༄༅།།མཚོ་སྔོན་བོད་རིགས་ཞིབ་འཇུག་ཚོགས་པས་གཙོ་སྒྲིག་བྱས་པའི་བོད་ཀྱི་ལེགས་བཤད་ཀུན་འདུས་ཆེན་མོའི་འགྲེམ་སྤེལ་མཛད་སྒོ་ཟི་ལིང་དུ་གཟབ་རྒྱས་ངང་འཚོགས།

      ཟླ་གཉིས་པའི་ཚེས་བཞི་ཉིན་གྱི་སྔ་དྲོར་མཚོ་སྔོན་བོད་རིགས་ཞིབ་འཇུག་ཚོགས་པས་གཙོ་སྒྲིག་དང་ཀན་སུའུ་མི་རིགས་དཔེ་བསྐྲུན་ཁང་གིས་དཔར་བསྐྲུན་བྱས་པའི་བོད་ཀྱི་ལེགས་བཤད་ཀུན་འདུས་ཆེན་མོའི་འགྲེམ་སྤེལ་མཛད་སྒོ་ཟི་ལིང་ཅ་རི་ཝང་ཁྲའོ་མགྲོན་ཁང་ཆེན་མོ་ནས་གཟབ་རྒྱས་ངང་འཚོགས།       མཚོ་སྔོན་ཞིང་ཆེན་སྲིད་གཞུང་གི་ཧྲིན་ཀྲང་གཞོན་པ་ཟུར་པ་སྟག་འབུམ་ཐར་དང་མཚོ་སྔོན་དམངས་སྲིད་ཐིན་གྱི་ཐིན་ཀྲང་ཟུར་པ་བློ་བཟང་ཟླ་བ། རིག་གཞུང་ཆེད་མཁས་པ་གཅོད་པ་དོན་འགྲུབ་དང་རྒྱ་ཡེ་བཀྲ་བྷོ། ཟླ་བ་སོགས་གྲོས་ཚོགས་ལ་ཞུགས་པ་མ་ཟད། ལེགས་བཤད་ཀུན་འདུས་ཆེན་མོའི་འགྲེམ་སྤེལ་མཛད་སྒོ་སྤེལ་བར་རྟེན་འབྲེལ་ཞུས་པ་དང་དཔེ་དེབ་འགྲེམ་སྤེལ་ཐད་ཀྱི་དགེ་མཚན་གྱི་སྐོར་ནས་གཏམ་བཤད།       ལེགས་བཤད་ནི་བོད་ཀྱི་རིག་གནས་ཁྲོད་ཀྱི་ཕུན་སུམ་ཚོགས་པའི་ནོར་བུ་རྩ་ཆེན་ཞིག་ཡིན་པ་མ་ཟད་ཀྲུང་ཧྭ་མི་རིགས་ཀྱི་ཕུལ་བྱུང་རིག་གནས་ཁྲོད་ཀྱི་འོད་དུ་འཚེར་བའི་རིག་གནས་ཀྱི་གྲུབ་ཆ་གལ་ཆེན་ཞིག་དང་། ལོ་ངོ་སྟོང་ཕྲག་ལྷག་གི་ལོ་རྒྱུས་ཀྱི་བརྒྱུད་རིམ་ཁྲོད་དུ་བོད་རིགས་མི་དམངས་ཀྱི་ངལ་རྩོལ་དང་འཚོ་བའི་ཁྲོད་ནས་བྱུང་བའི་ཐུན་མོང་མ་ཡིན་པའི་ཤུལ་བཞག་རིག་གནས་ཀྱི་རྩ་བ་ཡིན་ལ་བཅད་མའི་ལུས་དང་བརྗོད་བྱེད་ཀྱི་ཚིག་ལ་བརྟེན་ནས་ཆོས་འཇིག་རྟེན་གྱི་བླང་བྱ་དང་མཁས་བླུན་གྱི་ཁྱད་པར། ཡ་རབས་ཚུལ་མཐུན། མི་ཆོས་ཀུན་སྤྱོད་སོགས་བརྗོད་བྱ་གཙོ་བོར་བཟུང་བའི་སྲོལ་རྒྱུན་རྩོམ་ལུས་ཀྱི་རྣམ་པ་གལ་ཆེན་ཞིག་ཡིན།        བོད་ཀྱི་ལེགས་བཤད་ཀུན་འདུས་ཆེན་མོ་འདི་ནི་མཚོ་སྔོན་བོད་རིགས་ཞིབ་འཇུག་ཚོགས་པས་ཕྱོགས་ཡོངས་ནས་བོད་ཀྱི་དུས་རབས་རིམ་བྱོན་གྱི་མཁས་པ་དག་གིས་མཛད་པའི་ལེགས་བཤད་དག་སྒྲིག་དང་འཚོལ་སྡུད། རྒྱ་བོད་ལོ་ཙཱ་བྱས་ཏེ་དཔར་བསྐྲུན་བྱས་པའི་ཡིག་འབྲུ་ས་ཡ་གཅིག་དང་འབུམ་ལྔས་གྲུབ་པའི་པོད་བཞིའི་བདག་ཉིད་ཅན་གྱི་དཔེ་དེབ་ཅིག་ཡིན། མིག་སྔའི་བར་དུ་རྒྱ་བོད་ཤན་སྦྱར་གྱི་ལེགས་བཤད་ཐོག་མ་ཡིན་པ་དང་འདིས་བོད་ཀྱི་རིག་གནས་སྔོག་འདོན་དང་འཕེལ་རྒྱས། ཞིབ་འཇུག་བཅས་ཀྱི་ཐད་ལ་ནུས་པ་བླ་ལྷག་ཐོན་ཐུབ།