འཁྲུལ་བ་ཡིན་པའི་རྒྱུ་མཚན་གྱིས་མ་འཁྲུལ་བ་ཡིན་ཞེས་ཨུ་ཚུགས་གང་ཆེ་བྱས་ཀྱང་མ་འཁྲུལ་བར་ག་ལ་འགྱུར།   བླུན་པོ་ཕལ་པའི་བློ་འཁྲུལ་པ་ནི་སྨོས་ཅི་དགོས། བཙུན་པ་སངས་རྒྱས་དབྱངས་ཀྱིས་ཕྱི་དོན་བདེན་གྲུབ་ཏུ་ཐག་བཅད་པ་དེ་ཡང་སློབ་དཔོན་ཐོགས་མེད་ཀྱིས་རྫུན་དུ་བཏང་། སླར་ཡང་ཐོགས་མེད་རང་གིས་ཀུན་བརྟགས་བདེན་མེད་དང་། གཞན་དབང་བདེན་གྲུབ་ཏུ་ཐག་བཅད་པ་དེ་ཡང་། དབུ་མའི་སློབ་དཔོན་དག་གིས་རྫུན་གྱི་ཁོངས་སུ་བཏང་བས་མཁས་པ་དེ་ཚོའི་བློ་ལ་ཡང་ཡིད་བརྟན་མེད་ན་སུའི་བློ་ལ་ཡིད་བརྟན་ཡོད།བྱིས་པའི་དུས་ནས་རྒས་ཤིང་འཁོགས་པའི་བར། །སེམས་ཀྱི་ཁྱེར་སོ་ཅི་ཙམ་བརྗེས་གྱུར་པ། །རང་གི་མྱོང་བས་དཔྱད་ན་ཤེས་ནུས་པས། །ད་ལྟའི་འཆར་སྒོ་འདི་ལ་ཡིད་རྟོན་ཅི། །ཞེས་ཀྱང་སྨྲའོ། །འོ་ན་གང་ལའང་ཡིད་བརྟན་མེད་ན་ཅི་ཞིག་བྱེད་དགོས་ཟེར་ན། སྔར་སྨོས་པ་བཞིན་འཇིག་རྟེན་འདིར་ཇི་སྲིད་གནས་པ་དེ་སྲིད་དུ་རྫུན་ལ་ཡིད་ཆེས། རྫུན་ལ་བློ་གཏད། རྫུན་གྱི་སྟེང་དུ་རྣམ་གཞག་སྣ་ཚོགས་བྱེད་ནས་སྡོད་པ་ལས་གཞན་ཅི་བྱེད།   འོན་ཀྱང་ད་ལྟར་རང་རེས་གང་མཐོང་བའི་ས་རྡོ་རི་བྲག་འདི་དག་སངས་རྒྱས་ཚེ་ད་དུང་ཡང་ཁྲ་ལམ་མེར་མཐོང་རྒྱུ་ཡོད་སྙམ་ན་ཤིན་ཏུ་ནོར། རྩྭའི་བྲོ་བ་ཞིམ་པོ་དེ་བོང་བུའི་ལུས་ཀྱི་ནང་དུ་རྣམ་ཤེས་གནས་པ་དེ་སྲིད་དུ་ཚོར་ནུས་ཀྱི། དེ་ནས་ཐོན་ཚེ་བྲོ་བ་དེ་ཡང་བརླག་ཚར། བྱ་གག་གི་ནམ་ཚོད་ཟིན་པའི་རིག་པ་དེ་ཡང་བྱ་གག་གི་ལུས་ནས་ཐོན་ན་བརླགས་ཚར། རང་ཅག་ལ་ཡང་། ད་ལྟའི་དབང་པོ་ལྔ་པོ་འདི་ལས་གཞན་པའི་དབང་པོ་ལྷག་པོ་འགའ་བྱུང་ན། ཕྱི་རོལ་གྱི་ཤེས་བྱ་ཐམས་ཅད་ཀྱང་མང་དུ་འགྲོ། མིག་གཉིས་པོ་འདི་ཡང་གཡས་གཡོན་ན་མེད་པར་སྟེང་འོག་ཏུ་བརྩེགས་ཏེ་ཡོད་ན། ཕྱི་རོལ་གྱི་གཟུགས་ཐམས་ཅད་ཀྱང་དབྱིབས་དང་ཁ་དོག་མི་འདྲ་བར་འོང་ངེས། རང་རེས་ནི་གང་ཐག་བཅད་པ་ཡང་དབང་པོ་ལྔ་པོ་འདི་ལ་བརྟེན་ནས་ཐག་གཅོད་པ་ལས་གཞན་ཐབས་ཅི་ཡང་མེད། དཔྲལ་བ་ན་ཡོད་པའི་མིག་འདི་གཉིས་ཀྱི་ནང་ནས་མ་མཐོང་ན་གཟུགས་མཐོང་བའི་ཐབས་གཞན་མེད། རྣ་བའི་ཨི་ཁུང་ཆུང་ངུ་འདིའི་ནང་དུ་མི་ཤོངས་པའི་སྒྲ་གང་ཡང་ཐོས་མི་ནུས་པ་སོགས་ཡིན། དེས་ན་ནུས་པ་ཞན་པའི་དབང་པོ་འདི་ལྔ་པོའི་སྟེང་དུ། འཁྲུལ་བ་ཅན་གྱི་སེམས་ཀྱང་གྲོགས་སུ་སྦྲན་ནས་ཤེས་བྱ་ཐམས་ཅད་ཚད་འདི་ཙམ་གྱི་ནང་དུ་འདུས་སོ་ཞེས་ཐག་བཅད་ནས། རང་གི་སེམས་ངོར་མ་ཤར་པའི་གནས་ལུགས་ཀྱི་དོན་ལ། མེད་པ་དང་མི་སྲིད་པར་སྨྲས་ནས་བློ་བདེ་སྟེ་སྡོད་པ་ཡང་རྒུད་པ་ཀུན་གྱི་སྒོ་ཡིན།   རང་ཅག་གི་དབང་པོའི་ཚད་མ་འདི་དག་གིས་ས་རྒྱ་མི་ཆོད་པ་ནི། བཅོམ་ལྡན་འདས་ཉིད་ཀྱིས་ཀྱང་གསལ་བར་གསུངས་ཏེ། ཇི་སྐད་དུ། ཏིང་འཛིན་རྒྱལ་པོ་ལས། མིག་དང་རྣ་བ་སྣ་ཡང་ཚད་མ་མིན། །ལྕེ་དང་ལུས་དང་ཡིད་ཀྱང་ཚད་མ་མིན། །གལ་ཏེ་དབང་པོ་འདི་དག་ཚད་ཡིན་ན། །འཕགས་པའི་ལམ་གྱི་ས་ལ་ཅི་ཞིག་བྱ། །ཞེས་གསུངས་པ་ལྟ་བུའོ། །དེས་ན་འཕགས་པའི་ལམ་སྒོམ་པའི་དོན་སྒོ་མཐར་ཐུག་ནི། སྔར་ཡིད་ལ་མ་ཤར། མིག་གིས་མ་མཐོང་བ་ཞིག་གསར་དུ་ཤེས་པའི་ཆེད་དུ་ཡིན་ལ། རང་ཅག་གིས་ཁས་བླངས་པའི་འཇིག་རྟེན་ལས་འདས་པའི་ཆེད་དུ་ཡིན་ལ། རང་ཅག་གིས་ཁས་བླངས་པའི་འཇིག་རྟེན་ལས་འདས་པའི་ཆོས་སུ་རློམས་པ་འདི་དག་ཐམས་ཅད་ཀྱང་ཞིབ་ཏུ་བརྟགས་ཚེ། འཇིག་རྟེན་དང་། དེའི་ནང་ནས་མིའི་འགྲོ་བ་ཁོ་ན་ལ་དཔེ་བཀབ་ནས་བཟོས་པ་ཤ་སྟག་ཡིན་པ་དཔེར་ན། རང་ཅག་རིན་པོ་ཆེ་ལ་དགའ་བའི་རྐྱེན་གྱིས་འོག་མིན་གྱི་ས་གཞི་ཁང་ཁྱིམ་སོགས་ཀྱང་རིན་པོ་ཆེའི་རང་བཞིན་དུ་བྱས། དེ་བཞིན་ལོངས་སྤྱོད་རྫོགས་སྐུའི་མཚན་བཟང་རྣམས་ཀྱང་དོན་ལ་རང་ཅག་མིའི་མིག་ལ་ཡིད་དུ་འོང་བའི་ཆས་རྣམས་ཡིན།   ལོངས་སྐུ་དང་། ལྷའི་ཆ་ལུགས་དེ་ཡང་སྔོན་གྱི་རྒྱ་གར་རྒྱལ་པོའི་ཆ་ལུགས་ཡིན་པར་ཞིབ་ཏུ་བརྟགས་པས་ཤེས། འདི་རྣམས་རང་ཅག་གིས་བློ་བཟོ་ཙམ་མ་ཡིན་པར་མདོ་རྣམས་ལས་གསུངས་མོད་ཀྱང་། དེ་ཡང་དོན་ལ་བློ་ངོར་འཆར་མི་བཏུབ་པའི་སངས་རྒྱས་ཀྱི་སའི་ཡོན་ཏན་རྣམས་རང་ཅག་ལ་དྭངས་བ་དང་སྤྲོ་བ་བསྐྱེད་པའི་ཕྱིར་དུ་བློ་ངོར་འཆར་རྒྱུ་ཡོད་པ་ཞིག་ཐབས་མཁས་ཀྱིས་གསུངས་པ་ཙམ་ཡིན། དཔེར་ན་སངས་རྒྱས་རྒྱ་ནག་ཏུ་བྱོན་པའི་དབང་དུ་བྱས་ན། འོག་མིན་གྱི་ལོངས་སྐུ་དེ་ཡང་། ཨག་ཚོམ་སྣུམ་ལ་རིང་བ། འབྲུག་བེར་སེར་པོ་གྱོན་པ་ཞིག་འོང་ངེས། དེ་བཞིན་སངས་རྒྱས་བོད་དུ་བྱོན་ན། འོག་མིན་ན་གསེར་གྱི་ཇ་མདོང་དཔག་ཚད་ལྔ་བརྒྱ་པ་ཞིག་གི་ནང་དུ་འདོད་འཇོའི་བ་ཡི་མར་གསར་པ་དང་། དཔག་བསམ་གྱི་ཤིང་གི་ལོ་མ་སྦྱར་བའི་གསོལ་ཇ་སོགས་ཡོད་པར་ཐེ་ཚོམ་མེད།   དེས་ན་འདི་ཐམས་ཅད་རང་ཅག་སོ་སོའི་སྐྱེ་བོའི་བསམ་བློ་བཏང་ཚུལ་ཙམ་ཡིན་གྱི། སངས་རྒྱས་རང་གི་སྤྱོད་ཡུལ་དངོས་མ་དེ་ཚོ་ནི། སློབ་དཔོན་ཟླ་བས། འོན་ཀྱང་ཁྱོད་ཀྱི་གསང་བ་འདི་ནི་བསྙད་བགྱི་མ་ལགས་སོ། །གསུངས་པ་ལྟར་རང་ཅག་གི་མདུན་དུ་སྨྲ་མི་འོས་པའམ། སྨྲས་ཀྱང་གོ་རྒྱུ་མེད་པ་ཞིག་ཡིན་ངེས།   གལ་ཏེ་སངས་རྒྱས་ཀྱི་གསང་བ་བསམ་གྱིས་མི་ཁྱབ་པའི་ཕྱོགས་ལ་དད་པ་ཕྲན་ཙམ་ཡོད་ན། སངས་རྒྱས་ཀྱིས་བསྐལ་པ་སྐད་ཅིག་དང་རྡུལ་ཕྲ་རབ་འཇིག་རྟེན་དང་མཉམ་པར་མཛད་པ་འདི་ཀུན་ལ་ཡིད་ཆེས་ཅུང་ཟད་དགོས།   འོ་ན་རང་ཅག་གི་བློ་འདི་ཚད་མ་ཡིན་ན། རྡུལ་ཕྲ་རབ་གཟུགས་ཀྱི་ཆུང་བའི་མཐར་ཐུག་ཡིན་པར་ཐག་ཆོད། འཇིག་རྟེན་ནི་ཤིན་ཏུ་རྒྱ་ཆེ་བར་ཡང་ཐག་ཆོད། ཆུང་བའི་ནང་དུ་ཆེན་པོ་མི་ཤོང་བར་ཡང་ཐག་ཆོད་པས། སངས་རྒྱས་ཅི་ཙམ་རྫུ་འཕྲུལ་དང་ནུས་པ་ཆེ་ཡང་། ཚད་མས་གྲུབ་པའི་རྣམ་གཞག་གཞིག་པར་ག་ལ་ནུས། གལ་ཏེ་ནུས་ན་སངས་རྒྱས་ཀྱི་ནུས་པས། ཆོས་ཐམས་ཅད་བདེན་གྲུབ་ཏུ་བསྒྱུར་ཨེ་ནུས། སེམས་ཅན་ཐམས་ཅད་སངས་རྒྱས་སུ་བསྒྱུར་ཨེ་ཐུབ། དེ་མི་ཐུབ་པའི་རྒྱུ་མཚན་སེམས་ཅན་སངས་རྒྱས་མིན་པ་དང་། ཆོས་ཐམས་ཅད་བདེན་མེད་ཡིན་པའི་རྒྱུ་མཚན་གྱིས་ཡིན་ན་མ་གཏོགས་གཞན་ཅིའི་ཕྱིར་བསྒྱུར་མི་ནུས། གལ་ཏེ་རང་ཅག་གིས་རྡུལ་ཕྲ་རབ་དང་། འཇིག་རྟེན་ལ་ཆེ་ཆུང་མེད་སྨྲས་ན་ཀུན་རྫོབ་ལ་སྐུར་འདེབས་དང་ཆད་ལྟར་འགྲོ་ན། སངས་རྒྱས་ཀྱིས་དངོས་སུ་ཆེ་ཆུང་མེད་པར་མཛད་ཚེ་ཆད་ལྟ་དེ་ག་ལག་ལེན་དུ་བཏབ་པའི་སྡིག་པ་ཅི་བས་ཀྱང་མི་ཆེའམ། སྤྱིར་ཕྲ་རབ་དང་། འཇིག་རྟེན་ལ་ཆེ་ཆུང་ཡོད་པར་ཐག་བཅད་ནས། སངས་རྒྱས་ཀྱིས་དེ་ལྟར་མཛད་པ་དམིགས་བསལ་ཡིན་སོགས་དམིགས་བསལ་མང་པོ་སྤྱོད་དགོས་པ་འདི་ནི་དོན་ལ་རང་ཅག་གི་ཚད་མའི་ཁུག་མ་ལ་ཕྱོགས་ཐམས་ཅད་ནས་ཨི་ཁུང་རྡོལ་བའི་རྟགས་ཡང་དག་ཡིན་ནོ། །ལེགས་པར་གོ་ན་སངས་རྒྱས་ཀྱིས་ཕྲ་རབ་དང་། འཇིག་རྟེན་ཆེ་ཆུང་མཉམ་པར་མཛད་པ་དེ་སངས་རྒྱས་ཀྱི་ནུས་པ་ཆེ་དྲགས་པའི་རྒྱུ་མཚན་གྱིས་མི་མཉམ་པ་ཞིག་མཉམ་པར་མཛད་པ་མ་ཡིན་གྱི། རང་ཅག་གི་བློ་ངོར་ཆེ་ཆུང་གཉིས་འགལ་བར་མངོན་སུམ་དུ་མཐོང་བའི་རྣམ་རྟོག་གིས་ཐག་བཅད་པ་འདིས་སངས་རྒྱས་ཀྱི་ཐུགས་གཉིས་སུ་མེད་པའི་ཡེ་ཤེས་ཀྱི་རང་བཞིན་ཅན་དེ་འཆིང་མ་ནུས་པའི་རྒྱུ་མཚན་གྱིས་ཡིན་ནམ། སངས་རྒྱས་ཀྱིས་ཆེ་ཆུང་རོ་མཉམ་དུ་གཟིགས་ཤིང་། ཆེ་ཆུང་གཉིས་ཀྱང་དོན་ལ་རོ་མཉམ་ཡིན་པས། ཡིན་པ་ལ་ཡིན་པར་མཛད་པ་མ་གཏོགས་མིན་པ་ཡིན་པར་བསྒྱུར་བའི་རྫུ་འཕྲུལ་བསྟན་པ་ག་ལ་ཡིན།   རང་ཅག་གི་རྣམ་པར་རྟོག་པ་ལ། ཡོད་མེད། ཡིན་མིན། ཆེ་ཆུང་། བཟང་ངན་ལ་སོགས་པ་ཐམས་ཅད་ཀྱང་ཕན་ཚུན་འགལ་བ་ཤ་སྟག་ཡིན་པས་ཕྲ་རབ་གྱི་ནང་དུ་འཇིག་རྟེན་ཤོང་བ་མེད་པ་དེ། ཚད་མའི་མིང་བཏགས་པའི་རང་ཅག་གི་རྣམ་རྟོག་འདི་ཉིད་ཀྱིས་སྤྲུལ་པའི་རྫུ་འཕྲུལ་ཆེན་པོ་ཞིག་ཡིན། དེས་ན་རྫུ་འཕྲུལ་ངོ་ཐོག་སྟོན་མཁན་རང་རེ་ཡིན་གྱི། སངས་རྒྱས་མིན་པར་གོ་དགོས།   འཇུག་པའི་མཛད་བྱང་དུ། སློབ་དཔོན་ཟླ་བ་གྲགས་པས། རི་མོའི་བ་ལས་འོ་མ་བཞོས་པས་བདེན་པར་ཞེན་པ་བཟློག་པར་མཛད་པ་སོགས་གསུངས་ལ། གལ་ཏེ་སྣང་བ་འདི་ཚད་གྲུབ་ཡིན་ན། རི་མོའི་བ་ལ་རྒྱུ་མ་དང་། གློ་བ། ནུ་མ་སོགས་མི་སྲིད་པས། དེ་འདྲ་ལས་འོ་མ་དངོས་ཞིག་བཞོ་རྒྱུ་ཡོད་ན་ཟླ་བ་གྲགས་པས་རྟེན་འབྲེལ་ལ་སྐུར་པ་ཆེན་པོ་བཏབ་པ་ཡིན་གྱི། བདེན་གྲུབ་བཟློག་པ་ག་ལ་ཡིན།   བཀའ་གདམས་གླེགས་བམ་དུ་ཇོ་བོས་སྐུ་ལུས་ཡོངས་རྫོགས་སཙྪའི་སྐོས་ཕོར་ཆུང་ངུ་ཞིག་གི་ནང་དུ་འཇུག་པ་སོགས་རྫུ་འཕྲུལ་སྣ་ཚོགས་ཞིག་བསྟན་པའི་མཐར། དེ་རིང་འོ་ཅག་གིས་གང་བྱས་པ་འདི་ཀུན། རིགས་པ་སྨྲ་བའི་རྟོག་གེ་བ་རྣམས་ཀྱིས་འགལ་བ་བརྩི། འོ་ན་བརྩི་ན་ཡང་བརྩིར་ཆུག ཆོས་ཀྱི་གནས་ལུགས་འདི་འདྲ་ཞིག་མིན་རེ་ཞེས་རྒྱ་བོད་གཉིས་ཀ་འགྲིམས་ནས་མནའ་བསྐྱལ་ཡང་ཆོག་སོགས་གསུངས། དེས་ན་རང་ཅག་གིས་མེད་པ་མིན་ན་ཡོད་པ་ཡིན་དགོས། ཡོད་པ་མིན་ན་མེད་པ་ཡིན་དགོས། དེ་གཉིས་དངོས་འགལ་ཡིན། དེ་གཉིས་མིན་པ་གང་ཡང་མི་སྲིད་སོགས་དང་། དེ་བཞིན་དུ་ཆུང་བ་ཡིན་ན་ཆེན་པོ་མིན་དགོས། ཆེན་པོ་ཡིན་ན་ཆུང་བ་མིན་དགོས། དེ་གཉིས་ལ་ཁྱད་པར་མེད་ན། རྟེན་འབྲེལ་གྱི་རྣམ་གཞག་ཐམས་ཅད་འཇིག་འགྲོ་སོགས་ངར་སྐད་ཆེན་པོ་བསྒྲགས་ཏེ། ཆོས་ཉིད་སྤྲོས་པའི་མཐའ་བརྒྱད་དང་བྲལ་བར་ལྟ་བ་ལ་ཆད་ལྟ་ཆེན་པོ་ཡིན་ནོ་སོགས་སྨྲ་བ་འདི་ཡང་། རང་ཅག་གི་སེམས་ལ་ཡོད་མེད་གཉིས་ལས་གཞན་འཆར་རྒྱུ་མེད་ཅིང་། རང་རེའི་སེམས་ཀྱིས་ཡོད་མེད་གཉིས་ལས་གཞན་ངོ་མི་ཤེས་པའི་རྒྱུ་མཚན་གྱིས་ཡིན་ཀྱང་། རང་ཅག་གི་སེམས་ལ་འཆར་མི་ནུས་པའི་རྒྱུ་མཚན་གྱིས་མི་སྲིད་པ་དང་མེད་པར་ག་ལ་གྲུབ།   དཔེར་ན། འོ་མ་ལས་གཞན་པའི་མངར་ཆ་གཞན་ཅི་ཡང་རྒྱུས་མེད་པའི་བྱང་ཐང་གི་ཡུལ་ཞིག་ཏུ་སླེབས་ན། མངར་ཆ་ཡིན་ན་འོ་མ་ཡིན་དགོས། འོ་མ་མིན་ན་མངར་ཆ་ཡང་མིན་དགོས་ཞེས་ཨུ་ཚུགས་བྱེད་པར་ངེས་ཤིང་། ཡུལ་དེའི་མི་རྣམས་ཀྱི་སྣང་ངོར་འོ་མ་མིན་པ་དང་། མངར་མོ་ཡིན་པ་གཉིས་དངོས་འགལ་མཐར་ཐུག་ཞིག་ཡིན་ལ། དེ་འདྲ་སྨྲ་མཁན་ཀྱང་ཀུན་རྫོབ་ལ་སྐུར་བ་འདེབས་པའི་ཆད་ལྟ་ཆེན་པོ་ཡིན་ནོ། །དེ་བཞིན་དཔེར་ན། རྣམ་རྒྱལ་དང་ཚེ་རིང་གཉིས་ལས་མི་གཞན་གང་ཡང་ངོ་མི་ཤེས་པ་ཞིག་ཡིན་ན། ཁྱིམ་ཞིག་གི་ནང་དུ་མི་ཡོད་པར་ནི་ཐག་ཆོད། རྣམ་རྒྱལ་མེད་པར་ཐག་ཆོད་ཚེ། མི་དེ་ཚེ་རིང་ཡིན་པར་ཐག་ཆོད། དེ་གཉིས་ལས་གཞན་པའི་མི་ངོ་མི་ཤེས་བའི་རྒྱུ་མཚན་གྱིས། དེ་གཉིས་པོ་གཅིག་མིན་ན་གཅིག་ཡིན་དགོས་ཞེས་ཨུ་ཚུགས་བྱེད་པ་དང་འདྲ། རང་ཅག་གི་སེམས་འདི་ཡོད་མེད་གཉིས་ཀའི་སྟེང་དུ་རེས་མོས་ཀྱིས་གནས་པ་མ་གཏོགས། དེ་གཉིས་གང་ཡང་མིན་པ་ཞིག་གི་སྟེང་དུ་གནས་ཐབས་མེད་པར་བདེན།   འོན་ཀྱང་དབུ་མའི་ལམ་ནི་ཡོད་མེད་གཉིས་ཀའི་དབུས་དེ་ལ་ཟེར་བ་སངས་རྒྱས་རང་ཉིད་ཀྱིས་ཤིན་ཏུ་གསལ་བར་གསུངས་ཏེ། དཔེར་ན་འོད་སྲུང་གི་ལེའུ་ལས། འོད་སྲུང་ཡོད་ཅེས་བྱ་བ་འདི་ནི་མཐའ་གཅིག་གོ།མེད་ཅེས་བྱ་བ་འདི་ནི་མཐའ་གཉིས་པའོ། །དེ་གཉིས་ཀྱི་དབུས་གང་ཡིན་པ་དེ་ནི་དབུ་མའི་ལམ་བརྗོད་དུ་མེད་པ། བསམ་དུ་མེད་པ་སོགས་གསུངས་ཤིང་། འཕགས་པ་དཀོན་མཆོག་བརྩེགས་པ་ལས་ཀྱང་། ཡོད་དང་མེད་ཅེས་བྱ་བ་རྩོད་པ་སྟེ། །གཙང་དང་མི་གཙང་འདི་ཡང་རྩོད་པ་ཡིན། །རྩོད་པར་གྱུར་པས་སྡུག་བསྔལ་ཞི་མི་འགྱུར། །རྩོད་པ་མེད་པར་གྱུར་པ་སྡུག་བསྔལ་མཐའ། །སོགས་ཤིན་ཏུ་གསལ་བར་གསུངས་ཏེ། འོན་ཀྱང་དེང་སང་གི་མཁས་པ་རྣམས་ཀྱིས། ཡོད་པ་མིན། མེད་པ་མིན་བྱ་པའི་ལུང་ཞིག་རྣ་བས་ཐོས་ཚེ། ཐོག་མར་ལུང་དེ་གསུང་མཁན་སུ་ཡིན་རྩད་གཅོད་བྱེད། གལ་ཏེ་ལུང་དེ་བོད་སྔ་མའི་མཁས་པ་ཞིག་གི་གསུང་ཡིན་འདུག་ན། དེ་འདྲ་ཟེར་མཁན་དེ་ཆད་ལྟ་བ་བླུན་པོ་ཡིན་ཞེས་བརྙས་བཅོས་བྱེད། གལ་ཏེ་ལུང་དེ་སངས་རྒྱས་དང་ཀླུ་སྒྲུབ་སོགས་ཀྱི་གསུང་ཡིན་པར་ངོས་ཟིན་ན། ཡོད་པ་མིན་གསུངས་པ་བདེན་པར་ཡོད་པ་མིན་བྱ་བའི་དོན་ཡིན། མེད་པ་མིན་བྱ་བ་ཀུན་རྫོབ་ཏུ་མེད་པ་མིན་བྱ་པའི་དོན་ཡིན་སོགས་ཚིག་གི་ལྷན་པ་སྣ་ཚོག་བཏབ་ནས་རང་གི་ཞེ་འདོད་དང་འགྲིག་པ་ཞིག་བྱེད་དེ། （དོན་ལ་སངས་རྒྱས་ལ་དགག་པ་བཏབ་ན་མི་ངན་ལྟ་ངན་གྱི་མིང་ཐོགས་པ་ལ་འཇིགས། བོད་སྔ་མ་ལ་དགག་པ་བྱེད་ཐུབ་ན། མཁས་པ་དཔའ་བོའི་མིང་ཐོགས་པའི་ཁྱད་པར་དེ་ཙམ་མ་གཏོགས། ）ཡོད་མིན། མེད་མིན། བརྗོད་མིན། སྤྲོས་བྲལ་སོགས་ཀྱི་ཐ་སྙད་ནི། མདོ་དང་རིགས་ཚོགས་དང་། བོད་སྔ་མའི་མཁས་པ་དག་གི་གསུང་རབ་ལ་མང་ཉུང་མི་འདུག   དེས་ན་བོད་སྔ་མའི་མཁས་པ་རྣམས་ཀྱིས། གནས་ལུགས་བརྗོད་དུ་མེད་པ། བསམ་དུ་མེད་པ་སོགས་གསུང་པ་ལ། འགའ་ཞིག་གིས་ནི་བླུན་པོ་དང་། ཆད་ལྟ་བ་ཞེས་དགག་པ་བྱེད། འགའ་ཞིག་གིས་ཅུང་ཟད་གུས་པའི་ཚུལ་དུ་བྱས་ཏེ། བོད་སྔ་མའི་མཁས་གྲུབ་ཁོང་ཚོའི་ཐུགས་ཀྱི་དགོངས་ཚུལ་ལ་ནི་མ་འགྲིགས་པ་ཆེར་མེད་མོད་ཀྱི། ཁ་ནས་བཤད་པའི་ཚེ་རྗེ་བླ་མ་ལྟ་བུའི་ཞིབ་ཆ་མ་ཐོན་པ་ཙམ་ཡིན་ཟེར། དེ་བདེན་ན་བཅོམ་ལྡན་འདས་ཀྱིས་ཀྱང་ཐུགས་ཀྱི་དགོངས་ཚུལ་ལ་མ་འགྲིག་པ་མེད་མོད་ཀྱི། ཞལ་ལས་གསུང་པའི་ཚེ་ནི། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །ཅེས་དང་། ཡིན་པ་ལ་སྤྱོད་ན་མཚན་མ་ལ་སྤྱོད་དོ། །ཡོད་པ་མིན་པ་ལ་སྤྱོད་ན་མཚན་མ་ལ་སྤྱོད་དོ་སོགས་ཀྱི་ལྷན་པ་མཛེས་པོ་དེ་ཚོ་སྣང་མེད་དུ་བཞག་འདུག་པས། སངས་རྒྱས་ཁོང་ཡང་ཆོས་སྟོན་ཚུལ་ལ་ཞིབ་ཆ་མེད་པ་ཞིག་འདུག   དེས་ན་བོད་སྔ་མ་དང་། སངས་རྒྱས་གཉིས་ཀ་འགོག་ན་ཡང་མཉམ་དུ་ཁོག་ཅིག འཇོག་ན་ཡང་མཉམ་དུ་ཞོག་ཅིག མི་ཁ་སྡང་མི་སྡང་ལ་འཇིགས་ནས་ལྕེ་སྣ་ཚོགས་སུ་བསྒྱུར་ཏེ་མགོ་སྐོར་སྣ་ཚོགས་མི་གཏོང་བར་ཞུ།   དེའི་ཕྱིར་དོན་དམ་པའི་དཔྱད་པ་ལྷུར་ལེན་ན་རང་ཅག་གིས་ཐག་བཅད་ཚད་ཐམས་ཅད་རྩ་བ་ནས་མེད་པའི་བློ་བཟོ་ཤ་སྟག་ཡིན་པ་ལ་ཆ་འཇོག་དགོས། འདི་འདྲ་ལ་བསམ་ཚེ་འཇིགས་པ་ཆེན་པོ་སྐྱེ་བ་དེ་ཡང་སྟོང་ཉིད་ཀྱི་ལྟ་བ་ལ་འཇིགས་པ་སྐྱེ་པའི་འགོ་ཚུགས་པ་ཡིན། དེ་མིན་རང་ཅག་གིས་བསམ་ཚད་ཀྱི་ཡོད་མེད། ཡིན་མིན། གཙང་བཙོག །བཟང་ངན། སངས་རྒྱས་སེམས་ཅན། མཐོ་རིས་དམྱལ་བ་ལ་སོགས་པ་ཐམས་ཅད་རྟེན་འབྲེལ་བསླུ་བ་མེད་པ་ཡིན་ཞེས་རང་ཆགས་སུ་བཞག་ནས་དེ་ཚོ་འགོག་མི་ཆོག བཀག་ན་ཆད་ལྟར་ལྷུང་སོགས་ཐག་བཅད། དེ་མིན་པའི་བདེན་གྲུབ་བྱ་བ་ཞིག་འགོག་དགོས་ཟེར་བ་འདི་ཚིག་སྐམ་ཁ་ལ་བྱང་བའི་མཁས་པ་འགའ་ཞིག་གི་ངག་སྒྲོས་ཙམ་ཡིན།   ཁོང་ཚོའི་ལུགས་ལྟར་ན། ནམ་རྒྱུན་གྱི་རང་རེའི་རྒྱུད་ཀྱི་ངའོ་སྙམ་པའི་བློ་འདི་ཡང་བདག་འཛིན་མིན་པས་འགོག་མི་ཆོག དེས་ན་ངར་འཛིན་ལྷན་སྐྱེས་ངོས་འཛིན་ཚུལ་ཡང་། དཔེར་ན། མི་གཅིག་གིས། ཁྱོད་རྐུན་མ་ཡིན་ནོ་ཞེས་བརྗོད་ཚེ་ང་རྐུན་མ་ག་ལ་ཡིན་ཞེས། ང་ཧྲང་ངེ་བ་ཞིག་འཆར་བ་དེ་ངར་འཛིན་ལྷན་སྐྱེས་ཡིན་ཟེར།   གལ་ཏེ་ནམ་རྒྱུན་གྱི་ངའོ་སྙམ་པའི་བློ་འདི་ཚད་མ་ཡིན་ན། རྐུན་མ་ཡིན་ནོ་ཞེས་བརྗོད་ཚེ། ངའོ་སྙམ་པའི་བློ་སྐྱེས་པ་དེ་ཡང་། ཚད་མ་ཤུགས་ཆེ་རུ་སོང་བ་ཙམ་ཡིན་གྱི། བདེན་འཛིན་དུ་འགྲོ་དོན་ག་ལ་ཡོད།   གལ་ཏེ་བདེན་འཛིན་ཡིན་ན། མི་གཅིག་གིས། སངས་རྒྱས་ནི་སྐྱབས་གནས་མ་ཡིན་ཞེས་བརྗོད་ཚེ། སྐྱབས་གནས་ག་ལ་མིན་སྙམ་པའི་བློ་དེ་ཡང་བདེན་འཛིན་ཅིའི་ཕྱིར་མིན།   དེ་བཞིན་འདི་བུམ་པ་མིན་ཞེས་བརྗོད་ཚེ། བུམ་པ་མིན་ན་གཞན་ཅི་ཡིན། བུམ་པ་ཡིན་པར་ཐག་ཆོད་སྙམ་པའི་བློ་དེ་ཡང་། བུམ་པའི་བདེན་འཛིན་ཡིན་གྱི་ཚད་མ་ག་ལ་ཡིན། དེས་ན་ཁོང་ཅག་གི་ལུགས་ལྟར་ན། བློ་ཤུགས་ཆུང་བ་རྣམས་ཚད་མ་དང་། བློ་དེ་ག་རང་ཤུགས་ཆེ་རུ་སོང་ཚེ་རླུང་ལོག་པ་བཞིན་བདེན་འཛིན་དུ་འགྲོ་བར་འདུག་པས་ཡ་མཚན།   ལྟ་བ་རྟོགས་པ་ལ་དགག་བྱ་ངོས་ཟིན་པ་གལ་ཆེ་ཞེས་ཀུན་གྱི་ཁ་ལ་རླུང་ལྟར་གྲགས་པ་འདི་བདེན་ན། རྗེ་བླ་མ་རང་གི་ཞལ་ནས། སྟོང་ཉིད་མ་རྟོགས་བར་དུ། ཡོད་པ་ཙམ་དང་། བདེན་པར་ཡོད་པའི་ཁྱད་པར་ནམ་ཡང་ཕྱེ་མི་སྲིད་ཅིང་། དེ་བཞིན་བདེན་པར་མེད་པ་དང་། མེད་པ་ཙམ་གྱི་ཁྱད་པར་ཡང་འབྱེད་མི་ནུས་ཞེས་གསུངས་ཤིང་། ཐལ་རང་ལ་ཆོས་ཅན་མཐུན་སྣང་བ་མེད་པའི་རྒྱུ་མཚན་མཐར་ཐུག་ཀྱང་དེ་ཡིན་པར་གསུངས་པས། ལྟ་བ་མ་རྟོགས་གོང་དུ་བདེན་གྲུབ་ཟུར་དུ་ངོས་ཟིན་པ་ག་ལ་སྲིད། དེས་ན་དགག་བྱ་ངོས་འཛིན་ཁུལ་བྱས་པ་དེ་ལ་ཡིད་རྟོག་ག་ལ་ཡོད།   ཡང་འགའ་ཞིག་གིས་བུམ་པ་ཡོད་དོ་སྙམ་པའི་བློ་ཚད་མ་སྐྱེས་པ་ན། དེ་དང་དུས་མཉམ་དུ་བུམ་པ་བདེན་གྲུབ་ཏུ་ཡོད་སྙམ་པའི་བདེན་འཛིན་ཞིག་ཀྱང་སྐྱེས་མོད་ཀྱི། སོ་སོར་ངོས་ཟིན་པ་དཀའ་སོགས་ཟེར།   འོ་ན་ཚད་མ་བྱ་བ་སངས་རྒྱས་འཐོབ་བྱེད་ཀྱི་རྒྱུ་གཙོ་བོ་དེ་དང་། བདེན་འཛིན་བྱ་བ་ཉེས་པ་ཀུན་གྱི་རྩ་བ་དེ་གཉིས། གཅིག་ལ་གཅིག་འདྲ་ཆེ་བའི་རྒྱུ་མཚན་གྱིས་སོ་སོར་ངོས་མི་ཟིན་པ་ཡ་མཚན་ཆེ། དེ་གཉིས་གཅིག་སླེབས་པ་ལ་གཅིག་ངེས་པར་སླེབས་ན། འགོག་ན་ཡང་མཉམ་དུ་དགག་དགོས་ཀྱི། ཟུར་དུ་ཕྱེ་ག་ལ་ནུས།   ནམ་ལངས་སོ་སྙམ་པའི་བློ་དེ་ཡང་ཚད་མ་ཡིན། སྐེ་རགས་བཅིང་ངོ་སྙམ་པའི་བློ་དེ་ཡང་ཚད་མ་ཡིན། དེ་བཞིན་ཇ་འཐུང་།རྩམ་པ་ཟ་སོགས་ཀྱི་བློ་ཐམས་ཅད་ཚད་མ་རྐྱང་པ་ཡིན་ན། ཉིན་གང་པོའི་བློ་ཐམས་ཅད་ཀྱི་ནང་ན་འགོག་རྒྱུ་གཅིག་ཀྱང་མི་འདུག་པས། བདེན་འཛིན་ཟེར་བའི་དགག་བྱ་དེ་གང་དུས་སྐྱེ་བ་ཡིན། ཐོག་མ་མེད་པ་ནས་གོམས་པའི་བདེན་འཛིན་གྱི་བློ་དེ་ཉིན་རེ་ལ་ལན་རེ་གཉིས་ལས་ལྷག་མིས་སྐྱེ་ན་ཤིན་ཏུ་ངོ་མཚར།   དོན་གང་ལ་ཡང་གོམས་ཆེ་བའི་བློ་དེ་ག་རང་ཐོག་མར་སྐྱེ་བར་དཔེར་ན། རང་གི་ཕ་བྲམ་ཟེ་སློབ་དཔོན་འོང་བར་མཐོང་བ་ན། ཐོག་མར་བདག་གི་ཕ་འོངས་སོ་སྙམ་པའི་བློ་སྐྱེ་བ་ལས། སློབ་དཔོན་འོངས་སོ། བྲམ་ཟེ་འོངས་སོ་སོགས་བློ་ལ་མི་འཆར་ཞེས་ཚད་མའི་བསྟན་བཅོས་ནས་གསུངས་པ་བཞིན་ཡིན་ལ། རང་ཅག་ལ་ནི་བདེན་འཛིན་གྱི་བློ་འདི་ཐོག་མེད་ནས་གོམས་པ་ཡིན་པས། བུམ་པ་མཐོང་ཚེ་ཐོག་མར་སྐྱེ་བའི་བློ་དེ་ནི། བུམ་པར་བདེན་འཛིན་ཡིན་པར་ཐག་ཆོད། དེའི་ཕྱིར་རིགས་པས་དགག་བྱ་ལ་ཁ་ནས་ཁྱད་ཅི་ཙམ་ཕྱེ་ཡང་དོན་ལ་འགོག་རྒྱུ་དེ། བུམ་པ་འགོག་དགོས། ཀ་བ་འགོག་དགོས། ཡོད་པ་འགོག་དགོས། མེད་པ་འགོག་དགོས་ཀྱང་། བུམ་པ་བཞག་ནས་བུམ་པ་བདེན་གྲུབ་བྱ་བ་ཞིག་ཟུར་དུ་འགོག་རྒྱུ་ག་ལ་ཡོད། ཚུལ་འདི་ནི་སྔ་རབས་པའི་མཁས་པ་རྣམས་སུ་མ་ཟད། དགེ་ལྡན་ཕྱོགས་ཀྱི་མཁས་གྲུབ་ཉམས་མྱོང་ཅན་ཚོས་ཀྱང་གསལ་བར་དགོངས་འདུག་སྟེ། དཔེར་ན་ལྕང་སྐྱ་རིན་པོ་ཆེས། སྣང་བ་ལིང་ལིང་འདི་རང་སོར་བཞག་ནས། དགག་རྒྱུ་རྭ་ཅན་ཞིག་འཚོལ་བར་འདུག་སྟེ། སོགས་མ་མཉེས་པའི་གསུངས་བྱུང་བ་བཞིན། གུང་ཐང་བསྟན་པའི་སྒྲོན་མེ་དང་། པཎ་ཆེན་བློ་བཟང་ཆོས་རྒྱན་གྱིས་ཀྱང་དེ་ཁོ་ན་བཞིན་དུ་གསུངས་སོ། །འགའ་ཞིག་གིས། བུམ་པ། ཀ་བ་སོགས་རིགས་པས་དགག་ན་ཐམས་ཅད་མེད་པར་ལྟ་བའི་ཆད་ལྟ་སྐྱེ་སྙམ་ནས་འཇིགས་པ་ནི་དོན་མེད་པའི་སེམས་ཁྲལ་ཏེ། མདུན་ན་མཐོང་བཞིན་པའི་བུམ་པ་འདི་གཏན་ནས་མེད་དོ་སྙམ་པའི་ཆད་ལྟ་ཞིག་སོ་སྐྱེ་རང་ག་བ་ལ་སྐྱེ་བར་ག་ལ་སྲིད།   གལ་ཏེ་དེ་འདྲའི་བློ་ཞིག་སྐྱེས་ན་བུམ་པ་མཐོང་རྒྱུ་ཡོད། རེག་རྒྱུ་ཡོད་པ་དངོས་སུ་ཤེས་པས། བུམ་པ་འདི་ང་ལ་སྣང་རྒྱུ་འདུག་ཀྱང་། སྣང་བཞིན་དུ་གཏན་ནས་མེད་དོ་སྙམ་པའི་བློ་རང་ཤུགས་ཀྱིས་སྐྱེས་པས། བློ་དེ་འདྲ་ནི་སྣང་ལ་སྣང་བ་ལྟར་དུ་མེད་པར་འཛིན་པའི་སྣང་སྟོང་གཉིས་ཚོགས་ཀྱི་དབུ་མའི་ལྟ་བ་དེ་ཡིན་གྱི། ཆད་ལྟ་ག་ལ་ཡིན།   མདོར་ན་བུམ་པ་གཏན་ནས་མེད་སྙམ་པ་དང་། མིག་གིས་མངོན་སུམ་དུ་མཐོང་བའི་ཚེ། སྒྱུ་མ་ལྟ་བུའི་བློ་ངང་ངམ་ཤུགས་ཀྱིས་སྐྱེས་པས། ཆད་ལྟར་ལྷུང་བའི་ཉེན་ཅི་ཞིག་ཡོད།ཡིད་ཀྱིས་མེད་པར་ཐག་ཚོད་ཅིང་། །མིག་གིས་ཡོད་པར་མཐོང་བའི་ཚེ། །ཞྭ་སེར་མཁན་པོས་མ་བསླབ་ཀྱང་། །སྒྱུ་མའི་བློ་ལས་གཞན་ཅི་འབྱུང་། །ཞེས་ཀྱང་སྨྲས་སོ། །དཔེར་ན། གསེར་དང་། ས་རྡོ། རྩི་ཤིང་ལ་སོགས་པ་ཁྱད་མ་ཕྱེ་བར་ཅིག་ཅར་དུ་མེ་ལ་བསྲེགས་ན། ཚིག་པ་རྣམས་ནི་ཚིག །མ་ཚིག་པ་རྣམས་ནི་ཤུལ་དུ་ལུས་པ་ལྟར། རིགས་ཤེས་ཀྱིས་སྣང་བ་ཐམས་ཅད་ཁྱད་མ་ཕྱེ་བར་དགག་ཀྱང་། སྒྱུ་མའི་དངོས་པོ་ཤུལ་དུ་ལུས་རྒྱུ་ཞིག་ཡོད་པ་དེ་ལུས་ནས་སྡོད་ངེས་ཀྱི། དང་པོ་ཉིད་ནས་སྒྱུ་མ་ལྟ་བུའི་རྟེན་འབྲེལ་ཟུར་དུ་ཕྱེ་ནས། དེ་ལ་རིགས་པས་གནོད་པ་མ་བསྐྱལ་བར་འཇོག་ག་ལ་དགོས།   ཐ་སྙད་ཚད་གྲུབ་ཁས་མ་བླངས་ཀྱང་རྟེན་འབྲེལ་ལ་ཡིད་རྟོན་མེད་པར་མི་འགྱུར་བ་ཅི་ཡིན་ཞེ་ན། སྤྱིར་ཚད་མས་གྲུབ་པ་བྱ་བ་འདི་ཀུན་རྫོབ་ཀྱི་སྣང་བ་རགས་པ་རྣམས་ཕྲ་ཞིང་ཞིབ་ཏུ་བཏང་བའི་དགོས་པ་རྒྱ་ཆེན་པོ་འདིའི་ཆེད་དུ་མཁས་པ་རྣམས་ཀྱིས་ཚུལ་གསུམ་གྱི་རིགས་པས་གྲུབ་པ་བྱ་བ་དང་དོན་གཅིག་ཅིང་། དོན་ལ་ཀུན་བཏགས་ཀྱི་མ་རིག་པའི་ཡུལ་གྱི་ཁྱད་པར་འགའ་ཞིག་དགོས་པ་རྒྱ་ཆེན་པོའི་དོན་དུ་མཁས་པ་རྣམས་ཀྱི་རྟོག་གེའི་རིག་པས་ཆེས་གསལ་དུ་བཏང་བ་ཞིག་ཏུ་འདུག་ལ། སྤྱིར་ཚད་གྲུབ་བྱ་བ་དང་། ཡིད་ཆེས་པ། བསླུ་མེད། བསྙོན་མེད་སོགས་རྟོག་གེའི་རིགས་པས་སྣོན་པ་བཏབ་མ་བཏབ་ཙམ་གྱི་ཁྱད་པར་ལས། རིགས་དྲུག་ཀུན་གྱི་རྒྱུད་ལ་རང་བྱུང་དུ་ཡོད་པའི་ཀུན་རྫོབ་ཀྱི་རྣམ་ཤེས་འདི་ཁ་ཕྱོགས་བསྒྱུར་ལུགས་ཀྱིས་སྣང་བ་ཙམ་ལས་གཞན་དུ་མེད་ཅིང་། བུ་ཡི་ལག་པ་མེ་དང་འཕྲད་ན་ཨ་ཚ་ཚ་ཟེར་བ་དེ། བསླུ་མེད། བསྙོན་མེད་ཁས་ལེན་སོགས་ཡིན་ལ། ཕ་ཡིས་མེ་ཚ་བ་ཡིན། ལག་པ་ཤ་ཡིན་པས་མེ་ལ་ཐུག་ན་ཅི་ལ་མི་ཚ་སོགས་རྒྱུ་མཚན་དང་སྦྱར་བའི་བཀའ་བཀྱོན་གནང་བ་དེ་ལུང་རིགས་ཀྱི་ཚད་མས་གྲུབ་ལུགས་ཡིན། དེས་ན་ཇི་སྲིད་ས་རྡོ་རི་བྲག་ལ་སོགས་པའི་སྣང་བ་འདི་དག་མ་ཡལ་བ་དེ་སྲིད་དུ་མཆོག་གསུམ་རྒྱུ་འབྲས་རྟེན་འབྲེལ་ལ་སོགས་པའི་སྣང་བ་ཡང་ཡལ་བའི་དོན་མེད་ལ། དགོས་པའི་སྣང་བ་སྔོན་དུ་ཡལ་ནས། མི་དགོས་པའི་སྣང་བ་རྗེས་སུ་ལུས་ན་སོ་སོའི་སྐྱེ་བོ་ཆོས་མེད་ཐ་ཤལ་པའི་རང་བཞིན་ལས་འོས་ཅི་ཡོད།   ནམ་ཞིག་སྔོན་གྱི་སྔགས་པ་རྒན་པོ་རྣམས་ཀྱི་ཆོས་སྐད་ཆོས་ཟད་བློ་འདས་ཞེས་བརྗོད་པའི་ས་དེར་སླེབས་ཚེ་ས་རྡོ་རྟེན་འབྲེལ་མཆོག་གསུམ་སོགས་བཟང་ངན་བར་མའི་ཀུན་རྫོབ་འདི་དག་རྩ་བ་ནས་ཡལ་ཏེ་འདི་དག་གི་ཚབ་ཏུ། སྐུ་ཐུགས་ཟུང་འཇུག བདེན་གཉིས་ཟུང་འཇུག བཟང་ངན་ཟུང་འཇུག དགེ་སྡིག་ཟུང་འཇུག་སོགས་མང་པོ་ཞིག་ཡོང་རྒྱུ་མེད་དམ་སྙམ། དེའི་ཚེ་ཇི་སྙེད་པ་གཟིགས་པའི་རྣམ་མཁྱེན་གྱི་ཆ་ཤས་བྱེ་བ་འབུམ་ཕྲག་དེ་ཀུན་ཀྱང་ཇི་ལྟ་བ་གཟིགས་པའི་རྣམ་མཁྱེན་གཅིག་གི་ངོ་བོར་སོང་བར་སེམས།   སྤྱིར་རང་ཅག་སོ་སོའི་སྐྱེ་བོ་རྣམས་ལ་འདོད་པ་བཞིན་དུ་ཡིད་ཆེས་པ། མི་འདོད་བཞིན་དུ་ཡིད་ཆེས་པ། འོས་མེད་པར་ཡིད་ཆེས་པ་སོགས་ཡིད་ཆེས་དུ་མ་ཞིག་ཡོད་མོད་ཀྱི་རྩ་བ་རང་གི་སྣང་བ་ལ་རང་ཉིད་ཡིད་ཆེས་པ་ཙམ་ལས་མེད་ཅིང་། ཡིད་ཆེས་པ་བྱ་བ་དེ་རང་དབང་མེད་པར་མྱོང་བའི་སྟོབས་ཀྱིས་སེམས་ཡུལ་ཕྱོགས་རེ་བ་ཞིག་ལ་འཇུག་དགོས་པ་དེ་ཡིན། རྨི་ལམ་དུ་སྣང་ཇི་ལྟ་བ་བཞིན་བདེན་པ་ཚད་གྲུབ་ཏུ་སུས་ཀྱང་ཁས་མི་ལེན་མོད། རྨི་ལམ་དུ་ཤར་བའི་བདེ་སྡུག་འཇིགས་སྐྲག་སོགས་ཀྱི་སྣང་བ་དང་ཚོར་བ་ལ་དབང་མེད་དུ་ཡིད་ཆེས་དགོས་པ། དཔེར་ན། རྨི་ལམ་དུ་བྲག་རི་ཆེན་པོའི་རྩེ་ནས་གཡང་དུ་ལྷུང་བ་ལ་ཚུལ་གསུམ་གྱི་རིགས་པས་དཔྱད་ན་འཆི་བ་ལས་འོས་མེད་ཀྱང་། གཡང་དུ་ལྷུང་། དེ་ནས་ཕྱིར་འོང་། སླར་ནམ་མཁའ་ལ་འཕུར་བ་སོགས་རིགས་པས་དཔྱད་ན་མི་འགྲུབ་པའི་སྣང་བ་དེ་ཀུན་ལ་གཡང་དུ་ལྷུང་ཚེ་འཇིགས་སྐྲག་དང་ནམ་མཁའ་ལ་འཕུར་དུས་དགའ་སྤྲོ་སོགས་སེམས་ཀྱི་ཉམས་མྱོང་སྣ་ཚོགས་བསྙོན་མེད་དུ་འབྱུང་བ་འདི་ཡིན་ཞིང་། མདོར་ན་ཉ་ཆུ་ཡི་ནང་དུ་བག་ཡངས་སུ་གནས་པ་དང་། མི་ཆུ་ཡི་ནང་དུ་ཐིམ་པས་འཇིགས་སྐྲག་གཉིས་ཀ་ཉ་དང་མི་གཉིས་ཀས་དབང་མེད་བསྙོན་མེད་ཡིད་ཆེས་དགོས་པ་ལྟ་བུའོ། །དེས་ན་ཐལ་འགྱུར་བའི་རང་ལུགས་ཐུན་མོང་མ་ཡིན་པ་རང་ངོ་དང་གཞན་ངོའི་ཁས་ལེན་རྒྱུའི་ཁྱད་པར་ནི་གཉིས་འཛིན་གྱི་སྣང་བ་མ་ལོག་པའི་སོ་སྐྱེ་རྣམས་ཀྱིས་དབང་མེད་དུ་ཁས་ལེན་དགོས་པ་འདི་དག་གཞན་ངོའི་ཁས་ལེན་ཡིན་ལ། སོ་སོའི་སྐྱེ་བོའི་སྣང་ཚུལ་བསམ་ཚུལ་གྱི་ཡུལ་དེ་ཀུན་ལས་གཅིག་ཀྱང་ཆོས་ཉིད་རྟོགས་པའི་རྣལ་འབྱོར་པར་རང་གིས་རང་ལུགས་སུ་ཁས་མི་ལེན་པ་ནི། ཐལ་འགྱུར་བས་རང་ཕྱོགས་མི་བྱེད་པའི་དོན་ཡིན་ཞིང་། ཁས་ལེན་མེད་པའི་སྔ་རྒོལ་མཉམ་གཞག་སྨྲ་བྲལ་གྱི་ངང་དུ་བཞུགས་པ་ལ། ཁས་ལེན་ལྡན་གྱི་ཕྱི་རྒོལ་གྱིས་ལུང་རིགས་ཀྱི་སྒོ་ནས་རྩོད་པ་བྱེད་ཚེ་ལན་གང་བཏབ་ཐམས་ཅད་ཁས་ལེན་ཤ་སྟག་དུ་འགྱུར་བས་ཁས་ལེན་མེད་པའི་ལྟ་བ་འདི་ཚིག་དང་སྒྲ་དང་ཁྱད་པར་རྟོག་གེའི་རིགས་པའི་ནང་དུ་ཤོང་པའི་གནས་མེད་པ་ཡིན་ནོ། །མདོར་བསྡུས་ན། ས་ཡོད་པར་སྙིང་ཐག་པ་ནས་ཁས་ལེན་ན་རང་ལུགས་ཀྱི་ཁས་ལེན་ཡིན། ས་ཡོད་ཅེས་དབང་མེད་དུ་ཁས་ལེན་ན་གཞན་ངོའི་ཁ་ལེན་ཡིན། དེ་བཞིན་གཤེགས་པས་བྱང་ཆུབ་ཤིང་ལ་སྤྱན་མི་འཛུམ་པར་བདུན་ཕྲག་གཅིག་བཞུགས་པ་དེ་ཁས་ལེན་མེད་པའི་རང་ལུགས་ཡིན་ལ། ལྟ་བ་དེ་ཉིད་རྟོགས་པའི་ཆེད་དུ་བདེན་བཞིའི་ཆོས་ཀྱི་འཁོར་ལོ་བསྐོར་བ་འདི་གཞན་ངོའི་ཁས་ལེན་གྱི་རྣམ་གཞག་ལ་སྙིང་རྗེའི་དབང་གིས་ཞུགས་པ་ཡིན་ཞིང་། གོ་ལུགས་འདི་ཐལ་འགྱུར་བ་ཙམ་དུ་མ་ཟད་བདེན་གཉིས་དྲང་ངེས་ཀྱི་རྣམ་གཞག་འདོད་པའི་གྲུབ་མཐའ་གཞན་ལའང་ཁྱད་པར་མེད་དེ། རྣམ་འགྲེལ་ལས་ཀྱང་། དེ་དེ་ཉིད་དོན་བཏང་སྙོམ་ཅན། །གླང་ཆེན་གཟིགས་སྟངས་ཉིད་མཛད་ནས། །ཕྱི་རོལ་སྤྱོད་ལ་འཇོག་པར་མཛད། ཅེས་བཅོམ་ལྡན་འདས་ཀྱིས་ཆོས་འཆད་པ་ན་ཕྱི་དོན་ཡོད་པའི་ཚུལ་ཞལ་གྱིས་བཞེས་ཚུལ་རྒྱ་འགྲེལ་དག་ཏུ་གསལ་བ་ལྟར་རོ། །མི་རེ་རེ་ལ་རང་ངོ་གཞན་ངོའི་བསམ་ཚུལ་གཉིས། འདོད་ཚུལ་གཉིས། བཤད་ཚུལ་གཉིས་ཡོད་པ་ལ་སངས་རྒྱས་དང་སེམས་ཅན་གྱི་སྣང་ཚུལ་བཤད་ཚུལ་ཐམས་ཅད་དགོངས་པ་གཅིག་དང་དབྱངས་གཅིག་ཏུ་དྲིལ་བ་ལ་སུ་ཞིག་ཡིད་ཆེས།   དེང་སང་གི་ཆོས་གྲྭའི་རྟགས་གསལ་དཀྱུས་མའི་གནོད་པ་ཙམ་ལ་འཇིགས་ན་ནི། ལན་གཞན་གང་ཡང་མི་དགོས་ཀྱི། ཐལ་བ་གང་ཡིན་ལ། ཁས་ལེན་མེད། ཁས་ལེན་མེད་ཅེས་པའི་ལན་འདི་ཙམ་གྱིས་ཀྱང་། ཀྱལ་ཀ་དེ་རྩེད་མོའི་ཚུལ་དུ་བཟློག་པར་ནུས་སོ། །སོ་སོའི་སྐྱེ་བོའི་རྣམ་རྟོག་ལ་རྩ་བ་གཏད་པའི་ཚུལ་གསུམ་རྟོག་གེའི་རིགས་པ་ནི་རང་གིས་རང་ཉིད་གཞོམ་པའི་ཐབས་ཙམ་དུ་བྱས་ན་བཟང་མོད། ཁས་ལེན་མེད་པའི་ལྟ་བ་ལ་གནོད་པའི་ལག་ཆ་བྱེད་ན་ཆོས་ཀྱི་དབྱིངས་ལ་འཇུག་པའི་ཐབས་མེད་པ་སློབ་དཔོན་ཕྱོགས་ཀྱི་གླང་པོས་ཚད་མ་ཀུན་བཏུས་སུ་ཆེས་ཤིན་ཏུ་གསལ་བར་གསུངས་སོ། །ཡོད་མེད་བློ་ཡིས་བཞག་པའི་ཤེས་བྱ་དང་། །བདེན་རྫུན་ཡུལ་ལ་ལྟོས་པའི་ཚད་མ་གཉིས། །གཅིག་གི་རྫུན་ཁུངས་གཅིག་ལ་གཏད་མཐོང་ནས། །ཐ་སྙད་ཚད་གྲུབ་འཇོག་ལ་བློ་མ་བདེ། །མ་བརྟག་མ་དཔྱད་འཇིག་རྟེན་རྣམ་གཞག་དང་། །བརྟག་ཅིང་དཔྱད་པའི་གྲུབ་མཐའི་གཞུང་ལུགས་གཉིས། །གཅིག་གི་རྩ་བ་གཅིག་ལ་ཐུག་མཐོང་ནས། །ཐ་སྙད་ཚད་གྲུབ་འཇོག་ལ་བློ་མ་བདེ། །བློ་ལ་སྣང་བ་ཙམ་གྱི་སྒྱུ་མ་དང་། །དོན་ལ་ཡིན་པར་ངེས་པའི་གཤིས་ལུགས་གཉིས། །གཅིག་ཤོས་བདེན་ན་གཅིག་ཤོས་རྫུན་མཐོང་ནས། །ཐ་སྙད་ཚད་གྲུབ་འཇོག་ལ་བློ་མ་བདེ། །རང་སྐྱོན་རི་བོ་འགེབ་པའི་སྔ་རྒོལ་དང་། །གཞན་སྐྱོན་ཁབ་ཀྱིས་འཚོལ་པའི་ཕྱི་རྒོལ་གཉིས། །གཅིག་ལས་གཅིག་རྒྱལ་རེས་སུ་བྱེད་མཐོང་ནས། །ཐ་སྙད་ཚད་གྲུབ་འཇོག་ལ་བློ་མ་བདེ། །ཡོད་མཐའ་འགོག་པའི་སྣང་རུང་མ་དམིགས་དང་། །མེད་མཐའ་སྤོང་བའི་མི་སྣང་མ་དམིགས་གཉིས། །གཅིག་གི་རྣམ་གཞག་གཅིག་གིས་བཤིག་མཐོང་ནས། །ཐ་སྙད་ཚད་གྲུབ་འཇོག་ལ་བློ་མ་བདེ། །གྲོགས་པོར་མཚན་མར་ཞེན་པའི་བདེན་འཛིན་དང་། །གྲོགས་ཀྱི་ཕན་པར་རྟོགས་པའི་ཚད་མ་གཉིས། །སྲེད་པ་སྐྱེད་ལ་ཁྱད་པར་མི་འདུག་པས། །ཐ་སྙད་ཚད་གྲུབ་འཇོག་ལ་བློ་མ་བདེ། །དགྲ་བོ་བདེན་པར་ཞེན་པའི་དངོས་འཛིན་དང་། །དགྲ་ཡིས་གནོད་པར་ངེས་པའི་ཚད་མ་གཉིས། །ཞེ་སྡང་སྐྱེད་ལ་ཁྱད་པར་མ་མཐོང་ནས། །ཐ་སྙད་ཚད་གྲུབ་འཇོག་ལ་བློ་མ་བདེ། །རྗེས་དཔག་ཚད་མ་མངོན་སུམ་བློ་ལས་སྐྱེས། །མངོན་སུམ་བདེན་རྫུན་རྗེས་སུ་དཔག་པས་དཔྱད། །ཕ་ཡི་དཔང་པོ་བུ་ཡིས་བྱས་པ་འདིས། །ཐ་སྙད་ཚད་གྲུབ་འཇོག་ལ་བློ་མ་བདེ། །རིགས་པས་དཔྱད་པ་ཤིང་རྟའི་སྲོལ་ལ་བརྟེན། །ཤིང་རྟ་ཆེན་པོ་རིགས་པའི་སྟོབས་ཀྱིས་སྒྲུབ། །རང་ཐག་ཆོད་ན་སུ་ཡི་རྗེས་སུ་འབྲང་། །རང་ཐག་མ་ཆོད་སུ་ལ་ཡིད་རྟོན་བྱེད། །ཡང་དག་རིགས་པ་ངེས་དོན་ལུང་ལས་རྙེད། །དྲང་ངེས་ཁྱད་པར་དྲི་མེད་རིགས་པས་འབྱེད། །རིགས་པས་ཤེས་ན་ངེས་དོན་ཅི་ལ་འཚོལ། །རིགས་པས་མ་ཤེས་ངེས་དོན་ག་ལ་རྙེད། །བྱམས་མགོན་ཁྱི་མོར་མཐོང་བའི་ངང་ཚུལ་འདིས། །མ་བརྟགས་ལྷན་སྐྱེས་བློ་ལ་ཡིད་མ་ཆེས། །དབུ་སེམས་མཁན་པོའི་ལྟ་གྲུབ་འགལ་ལུགས་འདིས། །དཔྱོད་ལྡན་མཁས་པའི་བློ་ལ་ཡིད་མ་ཆེས། །ཕལ་པ་དྲང་པོའི་རྗེས་སུ་འབྲང་འབྲང་ནས། །རྒུད་པའི་རྩ་བ་ལྷན་སྐྱེས་བདེན་འཛིན་རྙེད། །མཁས་པ་དྲང་པོའི་རྗེས་སུ་འབྲང་འབྲང་ནས། །དེ་ལས་སྡུག་པའི་ཀུན་བཏགས་བདེན་འཛིན་རྙེད། །ཡོད་མེད་ཡིན་མིན་བདེན་རྫུན་ལ་སོགས་པའི། །རྩོད་པའི་འུར་སྒྲ་སྒྲོག་པའི་འཇིག་རྟེན་འདིར། །རྟག་ཏུ་ཀུན་མཐོང་ཤེས་བྱ་ཡིན་པར་སྣང་། །རྒྱུན་དུ་གང་གོམས་ཚད་མ་ཡིན་པར་སྣང་། །མི་མང་གང་ལ་དགའ་དེ་བདེན་པ་དང་། །ཁ་མང་གང་ལ་མཐུན་དེ་གྲུབ་མཐར་སྣང་། །མི་རེའི་ཁོང་ན་མི་མཐུན་ཚད་མ་རེ། །དེ་ཡི་རྒྱབ་སྐྱོར་རྡོ་རྗེའི་བཀའ་ལུང་རེད། །ལ་རེའི་རྒྱབ་ན་མི་མཐུན་ཆོས་ལུགས་རེ། །དེ་ཡི་རྗེས་འབྲང་མཁས་བླུན་སྟོང་ཕྲག་རེ། །འདི་ཉིད་བདེན་ལ་འདི་ཡིས་མི་བསླུ་ཞེས། །རང་གི་བདེན་ཁ་རང་ལ་སྦྱིན་པ་འདི། །རིགས་མཐུན་སྐྱེ་བོའི་ཚོགས་རྣམས་ཉམས་རེ་དགའ། །མི་མཐུན་ཚོགས་ལ་སྨྲས་ན་ཞེ་རེ་ཁྲེལ། །མི་མཐུན་རིགས་དྲུག་འགྲོ་བའི་རྒྱལ་ཁབ་འདིར། །བཅུ་ཡིས་འདོད་པ་བརྒྱ་ཡིས་མི་འདོད་ཅིང་། །མི་ཡིས་མཐོང་བ་ལྷ་ཡིས་མི་མཐོང་བས། །བདེན་རྫུན་ཚད་མའི་ཁྲིམས་ཐག་སུ་ཡིས་ཆོད། །ཤེས་རབ་སྦྱང་པས་མི་ཚེ་ཟད་བྱས་པའི། །གྲུབ་མཐའ་མཁན་པོའི་བློ་ཡང་འཁྲུལ་གྱུར་ན། །འཇིག་རྟེན་བླུན་པོའི་རྫུན་གྱི་སྣང་བ་ལ། །ཐ་སྙད་ཚད་མར་ཡིད་རྟོན་བྱེད་པ་འཁྲུལ། །མཁོ་ཚད་བཟང་ཚད་སེམས་ཀྱི་འཆར་སྒོ་ཀུན། །གུད་དུ་ཕྱེ་ནས་ཚད་མར་འདོད་པ་དེས། །སྒྱུ་མའི་གྲོང་ཁྱེར་ཞིག་པའི་ཐང་སྟོང་དུ། །མིག་འཕྲུལ་ནོར་བུའི་ཕུང་པོ་སླར་ཡང་རྙེད། །བཞིན་རས་ཅུང་ཟད་འགྱུར་བས་འགྱུར་བྱེད་ཅིང་། །མེ་ལོང་ཅུང་ཟད་འགྱུར་ཡང་འགྱུར་བྱེད་པའི། །མི་བརྟན་འགྱུར་བའི་ཤེས་བྱའི་གཟུགས་བརྙན་འདི། །ནམ་ཞིག་མཐའ་ལ་གཏན་དུ་ཡལ་བར་ངེས། །དཔྱད་པ་འདི་ལ་ཐུག་པས་མེད་དམ་སྙམ། །ལག་པ་ཁབ་ལ་ཕྲད་པས་ཡོད་དམ་སྙམ། །མྱོང་བ་མངོན་སུམ་ལག་པས་ཡིན་ནམ་སྙམ། །སྣང་བ་འཁྲུལ་པ་སྲིད་པས་མིན་ནམ་སྙམ། །ཡོད་པའི་རྩ་བ་བཙལ་བས་མེད་དམ་སྙམ། །མེད་པའི་རྩེ་མོ་མཐོང་བས་ཡོད་དམ་སྙམ། །བདེན་པའི་ས་བོན་བཏབ་ན་རྫུན་པར་ཤེས། །རྫུན་པའི་འབྲས་བུ་མྱོང་ཚེ་བདེན་པར་སྣང་། །ཞེས་ཀྱང་སྨྲས་སོ། །དབུ་མ་བར་ཁས་ལེན་མེད་བྱ་བ་འདི་དབུ་མ་པས་མི་ཚེ་གཅིག་ལ་ཁ་མི་གྲག་བྱ་བའི་དོན་མ་ཡིན་གྱི། ཟླ་བ་གྲགས་པས་ཀྱང་། འདི་ནཱ་ལེནྡཱའི་དགོན་པ་ཡིན། ང་ཟླ་བ་གྲགས་པ་ཡིན། འདི་ངའི་ཆོས་ཆོས་གོས་ཡིན། སངས་རྒྱས་བྱང་ཆུབ་སེམས་དཔའ་ལས་འཁྲུངས་སོགས་ཀྱི་ཁས་ལེན་མཛད་ངེས་མོད། དོན་དམ་པ་དང་ཀུན་རྫོབ་ལ་དཔྱོད་པའི་སྐབས་གཉིས་སོ་སོར་ཕྱེ་དགོས་ཏེ། དོན་དམ་པ་ལ་དཔྱོད་པའི་སྐབས་སུ་ཁས་ལེན་མེད་ཅེས་སྨྲས་པ་དེ་ག་རང་ཁས་ལེན་ཡིན་སོགས་བརྗོད་པ་ནི། ང་མནལ་ལམ་དུ་འགྲོ་བས་ཅི་ཡང་མ་སྨྲས་ཞིག་བརྗོད་པ་ན། ཁ་ལ་མ་ཉན་པར་མནལ་དུ་འགྲོ་བས་ཅི་མ་སྨྲ་ཞིག་བརྗོད་པ་དེ་ག་རང་མནལ་དུ་མི་འགྲོ་བའི་རྟགས་ཡིན་ཞེས་ཀྱལ་ཀ་བྱེད་པ་དང་འདྲ་བས་སྙིང་པོ་ཅི་ལ་ཡོད།   སྔོན་ཁྲུང་ཁྲུང་གི་ཁྱུ་ནམ་མཁའ་ལ་འགྲོ་བ་ན་ཁྲུང་ཁྲུང་གི་དེད་དཔོན་གྱིས་རང་རེ་ཁ་མི་གྲག །གྲག་ན་གཞན་གྱིས་གསོད་པར་འགྱུར་ཞེས་སྨྲས་པས་ཐམས་ཅད་ཀྱིས་མི་གྲག །མི་གྲག །མི་གྲང་མི་གྲང་ཞེས་སྒྲ་སྔ་མ་ལས་ཆེ་བར་བསྒྲགས་པ་དེ་དང་འདྲ།   མདོར་ན་བསྙུང་གནས་ངག་བཅད་ཀྱི་དམ་བཅའ་དང་། ལུང་མ་བསྟན་གྱི་ལྟ་བ་བཅུ་བཞི་ལ་བཅོམ་ལྡན་འདས་ཀྱིས་གང་དུ་ཡང་ལུང་མ་བསྟན་པ་འདི་དག་ཡོད་སྲིད་ན། ཁས་ལེན་མེད་པའི་ལྟ་བ་ཡང་ཡོད་སྲིད་ལ། གཞན་དུ་ན། སྔོན་མཐའ་སྔོན་རྣམས་ཞུས་པའི་ཚེ། །ཐུབ་པ་ཆེན་པོས་མི་གསུངས་བཞུགས། །ཞེས་བཤད་ཅིང་། ལན་མེད་པ་ནི་ཕམ་པ་ཐམས་ཅད་ཀྱི་མཐར་ཐུག་པ་ཡིན་ནོ་ཞེས་འདུག་པ་ལུང་ལས་བཤད་པས། བཅོམ་ལྡན་འདས་ཐམས་ཅད་ནས་ཐམས་ཅད་དུ་ཕམ་པར་གྱུར་པ་འདི་ལྟ་བུའི་རིགས་པ་ལག་ཏུ་ཐོགས་ནས་ང་རྒྱལ་དེ་ཙམ་བྱ་མ་དགོས། འཕགས་པས་ནི། གང་ཕྱིར་དེ་ལྟར་ཟབ་པའི་ཆོས། །སྣོད་མིན་འགྲོ་ལ་མི་གསུངས་པ། །དེ་ཉིད་ཕྱིར་ན་མཁས་རྣམས་ཀྱིས། །སྟོན་པ་ཐམས་ཅད་མཁྱེན་པར་ཤེས། ཞེས་ལན་མ་གསུངས་པ་དེ་ག་རང་ལ་བསྔགས་བརྗོད་མཛད་དོ། །རང་ལ་གོ་བ་ཡོད་ན་ཁས་ལེན་མེད་པ་དེ་ག་རང་གིས་ཡང་དག་པའི་ལྟ་བ་རྒྱུད་ལ་སྐྱེས་ནུས་ཤིང་། འཕགས་པས་མི་སྨྲ་བའི་བརྟུལ་ཞུགས་ཞེས་ཟབ་མོའི་དོན་གྱི་གནད་ཕར་ཞོག མགོན་མེད་ཟས་བྱིན་གྱིས་བཅོམ་ལྡན་འདས་ལ་གསོལ་པ། སང་བདག་གི་ལྡུམ་རར་གདུགས་ཚོད་གསོལ་བར་ཅི་གནང་ཞེས་ཞུས་པར། བཅོམ་ལྡན་འདས་ཀྱིས་ཅང་མི་གསུངས་པས། དེ་དེ་བཞིན་དུ་གནང་བར་རིག་ནས་སོགས་བཤད་པ་ཙམ་ཡང་མ་མཐོང་བར་ཟད་དོ། །དེས་ན་ཁས་ལེན་མེད་ཅེས་བརྗོད་པ་དེ་སྲིད་དོན་དམ་དཔྱོད་པའི་སྐབས་ཡིན་ལ། ཁས་ལེན་མེད་པ་དེ་ཉིད་ཆོས་ཅན་དུ་བྱས་ནས་ཁས་ལེན་ཡིན་མིན་སོགས་དཔྱོད་པ་ཕན་ཆད་ཀུན་རྫོབ་དཔྱོད་པའི་སྐབས་ཡིན་པས། དེ་ཕན་ཆད་དུ་འཇིག་རྟེན་ན་གང་ཡོད་པ་སྨྲས་པ་དེ་ང་ཡང་ཡོད་པར་སྨྲ། མེད་པར་སྨྲ་བ་དེ་ང་ཡང་མེད་པར་སྨྲ་སོགས་བདེ་བར་གཤེགས་པ་རང་ཉིད་ཀྱིས་གསུངས་པ་འདི་ལས་ཐབས་གཞན་ཅི་ཡོད།   ཉག་སྐེད་བུ་ལོང་མའི་མདུན་དུ་ཁྱོད་རང་འཁོར་ལོས་སྒྱུར་བའི་རྒྱལ་པོ་ཡིན་ནོ་བྱ་བ་ཁས་ལེན་ཡིན། བུ་ལོང་མས་འོ་ན་ཁྱོད་ཀྱིས་རང་ལུགས་ཁས་ལེན་པ་ཡིན་ནམ། ངའི་ངོ་སྲུང་ཙམ་ཡིན་ཞེས་དྲིས་ཚེ་ངོ་སྲུང་གཏན་ནས་མ་ཡིན་གྱི། ཁོ་བོ་རང་གི་ལུགས་ཡིན་ཞེས་བརྗོད་པ་ལས་ཐབས་གཞན་མེད་མོད། ཁས་ལེན་དེ་འདྲ་བུ་ལོང་མ་ལ་འཇིགས་ནས་དབང་མེད་དུ་ཁས་བླངས་པ་ལས། སེམས་ཀྱི་སྟེང་ན་ཡིད་ཆེས་ཅུང་ཟད་ཀྱང་མེད་པ་བཞིན་དུ། མེ་ཡིས་ཚིག ཆུ་ཡིས་གྲང་། རླུང་གིས་བསྐྱོད་པ་སོགས་བུ་ལོང་མ་དང་འདྲ་བས། ཕྱི་རོལ་གྱི་ནུས་པ་འདི་དག་དབང་མེད་དུ་ཁས་ལེན་དགོས་པར་བདེན་མོད། རང་ལུགས་ལ་ཁས་ལེན་མི་དགོས་པའི་ཁྱད་པར་ཕྱེད་དགོས།འདིའི་སྐོར་རྗེ་བླ་མའི་རེད་མདའ་པའི་དྲིས་ལན་དུ་ཤིན་ཏུ་གསལ་བས་གཟུ་བོར་གནས་ནས་དེར་བལྟ་བར་འཚལ།   མདོར་ན་ད་ལྟའི་བསམ་ཚུལ་འདིའི་དབང་དུ་བྱས་པས་བསམ་མནོ་ཐམས་ཅད་ལ་ཆགས་སྡང་རྨོངས་གསུམ་གྱི་རྩ་བར་མ་གྱུར་པ་གཅིག་ཀྱང་མི་སྣང་ཞིང་། གལ་སྲིད་རང་ཅག་གི་ནམ་རྒྱུན་གྱི་བློ་འདིའི་ཁྲོད་ན་ཡང་དག་པའི་རིགས་པ་ཞིག་ཡོད་ཚེ། འཁོར་བ་ཐོག་མ་མེད་པ་ནས་བསྐལ་པ་གྲངས་མེད་ཀྱི་བར་དུ་གོམས་ཀྱང་ད་དུང་ཡར་སྐྱེད་འདི་ཙམ་ལས་མེད་པ་ངོ་མཚར། བྱི་ལ་དང་ཁྱི་སོགས་རང་རང་གིས་གང་མྱོང་བའི་རྣམ་རྟོག་གི་སྣང་བ་དེ་ཀུན་བྱི་ལ་དང་ཁྱི་ཡི་སྐད་དབྱངས་ཀྱི་རྣམ་འགྱུར་གསུམ་བཞི་ལས་མེད་པ་དེའི་ནང་དུ་བསྡུས་ནས་བརྗོད་པ་མ་གཏོགས་ཐབས་གཞན་མེད་པ་བཞིན་དུ་རང་ཅག་སོ་སོའི་སྐྱེ་བོ་དག་དབང་ཐོབ་པའི་བྱང་ཆུབ་སེམས་དཔའ་རྣམས་ལ་ལྟོས་ན་ཁྱི་དང་བྱི་ལའི་ཚོད་ཙམ་དུ་ཡང་མ་སླེབས་པ་དག་གི་རྣམ་རྟོག་གི་བུ་ག་ཆུང་ངུ་འདིར་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱིས་གཟིགས་པའི་མཐའ་དང་བྲལ་པའི་ཆོས་དབྱིངས་ནམ་མཁའ་ཆེན་པོ་དེ་མེད་དགག མ་ཡིན་དགག་སོགས་ཀྱི་གཟུགས་སུ་བཀོད་པར་ག་ལ་ནུས།   ཁས་ལེན་མེད་པ་དེ་ཉིད་ཁས་ལེན་ཡིན་ནོ་བྱ་བ་དང་། གོང་དུ་སྨྲས་པ་ལྟར་ཀ་ར་ལ་རྒྱུས་མེད་པའི་བྱང་འབྲོག་གི་ཡུལ་དུ་ལོ་དང་འོ་མ་མིན་པའི་ཀ་ར་བྱ་བའི་མངར་བ་དེ་ཉིད་འོ་མ་ཡིན་ངེས་སོ་ཞེས་ཨུ་ཚུགས་བྱེད་པ་དང་འདྲ་སྟེ། མེ་ལོང་གི་ཆེ་ཆུང་ལ་དཔགས་པའི་གཟུགས་བརྙན་གྱི་རྒྱ་ཁྱོན་ཡང་དེ་ཙམ་ལས་མེད་པ་ལ་དེའི་ནང་དུ་མ་ཚུད་པ་ཐམས་ཅད་རིགས་པའི་དགག་བྱ་ཤ་སྟག་ཏུ་འདོད་པ་ནི་ཟབ་མོའི་ཆོས་ཐམས་ཅད་ལ་གོ་བ་རྣལ་མ་སྐྱེ་བའི་གེགས་སུ་ཤེས་པར་བྱའོ། །གཞན་ཡང་ཡིད་ལ་ཁས་ལེན་མེད་པར་ཐག་ཆོད་ཅིང་ཁ་ནས་རྣམ་གཞག་སྣ་ཚོགས་ཁས་ལེན་པའི་སྔ་རྒོལ་གྱི་དམ་བཅའ་དེ་ཁ་ཞེ་མི་མཐུན་པའི་རྫུན་དུ་འགྱུར་ན། ཡིད་ལ་བདེན་འཛིན་གྲ་ཟུར་མ་ཉམས་པའི་ཕྱི་རྒོལ་གྱིས་ཆོས་ཐམས་ཅད་བདེན་མེད་དུ་གྲུབ་ཡང་རྫུན་དུ་འགྱུར་བ་མ་ཡིན་ནམ། དེས་ན་ཐབས་ལ་མཁས་པའི་སྤྱོད་པ་ཕྲ་མོ་ཚམ་ལ་ཡང་རང་དང་བསམ་ཚོད་རིགས་མི་མཐུན་པའི་མི་དྲག་ཞན་གང་རུང་དང་འཕྲད་ཚེ། ཕྱི་རོལ་ལུས་ངག་གི་རྣམ་འགྱུར་དང་། ནང་སེམས་གྱི་བསམ་ཚུལ་ཐ་དད་དགོས་ན། སོ་སོའི་སྐྱེ་བོའི་རྣམ་པར་རྟོག་པ་རྣམས། བྱང་ཆུབ་སེམས་དཔའི་ས་རིམ་པ་བཅུའི་རྒྱབ་དུ་བསྐྱུར་བའི་སངས་རྒྱས་བཅོམ་ལྡན་འདས་ལ་རང་གི་དགོངས་ཚོད་དང་གདུལ་བྱ་ལ་ཁྲིད་ཚོད་ཀྱི་ཁྱད་པར་གཉིས་ཡོད་པ་ལྟ་ཅི་སྨོས།   དེས་ན་ཡང་དག་པའི་ལྟ་བ་ལ་ཡང་། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །ཞེས་དང་། སོ་སོ་རང་རིག་ཡེ་ཤེས་སྤྱོད་ཡུལ་བ། །ཞེས་རྣལ་འབྱོར་པ་རང་གི་བསམ་ཚུལ་ཞིག་དང་། ཡོད་པ་མིན་ན་མེད་པ་ཡིན་དགོས། མེད་པ་མིན་ན་ཡོད་པ་ཡིན་དགོས། ཞེས་ཆོས་ཀྱི་དབྱིངས་སོགས་ཅི་འདྲ་ཞིག་ཡིན་ཀྱང་ཡོད་མེད་གཉིས་ཀའི་མངའ་འབངས་སུ་འདུ་དགོས་སོགས་མཁས་པའི་སྙན་གྲགས་བ་དན་དཀར་པོ་སྲིད་མཐའི་བར་དུ་སྒྲོགས་པ་དག་ཀྱང་མེད་དུ་མི་རུང་བ་ལགས་མོད། ཆོས་ཀྱི་དབྱིངས་དང་། མཁས་པའི་སྙན་པ། མ་བཅོས་པའི་གཤིས་དང་། རྟོག་པའི་རིགས་པ། མི་གསལ་བའི་སྤྲོས་བྲལ། གསལ་བའི་མཐའ་བཞི་སོགས་རང་རང་གིས་ཇི་ལྟར་སྨྲས་པ་བཞིན་འདམ་ག་བྱ་བར་ཟད་དོ། །སྤྱིར་སྐད་ཅིག་བསྐལ་པ། ཕྲ་པའི་རྡུལ་འཇིག་རྟེན་གྱི་ཁམས་སུ་བསྒྱུར་བ་སོགས་མཐར་ཐུག་གི་གོ་འཕང་དུ་སླེབས་ཚེ་རྣམ་གཞག་ཐམས་ཅད་ཅིག་ཅར་དུ་འདྲེས། བུ་ཡི་འོད་གསལ་སྣང་བ་ཁྲ་ལམ་མེ་བ་དང་ཕན་ཚུན་ལྟོས་དགོས་པའི་སྟོང་ཉིད་རྟོགས་པའི་ཤེས་རབ་འདི་དང་། གཞི་ཡི་འོད་གསལ། གཅིག་དང་ཐ་དད། ཡོད་པ་དང་མེད་པ་སོགས་ཐམས་ཅད་ཨ་མ་ཕག་མོ་ཞལ་གཉིས་མའི་སྐུ་གཅིག་ཏུ་གྱུར་པ་དེ་འདྲ་དེ་མཐར་ཐུག་གི་འོད་གསལ་མ་བུ་གཉིས་ཕྱིར་མི་ལྡོག་པའི་ཚུལ་དུ་མཇལ་བ་སྟེ་ཐར་པའི་གོ་འཕང་བྱ་བ་ཡང་དེ་ཡིན་ནོ། །ཆོས་གྲྭའི་རིགས་ལམ་གྱི་དབང་དུ་བྱས་ཚེ། རི་རབ་དཔག་ཚད་བརྒྱད་ཁྲི་ཚད་དང་ལྡན་པར་ཐལ། བྱས་པ་ལ། འདོད། ཕྲ་རབ་ཕྱོགས་དང་བྲལ་བར་ཐལ། བྱ་བ་ལའང་། འདོད། འོ་ན་རྡུལ་གཅིག་ཡུལ་ལ་མཐས་གཏུགས་འཇིག་རྟེན་གྱི། སོགས་ཕྲ་རབ་ཇི་སྙེད་ཀྱི་གྲངས་དང་མཉམ་པའི་འཇིག་རྟེན་ཐམས་ཅད་འཇུག་པར་མཛད་པ་མ་ཡིན་པར་ཐལ། དཔག་ཚད་བརྒྱད་ཁྲིའི་ཚད་ལྡན་གྱི་གཟིགས་ཕྱོགས་ཆ་བྲལ་བའི་རྡུལ་གྱི་ཁོངས་སུ་མི་ཤོང་པའི་ཕྱིར། ཞེས་ཐལ་བ་འཕངས་ཚེ། དེའི་ལན། ད་ལྟ་ཡོངས་གྲགས་དམིགས་བསལ་བྱ་བ་དེ་ཡིན། འདི་འདྲ་དམིགས་བསལ་དུ་བྱས་ཆོག་ན་ཡོད་པ་མ་ཡིན་ན་མེད་པ་ཡིན་པར་ཐལ། དགག་པ་གཉིས་ཀྱི་རྣལ་མ་གོ་བའི་ཕྱིར་སོགས་ཀྱི་རིགས་པ་ལའང་དམིགས་བསལ་ཀྱི་ལན་བཏབ་ན་མི་འགྲིག་པའི་རྒྱུ་མཚན་ཅི་ལ་ཡོད།   མདོར་ན་ཐེག་པ་ཆེན་པོ་ལ་མོས་པ་ཐམས་ཅད་བསམ་གྱིས་མི་ཁྱབ་པའི་གནས་ལའང་མོས་དགོས་པ་ཡིན། གཞན་དུ་ན་ཤིན་ཏུ་ཚ་བ་བསྐལ་པའི་མེ་དཔུང་གི་དབུས་དང་། ཉི་མའི་གདན་གྱི་འོག་ཏུ་ཤིན་ཏུ་བསིལ་བའི་ཟླ་བ་དང་པདྨའི་གདན་དྭངས་པ་དང་། ཤིན་ཏུ་ཁྲོས་པའི་མཚོན་ཆ་གདེངས་ཤིང་། ཤིན་ཏུ་ཆགས་པའི་ཡུམ་ལ་འཁྱུད་པ་སོགས་འདི་དག་རྟོག་གེའི་རིགས་པས་དཔྱད་ན་འགལ་འདུ་ཤ་སྟག་ཏུ་མཐོང་བས། དེ་དག་རྣམ་པ་སྟོན་ཚུལ་ཙམ་ཡིན་ནོ་ཞེས། དོན་ལ་ཐང་ཀའི་སྟེང་གི་རི་མོ་དང་ཁྱད་མེད་པར་བྱེད་དགོས་པ་ཙམ་བྱུང་འདུག་ཀྱང་། ཡུལ་དང་། ཡུལ་ཅན། འདོད་ཆགས། ཞེ་སྡང་། ཚ་བ། གྲང་བ། གཙང་དང་དམེ་བ་སོགས་གཉིས་མེད་གཅིག་ཏུ་འདྲེས་པའི་ཟུང་འཇུག་ཡེ་ཤེས་ཆེན་པོའི་སྐུའམ། ལུས་སེམས་ངོ་བོ་གཅིག་ཏུ་འདྲེས་པ་དེ་ཟུང་འཇུག་གི་སྐུ་ཡིན་པར་ཤེས་པར་བྱའོ། །གཟུགས་ཀྱི་སྐུ་གཉིས་གཞན་དོན་དུ་བསྟན་ཅིང་མཚན་དང་དཔེ་བྱད་ཀྱང་གཙོ་བོར་གཞན་ཡིད་ལ་དང་བ་བསྐྱེད་པའི་ཆེད་ཁོ་ན་ཡིན་ན། ཚོགས་གཉིས་ཀྱི་ལག་རྗེས་མཐར་ཐུག་གྲུབ་པའི་མཚན་དཔེ་ཡོངས་རྗོགས་ཀྱི་སྐུ་ལ་ཕག་ཞལ་དང་། སེངྒེའི་ཞལ་སོགས་འོང་བ་ཅི་ལ་སྲིད།དེས་ན། སྤྱིར་ཐེག་པ་ཆེན་པོ། ཡང་སྒོས་སུ་རྡོ་རྗེའི་ཐེག་པ་ཐམས་ཅད་ལ་བླ་མ་སངས་རྒྱས་སུ་བལྟ་བའི་རིགས་པ་འདི་ནས་བཟུང་རང་ཉིད་རྡོ་རྗེ་འཆང་དུ་བསྒོམ་པ་དང་ལུས་དཀྱིལ་འཁོར་ཡོངས་རྫོགས་གྲུབ་པར་ཡིད་ཆེས་པའི་བར་འདི་དག ད་ལྟའི་ཚད་མ་འདི་མགོ་མཇུག་ལྡོག་པའི་ཆེད་ཁོ་ན་ཡིན་ལ། ཤ་ལྔ་བདུད་རྩི་ལྔ་སངས་རྒྱས་ལ་མཆོད་པ་འབུལ་བ་སོགས་འདི་ཀུན་ཀྱང་ཐ་མལ་པའི་རྣམ་རྟོག་རྣམས་རྟོག་གེའི་རིགས་པ་དང་ལྷན་ཅིག་དུ་ཐལ་བ་རྡུལ་དུ་བརླག་པའི་དོན་དུ་གསུངས་པ་ཡིན་གྱི། གཞན་དུ་ན་མཆོད་ཡུལ་དམ་པ་ལ་མི་གཙང་བ་འབུལ་བ་འདི། སྤྱིར་ཚད་མ། སྒོས་སུ་རྟོག་གེའི་རིགས་པ། ཡང་སྒོས་སུ་ཡུལ་གྱི་ཁྲིམས་ཚུན་ཆད་དང་ཡང་འགལ་བས། ཕོ་བྲང་ཞི་བ་འོད་ཀྱིས། མི་གཙང་འདམ་གྱིས་དེ་བཞིན་གཤེགས་པར་མཆོད། །རོ་མྱག་འདམ་དུ་འགྲོ་བ་སྙིང་རེ་རྗེ། །གསུངས་པ་ལྟར་མ་ཡིན་ནམ།མདོར་ན། མི་གཙང་བ་གཙང་བར་བྱེད་པ། མི་རིགས་པ་རིགས་པར་བྱེད་པ་སོགས་ཐ་མལ་བའི་རྣམ་རྟོག་ལྡོག་པའི་ཕྱིར་གསུངས་པ་ཤ་སྟག་ཡིན་པ་ཤེས་དགོས་ཤིང་། ནམ་ཞིག་ན་ས་སངས་རྒྱས་སྤྱན་མ། སངས་རྒྱས་སྤྱན་མ་ས། གཙོ་བོ་འཁོར། འཁོར་གཙོ་བོ་ཡིན་པ་སོགས་བླ་ན་མེད་པའི་འགལ་འདུ་ཆེན་པོའི་གོ་འཕང་ཞིག་རྙེད་རྒྱུ་ཡོད་པར་སྣང་།མདོར་ན་རང་ཅག་སྐྱོན་ཐམས་ཅད་ཀྱི་གཙོ་བོ་གཅིག་ནི། ཀུན་རྫོབ་དོན་དམ་གྱི་རྣམ་གཞག་ཐམས་ཅད་རང་ཅག་གི་ཁ་ན་བཤད་བདེ་བ། སེམས་ལ་ཤར་ཐུབ་པ་ཞིག་མ་བྱུང་གི་བར་དུ་ཨུ་ཚུགས་མཐར་སྐྱེལ་བྱེད་ཅིང་། ལྷག་པར་ཁ་ནས་བཤད་བདེ་བ་ཞིག་གཙོར་བྱས་ཏེ་རྣམ་ཤེས་དེ་འདྲ་ཞིག་བྱུང་ཚེ་ལུང་དང་རིགས་པས་རྙེད་པའི་དོན་མཐར་ཐུག་ཞིག་རྙེད་པར་རློམས་མོད། དོན་ལ་ཤ་ལ་དགའ་བས་ཤ་རྙེད་པ་དང་། ཆང་ལ་དགའ་བས་ཆང་རྙེད་པ་ལྟར་རང་གི་རྣམ་རྟོག་དང་རྗེས་སུ་མཐུན་པའི་ཡུལ་རྙེད་པ་ཙམ་ཡིན་གྱི། རྒྱལ་བ་སྲས་བཅས་ཀྱི་སྤྱོད་ཡུལ་ཟབ་མོ་དེ་རྙེད་པ་ག་ལ་ཡིན། དོན་གྱི་དབང་དུ་གཟིགས་ནས། སོ་སོའི་སྐྱེ་བོའི་བློ་འདི་དགག་ཕྱོགས་དང་། མིན་ཕྱོགས། མེད་ཕྱོགས་ནས་མཐར་ཐུག་གི་གཤིས་དང་ངོ་སྤྲོད་པ་ལས། སྒྲུབ་ཕྱོགས། ཡིན་ཕྱོགས། ཡོད་ཕྱོགས་ནས་གནས་ལུགས་དང་མཇལ་བའི་ཐབས་མེད་པར་གཟིགས་ནས་གཞན་གྱིས་ཁས་ཅི་བླངས་པ་ཐམས་ཅད་ཐལ་འགྱུར་གྱིས་ལྡོག་ཅིང་། རང་ལུགས་སུ་ཁས་ལེན་ཅི་ཡང་མེད་པའི་དེ་བཞིན་གཤེགས་པས་བསྟན་པའི་སྙིང་པོ་དམ་པའི་ཆོས་གནས་མེད་པ། ཡུལ་མེད་པ་འདི་ཉིད་གསལ་བར་མཛད་པ་ཡིན།དེའི་ཕྱིར་ཡང་དག་པའི་ལམ་གྱི་གེགས་གཙོ་བོ་ནི་རྣམ་རྟོག་བྱ་བ་འདི་ཡིན་པས་སློབ་དཔོན་ཆོས་ཀྱི་གྲགས་པ་ཀྱང་། རྟོག་པའི་དྲ་བ་རྣམ་བསལ་ཞིང་། །ཟབ་ཅིང་རྒྱ་ཆེའི་སྐུ་མངའ་བ། །སོགས་གསུངས་ཤིང་། ཕྱོགས་ཀྱི་གླང་པོས། རྟོག་པའི་ལམ་ནས་ཆོས་ཉིད་ལ་ཁྲིད་ན། །བདེ་གཤེགས་ལམ་ནས་ཆོས་ཁྲིད་ཉམས་པར་གྱུར། །བྱ་བའི་དོན་འགྲེལ་བའི་སླད་དུ། རྣམ་འགྲེལ་དུ། ཆོས་དང་ཆོས་ཅན་རྣམ་གཞག་དང་། །ཐ་དད་ཐ་དད་མིན་ཅི་འདྲ། །དེ་ཉིད་དུ་ནི་མ་བརྟགས་པར། །འཇིག་རྟེན་ཇི་ལྟར་གྲགས་དེ་ལ། །དེ་བཞིན་ཁོ་ན་བརྟེན་ནས་ནི། །བསྒྲུབ་བྱ་སྒྲུབ་པ་ཀུན་བཞག་པ། །དམ་པའི་དོན་ལ་འཇུག་བྱའི་ཕྱིར། །མཁས་པ་རྣམས་ཀྱི་བྱས་པ་ཡིན། །སོགས་གསུངས་སོ། །དོན་དམ་པར་མེད་པས་མེད་གོ་མི་ཆོད། ཀུན་རྫོབ་ཏུ་ཡོད་པས་ཡོད་གོ་ཆོད་བྱ་བ་འདི། དོན་ལ་འཕགས་པའི་ཡེ་ཤེས་ཀྱིས་མི་རྙེད་པས། མི་རྙེད་པའི་གོ་མ་ཆོད། སོ་སྐྱེའི་རྣམ་རྟོག་གིས་རྙེད་པས་རྙེད་གོ་མ་ཆོད་བྱ་བ་ཡིན་འདུག་ལ། རང་བཞིན་གྱིས་གྲུབ་པ་དོན་དམ་པར་མེད། རི་བོང་རྭ་དོན་དམ་པར་མེད་སོགས། སྟོང་གཞི་ཆོས་ཅན་གཏན་ནས་མི་སྲིད་པའི་རིགས་འདི་འདྲ་མ་གཏོགས་ནམ་ཡང་དོན་དམ་དུ་མེད་པས་མེད་གོ་ཆོད་པ་མི་རྙེད་ན། མེད་གོ་མི་ཆོད་པ་ཙམ་དུ་མ་ཟད་ཀྱིས། ཡོད་གོ་ཆོད་པར་འདུག རི་བོང་རྭ་དོན་དམ་པར་མེད་ཅེས་དགག་བྱ་ལ་དོན་དམ་གྱི་ཁྱད་པར་སྦྱར་ཚེ། ཀུན་རྫོབ་ཏུ་ཡོད་པ་ཤུགས་ལ་གོ་ཞིང་། གཞན་དུ་ན་རི་བོང་རྭ་དོན་དམ་པར་མེད་ཅེས་པ་དང་རི་བོང་རྭ་མེད་ཅེས་པ་གཉིས་ལ་ཚིག་གི་ནུས་པའི་ཁྱད་པར་ཅི་ཡོད། འདི་ལ་དགོངས་ནས། བདག་ལས་སྐྱེ་བར་དོན་དམ་པར་མེད་དེ། ཞེས་གྲངས་ཅན་འགོག་པའི་རིགས་པའི་སྐབས་སུ་དོན་དམ་པའི་ཁྱད་པར་སྦྱར་བ་ལ་བདེན་པ་གཉིས་ལས་ཉམས་པའི་མུ་སྟེགས་ནི། བདེན་པ་གཉིས་ཆར་དུ་དགག་པར་བྱ་བ་ཡིན་པས། དོན་དམ་པའི་ཁྱད་པར་སྦྱར་མི་དགོས་སོ་ཞེས་སློབ་དཔོན་ཟླ་བ་གྲགས་པས་གསུངས་པ་ལྟར། བདེན་པ་གཉིས་ཆར་དུ་མེད་པའི་རི་བོང་རྭ་དགག་པ་ན་དོན་དམ་པའི་ཁྱད་པར་སྦྱར་ག་ལ་དགོས། རི་བོང་རྭ་དོན་དམ་དུ་མེད་པ་དང་། དེ་རྟོགས་པའི་བློ་གཉིས་སྟོང་ཉིད་དང་སྟོང་ཉིད་རྟོགས་པའི་བློ་ཡིན་ནམ་མིན། རི་བོང་རྭ་གཏན་ནས་མེད་པར་རྟོགས་པའི་བློ་དེས་རི་བོང་རྭ་དཀར་པོ། ནག་པོ་སོགས་ཡོད་པའི་སྒྲོ་འདོགས་ཤུགས་ཀྱིས་ཆོད་པས་རི་བོང་རྭ་བདེན་གྲུབ་ཡོད་པའི་སྒྲོ་འདོགས་ཀྱང་ཆོད་པ་ཡིན། ཉོན་མོངས་ལམ་གྱི་དགག་བྱ་བྱས་དུས་ངོ་སྐལ་གྱི་སྤང་བྱ་དེ་གཏན་ནས་མེད་པར་བྱེད་པས་དོན་དམ་པའི་ཁྱད་པར་སྦྱར་མི་དགོས་སོ། །ཞེས་སྨྲ་བ་ཡང་རི་བོང་གི་མགོ་ལ་རྣོ་ཞིང་ཤིན་ཏུ་རིང་བའི་རྭ་ནག་པོ་ཞིག་མེད་ཅེས་སྨྲ་བའི་ཚེ། རྣོ་ཞིང་རིང་བ་ལ་སོགས་པའི་ཁྱད་པར་སྦྱར་ཆོག་ལ། དེའི་མགོ་ལ་བདེན་གྲུབ་གྱི་རྭ་མེད་དོ་ཞེས་དོན་དམ་པའི་ཁྱད་པར་སྦྱར་མི་ཆོག་པའི་དོན་ཅི་ཡིན་ཞེས་དྲི་བ་བྱའོ། །ལམ་གྱི་དགག་བྱ་བྱ་བ་ཉོན་མོངས་ཅན་གྱི་སེམས་སྔ་མ་སྔ་མའི་འཛིན་སྟངས་རྣམས་ཕྱི་མ་ཕྱི་མས་འཇིག་པར་བྱེད་པ་འདི་ཙམ་ཞིག་ལས་འོས་མེད་ལ། དེ་ལ་དོན་དམ་པའི་ཁྱད་པར་སྦྱོར་མི་དགོས་ན། རིགས་པའི་དགག་བྱ་ལའང་ཅི་ལ་སྦྱོར་དགོས། མདོར་ན་བདེན་འཛིན་ནང་དུ་ཡོད་པ་དང་། བདེན་འཛིན་མདུན་ན་མཐོང་བཞིན་པ་འདི་བཞག་ནས་གཞན་ཞིག་དགག་པ་ནི་རྗེ་ལྕང་སྐྱ་རིན་པོ་ཆེས། སྣང་བ་ལིང་ལིང་འདི་རང་སོར་བཞག་ནས། །དགག་རྒྱུ་རྭ་ཅན་ཞིག་འཚོལ་བར་འདུག་སྟེ། །ཞེས་གསུངས་པ་ལས་མ་འདས་པའོ། །རྒྱུད་ཆེན་སངས་རྒྱས་རྒྱ་མཚོ་ལ། རྗེ་འཇམ་དབྱངས་བཞད་པས་ཐལ་རང་གཉིས་ཀའི་ལྟ་བའི་ཁྱད་པར་དྲིས་ཚེ། གཟིམ་ཁང་གི་ཀ་བ་ཞིག་ལ་ཕྱག་མཛུབ་བཙུགས་ནས་རང་རྒྱུད་པའི་ལུགས་ལ་ཤིང་ཧྲང་ཧྲང་པོ་འདི་ཀ་བ་ཡིན། ཐལ་འགྱུར་བའི་ལུགས་ལ་འདི་ཀ་བའི་གདགས་གཞི་ཡིན་གྱི་དེའི་སྟེང་དུ་མིང་རྐྱང་བཏགས་ཡོད་ཙམ་གྱི་ཀ་བ་ཞིག་ཡོད་ཀྱི་གསུངས་པ་དང་། ཨ་རིག་དགེ་བཤེས་ཆེན་མོ་ཝ་མང་པཎྜི་ཏར་མཇལ་བར། ཁྱོད་པོ་ཏི་ལྔ་ལས་ཅི་ལ་མཁས་ཞེས་གསུངས། དབུ་མ་ལ་སྦྱངས་པ་ཆེ་ཙམ་ཡིན་ཞེས་ཞུས་པས། འོ་ན། ཐལ་འགྱུར་བའི་ལུགས་ལ་འདི་ཅི་ཡིན་གསུང་ནས་མདུན་ན་ཅོག་ཙེ་ཞིག་འདུག་པ་ལ་ཕྱག་མཛུབ་ཀེར་ཀེར་མཛད། དེ་ཅོག་ཙེ་ལགས་ཞུས་པས། ཅོག་ཙེ་མ་ཡིན་པར་ཐལ། ཅོག་ཙེའི་གདགས་གཞི་ཡིན་པའི་ཕྱིར་གསུངས་པར་ལན་ཅི་ཡང་མ་རྙེད་པར་ལུས་ཞེས་གསུངས་པ་འདི་གཉིས་ངེས་པར་ཐལ་རང་གི་ལྟ་བའི་གནད་ཡིན་པར་འདུག་ཅིང་། དེ་ལྟར་ན་མདུན་ན་གནས་པའི་ཤིང་གྲུ་བཞི་འདི་ཅོག་ཙེ་ཡིན་པར་འཛིན་པ་དེ་ཐལ་འགྱུར་བའི་ལུགས་ཀྱི་བདེན་འཛིན་དང་། རང་རྒྱུད་པའི་ལུགས་ཀྱི་ཐ་སྙད་ཚད་མར་ཤེས་པར་བྱ་ལ། དེ་བཞིན་མདུན་ན་གནས་པའི་ཤིང་གྲུ་བཞི་འདི་ཅོག་ཙེ་ཡིན་པ་དེ་ཐལ་འགྱུར་བའི་ལུགས་ཀྱི་གཞན་ངོའི་ཁས་ལེན་དང་། རང་རྒྱུད་པའི་ལུགས་ཀྱི་རང་དབང་གི་ཁས་ལེན་དུ་ཤེས་པར་བྱ་ཞིང་། དེ་བཞིན་མདུན་ན་གནས་པ་འདི་གྲུ་བཞི་ཡིན་མིན་དྲིས་ཚེ་ཡང་། འདི་གྲུ་བཞིའི་གདགས་གཞི་ཡིན་གྱི་གྲུ་བཞི་མ་ཡིན། དེས་ན་མདུན་ན་གནས་པ་འདི་ཡང་མདུན་ན་གནས་པའི་གདགས་གཞི་ཡིན་གྱི་མདུན་ན་གནས་པ་དེ་མ་ཡིན་ཞེས་མཐར་གདགས་གཞི་ཕྱི་མ་ཕྱི་མས་སྔ་མ་སྔ་མ་བསླུས་ནས་འདི་ཡིན་གྱི་ཁས་ལེན་ཅི་ཡང་མེད་པའི་གདགས་གཞི་གདགས་ཆོས་ཐམས་ཅད་ཀྱིས་སྟོང་པས་བཟང་པོ་སྤྲོས་བྲལ་དང་། ངན་པ་མེད་དགག་གཉིས་དོན་གཅིག་མིང་གི་རྣམ་གྲངས་སུ་སོང་བས། གནས་གཅིག་ལ་སླེབས་པ་དེ་འཁོར་བའི་རྩ་བ་ཆོད་པའི་ལམ་གྱི་འགག་མདོ་དེ་ཡིན་པར་སྣང་ཞིང་། སླར་ཡང་མདུན་ན་གནས་པ་དེ་ཤིང་གྲུ་བཞིར་འདུག་གྲུ་བཞི་དེ་ཅོག་ཙེ་རུ་འདུག ཅོག་ཙེའི་སྟེང་ན་བུམ་པ་འདུག་སོགས་ཐ་མལ་པའི་བློ་མ་བསྒྱུར་བའི་འཇིག་རྟེན་ཕལ་བ་ཐམས་ཅད་ཀྱང་ཁ་མཐུན་ལ། འོན་ཀྱང་གྲུབ་མཐས་བློ་བསྒྱུར་མ་བསྒྱུར་བྱ་བ་འདི་གཉིས་ཀྱིས་མཚམས་ཤིན་ཏུ་དབྱེ་དཀའ་སྟེ། རྣམ་པ་གཅིག་ཏུ་ན། པ་སངས་བྱ་བ་ཀུན་ལ་བཟང་། །སོགས་ཀྱི་རྗེས་སུ་འབྲང་བས་ཡི་གེ་ཙམ་ཡང་མི་ཤེས་པའི་ཕལ་པ་དེ་དག་ཀྱང་གྲུབ་མཐས་བློ་བསྒྱུར་བ་ཤ་སྟག་ཡིན་ལ། ཆོས་ཀྱི་གནས་ལུགས་ལ་བསམས་ནས་གྲུབ་མཐས་བློ་བསྒྱུར་མ་བསྒྱུར་གྱི་ས་མཚམས་དབྱེ་ན་ཡང་། རྗེ་བླ་མས་ཇི་སྐད་གསུངས་པ་ལྟར། རྟེན་ནས་འབྱུང་བའི་རྒྱུ་མཚན་གྱིས་དབུ་མ་པ་རྣམས་རང་བཞིན་མེད་པར་འདོད་ཅིང་། གཞན་པ་རྣམས་རྒྱུ་མཚན་དེ་ཉིད་ཀྱིས་རང་བཞིན་ཡོད་པར་འདོད་པས་གཉིས་ཀ་ཡང་གྲུབ་མཐའ་ཡིན་མིན་གྱི་ཁྱད་པར་ཅི་ཡང་མི་སྣང་ཞིང་། མདོར་ན་རྗེས་དཔག་ལ་བརྟེན་པ་ཐམས་ཅད་གྲུབ་མཐའ་དང་། མངོན་སུམ་ལ་བརྟེན་པ་ཐམས་ཅད་ཕལ་པ་རང་བཞིན་པའི་བློ་ཡིན་པ་ཙམ་གྱིས་ཤན་འབྱེད་ན་མ་གཏོགས་འབྱེད་ཆོས་ཅི་ཡང་མ་མཐོང་།དེ་ལྟར་བྱས་ཚེ་ངའོ་སྙམ་པའི་ཡུལ་གྱི་ང་དེ་ལྷན་སྐྱེས་མ་རིག་པས་བཏགས་པའི་བདག་དང་། བདག་དེ་ཉིད་ཁྱད་པར་གསུམ་ལྡན་ཡིན་པར་སོགས་ཀུན་བརྟགས་ཀྱི་མ་རིག་པས་བཏགས་པའི་ཡུལ་དུ་བྱེད་དགོས་མོད་ཀྱང་། མིང་གི་བཏགས་པ་ལ་མ་ལྟོས་པ་རང་ངོས་ནས་གྲུབ་པར་འཛིན་པ་འགྲོ་བ་ཐམས་ཅད་ཀྱི་རྒྱུད་ལ་རང་བཞིན་ངང་གིས་འབྱུང་བའི་ལྷན་སྐྱེས་ཀྱི་མ་རིག་པ་ཡིན་ཚུལ་དང་། བདེན་པར་མེད་ཀྱང་རང་བཞིན་གྱིས་ཡོད་པར་འཛིན་པ་དེ་སློབ་དཔོན་ལེགས་ལྡན་འབྱེད་ཀྱིས་གསར་དུ་བཟོས་པའི་གྲུབ་མཐས་བློ་བསྒྱུར་བའི་ཀུན་བརྟགས་ཀྱི་མ་རིག་པ་ཡིན་པའི་ཁྱད་པར་འདི་གཉིས་སུ་ཞིག་གིས་ཕྱེ་བར་ནུས། གཤང་གཅི་གང་དགར་འདོར་ཆོག་པར་འཛིན་པའི་བྱིས་པའི་བསམ་པ་དེ་ལྷན་སྐྱེས་ཀྱི་བློ་དང་། ནམ་ཞིག་བཤང་གཅི་གདན་གྱི་སྟེང་དུ་བཏང་མི་ཆོག་པར་འཛིན་པ་དེ་ཕ་མ་གཉིས་ཀྱི་གྲུབ་མཐས་བསྒྱུར་བའི་བློ་མིན་ནམ།མདོར་ན་འཇིག་རྟེན་འདིར་སྐྱེ་བ་ཐམས་ཅད་ཀྱང་ནང་པའི་གྲུབ་མཐའ་བཞི། ཕྱི་རོལ་བའི་གྲུབ་མཐའ་དྲུག་ཅུ་སོགས་ཀྱིས་བློ་མ་བསྒྱུར་བ་ནི་ཡོད་སྲིད་མོད་ཀྱི། རང་ཉིད་རང་གི་གྲུབ་མཐས་ཡིད་མ་བསྒྱུར་བ་ནི་གཅིག་ཀྱང་མེད་དེ། ཕ་མ་གཉིས་སོགས་སྐལ་མཉམ་གྱི་འགྲོ་བ་དག་གི་ལུང་དང་། རང་གི་རིགས་པ་ཟུང་དུ་མ་འབྲེལ་བའི་ཤེས་བྱ་རྣམས་འདི་དང་འདི་ཡིན་ཞེས་སྨྲ་བ་སུ་ཡང་མི་སྲིད་པས་སོ། །ཐལ་འགྱུར་བའི་སློབ་དཔོན་ཆེན་པོ་རྣམས་ཀྱིས་ཀྱང་ཀུན་རྫོབ་ཀྱི་རྩ་བར་འཇོག་པའི་གཞི་འདི་ཙམ་ཞིག་ལས་མ་གཟིགས་པས། འཇིག་རྟེན་ལ་གྲགས་པ་ཞིག་ཀུན་རྫོབ་ཀྱི་རྣམ་བཞག་ཏུ་བཞེད་དོ། །དེས་ན་རང་གིས་བསྙོན་དུ་མེད་པའི་སྣང་བ་འདི་དག མི་ལ་མིའི་སྣང་བ་བསྙོན་དུ་མེད། འདྲེ་ལ་འདྲེའི་སྣང་བ་བསྙོན་དུ་མེད། ཁྱི་ལ་ཁྱིའི་སྣང་བ་བསྙོན་དུ་མེད་པ་སོགས་ཡིན་མོད་ཀྱི། འདྲེ་ཡི་སྣང་བར་གྲུབ་པའི་ཁང་པ་དང་། མི་ཡི་སྣང་བར་གྲུབ་པའི་ཁང་པ་གཉིས་ཀ་ཚད་མས་གྲུབ་ཅིང་། སྣང་བ་དེ་གཉིས་གང་ལས་བྱུང་བའི་གཞི་འདྲེ་ཁང་མི་ཁང་གང་ཡང་མ་ཡིན་པའི་ཁང་པ་འདྲེ་དང་མི་གཉིས་ཀས་མ་མཐོང་བ་ཞིག་ཡོད་པར་འདོད་པ་ནི། གྲངས་ཅན་པའི་སྤྱི་རྟག་དངོས་ཀྱི་འདོད་ཚུལ་དང་ཁྱད་ཅི་ཡང་མེད་ལ། སེམས་ཙམ་པའི་གྲུབ་མཐའ་དང་ཡང་ཅུང་ཟད་ཉེ་མོད། རྣལ་འབྱོར་སྤྱོད་པ་རྣམས་ཀྱིས་བལྟ་བྱ་ཐུན་མོང་བའི་སྣང་བ་གང་ལས་འབྱུང་བའི་གཞི་དེ་ལ་བརླན་གཤེར་ཕོར་པ་གང་ཡོད་པར་མི་སྨྲ་ཡི། རྩ་བ་གཅིག་གང་ལས་རིགས་དྲུག་གི་རྣམ་ཤེས་ཐ་དད་དུ་འབྱུང་བའི་ཀུན་གཞིའི་རྣམ་པར་ཤེས་པའི་ངང་དུ་གནས་པའི་བག་ཆགས་ཀྱི་ནུས་པ་སད་ཚུལ་ཙམ་ཞིག་དུ་བཞེད་དོ། །རྣམ་སྨིན་ལུས་དྲུག་ལྡན་པའི་རིགས་དྲུག་ལ། །སྣང་བ་རྣམ་དྲུག་འབྱུང་བ་སྨོས་ཅི་དགོས། །དབང་པོ་དྲུག་ལྡན་མི་ཡི་ལུས་ལ་ཡང་། །ཐུན་མོང་རྩ་བ་མེད་པའི་སྣང་བ་དྲུག །ཅེས་ཀྱང་སྨྲའོ། །མདོར་ན་རང་ཅག་ཐ་མལ་པ་རྣམས་ལ་སྣང་ཞིང་། ཤིང་རྟ་རྣམ་བདུན་གྱི་རིགས་པས་དུམ་བུ་སྟོང་དུ་བཤིགས་ཀྱང་ལྡོག་དུ་མེད་པའི་སྣང་བ་འདི་ཀུན་ཤེས་སྒྲིབ་ཁོ་རང་ངམ་ཁོ་ཡི་ནུས་པ་ཞིག་ཡིན་པར་སྣང་། འདིའི་རྒྱུ་མཚན་གྱིས་རང་ཅག་གིས་རྩིག་པའི་ཕ་རོལ་གྱི་གཟུགས་མི་མཐོང་བ་ཡིན་ལ། སངས་རྒྱས་ཀྱིས་རྩིག་པའི་ཕ་རོལ་གྱི་གཟུགས་གཟིགས་པ་ཡིན་པས། སྣང་བའི་རྣམ་གཞག་འདི་ཀུན་རིགས་ངོར་ཡོངས་རྫོགས་པར་ཞིག་པ་ན་ཉོན་སྒྲིབ་སྤངས་པ་དང་། སྣང་ངོར་ཡོངས་སུ་རྫོགས་པར་ཞིག་པ་ཤེས་སྒྲིབ་སྤངས་པ་ཡིན་ནོ་ཞེས་སློབ་དཔོན་ཟླ་བ་གྲགས་པ་ནི་སྒྲིབ་གཉིས་ཟད་པའི་སངས་རྒྱས་ལ་དེ་ལྟར་མེད་པར་སྣང་ངོ་། །