གསེར་མདོག་པཎ་ཆེན་ཤཱཀྱ་མཆོག་ལྡན་ལགས་ཀྱི་སྙན་རྩོམ།

གདོང་པ་བཞི་ལྡན་རྭ་གཞུ་དང་ལྡན་འབར་བའི་སྐྲ་ཅན་མདའ་ལྔ་པ། །
པགས་པའི་གོས་ཅན་མཆེ་བ་གཅིག་པ་ལག་ན་མདུང་ཐོགས་རྟ་གདོང་ཅན། །
སྟོབས་ཀྱི་དགྲ་དང་ཟ་བྱེད་ཞགས་པ་ཅན་དེ་སྲིད་སྡེའི་བྱེད་པོ་ཡིས། །
ཀུན་ནས་མྱོས་པར་བྱས་པའི་འགྲོ་འདི་འདུལ་མཁས་ཀུན་མཁྱེན་གཙུག་ན་རྒྱལ། །
ངག་གི་དབང་བོའི་དགེ་མཚན་བརྒྱ་ཕྲག་ཅིག །
ཕྱོགས་བརྒྱར་འཕྲོས་པའི་དཔའ་ཡོན་འདུས་པ་ལས། །
ས་སྐྱོང་དབང་བོ་སྟོང་གིས་གུས་བཏུད་པའི། །
འོད་ཟེར་བརྒྱ་ཕྲེང་འཁྲིགས་པའི་གུར་ཁང་དུ། །
གླང་ཆེན་དཀར་པོས་བཏེགས་པའི་ཁྲི་སྟེང་དེར། །
མིག་གཉིས་འཛུམ་པའི་གར་བསྒྱུར་འཇམ་པའི་དཔལ། །
རྡོ་རྗེ་རྣོན་པོ་བཞད་པའི་གད་རྒྱངས་ཅན། །
མཐོ་རིས་དབང་བོའི་ལུས་ལ་མཛེས་ཞུགས་ནས། །
ཆུ་བོའི་གཏེར་བཞིན་ཐུབ་བསྟན་རྒྱ་མཚོའི་དཔལ། །
ལེགས་པར་གནས་པ་ས་འཛིན་དཀར་པོའི་ཁྱོན། །
ས་སྐྱ་ཞེས་གྲགས་སྙན་པའི་སྒྲ་དབྱངས་ནི། །
སྟོང་གསུམ་ཁོར་ཡུག་རི་བོའི་ཁོངས་ལས་བརྒལ། །
འདབ་བརྒྱའི་ལྟེ་བ་ལ་གནས་འོད་སྟོང་གིས་འབར་ལི་ཁྲིའི་ལུས་ཅན་དྷཱིཿཡིག་ནི། །
སྙིང་རྗེའི་ཟླ་ཟེར་དང་འགྲོགས་འགྲོ་ལ་ཆགས་པའི་ཚ་ཟེར་དབང་བོ་ཞུ་བ་ལས། །
ལེགས་པར་འཁྲུངས་པའི་ཡིད་འཕྲོག་གཞོན་ནུ་ཆགས་པའི་ཉམས་ལྡན་འགྱིང་ཞིང་སྒེག་པ་ཅན། །
མི་ཟད་ཚིག་གི་གཏེར་མཆོག་དྲི་ཞིམ་ཟུར་ཕུད་ལྔ་ལྡན་དེ་ལ་འདུད། །
སྲིད་པའི་རྒྱ་མཚོ་རིང་ནས་ལེགས་བརྒལ་ཡང་། །
ཞི་བའི་གནས་སུ་ཡུད་ཙམ་མི་བཞུགས་ལ། །
ཕྱི་ནང་ཆོས་ཀྱི་དེ་ཉིད་སྟོན་མཁས་པའི། །
ཀུན་དགའ་སྙིང་པོ་སྐྱེ་དགུའི་གཙུག་ན་མཛེས། །
སྦྱང་དཀའ་ཟླ་བའི་བསོད་ནམས་ཡེ་ཤེས་ཚོགས། །
གྲངས་མེད་བསྐལ་པར་བསྐྲུན་པའི་མཐུ་གྲུབ་པ། །
ས་བཅུའི་རྩེ་མོར་སོན་པའི་རིགས་སྔགས་འཆང་། །
གནས་ལྔ་རིག་པ་བསོད་ནམས་རྩེ་མོའི་ཞབས། །
རྗེ་བཙུན་མཁྱེན་པའི་གཏེར་གྱི་བཀའ་གྲུབ་པ། །
རྡོ་རྗེ་འཆང་དབང་ཐུགས་ཀྱི་བང་མཛོད་ལ། །
དབང་སྒྱུར་རྒྱལ་པོར་གྲགས་པའི་རྒྱལ་མཚན་དཔལ། །
སྲིད་པ་གསུམ་ན་ཁྱོད་དང་མཚུངས་མ་མཆིས། །
བློ་གསལ་ཀུན་དགའི་འཛུམ་ཆེན་དགོད་པའི་རྩེར། །
གཞུང་ལུགས་མི་འདྲའི་རྒྱལ་མཚན་སྟོང་སྒྲེང་ཞིང་། །
འཇམ་པའི་དཔལ་ཞེས་གྲགས་པའི་གདུགས་བཟང་པོ། །
ལེགས་པར་འཛིན་པ་ས་སྐྱ་པཎྜི་ཏ། །
བློ་གྲོས་ཡིད་བཞིན་མཚོ་ལ་དབང་འབྱོར་ཞིང་། །
འཕྲིན་ལས་མ་ལ་ཡ་རླུང་ཕྱོགས་མཐར་གཡོ། །
རིགས་ལྡན་ཆོས་ཀྱི་རྒྱལ་སྲིད་ཆེན་པོ་ལ། །
དབང་འབྱོར་ཆོས་ཀྱི་རྒྱལ་པོ་འཕགས་པའི་མཚན། །
དྲི་མེད་ཡོན་ཏན་ཀུན་ལྡན་ས་སྐྱ་པ། །
གངས་ཅན་ལྗོངས་འདིར་ཁྱོད་དང་མཚུངས་པ་ཡི། །
སྐྱབས་གཞན་ཕྱོགས་བརྒྱར་བཙལ་ཡང་མ་མཐོང་བས། །
ཁྱོད་ཉིད་འབའ་ཞིག་གུས་པའི་གཙུག་གིས་མཆོད། །
དེ་སྐད་སྨྲ་བ་ང་ཡིན་སྡེ་སྣོད་གསུམ་ཤེས་གསང་སྔགས་འཛིན་པ་ང་། །
བརྡ་སྤྲོད་བྱེད་གཞུང་ངས་བསླབས་ད་ལྟ་ང་ལས་སྙན་ངག་མཁས་པ་གང་། །
རྟོག་གེའི་གཞུང་ལ་སྦྱངས་པ་ང་ཆེ་ཐ་སྙད་ཕལ་ཆེར་ང་ལ་དྲིས། །
དེང་སང་འདི་ན་ང་བརྒྱད་སྨྲ་བར་རིགས་པ་ང་ལས་གཞན་ཡོད་མིན། །
ང་བརྒྱད་སྨྲས་པ་ཙམ་གྱིས་ས་སྐྱ་པ། །
ཀུན་དགའ་རྒྱལ་མཚན་ཉིད་དང་མཚུངས་སོ་ཞེས། །
སྣང་ཤས་དབང་གིས་ཆ་མེད་བྱུང་རྒྱལ་དུ། །
མངོན་པའི་ང་རྒྱལ་སྒྲོག་པ་ག་ལ་ཡིན། །
མཚུངས་བྲལ་རྣམ་དཔྱོད་ཆེན་པོའི་དགེ་ལེགས་ཀྱིས། །
རབ་འབྱམས་ཤེས་བྱའི་གནས་རྣམས་ཕལ་ཆེར་ལ། །
རྨོངས་པའི་ཕྱོགས་ཙམ་གསལ་བའི་མངོན་རློམ་གྱིས། །
དཔལ་ལྡན་ས་སྐྱར་དེ་སྐད་སྨྲ་བ་པོ། །
ཤཱཀྱ་མཆོག་ལྡན་དྲི་མེད་ལེགས་པའི་བློ། །
         ཞེས་བྱ་བ་འདི་ནི། ན་ཚོད་ལྡན་གྱི་ལོ། ཁྲུམས་ཀྱི་ཟླ་བའི་ཕྱོགས་དང་པོའི་སྟོང་བ་དང་པོ་ལ་ཤཱཀྱའི་དགེ་སློང་མཆོག་ལྡན་ལེགས་པའི་བློ་གྲོས་ཀྱིས་དཔལ་ས་སྐྱའི་གཙུག་ལག་ཁང་དུ་སྦྱར་བའོ། །མངྒལཾ། །
མཆན་འགྲེལ། སྙན་ངག་འདི་ནི«པཎ་ཆེན་ཤཱཀྱ་མཆོག་ལྡན་གྱི་གསུང་འབུམ»ལས་ཁོལ་དུ་ཕྱུང་བ་དང་། ཁ་བྱང་སྒྲིག་པ་པོས་བསྣན་པ་ཡིན།

མཛད་པ་པོ་མཚམས་སྦྱོར་མདོར་བསྡུས། རྒྱལ་མོ་གཡང་སྐྱབས་རྒྱལ། མཚོ་ལྷོ།
        གསེར་མདོག་པཎ་ཆེན་ཤཱཀྱ་མཆོག་ལྡན་ནི། རབ་བྱུང་བདུན་པའི་ས་སྤྲེལ（1428ལོ）ལོར་གསང་ཕུའི་བར་ཚིགས་སུ་འཁྲུངས། དགུང་ལོ་བརྒྱད་པར་སྐྱོར་མོ་ལུང་དུ་རོང་སྟོན་ཆེན་པོ་ལས་རབ་ཏུ་བྱུང་། དགུང་ལོ་ཉེར་གཅིག་གི་བར་རོང་སྟོན་ཆེན་པོའི་ཞབས་ལ་གཏུགས་ནས་རྒྱན་དྲུག་མཆོག་གཉིས་ཀྱི་གཞུང་སོགས་ཟབ་ཆོས་མང་དུ་གསན། དགུང་ལོ་ཉེར་ལྔ་པ་ནས་བཟུང་ངོར་དགོན་དང་། སྐྱོར་མོ་ལུང་། འཕན་པོ་ནཱ་ལེནྡྲ། གསང་ཕུ། ས་སྐྱ་སོགས་སུ་མཁན་ཆེན་ཆོས་རྒྱལ་དཔལ་བཟང་པོ་དང་། རོང་སྟོན་ཤེས་བྱ་ཀུན་གཟིགས། བློ་བརྟན་བཞི་པ། ངོར་ཆེན་ཀུན་དགའ་བཟང་པོ། སྤྱང་ལུང་པ་གཞོན་ནུ་བློ་གྲོས། རྒྱ་གར་པཎ་ཆེན་ནགས་ཀྱི་རིན་ཆེན་སོགས་ལས་རིག་གནས་མཐའ་དག་དང་གདམས་ངག་མང་དུ་གསན་ཞིང་། བསླབས་པ་དག་ཀྱང་མིང་རྐྱང་ཙམ་མ་ཡིན་པར་སོ་སོའི་གནད་ཇི་ལྟ་བ་བཞིན་དུ་ལེགས་པར་རྟོགས། དགུང་ལོ་ཉེར་གཉིས་པར་ཀམ་དགོན་དུ་ཐེག་ཆེན་ཆོས་རྗེའི་བུ་ཆེན་བློ་གྲོས་ཆོས་སྐྱོང་པའི་སྤྱན་སྔར་འཇིགས་བྱེད་རྭ་ལུགས་སྐོར་གྱི་མན་ངག་དང་། གུར་བརྟག་སཾ་གསུམ་གྱི་བཤད་པ་ཐེག་ཆེན་ཆོས་རྒྱལ་ལས་བརྒྱུད་པ། ལཱུ་ནག་དྲིལ་གསུམ་གྱི་དབང་ཐེག་ཆེན་པ་ལས་བརྒྱུད་པ་སོགས་གསན་སྐབས། རྒྱ་གར་སཾ་སྐྲྀ་ཏའི་སྐད་ལ་བྱང་བས་ཀམ་དགོན་བློ་གྲོས་ཆོས་སྐྱོང་བས་པཎྜི་ཏ་ཞེས་བསྔགས་པ་ནས་དེ་སྐད་ཡོངས་ལ་གྲགས་པར་གྱུར། དགུང་ལོ་ཉེར་བརྒྱད་པར（1455ལོ）ངོར་ཆེན་ཀུན་དགའ་བཟང་པོའི་ཐུགས་བཞེད་ལྟར། པོད་གྲངས་ལྔ་བཅུ་ལྷག་གི་གྲྭ་སྐོར་མཛད་ཅིང་། དེར་འདུས་ཀྱི་སྐྱེ་བོ་ཐམས་ཅད་དད་པའི་གནས་སུ་བཀོད། 
        གྲྭ་སྐོར་མཇུག་གྲུབ་པ་དང་དཔལ་ལྡན་ས་སྐྱའི་གནས་དང་། ས་སྐྱ་གོང་མ་རྣམ་ལྔར་མཚན་སྤེལ་བའི་མཆོད་བསྟོད་གནང་ནས་སྒོའི་ཀླད་དུ་སྦྱར་བས། འདི་ལྟ་བུའི་སྙན་ངག་སུ་ཞིག་གིས་བྲིས་ཞེས་གླེང་བ་ན། ཕྱི་ཉིན་ང་བརྒྱད་མ་སྦྱར་བྱང་དུ་བཀོད། དགུང་ལོ་ཞེ་གཉིས་པ་ས་མོ་གླང་གི（1469ལོ）ལོར་པཎ་ཆེན་དོན་ཡོད་དཔལ་བའི་བཀས་བསྐུལ་ཏེ་གསེར་མདོག་ཅན་དུ་འདུས་ཚོགས་བརྒྱ་ཕྲག་དུ་མར་ཆོས་ཀྱི་བཤད་པ་མང་དུ་མཛད་པ་ནས་གསེར་མདོག་པཎ་ཆེན་ཞེས་ཡོངས་སུ་གྲགས་ཏེ། སྤྱིར་རིག་གནས་ལྔ་དང་། ཁྱད་པར་དུ་སྒྲ་རིག་པ་དང་། ནང་རིག་གི་སྙིང་པོ། བཀའ་བར་མཐའ་དང་། ལུགས་གཉིས་ཀྱི་སྲོལ་ལས་བྱུང་བའི་རང་སྟོང་གཞན་སྟོང་གི་ལྟ་བའི་གནད་ཟབ་མོ་ལ་འདི་ཁོ་ན་བཀའ་དྲིན་ཆེ་བ་ཡིན་ནོ། །  ཁོང་གི་གསུང་ལས་སྐྱེས་པ་སློབ་མ་ལ་ཤངས་ཆེན་པ་དང་། རྡོར་རྒྱལ་བ། བློ་བཟང་སོགས་མང་དུ་བྱུང་། གསུང་རྩོམ་ལ«ཚད་མ་དཀའ་འགྲེལ་གྱི་སྤྱི་དོན་ཆེ་ཆུང་གཉིས»དང་། «རྣམ་རིག་ཊཱིཀ་ཆེན་གཉིས» «ཕར་ཕྱིན་ཊཱི་ཀ་ལུང་སྙིང་སྤྱི་དོན་གསུམ» «རྩ་འཇུག་ཊྰིཀ་སྟོང་ཐུན་ཆེན་མོ་གསུམ» «འདུལ་བའི་དཀའ་འགྲེལ་ལས་བརྒྱ་ཊྰིཀ» «བདེ་གསང་རྣམ་བཤད་གསེར་ཐུར་ཆོས་ཚན»སོགས་རྩོམ་པའི་རྣམ་གྲངས་ཤིན་ཏུ་མང་བོ་མཛད་ཡོད་དེ། གཞན་ཡང་རྫོང་སར་ཁམས་བྱེ་ལྔ་རིག་ཐུབ་བསྟན་སློབ་གླིང་གིས་བསྒྲིགས་ཤིང་། ཀྲུང་གོའི་བོད་རིག་པ་དཔེ་སྐྲུན་ཁང་གིས་པར་སྐྲུན་འགྲེམ་སྤེལ་བྱས་པའི«གསེར་མདོག་པཎ་ཆེན་ཤཱཀྱ་མཆོག་ལྡན་གྱི་གསུང་འབུམ»པོད་ཉེར་བཞིའི་བདག་ཉིད་ཅན་བཞུགས་ཡོད། འདི་བ་དགུང་ལོ་བརྒྱད་ཅུ་ལ་ཕེབས་པ་རབ་བྱུང་དགུ་པའི་མེ་ཡོས（1507ལོ）ལོར་གཤེགས་སོ། །