༄༅། །ཆོས་རྗེ་ས་སྐྱ་པཎ་ཆེན་རིན་པོ་ཆེར་གསེར་འབུམ་གྱི་ཐིངས་ཡིག་བཞུགས།

ཨོཾ་སྭསྟི།
བླ་མ་རྣམས་དང་ཡི་དམ་ལྷ། །
བླ་མེད་ཇོ་བོ་དཀོན་མཆོག་གསུམ། །
དུས་གསུམ་འཕགས་པ་ཐམས་ཅད་དང་། །
བརྟུལ་ཞུགས་གྲུབ་པ་མ་ལུས་ལ། །
གུས་པས་ཕྱག་འཚལ་སྐྱབས་སུ་མཆི། །
ཐུབ་པའི་བསྟན་པ་རིན་ཆེན་ལ། །
བྱ་བ་རླབས་ཆེན་མཛད་གྱུར་ཅིང་། །
སྔགས་དང་མཚན་ཉིད་ཀུན་གྱི་གཏེར། །
ལུང་དང་རིགས་པའི་དབང་ཕྱུག་སྟེ། །
བཀའ་དང་བསྟན་བཅོས་མ་ལུས་པ། །
གཞུང་དང་གདམས་ངག་ཐམས་ཅད་ལ། །
དྲི་མེད་ཤེས་རབ་སྤྱན་མཆོག་གིས། །
ལེགས་པར་གཟིགས་ཤིང་ཆོས་རྣམས་ལ། །
རྨོངས་མེད་བློ་གྲོས་རྒྱ་མཚོ་ལྟར། །
བླ་མའི་བླ་མ་བླ་ན་མེད། །
རྡོ་རྗེ་འཆང་དང་འདྲ་བ་ཡི། །
བླ་མ་དམ་པའི་གདུང་ལས་འཁྲུངས། །
དེང་སང་དུས་ན་ས་སྟེང་འདིར། །
རྩོད་པ་ཀུན་དང་རྣམ་པར་བྲལ། །
བྱམས་དང་སྙིང་རྗེ་བྱང་ཆུབ་སེམས། །
སྨོན་འཇུག་དོན་དམ་རྣམ་གསུམ་དང་། །
དྲི་མེད་ཚུལ་ཁྲིམས་རིན་ཆེན་གྱིས། །
འཁོར་བ་སྡུག་བསྔལ་རྒྱ་མཚོ་འདིར། །
སྡུག་བསྔལ་ཉམ་ཐག་འགྲོ་བ་རྣམས། །
ཐུགས་རྗེའི་ལྕགས་ཀྱུས་བཟུང་ནས་ཀྱང་། །
བྱང་ཆུབ་མཆོག་ལ་འགོད་པར་མཛད། །
ས་སྟེང་འཛམ་གླིང་རྩོད་དང་བྲལ། །
སྒྲ་སྒྱུར་ལོ་ཙཱ་རིན་ཆེན་ལ། །
གུས་པའི་ཡིད་ཀྱིས་རབ་ཏུ་འདུད། །