དམར་ཆུང་སེམས་ཀྱི་གདུང་དབྱངས།
གཅིག
སྟོད་དབུས་གཙང་རུ་བཞི་མན་ཆད། །
སྨད་མདོ་ཁམས་སྒང་དྲུག་ཡན་ཆད། །
དབུས་ཚྭ་མཚོ་དཀར་མོའི་འདབས་ནི། །
ཕོ་ང་ཡི་ཕ་ས་ཕ་ཡུལ། །
ས་སྐྱིད་པོ་ཆོས་རྗེ་གཡང་ར། །
སྡེ་གཡང་སྐྱིད་རྨོག་དབུ་ཕྱུག་མོ། །
སྡེ་འདི་ལ་འཛོམས་གསུམ་འཛོམས་ཡོད། །
ཤར་ཕྱོགས་ན་ཝར་དབོན་དུང་རི། །
དུང་དཀར་པོའི་མཆོད་རྟེན་བཞེངས་འདྲ། །
ཆུ་རྨ་ཆུ་གཡས་ནས་བཞུར་ས། །
ཞིང་འབྲུ་དྲུག་གཡོན་ནས་སྨིན་ས། །
ཕྱུགས་རྐང་བཞི་མདུན་ནས་འཕེལ་ས། །
ལྷོ་ཕྱོགས་སུ་བཀྲ་ཤིས་འོད་དཀར། །
སེང་དཀར་མོས་གཡུ་རལ་ངོམ་འདྲ། །
དབྱར་གསུམ་ཆར་ཆུ་མོད་ས། །
སྟོན་གསུམ་མེ་ཏོག་བཀད་ས། །
དགུན་གསུམ་དྲོད་གྲང་རན་ས། །
ནུབ་ཕྱོགས་སུ་ཚྭ་མཚོ་དཀར་མོ། །
གནམ་ཨ་སྔོན་ཐང་ལ་ལྷུང་འདྲ། །
སྤྲིན་དཀར་དམར་གདན་ལ་བཏིང་འདྲ། །
ཆོས་མདོ་སྔགས་བསྟན་པ་དར་ས། །
ཕ་བླ་མས་ཆོས་མགུར་གསུང་ས། །
རྒན་མགོ་དཀར་ཚེ་ཐག་རིང་ས། །
གཞོན་སོ་དཀར་བློ་རིག་རྒོད་ས། །
ཆེ་བཀུར་ཆུང་བྱམས་ཡོད་ས། །
འཇིག་རྟེན་སྣང་བ་མཐུན་ས། །
ཕྱུགས་ལ་རྟ་ནོར་ལུག་གསུམ། །
ཞིང་ལ་གྲོ་ནས་སྲན་གསུམ། །
རོང་འབྲོག་དབྱེ་བ་མེད་ས། །
ཆབ་དཔལ་རིག་གསུམ་དར་ས། །
འཇིག་རྟེན་གནམ་གྱི་འོག་ན། །
འདིའི་ཡན་གྱི་ས་ཞིག་ཆེ་ཡོད། །
ས་སྐྱིད་པོ་ཆོས་རྗེ་གྲོང་ན། །
སྨན་བུ་མོ་མེ་ཏོག་རང་བཀད། །
ཡག་མོ་སྒོ་སེང་ལྕམ་འབྲུག་མོ། །
གཞུང་ཞེ་རྒྱུད་ལྷ་དར་དཀར་པོ། །
བརྒྱ་ཡོད་རུང་བཙལ་འདོད་ང་མེད། །
ངའི་གངས་དཀར་སེམས་ཀྱི་ནོར་བུ། །
ཁྲ་ཆུང་མིག་གི་བཅུད་ལེན། །
ས་སྨད་ཕྱོགས་ཆབ་ཆ་གྲོང་གི །
རོགས་སྙིང་མཐུན་གཡུ་ཟླ་སྒྲོལ་མ། །
གཟུགས་སྐྱེས་ལུས་ཚིགས་དྲུག་སྨྱུག་མ། །
ཡག་མོ་སྒོ་རྗེ་བཙུན་སྒྲོལ་མ། །
སོ་སུམ་ཅུ་མུ་ཏིག་བརྒྱུས་མ། །
མིག་ཁྲ་ཆུང་སྐར་ཆུང་ཆ་མ། །
ཚིག་གང་བཤད་སྐྱབས་མགོན་མགུར་མ། །
སེམས་དམར་ཆུང་འགུགས་པའི་གཞི་མ། །
ཁྱོད་མིན་པ་བསམ་རྒྱུ་ང་མེད། །
ཁྱོད་མིན་པ་གླེང་རྒྱུ་ང་མེད། །
ཕོ་ང་དང་གཡུ་ཟླ་སྒྲོལ་མ། །
རིག་པའི་ལྡིང་ཁང་ནང་ནས། །
ལོ་གསུམ་ལ་ལུས་སེམས་འགྲོགས་ན། །
སྦྱོང་མི་དགོས་འཇིག་རྟེན་སྣང་བ། །
བློ་རིག་པས་མ་སྦྱངས་ཤེས་ཐལ། །
