སྙན་ངག་གི་གནད་དོན་འགའ་བཤད་པ།

དྲུག་པ། སྙན་ངག་གི་མི་རིགས་རང་བཞིན།
        མི་རིགས་སོ་སོ་ལ་རང་གི་ཁྱད་ཆོས་ལྡན་པའི་རིག་གནས་ཡོད་པ་བཞིན། སྙན་ངག་ལའང༌། ངེས་པར་དུ་མི་རིགས་ཀྱི་རང་བཞིན་ཡོད་དགོས། དེ་ཡང་བརྗོད་བྱ་ལ་མི་རིགས་ཀྱི་རང་བཞིན་དང་རྗོད་བྱེད་ལ་མི་རིགས་ཀྱི་བྲོ་བ་ལྡན་དགོས། དཔེར་ན། དམངས་ཁྲོད་ཀྱི་སྙན་ངག་དག་དང་ཏུན་ཧོང་གཏེར་ཡིག་དང་བཀའ་ཐང་ནས་བྱུང་བ་དག ལྷག་པར《དམེ་ཤུལ་ས་བསྟོད》《ལྷ་སའི་ཁྲོམ》《ཡི་དྭགས་སྐེ་རིང》སོགས་ལ་མི་རིགས་ཀྱི་རང་བཞིན་དང་དུས་རབས་ཀྱི་རང་བཞིན་ཇི་བཞིན་བྱུང་ཡོད་ཅིང༌། མི་ལ་རས་པའི་མགུར་མ་དང༌། ཚངས་དབྱངས་རྒྱ་མཚོའི་མགུར་གླུ། ཞང་སྟོན་བསྟན་པ་རྒྱ་མཚོ་དང་རྡོ་གྲུབ་བསྟན་པའི་ཉི་མ་སོགས་ཀྱི་སྙན་ངག་ལའང་མི་རིགས་ཀྱི་རང་བཞིན་ལྡན་པས་སྦྲང་དཀར་རྩམ་པ་དང་ཞོ་གསར་གྱི་ཞིམ་མངར་ཇི་བཞིན་ཀློག་པ་བོར་རོ་མངར་ཁྱད་པར་ཅན་ཞིག་སྟེར་ཐུབ་པ་རེད། ང་ཚོས་མི་རིགས་རང་བཞིན་དམ་འཛིན་བྱེད་པ་ནི་མི་རིགས་རང་ལ་གཞན་ལས་ཐུན་མོང་མ་ཡིན་པའི་སྐད་ཆ་དང་གོམས་གཤིས། ཡི་གེ་བཅས་སྙན་ངག་ཀྱང་ཐུན་མོང་མ་ཡིན་པ་ཞིག་ཏུ་འགྱུར་བའི་ཆེད་དུ་ཡིན།
        ཡིན་ནའང་ང་ཚོའི་སྙན་ངག་མང་བོ་ཞིག་དགེ་འདུན་ཆོས་འཕེལ་གྱིས་གསུངས་པ་བཞིན“རྒྱ་སྐད་བོད་སྐད་དུ་བསྒྱུར་པ་རྣམས་ཀྱི་དབྱིབས་ཁོ་ནར་བྲིས་ལ། དེ་རྣ་བར་འཇགས་འཇགས་ནས་གོ་བདེ་བར་སོང་བ་ཡིན་གྱི་བོད་སྐད་རང་གི་སྒྲིག་ཚུལ་ནི་མིན་པར་ངེས”ཞེས་པ་བཞིན་བརྗོད་བྱ་རྗོད་བྱེད་གང་གི་ཆ་ནས་ཀྱང་ཡ་མ་ཟུང་དུ་གྱུར་འདུག་པ་དཔེར་ན་གཞོན་ནུ་མ་ཞིག་བརྗོད་པའི་ཚེ་མིག་སྔོན་པོ་དང་རྐང་གདུབ་གྱོན་པ། སྐེད་པ་ཕྲ་བ་དང་ཚང་ར་རྒྱས་པ་སོགས་ཕྱོགས་གང་ནའང་རྒྱ་གར་བའི་ཤན་ཞུགས་པ་ཆེས་མང་ངོ༌། །དེའི་ཕྱིར་དགེ་འདུན་ཆོས་འཕེལ་གྱིས་མཁུར་ཚོས་མཚལ་ལྟར་དམར་པོ་དེ་རྒྱ་གར་བའི་རིགས་ལ་ཡེ་ནས་མེད་པས་རྒྱ་གཞུང་རྣམས་ནའང་མཆུ་སྒྲོས་དམར་བ་ལས་མཁུར་ཚོས་དམར་བའི་སྒྲོས་མི་འབྱུང་བ་དེ་ཡིན། འོན་ཀྱང་རང་རེ་ནི་མཁན་ཆེན་གནས་གསར་པས། དམར་སྣུམ་མཁུར་ཚོས་འཛུམ་ལྡན་གསེར་གྱི་རྣ་གོར་གཡོ་བའི་མཛེས་མ་སྤངས། །ཞེས་པ་ལྟ་བུའི་ཚིག་སྦྱོར་བྱས་ན་ཤིན་ཏུ་འཚམ། འོ་ཅག་ཤར་མོ་འགྲམ་དམར་མ་འདི་དག་བཏང་སྙོམས་སུ་འཇོག་པའི་གནས་ཅི་ལ་ཡོད་ཅེས་པ་བཞིན་རོང་མོ་རས་ལྭ་གྱོན་ཞིང་སྐྲ་ལུང་བཏགས་པ་དང་འབྲོག་མོ་རལ་ལེབ་དང་ཚགས་རྒྱན་བཏགས་པ་སོགས་ས་ཆ་རེའི་གཞོན་ནུ་མ་དག་གི་འཆར་སྒོ་དང་གོམས་གཤིས། སྨྲ་བརྗོད་སོགས་གནའ་དེང་གི་སྙན་ངག་ཀུན་ནའང་དཀོན་པ་རེད། དེའི་ཕྱིར། ང་ཚོས་དམངས་ཁྲོད་རྩོམ་རིག་དང་བར་དར་རྙིང་མའི་སྙན་ངག་གི་ལག་ལེན་ལ་སློབ་སྦྱོང་བྱས་ཏེ་གསར་དར་གྱི་མི་རིགས་རང་བཞིན་གསར་བཏོད་བྱས་ན་ཆེས་བཟང་སྟེ་དགེ་འདུན་ཆོས་འཕེལ་དང་འཇུ་སྐལ་བཟང་གི་སྙན་ངག་གིས་མཚོན་ལ་ལྷག་པར་བོད་ཀྱི་རང་བཞིན་དང་ཁ་བྲལ་ན་གཏན་ནས་མི་རུང༌།
        ད་ལྟའི་སྙན་ངག་མང་བོ་ཞིག་ལ་བལྟས་ན་ཕལ་མོ་ཆེ་ལ་མི་རིགས་ཀྱི་རང་བཞིན་གཏན་ནས་མེད་དེ་མི་རིགས་གཞན་པའི་སྙན་ངག་གི་ལད་མོ་ཤ་ཐོན་རུས་ཐོན་དུ་བྱས་ཤིང༌། རྗོད་བྱེད་ཀྱི་ཚིག་ནི་དེ་བས་ཀྱང་བོད་སྐད་མ་ཡིན་པ་ལྟ་བུ་ཞིག་ཏུ་གྱུར་འདུག དེ་ཡང་བོད་ཀྱི་བརྡ་སྤྲོད་པའི་ཚིག་ཕྲད་དེ་སྤྱི་སྒྲའི་ཕྲད་གང་སུ་ཅི་ཇི་དང་གུ་ཤིག་ཅིག་སོགས་ཀྱི་ནུས་པ་ལ་བརྩི་འཇོག་ཅི་ཡང་མེད་ལ་ཚིག་གི་ཆ་ནས་མཐིང་མདོག་གི་བསམ་པ་སོགས་མི་རིགས་འདིའི་ཁྱད་ཆོས་ལ་ཡེ་ནས་མེད་པ་དག་བཀོལ་བས་རྒན་པ་རྣམས་ཀྱིས་མི་འདོད་པའི་འཁང་གཏམ་སྣ་ཚོགས་སྨྲས་ཏེ་ཐ་ན་ཚིག་རང་དབང་ཅན་གྱི་སྙན་ངག་སྙན་ངག་མིན་ཞེས་རྗོད་བཞིན་པ་འདི་ནི་ང་ཚོས་མི་རིགས་རང་བཞིན་ལ་དོ་སྣང་མ་བྱས་པས་ལན། ལ་ལས་ཕྱི་གླིང་བའི་སྙན་ངག་ལ་བལྟས་ནས་སྙན་ངག་འབྲི་བ་མཐོང་མོད་སྙན་ངག་ལ་བལྟས་ནས་སྙན་ངག་འབྲི་བ་ནི་སྙན་ངག་འབྲི་སྦྱོང་གི་གོ་རིམ་ལས་མ་འདས་པས་དེ་ལྟ་ན་མི་རིགས་ཀྱི་རང་བཞིན་གཏན་ནས་ཐོན་མི་ཐུབ་ཅིང་ལྷག་པར་འཕེལ་རྒྱས་ལས་ལམ་ལོག་ཏུ་འགྲོ་ཉེན་ཆེ་ལ་ཚིག་དོན་གང་ལའང་ཕྱི་གླིང་བའམ་མི་རིགས་གཞན་པའི་སྙན་ངག་གི་ཁྱད་ཆོས་གཙོ་བོར་གཉེར་བ་འདི་མི་རིགས་ཀྱི་རང་བཞིན་ཉམས་བྱེད་ལས་ལེགས་ཆ་བསྡུ་བའི་ཚད་གཞིར་གཏན་ནས་མི་འགྲོ།
        མདོར་ན་མི་རིགས་ཀྱི་རང་བཞིན་ནི་སྙན་ངག་གི་གནད་ཀྱི་དོན་པོ་ཞིག་ཡིན་ཞིང་ཡིད་འཕྲོག་པའི་རྐྱེན་གཙོ་བོའང་ཡིན། དེས་ན་མི་རིགས་ཀྱི་རང་བཞིན་འདི་ཚིག་གི་ཆ་ནས་སྲོལ་རྒྱུན་དང་སྐད་རིགས། བརྡ་སྤྲོད་བཅས་ཀྱི་རྨང་གཞི་ལས་ཐོན་ཞིང་བརྗོད་བྱའི་ཐད་ནས་མི་རིགས་ཀྱི་དོན་དངོས་རྨང་གཞི་ལ་བསྟུན་ནས་བྱུང་བ་ཡིན། ལྷག་པར་དེ་གཉིས་ཟུང་དུ་སྦྲེལ་བའི་སྙན་ངག་ནི་མི་རིགས་ཀྱི་རང་བཞིན་ལྡན་པའི་བརྩམས་ཆོས་སུ་ཁ་ཚོན་གཅོད་ཆོག་ཅིང༌། སྙན་ངག་ལེགས་པའི་སྡོད་གནས་སུ་འདུག་པའི་ཆོ་ལོ་འཐོབ་ངེས་ཡིན།
བདུན། སྙན་ངག་གི་མཚོན་ཐབས།
        སྙན་ངག་གི་མཚོན་ཐབས་ནི་སྙན་ངག་པའི་རིག་པའི་རྩལ་ལས་ཐོན་པ་སྟེ་སྙན་ངག་འབྲི་བ་ལ་བྱང་བའི་འབྲས་རྟགས་ཤིག་ཡིན་ནའང་མཐའ་གཅིག་ཏུ་འདིར་ངེས་ཞེས་ཚོད་འཛིན་གཏན་ནས་མེད། དེའི་ཁྱད་ཆོས་བརྗོད་བྱ་སྟོན་པར་ཕན་ནུས་ངེས་ཅན་ཞིག་འདོན་པ་དང་ཚིག་ཚོགས་སྐྱུང་བྱེད་ཡིན་པས་མཚོན་ཐབས་དང་བྲལ་ཚེ་སྙན་ངག་དེ་ཚིག་ཉོག་ཏུ་འགྱུར་འགྲོ་བའམ་ཡང་ན་སྙན་ངག་གི་ཚོར་འདུ་དང་བརྩེ་དུང་ཀློག་པ་བོའི་ཡིད་ལ་སིམ་འགྲོ་བའི་ཁྱད་ཆོས་ཐོན་ཐུབ་པ་མ་ཡིན། དེས་ན་མཚོན་ཐབས་ཀྱི་དགོས་པ་སྙན་ངག་དང༌། ཀློག་པ་བོའི་འབྲེལ་བའི་སྟེང་དུ་གནས་ཡོད། 《མེ་ལོང་མ》ལས་བསྟན་པའི་དཔེ་རྒྱན་སོཊ་ཀྱང་མཚོན་ཐབས་ཡིན་ཏེ་དཔེར་ན་བྱ་ལེན་མའི་ཟློས་གར་ལས། འདམ་བུའི་ཚལ་ན་ཆུ་སྐྱེས་མཛེས་པ་སྟེ། །ར་རིས་རྒྱན་ཡང་ཟླ་བ་ཡིད་འོང་སྙམ། །ཤིང་ལོ་གྱོན་ཡང་ཕྲ་ལ་ལྡེམ་པའི་ལུས། །མཛེས་སྡུག་ཅན་ལ་རྒྱན་དུ་མི་འགྱུར་གང༌། །ཞེས་དང༌། ལུས་ནི་མདུན་དུ་འགྲོ་བྱེད་ཅིང༌། །སེམས་ནི་རྒྱབ་ཏུ་སླར་རྒྱུགས་པ། །ལྡོག་ཏེ་རླུང་གིས་འཁྱེར་བ་ཡི། །རྒྱ་ནག་དར་གྱི་བ་དན་བཞིན། །ཞེས་པ་འདི་གཉིས་ལས་ཡིད་ལ་དངོས་པོའི་ཆོས་ཉིད་ཅིག་གསལ་བོར་འཆར་ཐུབ་པ་ཞིག་དཔེར་བཀོད་པ་དེ་ལས་བརྗོད་བྱའི་དོན་སྟོན་པ་ལ་ནུས་པ་ཁྱད་པར་ཅན་ཞིག་བྱིན་པ་སྟེ་དོན་སྤྱི་ཁྱད་པར་ཅན་ཞིག་ལས་ཐད་ཀར་གློག་བརྙན་བསྟན་པ་ཇི་བཞིན་མིག་ལ་འཆར་ཐུབ་པ་རེད། ཡང《ཡི་དྭགས་སྐེ་རིང》ཞེས་པར། ཕ་ཞིག་གི་ལག་རྟེན་ཆག་ཐལ། །མ་ཞིག་གི་མིག་ཆུ་ལྷུང་ཐལ། །ཞེས་པ་འདི་ལ་མཚོན་ན་ར་མདའི་ཁྲོད་ཀྱི་གཞོན་ནུ་ཞིག་ཐད་ཀར་བསད་ཅེས་མ་བརྗོད་པར་འབྲས་བུ་ལས་གླེང་སྟེ་ རྒན་རྒོན་གཉིས་ཀྱི་འཚོ་རྟེན་དུ་གྱུར་པའི་གཅེས་ཕྲུག་སྟེ་ལག་རྟེན་ཞིག་ཆག་པས་དེའི་ཕ་མའི་ཚེ་མཇུག་གི་སྡུག་བསྔལ་དང་དཀའ་སྡུག ཐ་ན་རང་ཉིད་ཀྱིས་ཀྱང་དེ་གསལ་བོར་ཤེས་བཞིན་དུ་རང་སྲོག་སྲུང་བའི་ཆེད་དུ་བསད་ནའང་དེ་ནི་རང་རྒྱུ་ཆེད་དུ་རང་སྲོག་བློས་གཏོང་ཐུབ་པའི་དཔའ་བོ་ཞིག་ཡིན་པ་ཁས་བླངས་པར་མ་ཟད། དེའི་ཕ་མར་བརྩེ་དུང་ངམ་སྙིང་རྗེ་སྐྱེ་བ་སོགས་ཞིབ་མོར་བརྗོད་དེ་ཀློག་པ་བོ་རྣམས་ལ་བྲོ་བ་རྒྱ་ཆེན་པོ་ཞིག་སྟེར་བ་རེད། དེ་བཞིན་སྙན་ངག་པ་རེ་རེའི་བློ་གྲོས་ཀྱི་རྩལ་ལས་ཐོན་པའི་མཚོན་ཐབས་ཤིན་ཏུ་མང་ལ་ལག་ལེན་ལས་ཐོན་པའི་མཚོན་ཐབས་རེ་རེ་བཞིན་བརྗོད་པར་ག་ལ་ལང༌། ཡིན་ནའང་སྙན་ངག་གསར་བ་འབྲི་མཁན་དག་ལ་མཚོན་ན་མཚོན་ཐབས་གསར་བའང་ནང་འདྲེན་བྱེད་པ་མཐོང་མོད། དེ་ནི་གསར་བ་ལ་དགའ་བ་ཙམ་ལས་དགེ་མཚན་ཆེ་བའི་ཐབས་ཤེས་ཤིག་གཏན་ནས་མ་ཡིན།
        མཚོན་ཐབས་ལའང་ལུས་ངག་གི་བྱ་བས་ནང་གི་འགྱུར་བ་མཚོན་པ་དང་རྣམ་པ་ལས་མཚོན་པ། ཟུར་དང་ཉམས་ལས་མཚོན་པ་སོགས་ལག་ལེན་ལ་ཚད་འཛིན་མེད་ཅིང་མཚོན་ཐབས་ལ་མཛད་མཐའ་བྲལ་ནའང་ཞིབ་ཏུ་བསམས་ན་མཚོན་ཐབས་ལ་ཕྱིའི་མཚོན་ཐབས་དང་ནང་གི་མཚོན་ཐབས་གཉིས་ཡོད་ཅིང་ཕྱིའི་མཚོན་ཐབས་ནི་ཁོར་ཡུག་དང་དངོས་པོའི་འཕོ་འགྱུར་བརྗོད་པ་ལས་མཚོན་པ་དང༌། ནང་གི་དེ་རྣམ་འགྱུར་དང་སྨྲ་བརྗོད་སོགས་ལས་ཐོན་པ་ཞིག་སྟེ་ནང་སེམས་ཀྱི་འགྱུར་བ་ལས་ཕྱིའི་ཆོས་སྣ་ཚོགས་སུ་སྣང་བ་འདི་དང་དངོས་པོའི་འཕོ་འགྱུར་ལ་དོ་སྣང་ཆེན་པོ་བྱས་ཏེ་ཟུར་དང་ངོས་དག་གི་འབྲེལ་བ་ལ་ངེས་ཤེས་བྱུང་ན་མཚོན་རྟགས་སྣ་ཚོགས་འབྱུང་ལ་དེ་ནི་སྐད་ཆའི་སྒྱུ་རྩལ་ལ་གོམས་པའི་རྟགས་ཀྱང་ཡིན། ང་ཚོས་མཚོན་ཐབས་སྣ་ཚོགས་ཀྱི་ཆེད་དུ་རང་ཉིད་ཀྱི་བྱ་བྱེད་ལ་ལྟད་མོ་ལྟ་བའམ་རང་གཞན་གྱི་འབྲེལ་བ་དང་སེམས་ཁམས་བཅས་ལ་དངོས་སུ་ཞུགས་པར་མ་ཟད་ཟུར་ནས་ཀྱང་བལྟ་དགོས། དེ་དག་ཀྱང་ལས་སྣོན་དང་ཞུན་བརྡར་བརྒྱུད་དེ་བརྗོད་བྱ་མིག་ལ་འཆར་ཐུབ་ཅིང་ངོ་མཚར་ཆེ་བའི་མཚོན་ཐབས་སྣ་ཚོགས་འབྱུང་སྲིད།
བརྒྱད། སྙན་ངག་པར་འགྱུར་བའི་གོ་རིམ།
        སྙན་ངག་ལ་དགའ་བའི་མི་ཞིག་ཡིན་ཕྱིན། སྙན་ངག་པར་འགྱུར་འདོད་མེད་པ་ག་ལ་སྲིད། འོན་ཀྱང་སྙན་ངག་པར་འགྱུར་རྒྱུ་དེ་འདྲ་སླ་མོ་ཞིག་མིན་པས་སྙན་ངག་པར་འགྱུར་འདོད་པ་དག་གིས་སྙན་ངག་པར་འགྱུར་བའི་གོ་རིམ་ལ་བསམ་བློ་མ་བཏང་ན་ཕུགས་འདུན་དེར་འགལ་རྐྱེན་ཤིན་ཏུ་མང་བས་ལམ་བར་ནས་ཞུམ་པའང་སྐྱེ་ངེས་པས་དེ་ལྟ་ན་སྙན་ངག་པའི་གསེར་ཁྲིར་དབང་བའི་ལས་སྐལ་ཡང་ཇེ་རིང་དུ་འགྱུར་ངེས་རེད།
        རང་ལ་སྐྱེས་སྟོབས་ཀྱི་ཤེས་རབ་ཡོད་མེད་ལ་མ་བལྟས་པར་སྙན་ངག་པར་འགྱུར་འདོད་པ་ཞིག་ཡིན་ཕྱིན། ངེས་པར་དུ་རང་ཉིད་སྙན་ངག་མཁན་དུ་གྱུར་པའི་དུས་ཤིག་ཡོད་པའི་སྟོང་བསམ་རྨང་གཞིར་དགོས་ཤིང༌། དེ་ལྟ་བུའི་རྨང་གཞི་ནི་རང་བཀུར་དང་རང་ཉིད་ལ་ཡིད་ཆེས་འབྱུང་བའི་རྒྱུ་རྐྱེན་ཡིན་ལ། དེའི་དབང་གིས་དཀའ་སྤྱད་འབད་བརྩོན་དང་གདོང་མཆོང་ལ་ངར་ཤུགས་འབྱུང་ཐུབ། དེ་དང་མཉམ་དུ་སྐད་ཡིག་གི་ཆུ་ཚད་དང་མྱོང་བ་ཡང་དགོས་ཏེ་སྐད་ཡིག་གི་ཆུ་ཚད་ངེས་ཅན་ཞིག་མེད་ན་དག་ཆའམ་བརྡ་སྤྲོད། ཚིག་སྦྱོར་དག་ལ་འགོག་རྐྱེན་ཐེབས་ཤིང༌། མྱོང་བ་ནི་སྙན་ངག་གསོན་པོར་གཏོང་བའི་གསེར་འགྱུར་རྩི་ལྟ་བུ་ཡིན་ཞིང༌། དེ་ལ་ལག་ལེན་གྱི་མྱོང་བ་དང་འཚོ་བའི་མྱོང་བ། བསམ་པའི་མྱོང་བ་གསུམ་ཡོད་ལ་དེ་དག་ལ་བྱང་བར་འབད་པ་ནི་རང་བཀུར་ དང་ཡིད་ཆེས་ཀྱི་འབད་པ་བྱེད་མིན་གྱི་གནད་དེར་ཐུག་ཡོད། དེ་ཡང་ལག་ལེན་གྱི་མྱོང་ བའི་ཐད་ནས་བཤད་ན་སྙན་ངག་ཐོག་མར་འབྲི་བའི་ལས་དང་བོ་བ་དག་གིས་སྙན་ངག་འབྲི་དུས་ཡིད་ལ་ཅི་ཡང་འཆར་རྒྱུ་མེད་པའམ་གང་ཞིག་འབྲི་དགོས་མིན་མི་ཤེས་ལ་འབྲི་འདོད་རུང་ཅི་ཞིག་འབྲི་རྒྱུ་མི་རྙེད། ཡང་ན་འབྲི་རྒྱུ་ཞིག་རྙེད་རུང་སྨྱུ་གུ་ལག་ཏུ་བཟུང་ཚེ་བརྗེད་འགྲོ་བ་ལྟ་བུའི་བསམ་ཚུལ་ཞིག་སྐྱེས་ཤིང་གཞན་གྱིས་དེ་ལྟ་བུ་ཞིག་བྲིས་པ་མཐོང་ཚེ་རང་གི་འབྲི་རྒྱུ་དེ་བྲིས་འདུག་སྙམ་པ་དང་ད་གཟོད་ཡིད་ལ་ཤར་ཐུབ་པ་རེད། འདིའི་རྐྱེན་གཙོ་བོ་འཚོ་བའི་མྱོང་བས་མ་འདང་བ་དང༌། ལག་ལེན་གྱི་མྱོང་བ་ཞན་པ་དང་བསམ་པའི་མྱོང་བ་མེད་པའི་རྐྱེན་ལས་མ་འདས། འགག་སྒོ་འདིས་ཡིད་ཆད་སྲིད་ནའང་དེ་ལས་བརྒལ་བར་རྗོད་བྱེད་ཀྱི་ཚིག་གམ་དོན་གཡོར་བའམ་ལད་འབྲི་བྱས་ན་མི་རིང་བར་རྨང་གཞི་ཅུང་འབྱོར་ཐུབ། དེ་ནས་དེ་འཚོ་བའི་མྱོང་བ་དང་བསམ་པའི་མྱོང་བ་འབྲི་བར་སྦྱོང་དགོས། དེ་གྲུབ་ན་སྙན་ངག་ཆུ་བོའི་རྒྱུན་བཞིན་འཇོ་བའི་སྙན་ངག་པ་ཞིག་ཏུ་འགྱུར་ཐུབ།
        འོན་ཀྱང་བར་སྐབས་ནས་ཡིད་ཚིམ་ན་ཅི་ཡང་མི་འོང་ལ། སྙན་ངག་པར་འགྱུར་བའི་འདོད་བློའང་མིང་ཙམ་ལ་མི་བཅོལ་ཀ་མེད་ཡིན། ད་ལྟའི་ན་གཞོན་དག་ལ་བལྟས་ན་བར་སྐབས་ནས་ཡིད་ཚིམ་པའང་ཅུང་མང་བས་བོད་ལ་མིང་དོན་མཚུངས་པའི་སྙན་ངག་པ་དེ་འདྲ་མེད་པའི་རྒྱུ་རྐྱེན་གཙོ་བོ་ཡང་འདི་ཡིན་པ་འདྲ། དེ་བས་ཡིད་མ་ཚིམ་པར་བསམ་གཞིག་དང་མྱོང་བར་གོམས་པ་བཅས་ལས་གསར་བཏོད་འབྱུང་ངེས་ལ། རང་གི་ཐུན་མོང་མ་ཡིན་པའི་རྩོམ་རྩལ་མཐོ་རུ་འགྲོ་བས་སྙན་ངག་དེ་ཡང་རིམ་གྱིས་གོ་ས་མཐོ་རུ་འགྲོ་ངེས་ན་ལས་དང་བོ་བ་དག་གིས་གོ་རིམ་འདི་བརྗེད་མི་རུང་སྙམ།
དགུ། སྙན་ངག་གི་ལམ་ལོག
        བྱ་བ་གང་ཞིག་སྒྲུབ་ནའང་དེ་འགྲུབ་མིན་གྱི་རྒྱུ་རྐྱེན་ཡོད་ལ་ལྷག་པར་ལམ་ལོག་ཏུ་འགྲོ་སླ་བས་ཐོག་མར་ལམ་ལོག་ཏུ་འགྲོ་བའི་རྒྱུ་རྐྱེན་ངོས་ཟིན་ན་བྱ་བ་དེ་བདེ་བླག་ཏུ་འགྲུབ་སྲིད་པར་མ་ཟད། སླད་ནས་ཀྱང་དགེ་མཚན་ཆེན་པོ་འབྱུང་ངེས། སྙན་ངག་ཀྱང་དེ་ལས་མ་འདས་པས་ང་ཚོ་འཕེལ་རྒྱས་ཀྱི་ལམ་དུ་འགྲོ་ན་སྐྱོན་ཆ་འདོར་དགོས་ཤིང་དེ་ལ་ཡང་ངོས་ཟིན་དགོས།
        གཞོན་ནུ་མང་བོ་ཞིག་གི་ངོས་འཛིན་ལ་སྲོལ་རྒྱུན་གྱི་རྩོམ་སྟངས་ལམ་ལོག་ཅིག་ཏུ་འདོད་པ་ནི་འཁྲུལ་བ་ཐལ་ཆེ་ནའང༌། ཚིག་རྒྱན་གཙོ་བོར་འཛིན་པ་དང༌། གོ་སླ་བ་གྲོང་ཚིག་ཏུ་སྨོད་པ། དོན་དངོས་དང་ཁ་བྲལ་བ། དམངས་ཁྲོད་རྩོམ་རིག་ལ་དོ་སྣང་མེད་པར་དཔེ་ཐོག་ནས་སྙན་ངག་འཚོལ་བ་སོགས་ལམ་ལོག་མིན་ཞེས་བརྗོད་མི་ཐུབ། སྙན་ངག་གི་གསར་བཏོད་མཁན་སྙན་ངག་པ་ཡིན་མོད། དེར་ལྟ་མཁན་ཀློག་པ་བོ་ཡིན་པས་ཀློག་པ་བོས་དོ་སྣང་མེད་པའི་སྙན་ངག་ནི་སྙན་ངག་པའི་ངལ་བ་ལས་མེད་ཕྱིར་གོང་གི་དེ་དག་ལས་སྙན་ངག་འཚོ་བའམ་སྤྱི་ཚོགས་དང་ཁ་འབྲལ་བར་ངེས་སོ། །ལྷག་པར་དོ་སྣང་བྱེད་དགོས་པ་ནི་གསར་དར་སྙན་ངག་སྟེ། དེ་ཡང་རྒྱ་ནག་ལ་མཚོན་ན་སྔོན་ནས་དར་ཞིང་ད་ལྟ་བལྟས་ན་དེ་དག་གིས་འཕེལ་རིམ་གཞན་པ་ཞིག་གི་སྣེ་བཟུང་འདུག་པས་ང་ཚོའི་ནང་འདྲེན་དེ་ཡང་རྗེས་ལུས་ཤིག་ལས་མེད་ཅིང༌། དེ་ཡང་ཐོག་མར་སྙན་ངག་པ་ཞིག་གིས་གཞན་གྱིས་མི་གོ་བ་ཞིག་བྲིས། གཞན་ཞིག་གིས་དེ་ལ་ལད་མོ་བྱས་ཏེ་ངས་བྲིས་པ་ཁྱོད་ཀྱིས་མི་གོ་ལ་ཁྱོད་ཀྱིས་བྲིས་པ་ངས་མི་གོ་བའི་སྙན་ངག་ཅིག་དར་བཞིན་ཡོད། གནད་དོན་འདིར་ང་ཚོ་ཐོག་མར་འཕྲད་པ་ཡིན་པས་མི་རིགས་གཞན་པའི་ཉམས་མྱོང་ལས་བལྟས་ན་རྒྱ་ནག་གི་སྙན་ངག་མང་བོ་ཞིག་ལམ་ལོག་ཏུ་བགྲང་འདུག་པ་འདིས་མཚོན་ཞིང༌། རྗོད་བྱེད་ལ་རྒྱ་ཡིག་ཐད་བསྒྱུར་གྱི་ཚིག་མང་བོ་ཐོན་ཏེ་སུམ་རྟགས་དག་གསུམ་གྱི་གཏན་སྲོལ་རྡོག་རལ་དུ་གཏོང་བ་དག་དང༌། སྲོལ་རྒྱུན་གྱི་རྨང་གཞི་དང་དོན་དངོས་རྨང་གཞི། མི་རིགས་ཀྱི་ཁྱད་ཆོས་སོགས་སྣང་མེད་དུ་འཇོག་པ་དག་ནི་འཕེལ་རྒྱས་ཀྱི་ལམ་ཁར་འཕྲད་པའི་གོལ་ས་ཞིག་རེད་སྙམ།
        ཡང་གཅིག་བསམས་ན། ད་ལྟའི་སྙན་ངག་པར་རློམ་པ་ཕལ་མོ་ཆེས་མི་རིགས་གཞན་པའི་གཞུང་ལུགས་རྗེས་ཟློས་དང་སྙན་ངག་ལ་མིག་དཔེ་བལྟ་བ་ལས་བློ་ཁ་ནང་དུ་ཕྱོགས་ནས་སྙན་ངག་མ་ཐོས་ལ་སྙན་ངག་ལ་རྒྱུས་ལོན་བྱུང་མེད་པ་དང་རང་ཉིད་དང་སྙན་ངག་གི་འབྲེལ་བ་མ་བསམས་པས། ན་གཞོན་དག་གི་མགོ་ལ་སྐྲ་ལོ་བཞག་ཡོད་ནའང་དེས་གྱེར་བའི་སྙན་ངག་མ་ཐོས་ཤིང་སྙན་ངག་ལས་མི་རིགས་ཀྱི་ལ་རྒྱ་གླེང་ནའང་དེ་དང་སྙན་ངག་གི་འབྲེལ་བ་ལ་མ་བསམས་པས་ལམ་ལོག་ཏུ་འགྲོ་བའི་ཉེན་ཚབས་ཆེ་བ་རེད། དེ་ལྟར་བསམས་ཚེ་རང་ཉིད་ཀྱི་ཁྲག་དྲོན་དུ་རྒྱུ་བ་ནི་སྙན་ངག་ཡིན་ལ་ཨ་མའི་མིག་མདངས་སུ་འཕྱོ་བ་བརྩེ་དུང་ཡིན། ཐ་ན་གཡང་དཀར་གྱི་འབའ་སྒྲ་ཞིག་ནའང་ལྷུང་ལྷུང་དུ་རྒྱུ་བའི་རེ་ཉག་གི་རྦ་རླབས་ཤིག་འཕྱོ་བཞིན་འདུག་ན་ཡང༌། ང་ཚོས་སྙན་ངག་གི་བརྩེ་དུང་གཞོན་ནུ་མ་ལས་བཙལ་ཅིང་སྙན་ངག་གི་བགྲོད་ལམ“ཏི་སི་ཁོ”ལ་བརྗེས་པའི་འདུན་པ་འདི་ཇི་འདྲའི་སྐྱོ་ཨང༌། འདི་ལྟ་བུའི་བསམ་ཚུལ་དང་ཚད་གཞི་ལས་རྟག་ཏུ་གཞན་ལ་སྨོན་ནའང་རེ་སྨོན་གྱིས་བསླུས་པའི་ཤུལ་རྗེས་ནས་ཁ་ཕྱིར་འཁོར་ཏེ་སྡུག་ཡུས་འདོན་དགོས་པ་སུས་ཀྱང་དོ་སྣང་བྱེད་བཞིན་མེད་པ་འདྲ།
མཇུག་གི་གཏམ།
        སྙན་ངག་གི་གནད་དོན་འགའ་ཤས་གླེང་ནས་མཇུག་བསྡུས་མོད། ད་དུང་སྙན་ངག་ཁྲོད་ཀྱི་མི་གཤིས་རིག་པ་དང། སྙན་ངག་གི་གསང་བ། གསར་རྙིང་བར་གྱི་གཏན་ཚིགས་སོགས་འབྲི་དགོས་པ་མང་བོ་ཞིག་ད་དུང་འབྲི་རྒྱུ་ལུས་པ་འདྲ། ཡིན་ནའང༌། མི་ཞིག་གི་མཐོང་རྒྱ་ནི་ཁབ་ཅིག་གི་བུ་གའི་དཔེ་བཞིན་བདེན་དོན་མོད་པ་ཞིག་གཏན་ནས་མིན་ཕྱིར་རེ་ཞིག་ཆོག་ཤེས་བསྟེན་ན་ཡང༌། གོང་དུ་བརྗོད་པའི་ཚན་པ་དགུ་བོ་ནི་མཁས་པའི་གཞུང་ལུགས་ལ་མ་བརྟེན་པར་རང་གི་མྱོང་བ་དང་ངོས་འཛིན་གཞིར་བཞག་པས་ལོག་བཤད་དང་ཉོག་བཤད་སྲིད་པར་སྨོས་མ་དགོས་ནའང༌། སྙན་ངག་ལ་ཞེན་པ་བདག་ལ་མཚོན་ན་འདི་ལས་ལྷག་པའི་སེམས་གཏམ་མེད་ཕྱིར་མཁྱེན་ཡངས་ཀྱི་གྲོགས་པོ་དག་གིས་མཐོང་ཆུང་མེད་པར་དགག་གཞག་དང་དཔྱད་བརྗོད་ཀྱིས་བོད་ཀྱི་སྙན་གཞུང་ཐུན་མོང་མ་ཡིན་པ་ཞིག་གི་སྔོན་འགྲོར་ཐུན་མོང་གི་ནུས་པ་དང་ལྟ་བ་གཅིག་ཏུ་བསྣམས་པའི་རེ་བ་སྙིང་ཐག་པ་ནས་ཞུའོ།།