༄༅། །རྗེ་མི་ལའི་རྣམ་མགུར་ལས་བྲག་དམར་མཆོང་ལུང་གི་སྐོར།

ཞེས་གསུངས་པས། སྤྲིན་དེ་དར་སྣ་ལྔའི་ཡུག་བརྐྱང་བ་ལྟ་བུ་ཞིག་ཏུ་གྱུར་བའི་རྩེ་ལ། རྗེ་མར་པ་དེ་ཉིད་སྔར་བས་ཀྱང་གཟི་བརྗིད་ཆེ་བ་ཞིག་སེང་གེ་དཀར་མོ་རྒྱན་དུ་མས་བརྒྱན་པ་གཅིག་ལ་ཆིབས་ནས་བྱོན་ཏེ། བུ་མཐུ་ཆེན་ཁྱོད་ད་ལན་གདུང་བ་དྲག་པོས་ང་འབོད་པ་དེ་ཅི་བྱུང་། བླ་མ་དང་ཡི་དམ་དཀོན་མཆོག་ལ་ཡིད་ཆད་དམ། རྟོག་པ་རྐྱེན་ངན་གྱི་ཡུལ་ཕྱིར་འབྲངས་སམ། སྒྲུབ་ཁང་དུ་ཆོས་བརྒྱད་ཀྱི་བར་ཆད་ཞུགས་སམ། རེ་དོགས་ཀྱི་འགོང་པོས་བློ་གཙེར་བས་ཡིད་སུན་ནམ། ཡང་ཡར་དཀོན་མཆོག་ལ་ཞབས་ཏོག །མར་རིག་དྲུག་གི་སེམས་ཅན་ལ་སྦྱི་གཏོང་། བར་དུ་ཁྱོད་རང་སྡིག་སྒྲིབ་དག་པ་དང་ཡོན་ཏན་སྐྱེ་བའི་མཐུན་རྐྱེན་བཟང་པོ་སྐྱེ་བ་ཡིན་ནམ། ཅི་ཡིན་རུང་ཁྱོད་དང་ང་ལ་འབྲལ་ཐབས་མེད་ཀྱིས། སྒྲུབ་པས་བསྟན་པ་དང་སེམས་ཅན་གྱི་དོན་གྱིས་ཤིག་གསུངས་པའི་ཉམས་ཤིག་ཤར་བས། དགྱེས་དྲགས་བཟོད་བླག་མེད་པའི་ངང་ནས། ཉམས་ཤར་གྱི་གསུང་ལན་དུ་མགུར་འདི་བཞེས་སོ།།
ཕ་བླ་མའི་ཞལ་མཐོང་གསུང་ཐོས་པས། །
སྤྲང་པོའི་སྙིང་རླུང་ཉམས་སུ་ཤར། །
བླ་མའི་རྣམ་ཐར་དྲན་པ་ཡིས། །
རྟོག་པ་མོས་གུས་གཏིང་ནས་སྐྱེ། །
ཐུགས་རྗེ་བྱིན་རླབས་དངོས་གྲུབ་ཞུགས། །
ཆོས་མིན་སྣང་བ་ཐམས་ཅད་འགགས། །
བླ་མ་དྲན་པའི་གདུང་དབྱངས་འདི། །
རྗེ་བཙུན་སྙན་ལ་གཟན་ལགས་ཀྱང་། །
སྤྲང་ལ་སྣང་བ་འདི་ལས་མེད། །
ད་དུང་བགྱིད་དོ་ཐུགས་རྗེས་སྐྱོངས། །
སྙིང་རུས་སྡུག་བསྲན་གྱི་སྒྲུབ་པ་འདི། །
ཕ་བླ་མ་མཉེས་པའི་ཞབས་ཏོག་ཡིན། །
གཅིག་པུར་རི་ཁྲོད་འགྲིམ་པ་འདི། །
མཁའ་འགྲོ་མཉེས་པའི་ཞབས་ཏོག་ཡིན། །
རང་རྩིས་མེད་པའི་དམ་ཆོས་འདི། །
སངས་རྒྱས་བསྟན་པའི་ཞབས་ཏོག་ཡིན། །
ཚེ་དང་སྒྲུབ་པ་སྙོམས་པ་འདི། །
མགོན་མེད་སེམས་ཅན་གྱི་སྦྱིན་གཏོང་ཡིན། །
ན་དགའ་ཤི་སྐྱིད་སྙིང་རུས་འདི། །
ལས་སྒྲིབ་སྦྱོང་བའི་འཕྱག་ཤིང་ཡིན། །
སྡིག་ཟས་སྤངས་པའི་དཀའ་ཐབ་འདི། །
ཉམས་རྟོགས་སྐྱེ་བའི་མཐུན་རྐྱེན་ཡིན། །
ཕ་བླ་མའི་དྲིན་ལན་སྒྲུབ་པས་འཇལ། །
བུ་ཐུགས་རྗེས་སྐྱོངས་ཤིག་གུ་རུ་རྗེ། །
སྤྲང་རི་ཁྲོད་ཟིན་པར་བྱིན་གྱིས་རློབས། །