གངས་ཏི་སེ་དང་མ་ཕམ་གཡུ་མཚོ།

གངས་དཀར་ཏི་སེ་སྐད་པ་དེ། །
མ་མཐོང་རྒྱང་ནས་སྒྲ་ཆེ་བ། །
ཤེལ་དཀར་གྱི་མཆོད་རྟེན་འདྲའོ་སྐད། །
མཐོང་ནས་དྲུང་དུ་བསླེབས་པ་ན། །
རི་མགོ་ཁ་བས་གཡོགས་པ་གཅིག །
རི་མགོ་ཁ་བས་གཡོགས་པ་དེ། །
སྔོན་བདེ་གཤེགས་ཉིད་ཀྱིས་ལུང་བསྟན་པ། །
རི་བོ་གངས་ཅན་བྱ་བ་ཡིན། །
སྤྱིར་འཛམ་བུའི་གླིང་གི་ལྟེ་བ་ཡིན། །
སེང་གེ་དཀར་མོའི་འགྱིང་ས་ཡིན། །
ཤེལ་དཀར་གྱི་མཆོད་རྟེན་འདྲ་བ་དེ། །
དཔལ་འཁོར་ལོ་སྡོམ་པའི་ཕོ་བྲང་ཡིན། །
དེ་མཐའ་གངས་རིས་བསྐོར་བ་དེ། །
དགྲ་བཅོམ་ལྔ་བརྒྱའི་བཞུགས་གནས་ཡིན། །
སྡེ་བརྒྱད་ཀུན་གྱིས་མཆོད་པའི་རྟེན། །
དེ་མཐའ་གངས་རིས་བསྐོར་བ་དེ། །
སྤོས་ངད་ལྡན་པའི་རི་བོ་ཡིན། །
སྨན་ཤི་གསོས་ཀྱི་བདུད་རྩི་འཁྲུང་ས་ཡིན། །
གྲུབ་པ་ཐོབ་པའི་གནས་ཆེན་ཡིན། །
ཟག་མེད་ཏིང་འཛིན་བརྙེས་ས་ཡིན། །
ངོ་མཚར་དེ་བས་ཆེ་བ་མེད། །
ཡ་མཚན་དེ་བས་ཆེ་བ་མེད། །

མ་ཕམ་གཡུ་མཚོ་སྐད་པ་དེ། །
མ་མཐོང་རྒྱང་ནས་སྒྲ་ཆེ་བ། །
མཚོ་གཡུའི་མཎྜལ་འདྲའོ་སྐད། །
མཐོང་ནས་དྲུང་དུ་བསླེབས་ཙ་ན། །
ཀོ་མོག་ཆབ་ཀྱིས་གང་བ་གཅིག །
ཀོ་མོག་ཆབ་ཀྱིས་གང་བ་དེ། །
སྔོན་བདེ་གཤེགས་ཉིད་ཀྱིས་ལུང་བསྟན་པའི། །
མཚོ་མ་དྲོས་པ་ཞེས་བྱ་བ་ཡིན། །
སྤྱིར་ཆུ་བོ་བཞི་འདུས་ཀྱི་མགོ་བོ་ཡིན། །
ཉ་སྲམ་རྣམས་ཀྱི་འཕྱོ་ས་ཡིན། །
མཚོ་གཡུའི་མཎྜལ་འདྲ་བ་དེ། །
ཀླུ་ཆེན་བརྒྱད་ཀྱི་ཕོ་བྲང་ཡིན། །
དེ་ལ་ཆུ་ཐིགས་བཏབ་པ་དེ། །
བདུད་རྩི་འོ་མའི་ཆུ་རྒྱུན་ཡིན། །
ལྷ་མཆོད་སྦྱིན་བརྒྱ་བའི་ཁྲུས་ཆབ་ཡིན། །
ཆུ་ཡན་ལག་བརྒྱད་དང་ལྡན་པ་ཡིན། །
དེ་མཐའ་སྤང་དང་བྲག་གིས་བརྒྱན། །
ཀླུ་ཕྲན་རྣམས་ཀྱི་བང་མཛོད་ཡིན། །
ཤིང་འཛམ་བུ་གླིང་ཞེས་དེ་ལ་དྲས། །
ངོ་མཚར་དེ་བས་ཆེ་བ་མེད། །
ཡ་མཚན་དེ་བས་ཆེ་བ་མེད། །