logo

༄༅། །བླ་བྲང་དགོན་གཞུང་ལ་གནང་བའི་འཕྲིན་ཡིག

རྩོམ་པ་པོ།:རྡོ་སྦིས་དགེ་བཤེས་ཤེས་རབ་རྒྱ་མ ཡོང་ཁུངས།:མཚོ་སྔོན་པོ་དྲྭ་བ། དུས་ཚོད།:2022-02-15 ཀློག་གྲངས།:
        ཀུན་མཁྱེན་ཆེན་པོ་འཇམ་དབྱངས་བཞད་པའི་མཛད་འཕྲིན་གྱི་ཁང་བཟང་གནམ་དུ་འདེགས་པའི་ཀ་ཆེན་གྲྭ་ཚང་དྲུག་གི་བླ་མ་ལས་སྣེ་མཐའ་དག་ལ་གུས་པས་ཞུ་བ། ཁྱེད་རྣམ་པས་ཀུན་མཁྱེན་ཡབ་སྲས་ཀྱིས་སྐྱེས་རབས་ནས་སྐྱེས་རབས་སུ་དཀའ་ངལ་ཐབས་ཚུལ་བརྒྱ་ཕྲག་གིས་བསྟན་འགྲོའི་སྲོག་ཤིང་ཟླ་མེད་པར་འཛུགས་སྐྱོང་སྤེལ་གསུམ་བགྱིས་པའི་ཆོས་སྡེ་ཆེན་པོ་བླ་བྲང་བཀྲ་ཤིས་འཁྱིལ་ཞེས་འཛམ་གླིང་ན་གྲགས་པའི་རོལ་མོ་དགེ་བ་འདི་ལ་དད་ཞེན་གཅེས་སྤྲས་གཞན་འགྲན་མ་མཆིས་པར་ཉམས་པ་སོར་ཆུད། མ་ཉམས་གོང་སྤེལ་མཛད་ཀྱིན་ཡོད་པ་ནི་ངས་ཞུ་མ་དགོས་ཏེ། སྒ་ཁུར་རྟ་ལ་མི་འབབ་ན་སུ་ལ་འབབ། དེ་ལྟ་ནའང་ལྔ་བདོའི་མཐའ་ལ་ཐུག་པའི་དུས་འདིར་ཡུན་ཕྲན་ལ་ལ་ན་བསོད་ནམས་ཅན་ལས་བསོད་ནམས་དམན་པ་མང་། ཡ་རབས་ལས་མ་རབས་མགོ་འཕང་མཐོ། བདེན་པ་ལས་རྫུན་པ་ནོར་དུ་བྲིན། དྲང་འབྲེལ་ལས་གཡོ་ཁྲམ་ཇུས་སུ་རྒྱུག་པ་ལྟ་བུར་སྣང་ཡང་གུང་ཁྲན་ཏང་དང་རིན་མིན་ཀྲིན་ཧྥུའུ་ནས་ཆོས་དད་རང་དབང་ཐོག་བསྟན་པ་བསྟན་འཛིན་མཐུན་རྐྱེན་དང་བཅས་པ་ལ་སྲུང་སྐྱོབ་བཅོས་མིན་གྱི་རང་བཞིན་བདག་གིས་ཉམས་མྱོང་ཚད་མས་གྲུབ་པ་དེ་ལྟ་མོད། ཕྱོགས་དེའི་སྐྱེ་བོ་མ་རུངས་པ་འོ་མ་ཁྲག་འདེབས། སྡིག་པར་མིག་བཙུམ། རི་བོང་རྡོ་བརྫུས། ངོ་ཚ་ཁྲེལ་འདས་དག་ནས་ལུས་དང་ལོངས་སྤྱོད་འཇོམས་བྱེད་ཀྱི་ཕུང་ཀྲོལ་གཅིག་པུ་དུད་ནག་ཉོ་ཚོང་དང་། གྲི་འཛིང་འཐབ་རྩོད་སོགས་ཁྱིམ་པ་སུན་འབྱིན་གྱི་ལོག་སྤྱོད་ཚོད་མེད་ཉམས་སུ་བླངས་པ་ལ་བརྟེན་དགོན་པར་ཡང་གྲགས་ངན་ཐོས་ན་སྐྱི་གཡའ་བ་སྣང་ཞིང་། སྲིད་གསར་ཐུགས་དགོངས་དཀྲུགས་རྐྱེན་ཆེན་པོ་འབྱུང་གི་འདུག་ན། ཁོ་བོ་ཀུན་མཁྱེན་ཆོས་ཀྱི་རྒྱལ་པོའི་མངའ་ཐང་ལ་སྙིང་ནས་ཤ་ཚས་མི་བཟོད་པ་ཞིག་ཡིན་པར་མ་ཟད། རྒྱལ་ཁབ་གཞུང་ནས་ཀྱང་ནང་བསྟན་མཐུན་ཚོགས་ཀྱི་གཙོ་བོར་བཀོད་དེ་འདི་འདྲའི་འགལ་འཁྲུལ་འོས་མིན་རིགས་ལ་ལྟ་རྟོག་ལྷོད་མེད་དགོས་པའི་བཀའ་ལུང་ནན་ལྕི་ཡོད་གཤིས་ད་རེས་གསོལ་བ་འདེབས་རྒྱུའི་ཡང་སྙིང་། ཉི་མ་དེ་རིང་ནས་བཟུང་ཁྱེད་རྣམ་པ་མཁས་བཙུན་བཟང་འཛོམས་ཐམས་ཅད་མ་བགྲོས་དགོངས་མཐུན། སྟོབས་ཤུགས་ཆིག་དྲིལ། ཆུ་བརྒྱ་ཟམ་གཅིག་གི་དཔེས་ཐ་ནག་ཉོ་ཚོང་བྱེད་མཁན་སུ་ཡིན་ཡང་རུང་རང་བསྟན་རང་བཤིག་དགྲ་བགེགས་ཀྱི་དྭངས་མར་བལྟས་ཏེ་བླ་མ་དགེ་བའི་བཤེས་གཉེན་གྱི་གསུང་གི་བདུད་རྩིས་ཞི་བར་འདུལ་ཞིང་གལ་ཏེ་མ་ཐུལ་ན་སྐྱིད་སྡུག་ནས་ཕུད་ཅིང་ཅ་ལག་གཞུང་ལེན་སོགས་དྲག་པོས་ཚར་གཅོད་གང་ལ་གང་འོས་ཀྱི་ཐབས་མཁས་གཟི་བརྗིད་ལྡན་པས་ཕྱིན་ཆད་མིང་ཙམ་ཡང་མི་གྲགས་པར་རྩད་ནས་ཆོད་པའི་བཀའ་དྲིན་ཅི་ནས་ཀྱང་མི་ཆུང་བ་མཁྱེན། འདི་ལ་རྒྱུ་མཚན་མང་།
ཞེས་ཤེས་རབ་རྒྱ་མཚོ་འཇམ་དཔལ་དགྱེས་པའི་བློ་གྲོས་ནས་ཟླ་ཚེས་ལ་ཕུལ།། །།
འབྲེལ་ཡོད་འོས་སྦྱོར།