༄༅། །ལྷོ་ཁ་ས་ཁུལ་གྱི་དམངས་གླུ་ལས་འཚོ་བའི་གླུ།

བསམ་ཡས་དབུ་རྩེ་རིགས་གསུམ།
བུ་མོའི་ལས་ལ་གཟིགས་དང་།
བུ་མོའི་ལྟོ་གོས་གཏམ་གསུམ།
དབུ་རྩེ་བཞེངས་པར་ཟད་སོང་།

སེམས་པ་སྐྱོ་རྒྱུ་སྐྱོ་བྱུང་།
མ་སྐྱོ་མདོག་མདོག་བྱས་ཡོད།
ཨ་མ་དྲན་རྒྱུ་དྲན་བྱུང་།
མ་དྲན་མདོག་མདོག་བྱས་ཡོད།

ཨ་མས་མེ་ཅིག་ཐོངས་དང་།
ང་རས་ཆུ་ཅིག་བླངས་ཆོག
ཨ་མ་ང་གཉིས་སྐྱོ་རོགས།
ཐབ་རྡོ་གསུམ་པོས་བྱས་ཡོང་།

ལུས་ལ་ཤིག་གཅིག་བརྒྱབ་བྱུང་།
གྲོགས་པོ་གྲོགས་མོས་བསྒྲུགས་བྱུང་།
སེམས་པའི་ནང་གི་སྡུག་བསྔལ།
གྲོགས་པོ་གྲོགས་མོས་མ་ཤེས།

བྱ་ཞིག་ཡིན་ན་བསམས་བྱུང་།
བྱིའུ་ཞིག་ཡིན་ན་བསམས་བྱུང་།
ཕ་ཡུལ་ཨ་མའི་ཕྱོགས་ལ།
འཕུར་རྒྱུ་བྱུང་ན་བསམས་བྱུང་།

བྱམས་སྐྱོང་ཕ་མས་གནང་དུས།
བྱམས་སྐྱོང་ཡིན་བསམས་མ་བྱུང་།
བྱམས་སྐྱོང་མི་ལ་རེ་དུས།
ཆུ་ལ་འོ་མ་དྲོ་བྱུང་།

སེམས་པ་སྔ་སྐྱོ་ད་སྐྱོ།
ད་ལོའི་ལོ་ནས་སྐྱོ་བ།
ང་རང་སྐྱོ་བས་མ་ཚད།
ནམ་མཁའི་བྱ་ཡང་སྐྱོ་སོང་། རོང་གི་གླང་མ་འཕྲང་ལ།
མཐོང་རྒྱུ་གནམ་ལས་མི་འདུག
གནམ་ལ་འཁོར་བའི་སྤྲིན་པ།
ཡབ་ཡུམ་ཡིན་བསམས་ཡོང་གིས།

སྐྱིད་པོའི་བཀའ་བློན་སྦུག་ལ།
སིམ་སིམ་གཉིད་ཅིག་ཉལ་པས།
ཡབ་ཡུམ་སྐུ་དྲིན་ཅན་པ།
གཉིད་ལམ་ནང་དུ་མཇལ་བྱུང་།

སྐྱིད་པོའི་ཆོས་ལ་སྡོད་དུས།
སྡུག་པོ་བླ་མས་བཏང་བྱུང་།
བླ་མ་ནད་མནར་ཤི་རྒྱུ།
སྐྲ་ལོ་སྐྱིན་པ་འཁྱེར་ཤོག

ལས་ལ་ལྷ་ཆོས་བྱས་ནས།
སངས་རྒྱས་དགྲ་ལ་ལངས་ན།
གནས་ཆེན་དབེན་པའི་རི་ཁྲོད།
འགྲིམ་དང་མ་འགྲིམ་མི་འདུག

ཅ་ག་ཨ་མས་བྱས་པའི།
ལུས་པོ་ཤ་ཁྲག་ཕུང་པོ།
དབང་ཆེན་མི་ཡི་དཔོན་པོས།
བེད་སྤྱོད་གཏོང་བ་གནང་སོང་། ཙི་ཙིས་ཞིང་ཁ་བཟས་ནའི།
སྐྱིན་པ་ལེན་ས་མི་འདུག
དཔོན་པོས་སྐྱག་རྫུན་བཤད་ནའི།
མ་རེད་ཞུ་ས་མི་འདུག

སྐར་གླིང་བ་ཚྭ་བུལ་ཐལ།
རྒྱལ་སྲས་རླུང་བུས་འཁྱེར་སོང་།
སྒང་སྦྲའི་ཡུམ་ཆེན་ཨ་མ།
འཚོ་བ་ག་ནས་སྐྱེལ་འགྲོ།

གནམ་ལ་འཕུར་བའི་དཀྱིལ་ནས།
བྱིའུ་ལས་ཆུང་བ་མི་འདུག
སྤུན་མཆེད་རྒན་གཞོན་ནང་ནས།
ང་ལས་སྐྱོ་བ་མི་འདུག

ཨ་མས་སྟག་ལུང་གཞུང་ནས།
བག་ཐུག་འཇིབས་རིལ་བསྐུར་བྱུང་།
བག་ཐུག་རེ་རེ་ཟ་དུས།
མིག་ཆུ་རེ་རེ་ཤོར་བྱུང་།

ནམ་དེ་མ་ལངས་གོང་ནས།
ཉི་མ་ཤར་གྱི་ཡོད་ན།
དཔོན་ལ་ཐུག་ཁག་མི་འདུག
གཡོག་པོས་མ་འདྲ་ཞུས་བཞག

ང་རའི་བལྟ་ཕྱོགས་ཡིན་ནམ།
སྐར་མའི་ཤར་སྟངས་ཡིན་ནམ།
ད་ལོའི་ཐོ་རེངས་སྐར་ཆེན།
རོང་གི་གཏིང་ནས་ཤར་བྱུང་།

སེམས་པ་འབྲུ་ཕུང་བརྡལ་བརྡལ།
ང་རས་བྱས་ན་བསམས་བྱུང་།
ལུས་པོ་གྲོ་ཡོས་བརྔོ་བརྔོ།
དབང་ཆེན་དཔོན་པོས་བརྔོས་བྱུང་།

ལྕགས་ཟམ་མཆེ་བ་རི་ལ་།
སྐོར་ར་ལམ་གསུམ་བརྒྱབ་ནའི།
ད་དུང་སྒྲིབ་པ་མ་དག
ཡི་དྭགས་སྐྱེ་བ་བླངས་བྱུང་། དཀའ་བ་སྤྱད་ཀྱང་སྤྱད་ཡོད།
དཀའ་བ་ཆོད་ཀྱང་ཆོད་སོང་།
དཀའ་བ་སྤྱད་པའི་ལུས་པོ།
བྱ་མོའི་སྒྲོ་ལས་ཡང་ང།

སྐལ་བ་ཡིན་པ་ཨེ་རེད།
བསྐོས་བཞག་ཡིན་པ་ཨེ་རེད།
བྱིའུ་ཆུང་འཇོལ་མོའི་སྡོད་ས།
ཤིང་ལས་འཚེར་མ་འཇམ་པ།

གཙང་གི་ཁ་རག་ལ་མོ།
དབུས་ཀྱི་གམ་པ་ལ་མོ།
ལོ་མོ་འདི་གཉིས་མེད་ན།
དབུས་གཙང་ཇ་ཁུག་མགོ་སྦྲེལ།

རྩམ་པ་ཕྱེ་ཟོ་གང་གི།
བརྟེན་ས་ང་ལ་མེད་དའི།
གནས་བཟོད་རྐྱང་ཐང་ན་ཁའི།
བ་མོ་ལས་ཀྱང་བདེ་བ།
                                  
རི་མགོ་མཐོ་པོའི་གྲིབ་གཟུགས།
རི་ཆུང་ང་ལ་ཕོག་བྱུང་།
རི་མགོ་འདྲ་འདྲ་ཡོད་ན།
གྲིབ་གཟུགས་ཕོག་དོན་མི་འདུག གནམ་ལ་སྤྲིན་པ་འཁོར་སོང་།
ཉི་མ་མ་སྐྱིད་ཚར་སོང་།
ནང་ལ་མནའ་མ་སླེབས་སོང་།
བུ་མོ་མ་སྐྱིད་ཚར་སོང་།

ཨ་མ་ལགས་ཀྱི་བཀའ་བཀྱོན།
དམར་པོའི་མེ་ལས་ཚ་བ།
བུ་མོ་ང་རའི་ངང་རྒྱུད།
སྔོན་མོའི་ཆུ་ལས་རིང་བ།
སེམས་པ་སྐྱོ་ཡང་མི་སྐྱོ།
གང་གི་དོན་དུ་སྐྱོ་ག།
ལྟོ་གོས་མུན་པ་ནག་པོ།
དབང་ཆེན་དཔོན་པོས་གནང་བྱུང་།

ང་རས་མི་ཡི་ལུང་པར།
གཉོམ་ལ་ཆུང་ཆུང་བྱས་པས།
བོང་བུ་རྭ་མེད་ཅིག་གིས།
རྡུང་ལ་ཤག་ཤག་བྱས་བྱུང་།

སྐྱིད་ཡས་རང་ཡུལ་སྐྱིད་པ།
མི་ཡུལ་ལས་ལ་བསྐོས་སོང་།
བྱམས་ཡས་ཨ་མ་བྱམས་པ།
མ་གཡར་ལས་ལ་བསྐོས་སོང་།

གོས་ལ་ལྷན་པ་ཕོག་སོང་།
འབའ་མཐུག་འབེ་མཐུག་②ཤར་སོང་།
སྤུན་བཀྱག་བལྟ་བ་མཐོ་པོའི།
ཞབས་འདྲེན་མ་ཞུས་ཆོག་ཀ། དབྱར་སྟོད་ཟ་པོ་བཟས་ཡིན།
དབྱར་སྨད་སེ་འབྲུ་བཟས་ཟིན།
ད་ལོའི་ལོ་ཡག་ལྗང་པའི།
ངོ་སོ་འཁྱེར་དགོས་མེད་དོ།

སྐྱིད་ཡས་ཕ་ཡུལ་སྐྱིད་ནའི།
མི་ཡུལ་འགྲིམ་དགོས་ཐུག་སོང་།
དྲིན་ཅན་ཕ་མ་གཉིས་པོས།
ང་ལ་ཕྱིར་མིག་གཟིགས་དང་།

ལྕགས་ཟམ་གནས་རི་མཐོ་པོ།
ཉི་མ་ཤར་རྒྱུ་དཀོན་པ།
ཨོ་ལོ་ང་རའི་རྐང་པ།
དཀར་པོའི་འཁྱགས་ལ་ཤོར་སོང་།

ལས་ལ་དཀའ་བ་འདུག་དའི།
ལས་ཡུས་ཤོད་ས་མི་འདུག
ལས་ཡུས་ཤོད་སའི་ཕ་མ།
ས་ཐག་འགྱངས་ནས་བཞུགས་ཡོད།

ཨ་མ་མ་གཡར་ཅིག་གིས།
མ་འདོད་མདོག་མདོག་གནང་བྱུང་།
ལྡེ་མིག་མེད་པའི་སྒོ་ལྕགས།
ང་ལ་འབྱེད་དགོས་ཟེར་གྱིས། རི་མགོ་མཐོ་པོའི་དར་ལྕོག
གཡུག་གཡུག་ངང་ནས་ཟད་སོང་།
ཨོ་ལོ་མི་གཡོག་རྒྱུག་མཁན།
རྒྱུག་རྒྱུག་ངང་ནས་ཟད་སོང་།

ཉིན་མོ་ཉི་མས་བསྐྱལ་འགྲོ།
ཟླ་བ་ཟླ་བས་བསྐྱལ་འགྲོ།
ཨོ་ལོ་མི་གཡོག་རྒྱུག་མཁན།
མི་ཚེ་སྡུག་གིས་བསྐྱལ་འགྲོ།

སེམས་པས་གཡས་བསྐོར་བརྒྱབ་ཡོད།
ལུས་པོས་གཡོན་བསྐོར་བརྒྱབ་ཡོད།
གདན་ལྕོག་གྲུ་བཞིའི་སྟེང་དུ།
འཛོམས་པའི་སྨོན་ལམ་བརྒྱབ་ཡོད།

མ་ཤི་མི་ཡུལ་ཁམས་ལ།
གང་དགའ་གང་སྐྱིད་གནང་ཞུ།
ཤི་ནས་བྲག་སྟོད་སྟེང་དུ།
རྒོད་པོའི་མགོ་སྐོར་ཡིན་འགྲོ།

ཁྱེད་ཀྱིས་ནང（ཁྱིམ）གི་གཙོ་བྱས།
ང་རང་བྱིས་པ་ལོ་བརྒྱད།
རང་མགོ་མ་ཐོན་བར་དུ།
བྱམས་སྐྱོང་གནང་རོགས་གནང་དང་།

ཤར་གྱི་སྤྲིན་པ་དཀར་པོ།
བརྒྱབ་པའི་ལྷན་པ་མ་རེད།
ཉི་མ་སྤྲིན་པའི་འོག་ནས།
དྭངས་པའི་དུས་ཤིག་ཤར་ཡོང་།

སྤ་མ་བ་ལུའི་དཀྱིལ་ལ།
འུར་རྡོ་བསྐྱོན་པ་མ་གནང་།
བྱིའུ་ཆུང་ཨ་མ་མེད་པ།
བ་ལུའི་དཀྱིལ་ལ་བསྡད་ཡོད།  ཁ་ཅིག་སྐོམ་པའི་དུས་སུ།
ཆུ་ཅིག་སྟེར་མཁན་བྱུང་ན།
ཕ་ཡུལ་སྐྱིད་པོར་སླེབས་དུས།
ཆུ་ལན་ཆང་གིས་འཇལ་ཆོག

ཨ་མ་ང་ལ་བྱམས་ན།
ང་ལ་ལྷ་ཆོས་ཞུ་རོགས།
འཇིག་རྟེན་སྲིད་པའི་ལས་དེ།
དམྱལ་བའི་འཕྲང་ལས་ཁག་ཀ།

སེམས་པ་སྐྱོ་བའི་སྐད་ཆ།
རི་བོ་ཡེ་ལ་བཤད་པས།
རི་བོ་ས་རྡོ་ཡིན་ནའི།
དབུ་ཡིས་ལྕོག་ལྕོག་གནང་བྱུང་།

ཊམ་ཀ་བརྒྱ་ཡི་བུ་ལོན།
ཤ་ཁྲག་ལུས་པོས་འཇལ་ཡིན།
མི་ལོ་བཅུ་གཉིས་རིང་ལ།
བྲན་གཡོག་རྒྱུག་དགོས་ཤར་བྱུང་།

ང་ནི་མི་ཡུལ་ལུས་སོང་།
སེམས་པ་ལྷགས་པས་འཁྱེར་སོང་།
ནམ་མཁའི་བླ་མ་དཀོན་མཆོག
རང་ཡུལ་ཕྱོགས་ལ་སྐྱོལ་དང་།

ཆུ་མོ་ཡིན་ན་དགའ་ལ།
འགྲོ་སྙིང་གང་འདོད་ཕྱིན་ཆོག
བུ་མོ་མི་ཡི་གཡོག་པོ།
འགྲོ་བའི་དབང་ཆ་མི་འདུག

ཉི་མ་ཤར་བའི་ཐོག་མ།
བྲག་སྟོད་ཡེ་ལ་ཤར་སོང་།
ང་ནི་བྲག་སྟོད་ཡ་གིའི།
ཐང་དཀར་ཡིན་ནའི་དགའ་ལ།

ཐོ་རེངས་སྐར་ཆེན་ཟེར་བ།
རྫུན་མ་གཡོ་སྒྱུ་ཅན་འདྲ།
ཟླ་བ་ཡིན་ན་ཆུང་སོང་།
སྐར་མ་ཡིན་ན་ཆེ་སོང་།

མི་ཚོ་འགྲོ་གིས་བསམས་བྱས།
བསམ་ཡས་ཨར་པོར་ཕྱིན་པས།
ལུས་པོས་ས་རྡོ་མ་འཁྱོག
པུས་མོས་འདར་གསིག་བརྒྱབ་བྱུང་།

ཆོས་དེ་པད་མ་བཀའ་ཐང་།
བུ་མོར་གཡར་རོགས་གནང་དང་།
བུ་མོར་ཆོས་སྐལ་ཡོད་མེད།
བཀའ་ཐང་ནང་ནས་གསལ་ཡོང་།

ཁྱེར་རང་ཆོས་ལ་ཐད་མཁན།
ཆོས་འགོ་ཐོན་པ་གནང་རོགས།
ང་རང་མི་གཡོག་རྒྱུག་མཁན།
དགེ་བའི་ལས་ལ་འབད་ཆོག བསམ་ཡས་གཡས་ལ་བཞེངས་ཡོད།
མཆིམས་ཕུ་གཡོན་ལ་ཆགས་ཡོད།
བསམ་ཡས་མཆིམས་ཕུའི་བར་ལ།
བུ་ཚལ་གསེར་གྱི་བྱ་ཆུང་།

རྒྱ་གར་གནས་རི་མཐོ་བ།
ཙན་དན་ནགས་གསེབ་སྐྱིད་པ།
ཡིན་ནའི་ཆོས་འཁོར་ལྷ་ས།
ཡིད་ལ་ཡང་ཡང་འཁོར་བྱུང་།

ཆུང་དུས་ཕ་མས་གསོས་བྱུང་།
ཕ་མ་བཀའ་དྲིན་ཆེ་བྱུང་།
ད་ནི་རང་མགོ་ཐོན་སོང་།
ཕ་མའི་བཀའ་དྲིན་འཇལ་ཆོག

འཇམ་པོའི་ལུ་གུའི་བལ་གྱི།
གོས་ཅིག་གོན་རྒྱུ་བྱུང་ན།
སྐྱིད་སྡུག་ལྷན་པའི་འོག་ནས།
ལྷོགས་པའི་དུས་ཅིག་ཤར་ཡོང་།

ཐོ་རེངས་བྱ་ཕོའི་བྱ་སྐད།
སྙན་པོ་ག་ལ་ཟེར་བ།
ཨོ་ལོ་མི་ཡི་གཡོག་པོ།
ལོངས་ཤོག་ཟེར་མཁན་ཡིན་པ།

དཀའ་བ་འདི་ལ་སྦྱང་སྦྱང་།
དམ་པའི་ཆོས་ལ་སྦྱངས་ན།
ད་ཚོད་ཤཱཀྱ་ཐུབ་པའི།
གྲལ་འགོ་ཡེ་ལ་སླེབས་ཡོད།

གཡོག་ལ་ལོ་གསུམ་བསྡད་པས།
གཡོག་གོས་པུ་ཤུད་ཁྲ་ཁྲ།①
གཡོག་མཁན་ངོ་ཡང་མ་ཚ།
གོན་མཁན་སེམས་པ་སྐྱོ་བྱུང་།

ལ་དེ་གམ་པ་ལ་མོ།
བསོད་ནམས་ཡིན་ནའི་ཆེ་སོང་།
དཔལ་དིའི་སྟོང་ཆེན་བཅོ་བརྒྱད།
མི་ཚེ་ཡིན་ནའི་རིང་སོང་། རླུང་རྟ་ཡར་འགྲོའི་དུས་ལ།
མ་ལས་དཔོན་པོ་བྱམས་པ།
རླུང་རྟ་མར་འགྲོའི་དུས་ལ།
ཁྱི་ལས་ཞི་མི་སྡང་ང་།

མ་ཤི་མི་ཡུལ་ཁམས་ལ།
སྙན་པོའི་གླུ་ཅིག་ཐོངས་ཤོག
ཤི་ནས་དམྱལ་བའི་ཡུལ་ལ།
སྙན་གླུ་གཏོང་དབང་མི་འདུག

བསམ་ཡས་རྒྱལ་སྒོའི་ནང་གི།
ནམ་མཁའི་བྱ་དེ་དཀར་པོ།
ང་ལ་གནོད་མཁན་མི་དེ།
ཡོས་ཏོག་སྒྲུག་སྒྲུག་སྒྲུགས་དང་།

པད་མ་དཀར་པོའི་སྡོང་པོ།
རིན་ཆེན་གསེར་ལས་དཀོན་པ།
ཕ་མས་གནང་བའི་བསླབ་བྱ།
རྒྱལ་བའི་བཀའ་ལས་ལྷག་ཀ། མ་བྱུང་བུ་མོས་ཕྱིན་ཆོག
ནང་བཀྲ་ཤིས་པ་གནང་དང་།
གྲོད་ཁོག་ཆེན་པོས་ཕྱིན་ཆོག
ཕྱུག་པོ་ཡོང་བ་གནང་དང་།

སེང་གེ་རི་ལ་བཞུགས་པའི།
དགེ་སློང་ནམ་མཁའི་སྙིང་པོ།
འཇིག་རྟེན་བློ་ལ་མི་འདུག
སྐྲ་ཕུད་བཞེས་རོགས་གནང་དང་།

བསམ་བློ་གང་འདྲ་བཏང་ནའི།
དྲན་རྒྱུ་གླུ་ལས་མི་འདུག
ཤི་ནས་བར་རྡོའི་འཕྲང་ལ།
གླུ་ཡི་མཆོད་པ་ཕུལ་ཆོག

སྐར་མ་སྨིན་དྲུག་ཤར་སའི།
ལ་རྩེ་ཡེ་ནས་ཡོང་པས།
འཇག་མ་ཤུ་གླུ་གཏོང་སའི།
ལུང་ཆུང་འདི་ལ་སླེབས་སོང་།
དཔོན་པོའི་ཞབས་ཕྱི་ཞུ་བར།
ལས་སུ་སླ་པོ་མི་འདུག
ལགས་སོ"རྡི་རིག"དགོས་ཀྱིས།
གྲོད་ཁོག་ཞིམ་གྲོད་དགོས་ཀྱིས།

བདེ་བ་སྡུག་བསྔལ་མེད་པ།
ལྷ་སའི་དགའ་ལྡན་གཏམ་ཡོན།
ལུས་ཀྱི་རས་གོས་རལ་ནའི།
སྡེ་པ་གཞུང་གིས་གཡོགས་ཡོང་།

བཟང་པོ་སེམས་ལ་བཞག་ནས།
ཙི་ཙིས་གླང་ཆེན་འགྱོགས་ཀྱིས།
ངན་པ་སེམས་ལ་བཞག་ནས།
ཀྲག་པས་དགྲ་ཤ་ལེན་གྱིས།

སེམས་པ་དགོས་ན་ཕུལ་ཆོག
ལུས་པོས་ལྕོགས་ས་མ་རེད།
ལུས་པོ་དབང་ཆེན་དཔོན་པོའི།
ཕྱག་ཐོའི་ནང་ལ་ཚུད་སོང་།

སྐྱེ་བ་གཅིག་ནི་སྔ་སོང་།
སྐྱེ་བ་གཅིག་ནི་ཕྱིས་སོང་།
སྐྱེ་བ་སྔ་མིན་ཕྱི་མིན།
ཡོང་རྒྱུ་མེད་ན་དགའ་ལ།

དཔོན་པོ་རི་བོ་ཡིན་ཟེར།
མ་འགྱུར་གཏན་དུ་བཞུགས་དང་།
ང་ཚོ་རི་དྭགས་ཡིན་ཟེར།
གཡས་བསྐོར་བརྒྱབ་ནས་སླེབས་ཡོང་།

སེམས་པ་སྐྱོ་བའི་སྐད་ཆ།
སུ་དང་གང་ལ་མ་ཤོད།
དགྲ་གཅིག་ཡིན་ན་དགའ་འགྲོ།
གཉེན་ཞིག་ཡིན་ན་སྐྱོ་འགྲོ། སྟག་གི་བཞུགས་གདན་སྟེང་ལ།
གཟིག་གི་དཔོན་པོ་བཞུགས་ཡོད།
ཕྱི་ཡི་དགྲ་བོ་ཐུལ་སོང་།
ནང་གི་བསམ་དོན་གྲུབ་སོང་།

འགྲོ་ལ་འགྲོ་སྟངས་བྲལ་སོང་།
ལྷམ་ཆུང་སེང་གེའི་འབག་རེད།
སྡོད་ལ་སྡོད་སྟངས་བྲལ་སོང་།
ནང་གཟན་འཁྲུ་བཤལ་ཁ་རེད།

བསམ་བློ་མ་བཏང་དྲག་ཀ།
བཏང་ན་སེམས་པ་སྐྱོ་བ།
སེམས་པ་སྐྱོ་བའི་མི་གཡོག
རྒྱུག་དགོས་མེད་ན་དགའ་ལ།

བུ་མོ་ང་ལས་སྡུག་པ།
དམྱལ་བའི་ཡུལ་ལའི（ལའང）མི་འདུག
ལྟོ་གོས་གནམ་ནས་ཟགས་ནའི།
ཐུ་ལ（བ）བཟེད་ལོང（ཁོམ）མི་འདུག

ཕ་མ་ཤི་བ་སྔ་སོང་།
རང་མགོ་ཐོན་པ་ཕྱིས་སོང་།
ནམ་མཁའི་བླ་མ་དཀོན་མཆོག
རང་མགོ་འདོན་རོགས་གནང་དང་།

ཕ་མ་གསེར་ལས་ལྷག་པ།
མི་རྟག་འཆི་བས་ཁྲིད་སོང་།
གསེར་གྱི་བཞུ་མར་འཁྱེར་ཤོག
ཕ་མ་འཚོལ་བར་འགྲོ་དགོས།

ཕ་མས་གཡོག་ལ་བསྐྱལ་བྱུང་།
ཕ་མ་ངེས་པ་གནང་ཤོག
གཡོག་གླ་བྲེ་གང་མེད་པ།
སྦྱིན་བདག་ངེས་པ་གནང་ཤོག

སེམས་པ་སྔོན་ལ་སོང་ཞིག
ལུས་པོའི་སྡོད་ས་འཚོལ་ཞིག
ལུས་པོས་སྡེ་པ་གཞུང་གི།
གཡོག་གཞུག་བསྐྱལ་ནས་སླེབས་ཡོང་།

སྤྲང་ཀོ（པོ）རྒྱལ་ཁམས་སྐོར་མཁན།
ཕ་ཡུལ་ཤོད་ཤོག་ཟེར་གྱིས།
ཕ་ཡུལ་ཤོད་རྒྱུ་ཡོད་ན།
རྒྱལ་ཁམས་སྐོར་དགོས་མི་འདུག

ཨ་ཕ་ཨ་མ་མེད་པའི།
བུ་ཆུང་ཚེ་རིང་འབྲུག་རྒྱལ།
འགྲམ་པ་ས་ལ་སྦྱར་ནའི།
སྔས་མགོ་མཐོ་འདུག་ཟེར་གྱིས།

རྒོད་དཀར་ལ་མོ་རྒྱག་དུས།
རྟ་གཅིག་ཡོད་ན་དགའ་ལ།
ཆོས་འཁོར་ལྷ་སར་སླེབས་དུས།
ཕ་མ་ཡོད་ན་སྐྱིད་ལ། ས་གཞི་ཉི་མས་དྲོས་སོང་།
སྤྲིན་པས་བར་ཆད་མ་གཏོང་།
སྐྱིད་པའི་སྐྱིད་འགོ་ཚུགས་སོང་།
ཚེ་ལ་བར་ཆད་མ་གཏོང་།

གམ་པ་ལ་མོས་གཙོ་བྱས།
རི་ལ་རི་རྒྱུད་ཡོག་རེད།
དྲིན་ཅན་ཕ་མས་གཙོ་བྱས།
གཉེན་ལ་གཉེན་རྒྱུད་ཡོག་རེད།

ཙ་རི་ཡུལ་སྟོད་ཡུལ་སྨད།
ཤྭ་བ་ཡིན་ན་དགའ་ལ།
ཕྱི་ལ་དགྲ་ནི་མི་འདུག
ནང་ལ་རྩྭ་ཆུ་འཛོམས་པ།

སྔར་བྱས་ཕ་མ་བཟང་པོའི།
གོ་ཁའི་མེ་ཏོག་ཞུས་ཡིན།
ཕ་མ་སྐུ་ཚེ་ཐུང་སོང་།
མེ་ཏོག་འཁོར་བར་འཁྱམས་སོང་།

དགའ་པོ་སྐྱིད་པོ་བྱེད་ན།
ང་ཡག་ཁྱེད་ཡག་དགོས་ཀྱིས།
སྣམ་བུ་སྤུ་ཕྲུགས་འཐག་ན།
རྒྱུ་གཙང་སྤུན་གཙང་དགོས་ཀྱིས། ཆུང་ཆུང་ཆུང་ནས་གཤིབ་པའི།
གྲོགས་པོ་མི་གཅིག་ལུས་གཅིག
གཤིབ་ནས་སྡུག་ཏུ་མ་གཏོང་།
ལུང་པའི་མི་ལ་ངོ་ཚ།

ང་ལ་ཇ་ཡང་མི་དགོས།
ང་ལ་ཆང་ཡང་མི་དགོས།
དྲིན་ཅན་ཕ་མ་མཐོང་སའི།
ལ་རྩེ་ཡེ་ལ་སྐྱེལ་རོགས།

སྟོད་ཁོག་གླུ་ཡི་རྫོང་རྫོང་།
སྨད་ཁོག་ཞབས་བྲོའི་རྫོང་རྫོང་།
སུག་བཞི་ཡན་ལག་བཞི་པོ།
འཇིག་རྟེན་ལས་ཀྱི་རྫོང་རྫོང་། ཡར་གིའི་བདེ་བ་ཅན་དེ།
སྐྱིད་པོ་རང་དའི་ཨེ་ཡོད།
ཚད་ལྡན་བླ་མ་ཚོ་ཡང་།
ཕྱི་ལྟས་སློག་ནས་ཕེབས་ཀྱིས།

མར་གིའི་དམྱལ་ཁམས་བཅོ་བརྒྱད།
སྡུག་པོ་རང་དའི་ཨེ་ཡོད།
དབང་ཆེན་དཔོན་པོ་ཚོ་ཡང་།
འཚང་ཁ་ཤིག་ཤིག་ཕེབས་ཀྱིས།

ཕ་མས་བཏགས་པའི་མིང་ལ།
གཡུ་ཆུང་སྒྲོལ་མ་བཏགས་བྱུང་།
གཡུ་ཅིག་འདོགས་རྒྱུ་བཞག་ནས།
གཡུ་ལུང་ཉར་རྒྱུ་མ་བྱུང་།

ཕྱུག་པོ་ཨེ་ཡོང་བསམས་ནས།
ལྷོ་ཚོང་བྱང་ཚོང་བརྒྱབ་ཡོད།
བུ་ལོན་ལེན་དགོས་བྱུང་ན།
ཚོང་པ་བྱས་ནས་གང་ཡོང་།

ང་གཉིས་སྤུན་མཆེད་གཉིས་པོ།
ལས་ལ་ཧུར་ཐག་གནང་ཤོག
ལུས་ལ་པ་ཊའི་རི་མོ།
ཡོང་བའི་དུས་ཤིག་ཤར་ཡོང་།

ཆོས་ཅིག་བྱེད་དགོས་བསམས་ནས།
གོ་ནག་རི་ལ་འཛེགས་ཡིན།
ཆོས་ཀྱི་སྐལ་བ་མེད་འདྲ།
ཡར་ཀླུང་གཞུང་དུ་སླེབས་སོང་།

ལྟ་བ་ཨ་མས་མ་བཅག
ལྟ་བ་ཨ་ཕས་མ་བཅག
ལྟ་བ་ལན་ཆགས་ཕྲུ་གུས།
སྟར་ཁ་བཅོག་བཅོག་བཅག་བྱུང་། ང་ཚོ་ཕ་མ་སྤུན་མཆེད།
ཆོས་ཀྱི་པུ་ཏི་བརྩིག་བརྩིག
མཆོད་གཤོམ་འཁོར་བར་འཁྱམས་ཏེ།
ང་རང་གཅིག་པུ་ལུས་སོང་།

ཨ་མའི་ཁ་ལ་མ་ཉན།
ལ་མོའི་རྒྱབ་ལ་ཕྱིན་པས།
ལ་རྒྱབ་སྤྲིན་པའི་བར་ནས།
ཨ་མའི་ལག་གཡོག་བརྒྱབ་བྱུང་།

མ་གཞི་ལོ་ལ་བལྟས་ན།
རྒན་པ་རང་ནི་མིན་དའི།
ལྟོ་གོས་ཐག་ཧྲུལ་ཅན་དེས།
ལུས་པོ་འུབ་ཆད་ཐེབས་སོང་།

གྲམ་མདའ་གྲང་བའི་སྒང་ལ།
གྲང་རོགས་ཡར་འབྲོག་གཡུ་མཚོ།
ཤར་གཞི་སྐྱོ་བའི་སྒང་ལ།
སྐྱོ་རོགས་བྲག་རི་ཁ་སྤྱར། ཐུགས་རྗེ་ཆེ་བ་གནང་བྱུང་།
བཀའ་དྲིན་ཆེ་བ་གནང་བྱུང་།
ཐུགས་རྗེ་ཆེན་པོའི་བཀའ་དྲིན།
ངང་གིས་ངང་གིས་འཇལ་ཆོག

ང་ཚོ་སྤུན་མཆེད་ཆ་རེད།
ལྗང་ཕྲུགས་སྣེ་ལྔ་ཆ་རེད།
ལྗང་ཕྲུགས་ཆུ་ལ་བཀྲུས་ནའི།
ཚོས་གཞི་ལོག་ས་མ་རེད།

ཆོས་དེ་སྐྱིད་པོ་འདུག་གས（གམ）
ང་ཡང་ཆོས་ཅིག་བྱེད་གོ（དགོས）
ཨ་ཅེ་སྣང་སའི་ཆོས་ལ།
ང་ཡང་སྐྱོ་བ་སྐྱེས་བྱུང་།

ཕུ་ཡི་གངས་རི་དཀར་པོ།
མཐོང་དུས་ཕ་ཡུལ་དྲན་བྱུང་།
གནམ་ལ་སྐར་མ་ཤར་དུས།
དྲིན་ཅན་ཕ་མ་དྲན་བྱུང་།

དབྱར་ཟླ་བརྒྱད་པ་ཤར་སོང་།
སེ་བའི་མེ་ཏོག་བོ་སོང་།
ཕ་མ་མེད་པའི་བུ་ཆུང་།
སེམས་པ་གཏིང་ནས་སྐྱོ་བྱུང་།