༄༅། །བློ་སྣ་ནང་དུ་ཁུག་ཅིག་ཨང་།

མཆོག་སྐྱབས་གསུམ་འདུས་པའི་ངོ་བོ་ཉིད། །
རྗེ་བླ་མ་རྣམས་ལ་ཕྱག་བྱས་ཏེ། །
ཆོས་ཟབ་མོ་བྱང་ཆུབ་ལམ་རིམ་དོན། །
ཚིག་ཉུང་ངུ་གོ་སླའི་གླུ་རུ་ལེན། །

དངོས་གྲུབ་ཀྱི་གྲུ་ཆར་འབེབས་འདོད་ན། །
ལོག་རྟོག་གི་རླུང་དམར་མི་གཡོ་བའི། །
དད་གུས་ཀྱི་ནམ་མཁའ་ཡངས་པ་ལ། །
བླ་མའི་བྱིན་རླབས་སྤྲིན་ཆེན་འཁྲིགས་པ་དགོས། །
འདི་ལེགས་བྱས་ཀུན་གྱི་རྩ་བ་ཡིན། །
རྟེན་འབྲེལ་ཀུན་གྱི་ཐོག་མ་ཡིན། །
དེ་ལེགས་པར་བསམ་ན་རང་ལ་ཕན། །
བློ་སྣ་ནང་དུ་ཁུག་ཅིག་ཨང་། །

སྔར་དལ་འབྱོར་ཐོབ་པའི་གྲར་བསྡད་ཀྱང་། །
ལྟོ་གོས་ཁོལ་པོར་ཟད་པ་ཡིས། །
དུད་འགྲོ་དང་དབྱེར་མེད་གྱུར་པས་སྐྱོ། །
དོན་ལྡན་བྱེད་ན་དམ་ཆོས་ཁོ་ནར་འབད། །
སོས་དལ་དུ་སྡོད་ཁོམ་ག་ལ་ཡོད། །
འདི་སེམས་པ་ནང་གི་སྐུལ་ལྕག་ཡིན། །
དེ་ལེགས་པར་བསམས་ན་རང་ལ་ཕན། །
བློ་སྣ་ནང་དུ་ཁུག་ཅིག་ཨང་། །

བཟོད་མེད་དང་ཐར་མེད་ཀྱི་ངན་སོང་དུ། །
དོ་ནུབ་ཀྱང་མི་ལྟུང་གདེང་མེད་པས། །
ད་སྐྱབས་ཤིག་བཙལ་ན་བཙན་རན་ཡིན། །
སྐྱོབ་བྱེད་དངོས་གཞི་ལས་འབྲས་བླང་དོར་ཡིན། །
རང་བསམ་བཞིན་དམྱལ་བར་མཆོང་ཚུལ་མེད། །
ལོང་པ་སྨྱོ་འགྲོས་མ་བྱེད་ཅིག །
དེ་ལེགས་པར་བསམས་ན་རང་ལ་ཕན། །
བློ་སྣ་ནང་དུ་ཁུག་ཅིག་ཨང་། །

ཚེ་ཕྱི་མར་བདེ་འགྲོའི་རྟེན་ཐོབ་ཀྱང་། །
ད་ལན་བཞིན་སྟོང་པར་ཟད་གྱུར་ན། །
སྡུག་ཕྱི་ཐག་རིང་པ་ཁྱད་མེད་པས། །
ཁམས་གསུམ་འཁོར་བ་ཀུན་ལས་ཐར་བ་བདེ། །
དེ་སྲེད་པས་རང་རང་བཅིངས་པ་ཡིན། །
ད་ཀུན་ལ་ཞེན་ལོག་ངེས་འབྱུང་དགོས། །
དེ་ལེགས་པར་བསམས་ན་རང་ལ་ཕན། །
བློ་སྣ་ནང་དུ་ཁུག་ཅིག་ཨང་། །

མ་རིག་སྲེད་ལེན་ཞེན་པ་ཡི། །
ལས་སྲིད་པའི་ས་བོན་བཏབ་པ་ལས། །
སྡུག་བསྔལ་བདུན་གྱི་ལོ་ཏོག་རྒྱས། །
ཡང་བཏབ་ཅིང་བརྔས་ཏེ་ཡང་བཏབ་པས། །
སྡུག་བསྔལ་གྱི་ཕ་མཐར་ཕྱིན་དུས་མེད། །
ཐར་པའི་དགོན་པར་བྲོས་ན་ལེགས། །
དེ་ལེགས་པར་བསམས་ན་རང་ལ་ཕན། །
བློ་སྣ་ནང་དུ་ཁུག་ཅིག་ཨང་། །

སྲིན་བུ་མི་གཙང་དྲི་ལ་འཁོར་བ་བཞིན། །
གཙང་བདག་བདེ་དང་རྟག་འཛིན་གྱི། །
རྒྱུ་ལས་ཉེས་ཚོགས་ཀུན་འབྱུང་བས། །
ཉེས་ཀུན་ཞི་བའི་འགོག་པ་ཐོབ་ན་བདེ། །
དེ་འཐོབ་བྱེད་ཡང་དག་རིགས་པའི་ལམ། །
དེའི་རྩ་བ་རྣམ་དག་ཚུལ་ཁྲིམས་ཡིན། །
དེ་ལེགས་པར་བསམས་ན་རང་ལ་ཕན། །
བློ་སྣ་ནང་དུ་ཁུག་ཅིག་ཨང་། །

མ་རྒན་ལོང་བ་གཅན་གཟན་གྱི། །
ཁར་བོར་ནས་བྲོས་ན་ཁྲེལ་མེད་ཡིན། །
སྡུག་རང་གིས་འཁུར་བའི་གོ་བགོས་ན། །
ཡ་རབས་རྒྱལ་བའི་སྲས་ཀྱི་གྲངས་སུ་འགྲོ། །
དེ་ནས་ཕྱིན་དྲུག་ཉམས་ལེན་གྱི། །
དམ་བཅའ་མཐའ་རུ་འདོན་པ་གཅེས། །
དེ་ལེགས་པར་བསམས་ན་རང་ལ་ཕན། །
བློ་སྣ་ནང་དུ་ཁུག་ཅིག་ཨང་། །

བློ་འཁྲུལ་ངོར་ང་ཞེས་ཚུགས་ཐུབ་འདྲ། །
གཅིག་མིན་གཞན་མིན་གྱི་སྡོད་ཚུལ་མེད། །
དེར་དཔྱད་པ་འགའ་ཡང་མ་རྙེད་པས། །
སྣང་བ་ཙམ་ལས་རང་བཞིན་མེད་པར་ངེས། །
སྣང་སྟོང་འགལ་མེད་གྲོགས་གྱུར་འདི། །
དུས་གསུམ་རྒྱལ་བའི་དགོངས་པ་ཡིན། །
དེ་ལེགས་པར་བསམས་པ་རང་ལ་ཕན། །
བློ་སྣ་ནང་དུ་ཁུག་ཅིག་ཨང་། །

གཟུགས་ཅན་རྣམས་ཕྱོགས་ཀྱི་ཆ་ཤས་དང་། །
ཤེས་པ་རྣམས་སྐད་ཅིག་སྔ་ཕྱིའི་འཕྲེང་། །
ལྡན་མིན་ཡང་ཡན་ལག་ཚོགས་པ་ལ། །
བཏགས་ཙམ་ལས་ངོ་བོ་མ་གྲུབ་པས། །
བདག་མེད་གཉིས་སྟོང་གཞིའི་ཁྱད་ཙམ་ལས། །
གནད་རིགས་པའི་རྣམ་འགྱུར་གཅིག་གིས་ཤེས། །
དེ་ལེགས་པར་བསམས་ན་རང་ལ་ཕན། །
བློ་སྣ་ནང་དུ་ཁུག་ཅིག་ཨང་། །

ཐུན་མོང་ལམ་གྱིས་རྒྱུད་སྦྱངས་ཏེ། །
རྣམ་དག་དབང་གིས་སྨིན་བྱས་ནས། །
རིམ་གཉིས་རྣལ་འབྱོར་ལ་འབད་ན། །
དོན་གཉིས་དགའ་སྟོན་རང་གི་ལག་ཏུ་ཡོང་། །
དེའི་རྩ་བ་དམ་ཚིག་བསྲུང་བ་ཡིན། །
གཏན་འདུན་འཕྱུག་པ་མེད་པར་མཛོད། །
དེ་ལེགས་པར་བསམས་ན་རང་ལ་ཕན། །
བློ་སྣ་ནང་དུ་ཁུག་ཅིག་ཨང་། །

ཚུལ་འདི་སྐད་སྨྲས་པའི་དགེ་བ་ཡིས། །
དུས་རྟག་ཏུ་དལ་འབྱོར་རྟེན་ཐོབ་ཅིང་། །
ལམ་བཟང་པོ་འདི་དང་མི་འབྲལ་བས། །
དཔལ་སྐུ་བཞིའི་གོ་འཕང་མྱུར་ཐོབ་ཤོག །