༄༅༎ཨ་ཁུ་སྟོན་པ་འཕན་ཡུལ་དུ་ཕེབས་པ།

ད་ནི་སྐབས་སུ་བབས་པ་ཨ་ཁུ་སྟོན་པ་འཕན་ཡུལ་དུ་ཕེབས་པའི་སྐོར་དེ་འབྲི་བ་ལ། ཨ་ཁུ་སྟོན་པ་ནི་བློ་རིག་བཀྲ་ལ་སྤྱང་གྲུང་ལྡན་པའི་མི་ཞིག་ཡིན་པ་དེ་བོད་མི་ཀུན་གྱིས་ཁས་ལེན་ཞུ་ཡི་ཡོད་ནའང་རང་ཅག་འཕན་པོའི་ཡུལ་འདིར་སྔར་ཆོས་རྒྱལ་མེས་དབོན་རྣམ་གསུམ་གྱི་དུས་ནས་འཕན་ཡུལ་རིག་པའི་འབྱུང་གནས་ཞེས་དམངས་ཁྲོད་དུ་ཡོངས་གྲགས་ཡིན་པ་དེ་ཉིད་སྤྱང་གྲུང་ལྡན་པའི་ཨ་ཁུ་སྟོན་པ་འཕན་ཡུལ་དུ་ཕེབས་མ་ཐུབ་པའི་གཏམ་རྒྱུད་དེ་ལས་སླར་ཡང་ར་སྤྲོད་གསལ་པོ་ཞིག་བྱས་ཡོད་དོ། །
དེ་ཡང་སྤྱང་གྲུང་ལྡན་ལ་བློ་རིག་བཀྲ་བའི་ཨ་ཁུ་སྟོན་པ་དེ་ཉིད་རང་རིགས་བོད་མི་རྣམས་ལ་བློ་དང་རིག་པ་བསླབ་ཕྱིར་བོད་ཀྱི་ས་ཕྱོགས་གང་སར་ཕེབས་ཀྱི་ཡོད་པ་ལྟར་ཐེངས་ཤིག་འཕན་ཡུལ་དུ་བསྐྱོད་ནས་འཕན་པོའི་མི་རྣམས་ལ་བློ་དང་རིག་པ་བསླབ་དགོས་དགོངས་ཏེ། དང་ཐོག་འཕན་ཡུལ་གྱི་ས་མཚམས་ལྟ་བུར་གྱུར་བའི་བྲག་རལ་ལ་ཉག་ལས་སྒྲོལ་ཏེ་བྲག་རལ་ཟམ་པ་བརྒྱུད་འཕན་ཡུལ་གྱི་མདའ་རུ་ཕེབས་ནས་ཕུན་ཚོགས་གླིང་ཤར་ངོས་ཀྱི་གཙང་ཆུ་ལས་དེ་གའི་ཡུལ་མི་རྣམས་ལ་ཆུ་འཁྲིད་རོགས་ཀྱིས་ཆུ་དེ་ད་ལྟ་དཔལ་གླིང་ཤང་གི་བྱང་ངོས་སུ་ཡོད་པའི་མདའ་གྲོང་ཆུང་ང་ཞེས་པའི་གྲོང་ཚོ་དེ་བར་ཁྲིད་ཟིན་སྐབས་དེ་གའི་བྱིས་པ་ཁག་གཅིག་གིས་ཨ་ཁུར་ཁྱི་གློད་པས་ཨ་ཁུ་སྟོན་པ་གྲོང་ཚོ་དེ་ནས་ཡར་བསྐྱོད་མི་ཐུབ་པར་ཕྱིར་ལོག་བྱེད་དགོས་བྱུང་ཞིང་། གཙང་ཆུ་དེ་ཡང་དུས་དེ་ནས་བཟུང་མདའ་གྲོང་ཆུང་ང་ཞེས་པའི་ལུང་པ་དེ་ཡན་ལ་རྒྱུག་ཐུབ་ཀྱི་མེད་ཅེས་པའི་བཤད་སྲོལ་ཞིག་དུས་ད་ལྟའང་དེ་གའི་ཡུལ་མི་རྣམས་ཀྱི་བཤད་རྒྱུན་དུ་ཆགས་ཡོད་ལ་ས་ཡུལ་དངོས་ལ་བསྐྱོད་སྐབས་ཀྱང་བཤད་རྒྱུན་དེ་ཉིད་བདེན་པར་འདུག་གོ། དེ་ནས་ཨ་ཁུ་སྟོན་པ་ཕྱིར་ལོག་གིས་སླར་ཡང་བྲག་རལ་ཟམ་པ་བརྒྱུད་ལྷོ་ཕྱོགས་ཀྱི་རི་ཁུག་ནས་འཕན་པོའི་ནང་བསྐྱོད་ཅིང་། ཐོག་མར་དེང་སྐབས་དེ་གོང་ཞེས་འབོད་པའི་ལུང་པ་དེའི་མདར་འབྱོར་སྐབས་དེ་གར་འཕན་པོའི་བྱིས་པ་ཁ་ཤས་ཕྱུགས་འཚོ་བཞིན་ཡོད་པ་ཨ་ཁུས་མཐོང་བས་ཨ་ཁུས་བྱིས་པ་དེ་ཚོའི་སར་ཕྱིན་ནས་ཡུད་ཙམ་བཞུགས་རྗེས་ཁོང་ཚོ་དང་མཉམ་དུ་ཆུ་འགྲམ་ལ་ཉ་འཛིན་པར་འགྲོ་རྒྱུ་བྱས། ཁོང་ཚོ་ཉ་འཛིན་སའི་ཆུ་འགྲམ་དུ་འབྱོར་སྐབས་ཨ་ཁུས་ངེད་ཚོས་ཉ་འཛིན་སྐབས་ཉའི་གཟུགས་དབྱིབས་ལ་བལྟས་ནས་དེའི་ཁྱད་ཆོས་དང་མཐུན་པའི་བཤད་པ་རེ་བརྒྱབ་རྗེས་གཞི་ནས་ཉ་འཛིན་དགོས་ཞེས་བཤད་པ་ལྟར་བྱིས་པ་ཞིག་གི་ལམ་སེང་། མགོ་བཟོ་ཡག་ལ་སྐྲ་ལོ་མེད་པ། །ཉ་ཆུང་བསིལ་མ་ཞལ་ཞལ། །ཞེས་བརྗོད་བཞིན་ཉ་གཅིག་བཟུང་བ་དང་། ཡང་བྱིས་པ་གཞན་ཞིག་གིས། གསེར་མིག་ཡག་ལ་རྒྱང་མིག་མི་ཆོད། །ཉ་ཆུང་བསིལ་མ་ཞལ་ཞལ། །ཞེས་བརྗོད་བཞིན་ཉ་གཅིག་བཟུང་། དེ་ནས་ཡང་བྱིས་པ་གཞན་ཞིག་གིས། གཤོག་རྩལ་ཡག་ལ་ནམ་འཕང་མི་ཆོད། །ཉ་ཆུང་བསིལ་མ་ཞལ་ཞལ། །ཞེས་བརྗོད་བཞིན་ཉ་གཅིག་བཟུང་བས་ན། ཉའི་གཟུགས་པོའི་སྟེང་ཡོད་པའི་ཁྱད་ཆོས་མངོན་གསལ་ཅན་ཚང་མར་བྱིས་པ་དེ་ཚོས་བཤད་པ་བརྒྱབ་ཟིན་པས་ཨ་ཁུར་བཤད་པ་རྒྱག་རྒྱུ་གང་ཡང་མ་རྙེད་པར་འཇོལ་ལོ་འཇོལ་ལོ་ཞལ་ཞལ། ཞེས་བརྗོད་པས་ན་བྱིས་པ་རྣམས་ཀྱིས་ཨ་ཁུར་འཕྱ་སྨོད་བྱེད་པའི་དགོད་སྒྲས་ལུང་པ་ཁེངས། དེ་ནས་ཁོང་ཚོ་ལྟོ་ཚ་ཞེས་ཇ་བསྐོལ་སར་ལོག་སྟེ་ཉ་ཤ་མ་བཙོ་གོང་སྔོན་ལ་ཕྱུགས་མ་བསྐོང་རེས་ཀྱི་རྒྱན་རྒྱག་སྐབས་ཏག་ཏག་ཨ་ཁུ་རྒྱན་ཤོར་ཏེ་ཕྱུགས་མ་བསྐོང་བར་འགྲོ་རྒྱུ་ཁེལ། ཨ་ཁུས་ཕྱུགས་མ་བསྐོང་བར་མ་འགྲོ་གོང་བྱིས་པ་རྣམས་ལ་ཁྱེད་ཚོས་ཉ་བཙོ་སྐབས་ཁོག་མའི་ཁ་ཕྱེ་མི་ཉན། གལ་ཏེ་ཁོག་མའི་ཁ་ཕྱེ་ན་ཉས་བྲོས་ནས་རྩི་ཁུང་ནང་འཛུལ་གྱི་རེད་ཅེས་མངགས་བྱ་གནང་། དེ་རྗེས་ཨ་ཁུ་ཕྱུགས་མ་བསྐོང་བར་འགྲོ་རིང་བྱིས་པ་དེ་ཚོས་ཉ་ཤ་བཙོས་ནས་ཡོངས་རྫོགས་བཟས་ཏེ་ཨ་ཁུར་ཉའི་མཇུག་མ་ཙམ་ཡང་མ་བཞག  དེ་ནས་ཨ་ཁུ་ཕྱུགས་མ་བསྐོངས་ཏེ་ལྟོ་ཚར་འབྱོར་ནས་བྱིས་པ་ཚོར་ཉ་ཤ་ཚོས་མིན་སྐད་ཆ་འདྲི་སྐབས་བྱིས་པ་རྣམས་ཀྱིས་ཨ་ཁུ་རང་གི་གསུངས་པ་དེ་དངོས་གནས་བདེན་པ་རེད་འདུག   ཨ་ཁུ་རང་ཕྱུགས་མ་བསྐོང་བར་སོང་རྗེས་ངེད་ཚོས་ཉ་ཤ་ཚོས་ཡོད་མིན་བལྟ་ཕྱིར་ཁོག་མའི་ཁ་ཕྱེ་ཙམ་བྱས་པས། ཉ་རྣམས་དེ་མ་ཉིད་དུ་བྲོས་ཏེ་རྩི་རྩིའི་ཁུང་ནང་འཛུལ་སོང་ཞེས་བརྗོད་པས་ཨ་ཁུ་ནི་ག་ཟེར་འདི་ཟེར་མེད་པར་གྱུར། དེས་ན་ཨ་ཁུ་སྟོན་པ་བྱིས་པ་དེ་ཚོའི་བྱེད་སྟངས་ལ་ཁོང་ཁྲོ་ཟ་སྟེ་སེར་བ་མཛུབ་ཁྲིད་ཀྱི་སྔགས་ལ་བརྟེན་ནས་བྱིས་པ་དེ་དག་གི་མགོ་ཐོག་ཏུ་སེར་བ་ཕབ་པས་བྱིས་པ་དེ་དག་ནི་བློ་རིག་ཤིན་ཏུ་སྤྱང་བས་དེ་མ་ཐག་གོས་རྣམས་ཕུད་དེ་སླེ་པོའི་ནང་བླུགས་ནས་མགོ་ལ་གྱོན་ཏེ་ཆུའི་ནང་འཛུལ་ནས་བསྡད་པས་སེར་བ་ཆེན་པོ་ག་ཚོད་བབས་ན་ཡང་། བྱིས་པ་དེ་དག་ལ་གནོད་སྐྱོན་གང་ཡང་མ་བྱུང་བར། སེར་བ་བབས་ཟིན་རྗེས་སླེ་པོའི་ནང་ནས་གོས་རྣམས་སྐམ་པོར་བཏོན་ཏེ་ལུས་ལ་གྱོན་པས་ཨ་ཁུ་སྟོན་པ་སླར་ཡང་ག་བྱེད་འདི་བྱེད་མེད་པར་གྱུར། དེ་ནས་སང་ཉིན་དེར་ཨ་ཁུ་སྟོན་པ་དང་བྱིས་པ་རྣམས་ལྟོ་ཚར་སྒོར་སྒོར་དུ་བསྡད་དེ་སྤགས་ཟ་རྩིས་བྱེད་སྐབས་ཨ་ཁུས་ངེད་ཚོ་མི་སུས་ལོ་འཁོར་བཅུ་གཉིས་ཆ་ཚང་བར་སྐྱོར་ཐུབ་ན་དེར་ཛ་ར（ཛ་ར་ཞེས་པ་ནི་ཁ་སྐད་འདྲ་ཞིང་སྤགས་ཐང་གི་དོན་ཡིན།）བདག་པ་བྱ་རྒྱུ་ཡིན་ཞེས་གསུངས་ནས་ཨ་ཁུ་རང་གིས་སྔོན་ལ་བྱི་བ་--གླང་--སྟག་--ཅེས་དལ་པོའི་ངང་སྐྱོར་སྐབས་ཕྲུ་གུ་ཞིག་གིས་བྱི་བ་གླང་སྟག་ཡོས་འབྲུག་སྦྲུལ། རྟ་ལུག་སྤྲེལ་དང་བྱ་ཁྱི་ཕག  ཨ་ཁུའི་ཛ་ར་ང་ལ་ཧབ་ཅེས་ཆུ་རྒྱུག་པ་ལྟར་སྐྱོར་ནས་ཨ་ཁུའི་ཛ་ར་ཚུར་བླངས་པས་སླར་ཡང་ཨ་ཁུ་སྟོན་པ་ག་བྱེད་འདི་བྱེད་མེད་པར་གྱུར། དེ་ལྟར་ཨ་ཁུ་སྟོན་པས་འཕན་པོའི་བྱིས་པ་དེ་དག་ལ་ཁ་གཏད་གཏན་ནས་གཅོག་མ་ཐུབ་པར་འུ་ཐུག་ཐབས་ཟད་དུ་གྱུར་ཏེ་མཐར། འཕན་པོ་རིག་པའི་འབྱུང་གནས་ལ། ང་ཨ་ཁུ་སྟོན་པའི་དགོས་ཆེད་མེད། ལུང་པ་དེའི་གོང་ལ་ང་མི་འགྲོ། ལུང་པ་འདིའི་མིང་ལ་དེ་གོང་ཐོགས། ལུང་པ་འདིའི་ཕུ་དེ་ནི་རྟ་རོ་དམར་པོ་ཁ་ཕྱེ་བ་ནང་བཞིན་ཡོང་བ་ཤོག་ཅེས་བརྗོད་དེ་འཕན་ཡུལ་ནས་ཕྱིར་ལོག་བྱས། ཨ་ཁུ་སྟོན་པ་འཕན་ཡུལ་ནས་ཕྱིར་ལོག་ཕེབས་རྗེས་འཕན་པོའི་མི་རྣམས་ཀྱིས་ཨ་ཁུ་སྟོན་པ་འཕན་པོའི་མདའ་བར་ཕེབས་པ་དེར་དྲན་གསོ་ཞུ་ཕྱིར་ཨ་ཁུ་སྟོན་པ་དང་། བྱིས་པ་རྣམས་ཕྱུགས་རིགས་འཚོ་སའི་ས་ཆ་དེ་ག་རང་དུ་སྟོན་པ་སངས་རྒྱས་བཅོམ་ལྡན་འདས་ཀྱི་རྡོ་བརྐོས་ཀྱི་སྐུ་བརྙན་ཞིག་བཞེངས་ཏེ་ཨ་ཁུ་སྟོན་པ་ནི་སྟོན་པ་སངས་རྒྱས་ཀྱི་མཛད་པ་མང་པོའི་ནང་ནས་གཞན་ལ་རིག་པ་བསླབ་པའི་མཛད་ཆེན་དམིགས་བསལ་ཅན་ཞིག་ཏུ་ངོས་འཛིན་གྱིས་རང་ཉིད་འཕན་པོ་ནས་ཁ་བྲལ་བའམ་ཡང་ན་འཕན་པོར་ཐོག་མར་འབྱོར་སྐབས་དྲན་གསོ་དང་། གུས་བཀུར་ཞུ་ས་ཞིག་ཏུ་འགྱུར་བ་བྱེད་ཀྱི་ཡོད་ཅིང་། དེང་སྐབས་ས་དེར་སྟོན་པའི་སྒུལ་ཞེས་ཡོངས་གྲགས་སུ་གྱུར་ཡོད། ས་དེར་ཡོད་པའི་རྡོ་བརྐོས་ཀྱི་སྟོན་པའི་སྐུ་བརྙན་དེ་རིག་གནས་གསར་བརྗེའི་སྐབས་བླུན་རྨོངས་ཅན་གྱི་མི་སྣ་རེ་འགས་རྒྱུ་མཚན་གང་ཡང་མེད་པར་གཏོར་སྐྱོན་གང་ཙམ་བཏང་ན་ཡང་སྤྱི་ལོ་༡༩༩༠ལོར་དེ་གོང་གྲོང་ཚོའི་ཨ་ཁུ་ནོར་བུ་ཚེ་རིང་གིས་སྔར་གྱི་སྟོན་པའི་བཞུགས་གནས་དང་བཅས་པ་ཉམས་གསོ་ཞུས་པ་དང་། རྒྱལ་མཚན་ལགས་ནས་སྟོན་པའི་སྐུ་ལ་ཚོན་གྱིས་སྤྱན་འབྱེད་གནང་བ་སོགས་སྟོན་པའི་སྐུ་བརྙན་དང་། རྡོ་བརྐོས་ཀྱི་སྤྱན་རས་གཟིགས་ཕྱག་བཞི་པ། མ་ཎི་ཡིག་དྲུག་བཅས་ཚང་མ་ཉམས་གསོ་ལེགས་པར་ཞུས་ཏེ་སྔར་གྱི་ཉམས་བཟང་དེ་དག་གང་ལེགས་མངོན་པར་བྱས་ཡོད། གོང་གསལ་གྱི་སྒྲུང་གཏམ་དེ་དག་ལས་འཕན་པོའི་མི་རྣམས་ནི་སྔར་གྱི་དུས་ནས་སྤྱང་གྲུང་ལྡན་ལ་བློ་རིག་བཀྲ་བ་ཞིག་ཡོད་པ་དེ་གསལ་པོར་མངོན་པར་བྱས་ཡོད་ཀྱང་། དེང་སྐབས་བླང་དོར་གྱི་གནས་ལ་ཤིན་ཏུ་དམན་པའི་འཕན་པོའི་མི་སྣ་ཉུང་ཤས་ཤིག་གིས་བློ་དང་། རིག་པ་དེ་དག་བེད་སྤྱོད་ལོག་པར་བཏང་སྟེ་གཞན་ལ་གནོད་པའི་ལས་ངན་འགའ་ཞིག་བརྩམས་པ་དེས་དུས་རབས་ཉེར་གཅིག་པ་འདིའི་ནང་རྒྱ་ཆེའི་འཕན་པོ་བ་ཡོངས་ཀྱི་གདོང་པ་ཆུ་ལ་གཡུགས་ནས་བ་མོ་གཅིག་གིས་མི་ཡི་ཞིང་བཟས་པས། བ་མོ་ཐམས་ཅད་འགྲོ་བའི་ལམ་བུ་བཀག་ཅེས་པའི་དཔེ་ལྟར་དེང་སྐབས་ལྷ་ས་གཙོ་བོར་གྱུར་བའི་བོད་ཀྱི་ས་ཕྱོགས་གང་སར་འཕན་པོའི་མི་རྣམས་ལ་ཀུན་གྱིས་མཐོང་སྣང་མི་ལེགས་པ་ཞིག་ཆགས་ཡོད་པས། ད་ནི་མཐོང་སྣང་དང་མིང་ཆད་ངན་པ་དེ་དག་ལས་མཐར་བ་ཞིག་བྱེད་དགོས་ན་འཕན་པོ་བ་ཀུན་གྱིས་རང་ཡུལ་རང་གིས་འཛད་པའི་བྱ་སྤྱོད་ངན་པ་དེ་ཚོར་བསམ་གཞིགས་ནན་ཏན་གནང་དགོས་པ་མ་ཟད། ལྷག་དོན་དུ་ད་ལྟ་འཕན་པོའི་ནང་ཕ་མའི་མིང་ཐོགས་པ་ཐམས་ཅད་ཀྱིས་མི་ཆུ་ལ་འདེབས་པར་རང་གི་པུས་མོ་ནུབ་དགོས་ཞེས་པའི་དཔེ་ལྟར་དང་ཐོག་རང་ཉིད་ཀྱི་རྒྱུན་གཏན་འཚོ་བའི་ཁྲོད་ཀྱི་གཏམ་བརྗོད་དང་། བྱ་སྤྱོད་ངན་པ་རྣམས་སྤོང་གང་ཐུབ་ཀྱིས་རང་གི་མི་རབས་རྗེས་མ་རྣམས་ལ་མིག་དཔེ་བཟང་པོ་ཞིག་བསྟན་ཐུབ་པ་དང་། དེ་ནས་རང་ཉིད་ཀྱི་ཕྲུ་གུར་རབ་བྱུང་ན་ས་ཕྱོགས་གང་དུ་སོང་ཡང་ལས་སློབ་གང་སར་འགྲུབ་འབྲས་ཐོན་ཞིང་། གཞན་ཕན་ལྷག་བསམ་ཅན་གྱི་མི་ཞིག་བྱེད་ཐུབ་པ་དང་། གལ་ཏེ་སྐྱེ་བོ་གཞན་ལ་ཕན་པའི་བྱ་བཟང་བསྒྲུབ་མ་ཐུབ་ཀྱང་། གཞན་ལ་གནོད་པའི་བྱ་བ་ངན་པའི་རིགས་གཏན་ནས་བསྒྲུབ་རྒྱུ་མེད་པའི་བླང་དོར་གྱི་བསླབ་བྱ་གང་མང་གནང་དགོས་པ་དེ་ཤིན་ཏུ་གལ་ཆེ་བ་ཞིག་ཡིན་པ་ནི། སྔོན་བྱོན་མཁས་པ་རྣམས་ཀྱིས། སྒྱིད་ལུག་ཅན་གྱི་ཕ་མས་ཧུར་བརྩོན་ཅན་གྱི་བུ་ཕྲུག་ཅིག་གསོ་སྐྱོང་བྱེད་མི་ཐུབ་ལ། བློ་རྒྱ་ཆུང་ཞིང་རང་རྒྱལ་གཞན་ཕམ་གྱི་བསམ་པ་ཁོ་ན་ཡིད་ལ་བཅངས་པའི་ཕ་མ་ཞིག་གིས་ཁོག་རྒྱ་ཆེ་ཞིང་གཞན་ཕན་ལྷག་བསམ་ཅན་གྱི་བུ་ཕྲུག་ཅིག་གསོ་སྐྱོང་བྱེད་མི་ཐུབ་ཅེས་གསུངས་པ་ལྟར་བུ་ཕྲུག་འཚར་ལོངས་བྱེད་པའི་བརྒྱུད་རིམ་ཁྲོད་ཁྱིམ་ཚང་གི་སློབ་གསོ་ནི་སློབ་གསོ་ཐམས་ཅད་ཀྱི་ནང་ནས་ཨང་དང་པོ་དང་། ཕ་མ་གཉིས་ཀྱི་ཀུན་སྤྱོད་བཟང་པོ་ཞིག་དགོས་པ་དེ་ནི་རང་གི་བུ་ཕྲུག་རྣམས་ཀུན་སྤྱོད་བཟང་པོ་ཞིག་ཆགས་པར་གལ་གནད་ཆེ་ཤོས་ཤིག་ཆགས་ཡོད་དོ། །འོན་ཀྱང་དེང་སྐབས་སྤྱི་ཚོགས་ཐོག་མི་མང་པོ་ཞིག་གི་སེམས་ནང་ཕྲུ་གུ་ཡག་པོ་ཞིག་དགོས་ན་སྔོན་ལ་ཕ་མ་ཡག་པོ་ཞིག་དགོས་པའི་གནས་ལུགས་དེ་ཉིད་གསལ་རྟོགས་ཐུབ་མཁན་ཤིན་ཏུ་དཀོན་པས་ཁྱིམ་ཚང་མང་པོ་ཞིག་གི་ནང་ཕ་མ་གཉིས་ནས་རྒྱུན་དུ་རང་གི་གཏམ་བརྗོད་དང་བྱ་སྤྱོད་གང་སར་དོ་སྣང་དང་། བསམ་གཞིག་ནན་ཏན་མ་གནང་པར་ཕྲུ་གུའི་མདུན་དུ་གཞན་ལ་གནོད་པའི་ཚིག་ངན་དང་རྫུན་གཏམ། བཙོག་གཏམ་སོགས་བརྗོད་ཅིང་། བྱ་ངན་སྣ་ཚོགས་བརྩམས་པ་དེས་ཕྲུ་གུར་མིག་ལྟོས་ངན་པ་བཟོས་བས་ཕྲུ་གུ་དེ་དག་གིས་ཀྱང་། ཕ་རྒྱུད་བུ་ལ་མ་ཁྲིད་ན། །རི་བོང་ཤོ་ཏོ་ག་ནས་ཡོང་། །ཞེས་པའི་དཔེ་ལྟར་ཁྱིམ་ཚང་དང་། ཕ་མའི་ཤུགས་རྐྱེན་ངན་པ་ལ་བརྟེན་ནས་སྤྱི་ཚོགས་ཀྱི་འཚོ་བའི་ཁྲོད་བྱ་ངན་སྤྱོད་ངན་སྣ་ཚོགས་སྤེལ་ཏེ་ཕ་མར་སྡུག་པོ་གཏོང་སྐབས་ཕ་མ་གཉིས་ནས་རང་གི་ཕྲུ་གུ་ངན་ལང་དུ་ཤོར་བའི་ཐོག་མའི་འབྱུང་རྐྱེན་ལ་བསམ་བློ་མ་གཏང་བར་ནོར་འཁྲུལ་ཡོད་ཚད་ཕྲུ་གུས་བྱས་པར་བརྩིས་ཏེ་ཕྲུ་གུའི་སེམས་ལ་ཕོག་ཐུག་གཏོང་བའི་ཚིག་ངན་སྣ་ཚོགས་བརྗོད་ཀྱི་ཡོད། ཡིན་ནའང་གནད་དོན་དེར་ཞིབ་ཏུ་བསམ་ན་ཕྲུ་གུ་ངན་ལང་དུ་ཤོར་བའི་རྒྱུ་རྐྱེན་གཙོ་བོ་ཕ་མ་རང་ཉིད་ལ་ཐུག་པ་ཞིག་ཡིན་པས་ན་ཕ་མ་གཉིས་ཀྱི་གཏམ་བརྗོད་དང་བྱ་སྤྱོད་ཐམས་ཅད་ཡ་རབས་བཟང་སྤྱོད་དང་། གཞན་ཕན་ལྷག་བསམ་ཅན་ཞིག་ཏུ་གྱུར་བ་བྱས་ནས་རང་གི་བུ་ཕྲུག་རྣམས་ལ་མིག་དཔེ་བཟང་པོ་ཞིག་བསྟན་དགོས། དེ་ལྟ་བུའི་ཕ་མ་གཉིས་ཀྱི་རང་དཔེ་གཞན་སྟོན་དང་། བཟང་པོའི་བསླབ་བྱ་ལ་བརྟེན་ནས་རང་གི་མི་རབས་རྗེས་མ་རྣམས་བླང་དོར་གྱི་གནས་ལུགས་ཤེས་པའི་མི་སྣ་ཚད་ལྡན་ཞིག་ཏུ་གསོ་སྐྱོང་བྱེད་དགོས་ཤིང་། ལྷག་དོན་དེང་སྐབས་འཕན་པོ་བའི་མིང་འཛད་མཁན་གྱི་མི་སྣ་ཉུང་ཤས་དེ་དག་རྟ་ཁ་གཡང་ས་ནས་གཅུས་པ་ལྟར་ལེགས་པའི་ཕྱོགས་སུ་ཁ་ལོ་གཅུས་ཐུབ་པ་ཞིག་གནང་དགོས་པ་དེ་ནི་ཁ་ཚ་དགོས་གཏུགས་སུ་གྱུར་ཞིང་། གལ་ཏེ་གཞན་ལ་གནོད་པའི་བྱ་བ་ཁོ་ནར་དབྱིངས་ཞུགས་པའི་མི་སྣ་ཉུང་ཤས་དེ་དག་མགྱོགས་ནས་མྱུར་དུ་ལེགས་པའི་ལམ་དུ་ཁ་ལོ་གཅུས་མ་ཐུབ་ན་དེའི་འབྱུང་འབྲས་ནི་འཕན་པོ་བ་ཞེས་མིང་འབོད་མ་ཐག་ཡུལ་ཕྱོགས་གཞན་པའི་མི་རྣམས་ཀྱིས་གདོང་པ་གློད་ཅིང་མགོ་བོ་དབྱུག་པ་དང་། རྐང་པ་བརྡབ་ཅིང་དངངས་སྐྲག་བྱེད་སའི་མི་སྣ་ཐ་ཤལ་ཞིག་ཏུ་ངོས་འཛིན་གྱིས་འཕན་པོ་བ་ཡོངས་ཀྱི་ཁེ་ཕན་དང་། མདུན་ལམ་ལ་གནོད་པ་ཆེན་པོ་ཞིག་ཡོང་རྒྱུ་ཡིན་པ་དེ་ནི་ཐེ་ཚོམ་སྤུ་ཙམ་ཡང་བྱེད་མི་དགོས་པའི་གནད་དོན་ཆེན་པོ་ཞིག་ཆགས་ཡོད་པས། ད་ནི་ངེད་ཚོ་འཕན་པོ་བ་ཚང་མས་གནད་དོན་དེ་ཉིད་རྟག་པར་གླེང་སློང་དང་། བགྲོ་གླེང་གིས་རང་ཡུལ་ལ་ཕན་པའི་བྱ་གཞག་དེའི་ནང་མི་རེ་ངོ་རེས་འགན་སེམས་ཆེན་པོ་ཞིག་འཁུར་དགོས་པ་དེ་ཤིན་ཏུ་གལ་ཆེར་མཐོང་ངོ་། །
དེ་བཞིན་རྒྱུན་གཏན་འཚོ་བའི་ཁྲོད་དུ་མི་དང་མིའི་དབར་འབྲེལ་བ་བྱེད་སྐབས་ཡ་རབས་བཟང་པོའི་གཤིས་སྤྱོད་ལ་བརྟེན་ནས་ཞེ་ས་དང་གུས་ཞབས་མཚོན་པའི་བཀའ་མོལ་གསུང་རྒྱུ་དེ་བོད་མི་རིགས་ཀྱི་ཐུན་མོང་མ་ཡིན་པའི་གོམས་སྲོལ་བཟང་པོ་ཞིག་ཡིན་ལ། བསམ་པའི་དཔལ་ཡོན་དར་སྤེལ་གཏོང་བར་ཡང་དམིགས་བསལ་གྱི་དོན་སྙིང་ལྡན་པའི་བྱ་བ་བཟང་པོ་ཞིག་ཡིན་པས་ན། བོད་ཀྱི་ས་ཕྱོགས་གང་སར་མི་དང་མིའི་དབར་ཡ་རབས་གུས་ཞབས་ཀྱི་བཀའ་མོལ་གསུང་བའི་གོམས་སྲོལ་བཟང་པོ་ཞིག་དར་རྒྱུར་ཚང་མས་འབད་བརྩོན་ཆེན་པོ་ཞིག་གནང་གི་ཡོད་ནའང་ང་ཚོ་འཕན་པོའི་ཁུལ་དུ་རྒན་གཞོན་དང་། གོ་རིམ་གྱི་ལ་རྒྱ་གང་ཡང་མེད་པར་ཀྱས་་་་་དམས་་་་་ཞེས་དང་། ཁོ་དང་མོ་ཞེས་བརྗོད་པ་དང་། ད་དུང་ཀུན་གྱིས་གུས་བཀུར་ཞུ་སའི་དགེ་བའི་བཤེས་གཉེན་ལ་ཡང་ཁོ་སློབ་གྲྭའི་དགེ་རྒན་དེས་ཞེས་པ་སོགས་གུས་ཞབས་ཀྱི་རྣམ་པ་གང་ཡང་མེད་པའི་ཐ་ཤལ་གྱི་བརྗོད་ཚུལ་དེ་ཚོས་ཡུལ་ལུང་གཞན་ནས་འཕན་ཡུལ་དུ་ཕེབས་པའི་མི་རྣམས་ལ་ཐོག་མའི་བག་ཆགས་དེ་འཕན་ཡུལ་གྱི་མི་དེ་ཚོ་ནི་མ་རབས་ཐ་ཤལ་གྱི་མི་སྣ་རྐྱང་རྐྱང་ཞིག་འདུག་སྙམ་པའི་ཚོར་བ་རྣོ་པོ་ཞིག་སྟེར་བཞིན་ཡོད་པ་ནི་གཙོ་བོ་འཕན་པོའི་མི་རྣམས་ཀྱིས་རྒྱུན་གཏན་འཚོ་བའི་ཁྲོད་དུ་མི་དང་མིའི་དབར་འབྲེལ་གཏུག་བྱེད་སྐབས་ཡ་རབས་གུས་ཞབས་མེད་པར་མ་རབས་ཐ་ཤལ་གྱི་གཏམ་བརྗོད་གནང་སྟངས་དེ་ཚོའི་ཤུགས་རྐྱེན་ལ་བརྟེན་ནས་བྱུང་པ་ཞིག་ཡིན། དེས་ན་ང་ཚོ་འཕན་པོའི་མི་ཚང་མས་རྒྱུན་དུ་མི་དང་མིའི་དབར་འབྲེལ་བ་བྱེད་སྐབས་རབ་བྱུང་ན་གཞོན་པས་རྒན་པར་པཱ་ལགས། ཨ་མ་ལགས། སྲུ་མོ་ལགས། ཞང་ཞང་ལགས། ཅོག་ལགས། ཨ་ཅག་ལགས། ཞེས་འབོད་པ་དང་། རྒན་པས་གཞོན་པར་བུ་དོན་གྲུབ་དང་། བུ་མོ་དབྱངས་ཅན་ཞེས་པ་སོགས་སེམས་གཏིང་ནས་ཡ་རབས་གུས་ཞབས་མཚོན་པའི་བཀའ་མོལ་གསུང་རྒྱུར་ངེས་པར་དུ་གོམས་གཤིས་འཇགས་པ་བྱེད་དགོས་ཤིང་། གལ་ཏེ་བུ་དང་བུ་མོ་ཞེས་འབོད་མ་ཤེས་ཀྱང་དོན་གྲུབ། དབྱངས་ཅན་ཞེས་པ་སོགས་ཕན་ཚུན་མིང་ནས་འབོད་པ་ལས་ཀྱས་་་་་དམས་་་་་ཞེས་པ་དང་། ཁོ་དང་མོ་ཞེས་པའི་ཐ་ཤལ་གྱི་འབོད་སྟངས་དེ་ཚོ་ནི་ངེས་པར་དུ་མཚམས་འཇོག་བྱེད་དགོས་པ་དེ་ཤིན་ཏུ་གལ་ཆེའོ། །