ཁམས་མི་ཉག་གི་ལ་གཞས།

                           ཕ་རི་སྤང་ཐང་སྟེང་ན།།
                           མེ་ཏོག་དཀར་སེར་དམར་ལྗང་།།
                           ང་རང་དགའ་བའི་མེ་ཏོག།
                           མཛུ་གུ་བཙུགས་ནས་བཞག་ཡོད།།

                           ཕ་རི་སྟག་ལྤགས་བཏིང་ཡོད།།
                           ཚུ་རི་གཟིག་ལྤགས་བཏིང་ཡོད།།
                           ཁྱིན་རྒན་རྒྱ་བོའི་ལྤགས་པ།།
                           འདི་ལ་འགྲོ་ཁུངས་མེད་དོ།།

                           ཕ་རི་བྲག་སྒང་ཐོག་ཏུ།།
                           ཝ་མོས་ཁྱི་འདུག་བཅས་ཡོད།།
                           ཝ་ལྤགས་ཅི་ཙམ་ཡག་ན།།
                           ཝ་ཤ་ཁྱི་ཡིས་མི་ཤ།

                           མིང་པོ་ལྷ་སར་འགྲོ་ན།།
                           རྨ་བྱ་སྒྲོ་ཞིག་ཁུར་ཤོག།
                           ང་ཚོའི་ཚོན་ཡག་བུམ་པ།།
                           ཁ་རྒྱན་མེད་ནས་བཞག་ཡོད།།

                           ཆུ་ཆེན་ཡར་ལ་ལོག་འགྲོ།
                           ཆུ་ཆུང་མར་ལ་ལོག་འགྲོ།
                           ཆུ་ཞབས་གསེར་ཉ་མ་འོངས།།
                           ཆུ་དྲེག་ཐོག་ལ་ལྷག་ཐལ།།

                           ཁྱེད་རང་ཡག་ཏུ་མ་བསམ།།
                           རིན་ཆེན་རིལ་བུ་མ་རེད།།
                           ཁྱེད་རང་འཇིག་ཏུ་མ་བསམ།།
                           བཅོ་ལྔའི་ཟླ་བ་མ་རེད།།

                           གངས་རི་བསྐོར་ནས་ཡོང་ཟིག།
                           གངས་ཆུ་འཐུང་ནས་ཡོང་ཟིག།
                           གངས་དང་སེང་གར་ཉི་མ།།
                           དགོངས་པ་ཞུས་ནས་ཡོང་ཟིག།

                           ལུང་པ་སྦུག་ནས་ཡོང་བའི།།
                           ཨ་མཆོད་བརྒྱ་དང་རྩ་བརྒྱད།།
                           ཀ་ཁ་ཚིག་གཅིག་མི་ཤེས།།
                           བཀའ་ཐང་ངས་འདོན་ཟེར་ཀི།

                           ཆུང་འདྲིས་ཉིན་གཅིག་ཡོད་ཁར།།
                           ཉི་མ་ལ་མོ་ཐོག་ཐོག།
                           ལྷ་དང་བླ་མ་དཀོན་མཆོག།
                           ཉི་མ་ཡུན་རིང་བཞག་ཆོག།

                           ཁྱེད་ཉིད་ང་ལ་དགའ་ན།།
                           རྒྱ་གླིང་ནང་ནས་འབོད་ཆོག།
                           ང་ནི་ཁྱེད་ལ་དགའ་ན།།
                           ཤེལ་སྒོའི་ནང་ནས་བལྟ་ཆོག།

                           ཁྱོད་ཉིད་བླ་མ་ཡིན་ན།།
                           བླ་ཁྲིའི་སྟེང་ལ་བཞུགས་རོགས།།
                           ང་ཉིད་མེ་ཏོག་སེར་པོ།།
                           གཡོན་སྐོར་བྱས་ནས་འགྲོ་ཆོག།

                           ཁྱོད་ནི་ང་ལ་དགའ་ན།།
                           སྒོ་ལ་རྡོག་ཐོ་རྒྱག་རོགས།།
                           ང་ནི་ཁྱོད་ལ་དགའ་ན།།
                           འདན་བུ་ཕྱེ་སར་འོང་ཆོག།