བྱ་འཆད་ཁ་བའི་རང་རྣམ་ཚིགས་སུ་བཅད་པ།
ཡུལ་དང་བཤེས་གཉེན་རབ་སྤངས་ཏེ།།
འཛིན་ཆགས་མེད་པའི་དགེ་རྩ་བྱས།།
བཤེས་གཉེན་བཞུགས་པའི་ས་ཕྱོགས་སུ།།
ཐོས་བསམ་སྒོམ་གསུམ་དགེ་རྩ་བྱས།།
ད་ནི་ཤི་ཡང་མི་འགྱོད་དོ།།
ལྷ་རུ་ཉེ་དུ་མ་མཆོད་ཅིང་།།
ཧྲུལ་བོའི་གོས་གྱོན་དམན་ས་བཟུང་།།
སུ་དང་འགྲོགས་ཀྱང་ཡིད་མ་ཕྱུང་།།
གྲགས་པ་མ་བསྒྲུབས་ནོར་མ་བསགས།།
ད་ནི་ཤི་ཡང་མི་འགྱོད་དོ།།
མི་ཆོས་ལྷ་ཆོས་རིས་སྲིད་དང་།།
ཡོན་བདག་ལྷ་བཞིན་མཆོད་པ་དང་།།
བན་མོའི་བསྙེན་བཀུར་རྣམས་སྤངས་ཏེ།།
དྲང་སྲོང་ཆེན་པོའི་རྣམ་ཐར་སྤྱད།།
ད་ནི་ཤི་ཡང་མི་འགྱོད་དོ།།
བྱད་བཞིན་ཅན་དང་ནོར་ཅན་ལ།།
ཚོགས་སོགས་བསྙེན་བཀུར་མ་བྱས་ཤིང་།།
བུན་སྐྱེད་མ་བྱས་ཚོང་མ་བྱས།།
མཁར་ལས་མ་བྱས་གཞི་མ་བཟུང་།།
ད་ནི་ཤི་ཡང་མི་འགྱོད་དོ།།
