རི་བོ་ཨ་མ་ཟོ་དགུའི་ངག་རྒྱུན་གཏམ་རྒྱུད།

       གངས་རིའི་བླ་རི་གྲགས་ཅན་རྨ་རྒྱལ་གངས་རིའི་སྲས་མོ། སྲིད་པའི་ལྷ་གཉན་སྨན་བཙུན་དབང་ཕྱུག་མའི་གནས་རི་ཨ་མ་ཟོ་དགུ་རི་བོ་ནི་མཚོ་ལྷོ་ས་ཁུལ་གྱི་རི་རྒྱུད་མཐོ་ཤོས་ཤིག་ཡིན་ལ། མཐོ་ཚད་རྒྱ་མཚོའི་ངོས་ལས་མཐོ་ཚད4878ཙམ་ཡིན།

       རི་བོ་འདིར་ངག་རྒྱུན་གྱི་གཏམ་རྒྱུད་ཁྱད་མཚར་ཅན་འགའ་ཞིག་ཡོད་པ་ནི་འདི་ལྟར། གནའ་སྔ་མོ་སྔ་མོ་ཞིག་ལ་ས་ཁུལ་འདི་རང་བྱུང་གི་རྒྱ་མཚོ་ཆེན་པོ་ཞིག་ཡིན། དེའི་སྐབས་སུ་གངས་རིའི་སྲས་མོ་འདིས་ལོ་དགུ་ཙམ་ལ་བསྙེན་སྒྲུབ་མཛད་ཅིང་། མཇུག་མཐར་སྒྲུབ་པ་ལས་བྱུང་བའི་བདུད་རྩིའམ་འོ་མ་ཟོ་བ་དགུ་ཙམ་འཕགས་པ་སྤྱན་རས་གཟིགས་ལ་མཆོད་པར་ཕུལ་ཏེ་འདོད་དོན་གསོལ་བས་འཕགས་པ་སྤྱན་རས་གཟིགས་ཀྱི་རྫུ་འཕྲུལ་དང་བྱིན་རླབས་ཀྱིས་ཟོ་དགུའི་རྫ་རྒྱུད་དང་བློན་པོ་གསེར་ཆེན། དཀར་ལྡིང་རྫ་རྒན་དང་རི་བོ་ཉི་ཟླ་བཅས་རི་རྒྱུད་ཆེན་པོ་བཞི་གསར་དུ་སྐྱེས། དེར་མ་ཟད་བདུད་རྩིའམ་འོ་མ་ཟོ་བ་དགུ་བོ་ཟོ་དགུ་རི་བོའི་ཕང་བ་རུ་སྔར་བཞིན་མཆོད་པའི་ཚུལ་དུ་བཤམས་ཡོད་ཟེར། དེར་བརྟེན། ཡུལ་འདིའི་མི་རྣམས་ཀྱིས་སྲས་མོ་འདིའི་བཀའ་དྲིན་བཅས་ལ་བསམས་ནས་ཨ་མ་ཟོ་དགུ་ཞེས་གུས་བཀུར་དང་མཆོད་འབུལ་ཀྱང་རྒྱ་ཆེར་བྱེད་པ་ཡིན་ཟེར། གང་ལྟར་ཀྱང་རྫ་རྒྱུད་མཐོན་པོ་འདིའི་མགུལ་དུ་ཆེ་ཆུང་མི་འདྲ་བའི་མཚོ་ཆུང་དགུ་ཙམ་ཡོད་པ་དང་། དེ་དག་ནི་འོ་མ་ལྟེམ་ལྟེམ་འཁྱིལ་བའི་ཟོ་བ་ཆེ་ཆུང་དགུ་དང་ཤིན་ཏུ་མཚུངས་པ་དང་། རྫ་རྒྱུད་འདིའི་གནས་བདག་ཀྱང་ལྷ་གཉན་གྱི་སྲས་མོ་ཞིག་སྟེ་བུད་མེད་ཅིག་ཡིན་པའི་ཆ་ནས་རི་བོ་འདིར་ཨ་མ་ཟོ་དགུ་ཞེས་མིང་དུ་ཐོགས་པ་ནི་ཤིན་ཏུ་དོན་ལ་འབྱོར་བའི་གཏམ་རྒྱུད་ངོ་མཚར་བ་ཞིག་ཡིན་ནོ། །

       ཡུལ་འདིའི་མེས་པོ་རྣམས་ཀྱི་ངག་རྒྱུན་ལ་འདི་སྐད་ཡོད་དེ། སྔོན་ཞིག་ལ་རྒྱལ་མཆོག་ལྔ་པ་ཡིན་པར་གླེང་བའི་བླ་ཆེན་ཞིག་ཟོ་རྒུའི་རི་འདབས་སུ་ཞག་བཞུགས་གནང་བའི་ཞོགས་པ་དེར་བལྟ་བའི་ཆོག་མི་ཤེས་པའི་བུད་མེད་དད་ལྡན་པ་ཞིག་འཁོར་གཡོག་དང་བཅས་ཏེ་ཕེབས་ནས་བླ་མ་འཁོར་བཅས་ལ་འོ་མ་ཟེའུ་དགུ་ཙམ་ཕུལ་ནས་མཇལ་ཁ་ཞུས་ཏེ་ཕྱིར་ལ་ཕེབས་སོང་ཟེར། རྗེས་ནས་བླ་མ་མཆོག་གིས་འཁོར་རྣམས་ལ་འདི་ནི་ཧ་ཅང་ངོ་མཚར་ཆེ་བ་ཞིག་རེད་འདུག །བུད་མེད་འདིས་བཞོན་པ་ཡུ་མོ་ཞིག་ཡིན་ཞིང་ང་ཚོར་ཕུལ་པའི་འོ་མ་ཡང་ཡུ་མོའི་འོ་མ་ཡིན་འདུག་ཅེས་གསུངས་པར་གྲགས། ངག་རྒྱུན་འདི་དག་ལ་བརྟེན་ནས་ཡུལ་ཕྱོགས་འདིའི་མི་རྣམས་ཨ་མ་ཟོ་དགུ་རི་བོའི་གནས་བདག་ལ་ཧ་ཅང་གིས་དད་པར་གྱུར་ཏོ། །