གླིང་སྒྲུང་གཏམ་དཔེ་གཅེས་བཏུས། ཁག་དང་པོ།

སྡེ་ཧོར་ཡུལ་ཆོས་ཀྱི་ཉི་མ་ཤར།།
ནག་ཙིག་གེ་ཤན་པ་ཆོས་སྐལ་ཆད།།

ཤྭ་འགྲོག་དགོ་འགྲོག་རྐྱང་ལ་འགྲོག།
རྒོ་ཞར་མ་ནི་སྒེར་རང་འགྲོག།

སྐྱབས་རེ་ས་བླ་མ་དཀོན་མཆོག་ཡོད་ཀྱང་ངོ་མ་ཤེས།།
བློ་གཏད་ས་དམ་པའི་ལྷ་ཆོས་ཡོད་ཀྱང་སྒྲུབ་མ་ཐུབ།།

ལན་པ་མི་ལ་བཞག་ཀྱང་ལེ་ལན་རང་ལ་འཁོར།།

ཤ་ཕུ་ནུ་ཡིན་ཀྱང་ཐག་ཇེ་རིང་།།
པང་བུ་རྒྱུད་ཡིན་ཀྱང་ཞེ་ཇེ་ལོད།།

འདོད་པའི་ཁ་མ་གང་།།
ལས་ཀའི་མཐའ་མ་བུད།།

སེར་གྱི་ལེར་གདོང་གྲལ་སྒྲིགས་ཉིན་མོར།།
བློ་དྲི་ས་ཡོད་ཀྱང་དྲི་དབང་མེད།།

བྱ་སྔ་མ་ཤི་བའི་རོ་ལ་བལྟས་ན།།
བྱ་རྗེས་མ་མི་རྟག་དེ་དང་འདྲ་འདྲ།།

སྡིག་ཆེན་ཆོས་ཀྱིས་ཐུལ་ཡང་།།
ཆོས་དེད་ཆོས་ཀྱིས་མི་ཐུལ།།
གྱོང་པོ་སྣུམ་གྱིས་ཐུལ་ཡང་།།
མར་སྐོགས་སྣུམ་གྱིས་མི་ཐུལ།།

ང་རྒྱལ་གྱི་སྒང་ལ།།
ཡོན་ཏན་གྱི་ཆུ་མི་ཆགས།།

སྤྲང་པོས་ཉལ་བསམ་བཏང་ན།
རྒྱ་ར་རྟ་ཡིས་གང་།

བསམ་རྒྱུ་མང་ན་དྲན་རྒྱུ་མང་།
དྲན་རྒྱུ་མང་ན་ལས་རྒྱུ་མང་།
ལས་རྒྱུ་མང་ན་འོང་རྒྱུ་མང་།

རྟ་ཁ་སྲབ་ཀྱིས་བསྒྱུར།
བློ་ཁ་ཆོས་ཀྱིས་བསྒྱུར།

སྒང་ལ་ཁ་མཐོན་པོའི་རྩམ་སྐྱ་དེ།།
ཟེར་མ་རླུང་དང་ཕྱེད་བགོས་རེད།།

སྐྱེ་འཆི་ཉི་ཟླ་གཉིས་ལ་ཡོད།།
གྲ་རྒས་དམར་ཡག་སྟག་ལ་ཡོད།།

རང་དོན་ཁོ་ན་གཙོ་བྱེད་པ།།
དེ་ཡིས་རང་དོན་འགྲུབ་མི་སྲིད།

ཕུ་ནས་ཤྭ་ཤོར། མདའ་ནས་ཤེའུ་ཤོར།

བྱ་བ་ཐམས་ཅད་ལད་མོ་ཡིན།།
ལད་མོའི་ནང་ནས་གང་མཁས་ཡིན།།

ནངས་བ་མོའི་ལྷམ་བྱས།།
ནུབ་སྐར་མའི་ཞྭ་བྱས།།

མྱི་གཅིག་བསམ་པའི་སེམས་འདྲ་འདྲ།།
གཞོག་གཅིག་སྟ་རེའི་སོ་འདྲ་འདྲ།།
ཁས་ལེན་རང་གིས་བྱས་པ་དེ།།
སངས་རྒྱས་ཡིན་ཡང་བྱོལ་ཐབས་མེད།།

ལུང་པ་རེ་ལ་ཆ་ལུགས་རེ།།
བླ་མ་རེ་ལ་ཆོས་ལུགས་རེ།།

ཆུང་དུས་ཡོན་ཏན་མ་སྦྱོང་ན།།
ཆེ་དུས་འགྱོད་དང་མ་འགྱོད་མེད།།

སྐྱུར་མོ་ཞིག་དང་མ་འཕྲད་ན།།
མངར་མོ་ཐམས་ཅད་ཅང་ཅང་ཡིན།།

ཡ་རབས་མ་རབས་སྤྱོད་པས་ཤེས།།
ལུང་པ་གང་ཡིན་སྐད་ཀྱིས་ཤེས།།

ཁ་བལ་ལས་འཇམ།།
གཏིང་ཚེར་ལས་རྩུབ།།

ཁ་གཏམ་གཡུ་འབྲུག་སྐད་ལས་ཆེ།།
ལག་ལེན་ནམ་མཁའི་འཇའ་ལྟར་ཡལ།།

ཁ་རྗེ་ལ་བུ་ཡོད་ཀྱང་།།
དབང་ཐང་ལ་འོ་མ་སྐམ།།

ཁ་ཆེ་ཡང་སྣ་ཡི་འོག།
རི་མཐོ་ཡང་གནམ་གྱི་འོག།

ཁ་མཁས་པས་བུ་ལོན་འཕྲད་དུས་མེད།།
རྒྱུ་འདོད་པས་སྡིག་པ་དག་དུས་མེད།།

སྐྱེས་པའི་མི་ལ་གྲགས་པའི་གཏམ་དགོས།།
བྱས་པའི་ལས་ལ་གྲུབ་པའི་མཐའ་དགོས།།

སྐྱིད་ན་ནམ་མཁའི་བྱ་ཡང་འཁོར།།
སྡུག་ན་རང་གི་བུ་ཡང་བྲོས།།

སྐུད་པ་རིང་པོ་ལམ་མ་ཟད།།
མི་ཚེ་རིང་པོ་སྟོང་མ་ཟད།།