རྗེ་གསེར་ཁང་བའི་ཕྱག་རྩོམ།

༄༅། །བསྐལ་བཟང་གི་སངས་རྒྱས་སྟོང་ལ་ཕྱག་འཚལ་ཞིང་གསོལ་བ་འདེབས་པ་དགོས་འདོད་ཀུན་འབྱུང་ཞེས་བྱ་བ་བཞུགས་སོ། །
 

མཐུན་པའི་དགེ་ཚོགས་སྨོན་ལམ་རྨད་བྱུང་ཞིང་།།
སྤྱོད་པ་སྤྱོད་ཚེ་ནམ་ཡང་མཆེད་གྱུར་ལ།།
བསྐལ་བཟང་གཅིག་ལ་མཛད་པ་མཐར་ཕྱིན་པའི།།
རྫོགས་པའི་སངས་རྒྱས་སྟོང་ལ་ཕྱག་འཚལ་ལོ།།
གང་ཞིག་ཡིད་ལ་ལན་ཅིག་དྲན་པས་ཀྱང་།།
རེ་བའི་བུམ་བཟང་གཏན་འདུན་འཆི་མེད་ཀྱི།།
བདུད་རྩིས་འགེངས་མཛད་མི་ཟད་ཡོད་ཏན་གཏེར།།
རྫོགས་པའི་སངས་རྒྱས་སྟོང་ལ་ཕྱག་འཚལ་ལོ།།
མི་མཇེད་ཞིང་གི་འགྲོ་བ་མ་ལུས་པ།།
ཚད་མེད་ཐུགས་རྗེའི་ཕྱག་གིས་ཡོངས་བཟུང་སྟེ།།
ཉམ་ངའི་གཡང་ལས་སྒྲོལ་བའི་འདྲེན་པ་མཆོག།།
རྫོགས་པའི་སངས་རྒྱས་སྟོང་ལ་ཕྱག་འཚལ་ལོ།།
མ་རུངས་བདག་འདྲའི་འགྲོ་ལ་ལྷག་པར་ཡང་།།
ཐུགས་རྗེའི་འཇུག་པ་ཕུལ་དུ་བྱུང་གྱུར་བས།།
བརྩེ་བའི་ལྕགས་ཀྱུས་ནམ་ཡང་མི་གཏོང་བ།།
རྫོགས་པའི་སངས་རྒྱས་སྟོང་ལ་ཕྱག་འཚལ་ལོ།།
བཟང་བོའི་ཐུགས་བསྐྱེད་སྨོན་ལམ་ལྷན་ཅིག་བས།།
རྣམ་འདྲེན་སྔ་མའི་བསྟན་ལ་ཞུགས་པ་རྣམས།།
ཕྱི་མས་ཡོངས་སུ་སྨིན་ཅིང་གྲོལ་མཛད་པའི།།
རྫོགས་པའི་སངས་རྒྱས་སྟོང་ལ་ཕྱག་འཚལ་ལོ།།
སྐྱེ་ཞིང་སྐྱེ་བར་རྣམ་འདྲེན་དེ་དག་གི།།
བསོད་ནམས་བརྒྱས་མཚན་བལྟ་བས་མི་ངོམས་སྐུ།།
མིག་གི་ལམ་དུ་ནམ་ཡང་མི་འབྲལ་ཞིང་།།
བཀའ་བཞིན་བསྒྲུབས་པས་མཉེས་པ་ལྷུར་བྱེད་ཤོག།།
གསང་བ་ཀུན་ལ་ལྐོག་ཏུ་མ་གྱུར་བའི།།
སྤྱན་ལྡན་སྲས་ཀྱི་ཐུ་བོར་འགྱུར་བ་དང་།།
ཆོས་ཚུལ་མཐའ་དག་བཤད་དང་སྒྲུབ་པ་ཡིས།།
རྒྱལ་བའི་དགོངས་པ་ཇི་བཞིན་འཛིན་པར་ཤོག།
གསེར་གྱི་མདོག་ཅན་འཁོར་ལོས་སྤྲས་བའི་ཕྱག།
སྤྱི་བོར་བཞག་སྟེ་འཛུམ་པའི་མདངས་དང་བཅས།།
ཚངས་པའི་དབྱངས་ཀྱིས་བླ་མེད་བྱང་ཆུབ་ཏུ།།
ལུང་བསྟན་པ་ཡང་བདག་གིས་མྱུར་ཐོབ་ཤོག།