རྗེ་བླ་མ་སྐལ་ལྡན་རྒྱ་མཚོའི་ལྟ་མགུར་ཚན་པ་བཞི།

རྒྱལ་བའི་བསྟན་པའི་ཉིང་ཁུ།།
རྟེན་འབྱུང་སྟོང་པའི་དོན་དུ།།
ལམ་ལམ་གཟིགས་པའི་བླ་མ།།
སྙིང་གི་པདྨོར་རྟག་བཞུགས།།
བདག་གཞན་ཀུན་གྱི་སྣང་ཚུལ།།
འདི་ལས་གཞན་པའི་དགག་བྱ།།
གཞན་དུ་བཙལ་བས་མི་རྙེད།།
རང་གི་ཉམས་ལ་ལྟོས་ཤིག།
གཅིག་དང་དུ་བྲལ་རིགས་པས།།
ཡོད་མེད་ལེགས་པར་དཔྱད་ཚེ།།
ནམ་མཁའི་པདྨོ་ཇི་བཞིན།།
ཡེ་ནས་མེད་པར་འཆར་རོ།།
ཤར་བའི་ངང་དུ་སེམས་ཉིད།།
སྤྲོས་པ་ཀུན་དང་བྲལ་བར།།
གཡོ་མེད་རྩེ་གཅིག་ཞོག་དང་།།
མྱུར་དུ་ལྟ་བ་རྙེད་གྱུར།།
ངེས་ཤེས་གཞན་དུ་སོང་ན།།
སྔར་གྱིས་རིགས་པ་དྲན་ལམ།།
བྱས་ལ་ངེས་ཤེས་ཇེ་ཆེར།།
ཡང་དང་ཡང་དུ་གཏང་ངོ་།།
དེ་ལྟའི་མཉམ་བཞག་རྣལ་འབྱོར།།
གནད་དུ་སོང་ན་རྗེས་ཐོབ།།
འཁོར་འདས་སྣང་བ་གང་ཤར།།
རྟོག་བཏགས་རོལ་བར་འཆར་རོ།།
འདི་སྦྱར་རྣམ་དཀར་དགེ་བས།།
རིགས་ཤེས་གཞོན་ནུ་མིག་ཡངས།།
སྟོང་ཉིད་མཛེས་མ་ལྷན་ཅིག།
མྱུར་ཏུ་མཇལ་བར་གྱུར་ཅིག།   
                                             ཅེས་པ་འདི་ནི་བཙུན་པའི་གཟུགས་བརྙན་སྐལ་ལྡན་རྒྱ་མཚོས་སྦྱར་བའོ།།

ཡུལ་གང་ཤར་ངོས་ལ་ཕར་བལྟས་པས།།
གཤིས་ངང་ངམ་གཟུགས་པའི་རྣམ་འགྱུར་གྱིས།།
གདོན་བདག་འཛིན་མཁལ་བའི་མཚང་ཕྱུང་བའི།།
རྗེ་བཞད་པའི་རྡོ་རྗེའི་ཞབས་ལ་འདུད།།
མདང་གཉིད་ཀྱིས་ལོག་པའི་རྨི་ལམ་དུ།།
རྟ་གླང་བོ་ལ་སོགས་གང་རྨིས་པ།།
གཉིད་དེ་ལས་སད་ཚེ་མེད་པ་ལྟར།།
ཡུལ་ཡུལ་ཅན་སྣང་བ་གང་ཤར་ཡང་།།
ཕར་རྟོག་པས་བཞག་པ་མ་ཡིན་པར།།
དོན་ཡུལ་གྱི་སྟེང་ནས་མེད་སྙམ་དུ།།
བློ་ངེས་ཤེས་དྲངས་ལ་ཡང་ཡང་བསྐྱངས།།
དཔེ་གཞན་ཡང་བླང་ལ་བློ་རྒྱས་བྱ།།
དུས་ད་ལྟར་རང་ཅག་ཐམས་ཅད་ལ།།
བརྡས་ཕར་བཏགས་མིན་པའི་བདག་ཅིག་སྣང་།།
འདིའི་རང་གཟུགས་ཤུན་པས་མ་གོས་པ།།
དོན་རྣམ་དཔྱོད་མིག་གིས་མ་མཐོང་བར།།
ཆེས་ཕྲ་མཛངས་རིགས་པ་བརྒྱ་ཕྲག་གིས།།
བློས་གསར་དུ་བཅོས་པའི་བདག་ཅིག་ལ།།
འདི་དགག་བྱ་ཡིན་སྙམ་འགོག་པ་ནི།།
དཔེ་གང་མཐོང་འབེན་སྙམ་མདའ་འཕེན་བཞིན།།
ཡང་འགའ་ཞིག་གང་ཟག་མི་འགོག་ཅིང་།།
བདག་འགོག་པར་གསུངས་པའི་རྒྱུ་མཚན་གྱིས།།
བློས་གང་ཟག་ཟེར་བའི་ལིངས་པོ་ཞིག།
ཕར་བཞག་ནས་གཞན་ཞིག་འགོག་པ་ནི།།
ལར་རྟག་མཐའ་ནན་གྱིས་ཉོས་པ་འདྲ།།
ངོ་བོས་སྟོང་པས་འདི་ཡིན་འདི་མིན་མེད།།
འཕྲལ་བྱ་བྱེད་བཞག་པས་སྟོང་ཡལ་བའི།།
སྒོམ་ཇི་ཙམ་འབད་ཀྱང་བདག་མི་ཁོགས།།
དོན་ཧྲིལ་གྱིས་དྲི་ལན་འདི་ལྟ་སྟེ།།
སེམས་འཁྲུལ་བའི་རྫུན་ཁུངས་རིག་པ་ལས།།
དོན་དམ་པ་གཞན་ནས་མི་རྙེད་པས།།
དེའི་སྣང་ཚུལ་ཞིབ་མོར་རྟོགས་ཤིག་དང་།།
རང་གདོད་ནས་གནས་ཚུལ་རྗེན་ཅེ་རེ།།
ཚུར་ནང་ནས་རང་ལ་སྟོན་ངེས་པས།།
དུས་དེ་ཚེ་སྣང་བ་གང་ཤར་ཚོས།།
སྔར་མཐོང་མ་མྱོང་བའི་ལྟད་མོ་སྟོན།།
ཀྱེ་འདི་འདྲའི་ཆོས་དང་མཇལ་དུས་འདིར།།
སྡུག་མ་མཐའ་ཐུན་རེ་མ་བསྒོམས་ན།།
དཔེ་རིན་ཆེན་གླིང་ཕྱིན་ཚོང་བ་རྣམས།།
ནོར་ཡེ་མེད་སྟོང་ལོག་བྱས་པ་བཞིན།།
དོན་དེ་ཕྱིར་ཕྱོགས་འདིར་རབ་གཞོལ་ལ།།
ཕྱིས་ན་འཆིས་གཏུགས་ཀྱང་འགྱོད་མེད་གྱིས།།
འདིར་ལེགས་བཤད་ག་བུར་ཐིགས་པའི་རྒྱུན།།
གང་བསགས་པ་དངོས་འཛིན་འཕྲོག་ཕྱིར་བསྔོ།།
                                               ཞེས་པ་འདི་ནི་ངུར་སྨྲིག་གིས་གཡོགས་པའི་སྐལ་ལྡན་གྱིས་རང་ཉིད་ལ་གཅིག་ལབ་ཏུ་སྨྲས་པའོ།།

ན་མོ་ཤཱུ་ནྱཱ་ཏ་ཡ།   
གང་ཤར་ལ་བལྟས་པས་སྟོང་སེང་ངེ་།།
སྟོང་ཉིད་ལ་བལྟས་པས་དབྱེར་མེད་པའི།།
མཉམ་རྗེས་ཀྱི་རྣལ་འབྱོར་མཐར་ཕྱིན་པའི།།
གསུམ་ལྡན་གྱི་བླ་མ་བདག་གི་སྐྱབས།།
གདུལ་རྒྱུ་ཡི་དགྲ་དེ་ངོ་མ་ཤེས།།
འདུལ་བྱེད་ཀྱི་ཆོས་དེ་དཔེ་ལ་ལུས།།
འདུལ་མཁན་གྱི་མི་དེ་ཁྱི་བཞིན་འཁྱམས།།
འདུལ་འདོད་ཀྱི་བསམ་པ་རང་དགར་ཡལ།།
སེམས་ཉིད་ཀྱི་སྣང་བ་གང་ཤར་ཚོ།།
དུས་མིན་གྱི་ཚེ་ན་ཚུགས་སེ་སྣང་།།
བཙལ་དུས་སུ་མི་འཆར་དགུ་འཆར་གྱི།།
སྣ་ཚོགས་ཀྱི་བསླུ་བྲིད་སྟོན་གྱིན་འདུག།
ཀུན་ཁྱབ་ཀྱི་ཆོས་དབྱིངས་སྟོང་སང་ཡང་།།
རིགས་ཤེས་ཀྱིས་གདན་འདྲེན་མ་ནུས་པས།།
བདེན་བདེན་དུ་བཅོས་ནས་དུས་རྟག་ཏུ།།
ཕན་ཕན་གྱི་ཟོལ་གྱིས་བྱུར་སྣ་དྲངས།།
ཡེ་མེད་ཀྱིས་འདི་འདྲའི་ཕུང་དཀྲུགས་པ།།
སྟོང་ཉིད་ཁྱོད་རིས་མེད་བདེན་ན་ནི།།
གདན་འདྲེན་ལ་ལྟོས་པ་མི་མངའ་བར།།
ལ་གོར་དུ་རང་ཞལ་སྟོན་ལ་ཤོག།
རང་ཞལ་ནི་རྗེན་པར་མ་བསྟན་ན།།
རིས་མེད་ཀྱི་ཆོས་དབྱིངས་མཛེས་མ་ཁྱོད།།
ཡེ་མེད་ཀྱི་ཕུང་རྒན་གྲོགས་གྱུར་ནས།།
ཁ་འཛིན་དང་རྒྱབ་རྟེན་བྱས་ཀྱིས་དོགས།།
ཡང་སྲིད་འདིར་སྔོན་ནས་ད་ལྟའི་བར།།
འབྲལ་མེད་དུ་འགྲོགས་པའི་གྲོགས་པོ་འདིའི།།
ལོ་རྒྱུས་འདི་ད་མིན་ཡེ་མ་ཚོར།།
ད་ལམ་རང་རྒྱུས་ཞིབ་ཡོད་དུས་འདིར།།
བཟང་ངན་གྱི་རྟིང་ཞིག་གཅོད་རེ་རན།།
རན་པ་རུ་མ་ཟད་འཕྱིས་པ་འདྲ།།
ད་རེས་ནི་རྩད་ཅིག་མ་ཆོད་ན།།
གཏན་སྐྱིད་ཀྱི་བདེ་ལ་མ་རེ་མཛོད།།
                        ཅེས་པ་འདི་ཡང་ཟོག་པོ་སྐལ་ལྡན་གྱིས་སྨྲས་པའོ།།

ན་མོ་དྷ་རྨཱཿདྷ་ཏུ་ཡ།།
གཉུག་མ་འོད་གསལ་གཤིས་ལ།།
བཟང་ངན་སྤྲོས་པ་མེད་པའི།།
སྟོང་པའི་ངང་དུ་རྟག་བཞུགས།།
བླ་མ་མཆོག་དེས་བདག་སྐྱོངས།།
ཁོ་རང་ངོས་ནས་སྔར་ནས།།
ད་བར་གྲུབ་གྲུབ་ང་ཞིག།
བློ་འདིས་འཛིན་པ་ལྟ་བུའི།།
ཉམས་ཤིག་རྒྱུད་ལ་ཤར་ཚེ།།
ཕུང་པོ་འདི་དང་གཅིག་ན།།
བྱེད་པ་པོ་དང་བྱ་བའི།།
ལས་ཀྱང་གཅིག་ཏུ་འགྱུར་བའི།།
རིགས་པས་གསལ་བ་འབབ་བོ།།
གལ་དེ་སོ་སོ་ཡིན་ན།།
བུམ་པ་སྣམ་བུ་བཞིན་དུ།།
འབྲེལ་མེད་སོ་སོར་འགྱུར་བས།།
དེ་ཡང་མི་འཐད་བསམ་མོ།།
འཁར་གཞོང་ནང་གི་ཞོ་ལྟར།།
ཕུང་པོའི་རྟེན་དུ་མེད་ལ།།
རེ་ལྡེར་ལྷ་སྦྱིན་གནས་ལྟར།།
ཕུང་ལ་བརྟེན་ནས་མེད་དོ།།
ལྷ་སྦྱིན་དོན་གཞན་གྱུར་པའི།།
བ་ལང་དག་དང་ལྡན་བཞིན།།
ང་ཡང་རང་གི་ཕུང་པོ།།
ལྡན་ཚུལ་དེ་ཡང་མི་རིགས།།
གལ་དེ་ཕུང་པོ་ཚོགས་ཙམ།།
བདག་གོ་སྙམ་ན་མིན་ཏེ།།
བདག་གི་གདགས་གཞི་ཡིན་ཕྱིར།།
དེ་ཡང་མི་འཐད་བསམ་མོ།།
དབྱིབས་ཀྱང་བདག་ཏུ་སྨྲ་ན།།
འོ་ན་གདགས་གཞི་བཏགས་ཆོས།།
གཅིག་ཏུ་འགྱུར་བའི་ཉེས་པ།།
ཁྱོད་ལ་ངེས་པར་འོང་ངོ་།།
དེ་ལྟར་ཁྱབ་བྱེད་ཁེགས་པས།།
ཁྱབ་བྱ་ཡང་ནི་ཁེགས་པ།།
ཐོག་མར་བྱས་ནས་མེད་དགག།
འཛིན་སྟངས་ཡུལ་དུ་བསྐྱང་ངོ་།།
རྗེས་སུ་འཁོར་འདས་སྣང་བ།།
བསྙོན་དུ་མེད་པར་མཐོང་ཚེ།།
ཨེ་མའོ་ལས་ཉོན་སྒྱུ་མས།།
བྱས་པ་འདི་ཡང་ཡ་མཚན།།
སྙིང་གི་དཀྱིལ་ནས་བསམ་ལ།།
སྤྱོད་ཕྱོགས་གང་ལ་འཇུག་ཀྱང་།།
དེ་ཉིད་ངེས་པའི་རྩིས་ཀྱིས།།
ངེས་པར་ཟིན་པར་བྱའོ།།
དེ་ལས་བྱུང་བའི་དགེ་ཚོགས།།
རི་བོང་བཅལ་བཞིན་དོན་མེད།།
འཇིགས་སྐྲག་གིས་གཟིར་འགྲོ་ཀུན།།
རང་ངོ་ཤེས་ཕྱིར་བསྔོའོ།།
                                 ཞེས་པ་འདི་ཡང་སྙིང་རུལ་སྐལ་ལྡན་གྱིས་སྨྲས་པའོ།།