རོགས་འཐེན་ཐོས་པ་ཀུན་སྨྲེང༌།
གཅིག
གནས་མཆོག་གྱུར་གངས་ཅན་ཡུལ་ལྗོངས། །
ཕྱིའི་འཛོམས་པ་གངས་ཀྱི་ར་བ། །
ནང་འཛོམས་པ་གདོང་དམར་བོད་པ། །
རི་མཐོན་པོ་ཕྱི་འཛོམས་ནང་འཛོམས། །
ཕྱིའི་འཛོམས་པ་བྲག་དང་ཤུག་པ། །
ནང་འཛོམས་པ་རྫ་ཆུ་བསིལ་མ། །
ཆུ་གཙང་མོ་ཕྱི་འཛོམས་ནང་འཛོམས། །
ཕྱིའི་འཛོམས་པ་ངང་སྐྱ་ངང་དམར། །
ནང་འཛོམས་པ་ཉ་དང་ཆུ་སྲམ། །
སྡེ་ཆེན་པོ་ཕྱི་འཛོམས་ནང་འཛོམས། །
ཕྱིའི་འཛོམས་པ་རྟ་ནོར་ལུག་གསུམ། །
ནང་འཛོམས་པ་རྒན་དར་གཞོན་གསུམ། །
རོགས་ཆུང་ལོ་ཕྱི་འཛོམས་ནང་འཛོམས། །
ཕྱིའི་འཛོམས་པ་ཡག་དང་ཕོ་སྒོ། །
ནང་འཛོམས་པ་ཁྲེལ་ཡོད་བློ་ལྡན། །
ཁྲ་ལམ་མེར་སྐར་ཚོགས་དཀྱིལ་ནས། །
དཀར་གསལ་ལེ་ཟླ་བ་ཤར་དུས། །
འཇམ་ཐང་ངེར་སྡེ་ཆེན་དཀྱིལ་ནས། །
འཛུམ་དམུལ་ལེ་ཞེ་མཐུན་རོགས་ལོས། །
རྟ་རྐྱང་རྒོད་འཕུར་ཤེས་ཞོན་ནས། །
སྐད་སང་སང་ལ་གཞས་ལེན་བཞིན། །
ངེད་ཚང་གི་འདབས་ལ་ཐོན་ཐལ། །
ང་རེམ་མ་སྔུན་ན་བུད་དེ། །
རོགས་ཆུང་ལོའི་རྟ་སྐེ་བླངས་ནས། །
ངག་འཇམ་པོས་འཚམས་འདྲི་ཞུས་ན། །
རོགས་ཆུང་ལོར་ཚིག་ལན་མེད་ཀི །
མ་ངེད་ཚོའི་སྐེ་ལ་འཐམས་ཐལ། །
ཁུག་གཡང་དཀར་ར་ཡི་འདབས་སུ། །
གདན་དཀར་པོ་དམར་པོ་བཏིང་ནས། །
རོགས་བློ་གྲོས་ཟླ་བ་ངེད་གཉིས། །
གོས་ཨ་འཇམ་ཚ་རུ་གོན་ནས། །
ཞེ་མཐུན་པའི་ཁ་བརྡ་བྱས་ན། །
ངའི་ཞེ་འགྲོགས་བློ་གྲོས་ཟླ་བས། །
མ་ཁྱོད་ཚོ་བདེ་སྐྱིད་གཞུང་རེད། །
ཕོ་ང་ཚོ་གསེར་ལུང་ཁོག་རེད། །
ཕྱོགས་གཉིས་སུ་སྨྲེང་ནས་ཅི་བྱེད། །
ཁྱིམ་གཅིག་ལ་སྨོན་ལམ་འདེབས་ཟེར། །
དགུང་ཨ་སྔོན་དབྱིངས་ཀྱི་འབྲུག་སྒྲ། །
བྱ་རྨ་བྱའི་ཡིད་ཀྱི་འདོད་རེད། །
རོགས་བློ་གྲོས་ངག་གི་གཏམ་སྙན། །
མ་ང་ཚོའི་སེམས་ཀྱི་འདོད་རེད། །
ཚིག་འགོ་མ་དཀོན་མཆོག་མནའ་བྱས། །
ཚིག་གཞུག་མ་ཉི་ཟླ་དཔང་བྱས། །
རོགས་བློ་གྲོས་སྐེད་ཀྱི་གྲི་ཆུང༌། །
མ་ང་ཚོའི་སྐེ་ཡི་རྒྱན་ཆ། །
བློ་མི་འགྱུར་གཉེན་གྱི་རྟགས་བརྗེས། །
གཉིས།
ཟླ་ལྔ་བའི་ཚེས་མགོ་ཞིག་ལ། །
ངའི་དྲིན་ཅན་ཕ་མ་གཉིས་ཀྱིས། །
ངའི་གཅེས་ཕྲུག་ཡུལ་ནས་མ་འདུག །
ལུག་གཡང་དཀར་རི་ལ་ཐེད་ཟེར། །
མ་ཀླད་མེད་ལས་ངན་ང་ཡིས། །
དོན་མ་གོ་ལུག་ཁྱུ་དེད་དེ། །
རི་མཐོན་པོའི་མགོ་ལ་བུད་ན། །
རོག
