རྒྱལ་ཁམས་བསྐོར་བའི་སྣང་ཚུལ།

　　　　　　　　　　ཞིང་ཆེན་སོ་སོས་བདམས་པའི་འཐུས་མི་ལས། །
　　　　　　　　　　ཡིན་མིན་བརྟག་པའི་ཚུལ་བཞིན་འགྲིམ་བྱས་ནས། །
　　　　　　　　　　གང་ཞིག་མང་པོའི་ཕྱོགས་སུ་ཐག་གཅོད་པ།།
　　　　　　　　　　དབྱིན་ཇིའི་གཞུང་དང་མེ་གོའི་སྲོལ་ལུགས་ཉིད། །
　　　　　　　　　　ཡུལ་གྱི་ཡོང་འབབ་གཞུང་ས་ཁོ་ནར་དབང་། །
　　　　　　　　　　གཞུང་གི་དབང་ཐག་སྐྱེས་བུ་གཅིག་གིས་གཅོད། །
　　　　　　　　　　དེ་ཡི་བསྐོ་བཞག་འབངས་ཀྱིས་བྱེད་པ་དེ། །
　　　　　　　　　　ཨུ་རུ་སུ་དང་འཇར་མན་གཞུང་གི་སྲོལ། །
　　　　　　　　　　མི་དྲག་མཐོན་པོའི་རིགས་ཀྱི་སྡེ་ཚན་ལ། །
　　　　　　　　　　ཡོན་ཏན་ཚོད་ལ་དཔག་པའི་གྲལ་བྱས་ནས། །
　　　　　　　　　　རྒྱལ་ཁམས་སྤྱི་པའི་བྱ་གཞག་ཐག་གཅོད་པ། །
　　　　　　　　　　འདི་ནི་ཤར་ཕྱོགས་ཉི་མའི་ཁབ་ཀྱི་སྲོལ། །
　　　　　　　　　　ཕོ་ལུས་ཐོབ་ཚད་རྒྱལ་པོའི་གཡོག་པོ་སྟེ། །
　　　　　　　　　　མོ་ལུས་ཐོབ་ཚད་བཙན་པོའི་བཙན་མོ་ཉིད། །
　　　　　　　　　　ཡོད་ཚད་ཐམས་ཅད་རྗེ་ཡི་དཀོར་རྫས་ཡིན། །
　　　　　　　　　　ཙནྡྲ་ཤམ་ཤེར་མ་ཧཱ་ར་ཛའི་སྲོལ། །(བལ་ཡུལ)
　　　　　　　　　　ཐམས་ཅད་ཁོང་དུ་སྦེད་པ་ཟབ་མོར་རློམས། །
　　　　　　　　　　ཀུན་ལ་དོགས་པ་ཟ་བ་གྲུང་པོར་བྱེད། །
　　　　　　　　　　རྙིང་པ་ཐམས་ཅད་ལྷ་ཡི་སྲོལ་དུ་བསྒྲགས། །
　　　　　　　　　　གསར་པ་ཐམས་ཅད་བདུད་ཀྱི་འཕྲུལ་དུ་སེམས། །
　　　　　　　　　　ངོ་མཚར་ཕལ་ཆེར་ཐན་ལྟས་ཉིད་དུ་བསྒོམས། །
　　　　　　　　　　ཆོས་ཀྱི་རྒྱལ་ཁམས་ཏྲི་བྷོ་ཊ་ཡི་སྲོལ། །
　　　　　　　　　　འདི་ནི་ད་ལྟའི་བར་དུ་རང་རེའི་སྲོལ། །
　　　　　　　　　　ཀུན་ལ་ཕན་པའི་ངོ་མཚར་རྫས་འཕྲུལ་དང་། །
　　　　　　　　　　ཡོངས་ལ་གནོད་པའི་ལྟས་ངན་ཆོ་འཕྲུལ་གཉིས། །
　　　　　　　　　　ཤེས་རབ་རལ་གྲིའི་རྣོ་ཕྱོགས་རེ་རེའི་སྣེ། །
　　　　　　　　　　གཅིག་གི་ཟླ་ལ་གཅིག་ཀྱང་སླེབས་པར་ངེས། །