སྙིགས་མའི་དུས་སུ་མི་དགེ་བའི་བདག་འབྲས་བདོ་བས་ལོག་སྤྱོད་འབྱུང་འགྱུར་མང་བོ་མཁྱེན་ནས་གསུངས་པའི་མགུར་དབྱང
ཨོཾ་སྭ་སྟི།
སེམས་བསྐྱེད་རྩ་བ་དམིགས་མེད་སྙིང་རྗེའི་ཆུས།།
ཡང་ཡང་བརླན་པས་ཐབས་ཤེས་ཡལ་འདབ་རྒྱས།།
དོན་གཉིས་མཐར་ཕྱིན་འབྲས་བུས་རབ་བརྗིད་པའི།།
ཐུབ་དབང་དཔག་བསམ་ལྗོན་པ་རྒྱལ་གྱུར་ཅིག།
གང་གིས་ལེགས་གསུང་མདོ་སྔགས་ཆོས་ཀྱི་རོས།།
ལེགས་པར་ཚིམ་པའི་དགའ་བས་ལེགས་བཤད་གླུ།།
ཅི་ཡང་ལེན་པ་ཀླུ་སྒྲུབ་ཐོགས་མེད་སོགས།།
གཉིས་སྐྱེས་མང་བོས་འཕགས་ཡུལ་སྐྱེད་ཚལ་གང༌།།
རིང་མོ་ཞིག་ན་ཆོས་རྒྱལ་ལོ་པཎ་སོགས།།
སྨོན་ལམ་མཐུ་ལྡན་དེད་དཔོན་བརྒྱ་ཕྲག་གིས།།
རྒྱ་གར་དམ་ཆོས་རིན་ཆེན་འབྱུང་གནས་ནས།།
བཤད་སྒྲུབ་དབང་གི་རྒྱལ་པོ་བོད་དུ་བླངས།།
ཆོས་སྲིད་འབྱོར་བ་སྲིད་པའི་མིག་འབར་བས།།
གངས་ཅན་ལྗོངས་འདིའི་རྒུད་པའི་མུན་ཀུན་བསལ།།
&
