«ཡང་ཡང་ཡིད་ལ་དྲན་པའི་རྩྭ་ཐང»ཞེས་པ་ལས་འཕྲོས་པའི་གཏམ།

       ལོ་རབས་བརྒྱད་ཅུའི་ནང་སྐྱེས་པའི་ལྷ་གཡང་ནོར་བུ་ནི་བོད་ཀྱི་དེང་རབས་ན་གཞོན་རྩོམ་པ་པོའི་དཔུང་ཁག་ཁྲོད། སློབ་ལ་བརྩོན་ཞིང་གསར་རྩོམ་གྱི་སྨྱུག་ཁ་གཏན་ནས་མི་ལྷོད་མཁན་ཞིག་རེད། ཁོང་གིས་སློབ་སྦྱོང་དང་ལས་ཀའི་ཞོར་དུ་འབད་པ་ཧུར་ཐག་ངང་གསར་རྩོམ་ལ་གཞོལ་ཏེ། སྔ་རྗེས་སུ་བོད་ལྗོངས་ཉིན་རེའི་ཚགས་པར་དང་། ནག་ཆུའི་ཚགས་པར། བོད་ཀྱི་རྩོམ་རིག་སྒྱུ་རྩལ། སྤང་རྒྱན་མེ་ཏོག་སོགས་ཀྱི་དུས་དེབ་དང་ཚགས་པར་སྟེང་བརྩམས་ཆོས་མི་ཉུང་བ་ཞིག་སྤེལ་ནས་རྩོམ་རིག་གསར་རྩོམ་གྱི་ནུས་རྩལ་གང་ལེགས་མངོན་ཐུབ་པ་བྱུང་ཡོད།        ལྷ་གཡང་ནོར་བུ་ནི་གྲོང་གསེབ་ཏུ་ལྟེ་ཁྲག་འཕོས་ནས་འཚར་ལོངས་བྱུང་བ་དང་། ཕ་ཡུལ་དང་། ཕ་ཡུལ་གྱི་ཕ་མ་སྤུན་མཆེད་ལ་བརྩེ་བ་ཟབ་ཅིང་། གྲོང་གསེབ་ཀྱི་འཚོ་བར་རྒྱུས་མངའ་ཆེ་བར་མ་ཟད། ལྷ་སའི་བྱང་ཕྱོགས་ཀྱི་ཁྱད་དུ་འཕགས་པའི་ས་མ་འབྲོག་གི་རིག་གནས་མཁའ་དབུགས་སྟུག་པོའི་དབུས་འཚར་ལོངས་བྱུང་བའི་རྐྱེན་གྱིས་དམངས་ཁྲོད་རྩོམ་རིག་ལ་རང་བཞིན་ངང་བག་ཆགས་བཟང་པོ་ཡོད་ལ་རྨང་གཞིའང་གཏིང་ཟབ་པོ་ཞིག་འདིང་ཐུབ་པ་བྱུང་ཡོད། སྤྱི་ལོ༢༠༠༥ལོར་བོད་ལྗོངས་ཞིང་འབྲོག་སློབ་ཆེན་ལས་ཐོན་ཏེ། ཡངས་ཤིང་རྒྱ་ཆེ་བའི་བྱང་ཐང་ནག་ཆུའི་རྩྭ་ཐང་དུ་འབྱོར་རྗེས། ས་ཆ་དེ་གའི་གངས་རི་དང་། མཚོ་མོ། རྩྭ་ཐང་ལ་སེམས་པ་དབང་མེད་དུ་ཤོར་བ་དང་། ལྷག་པར་དུ་རྩྭ་ཐང་གི་གྲུ་ཟུར་གང་སར་བློ་བདེ་བག་ཕེབས་ངང་འཚོ་བཞིན་པའི་མི་དང་། རྟ་ནོར་ལུག་གསུམ། དེ་བཞིན་མིའི་རིགས་ཀྱི་གྲོགས་པོར་གྱུར་པའི་རི་སྐྱེས་སྲོག་ཆགས་ལ་དམིགས་བསལ་གྱི་བརྩེ་དུངས་ཤིག་ཆགས་ཡོད། བྱང་ཐང་གི་ལོ་བཅུའི་འཚོ་བའི་ཉམས་མྱོང་དང་། ལྷག་པར་དུ༢༠༡༡ལོར་ཤན་རྩ་རྫོང་རིག་རྩལ་ལྷན་ཚོགས་དབུ་བརྙེས་ཤིང་། ཤན་རྩའི་དམངས་ཁྲོད་རིག་གནས་དཔེ་ཚོགས་ཀྱི་རྒྱུ་ཆ་འཚོལ་ཞིབ་དང་བསྡུ་སྒྲིག་གི་ལས་ཀར་ཞུགས་པ་ནས་བཟུང་། བྱང་འབྲོག་ལ་རྒྱུས་མངའ་དང་། རྩྭ་ཐང་གི་རིག་གནས་ཤེས་རྟོགས། གནའ་བོའི་སྲོལ་རྒྱུན་རིག་གནས་ལ་བསམ་གཞིག་བཅས་བྱེད་པར་དམིགས་བསལ་གྱི་མཐུན་རྐྱེན་བཟང་པོ་འཛོམས་པ་དེས་ཕྱིས་སུ་རྩོམ་རིག་གསར་རྩོམ་གྱི་རྨང་གཞིའང་བརྟན་པོ་ཞིག་འདིང་ཐུབ་པ་བྱུང་ཡོད། ཁོང་གིས་བྱང་འབྲོག་རྩྭ་ཐང་ནི་བདག་ལ་གསར་རྩོམ་གྱི་འབྱུང་ཁུངས་དང་། འཛད་མཐའ་མེད་པའི་སྟོབས་ཤུགས་སྩོལ་མཁན་དེ་ཡིན་པས། གནས་འདི་ན་ནམ་ཡང་བྲིས་མི་ཚར་བའི་གཏམ་རྒྱུད་རིང་མོ་ཡོད་ལ། ཚེ་གང་གི་འབད་འཐབ་དམིགས་ཡུལ་ཡང་ཡོད། ཅེས་གསུངས།        གཞི་རྩའི་ཆ་ནས་ལྷ་གཡང་ནོར་བུའི་ལྷུག་རྩོམ་ལས་བབ་ཆགས་ཤིང་སྲོལ་རྒྱུན་གྱི་རྣམ་པ་ལེགས་པོ་ཞིག་མངོན་པ་དང་། ནང་སེམས་ཀྱི་འགྱུར་བག་དང་ཚོར་སྣང་ངམ་བརྩེ་བ་དེ་ཇི་མ་ཇི་བཞིན་ལྷུག་བརྗོད་བྱས་འདུག་ལ། སྔ་ཕྱི་བར་གསུམ་དུ་བྱང་ཐང་ལ་བཅངས་པའི་ལྷག་བསམ་དང་འགན་འཁྲིའི་འདུ་ཤེས་ཤིག་ཀྱང་མངོན་འདུག དེ་བས་བརྩེ་སེམས་ལ་ལྷད་མེད་ཅིང་། ལྷུག་བརྗོད་ལ་བཙིར་གནོན་མེད་པར་རང་བཞིན་ངང་ལྷུང་ལྷུང་དུ་འབབ་པའི་ཆུ་རྒྱུན་ལྟ་བུས་རྩོམ་ཡིག་སྤྱིའི་བསམ་གཞིག་གི་འཁོར་རྒྱ་ཡངས་པོར་བཏང་བར་མ་ཟད། རྩོམ་པ་པོ་རང་ཉིད་ཁོ་ནར་དབང་བའི་ལྷུག་བརྗོད་བྱེད་ཐབས་ཤིག་ཀྱང་འཚོལ་ཞིབ་དང་ཉམས་ལེན་བྱེད་བཞིན་འདུག
       དཔེར་ན། «ཡང་ཡང་ཡིད་ལ་དྲན་པའི་རྩྭ་ཐང»གི་ནང་། རྩོམ་པ་པོའི་དྲན་ཤེས་ངོགས་ཀྱི་མཛེས་སྡུག་ལྡན་པའི་མི་སྣ་དང་བྱ་བ། ཁོར་ཡུག་སོགས་ལ་བཅངས་པའི་ཚོར་འདུ་ཟབ་མོ་དང་། བསམ་གཞིག་ནན་ཏན། ལྷད་མེད་བརྩེ་དུངས་སོགས་ལས་མངོན་གསལ་ཤིན་ཏུ་དོད། མ་གཞི་ལྷུག་རྩོམ་དེ་ཉིད་རིང་པོ་ཞིག་མིན་རུང་། དེའི་ནང་རྩྭ་ཐང་དང་། ཕ་ཡུལ། མི་རིགས། མེས་རྒྱལ་ལ་བཅངས་པའི་ལྷག་བསམ་ཟོལ་མེད་ཀྱི་མཛའ་སེམས་ཟབ་མོ་ལྷུག་པོར་བརྗོད་ཡོད། ཁོང་གི་རྩོམ་ལས་མངོན་པའི་མི་ཚེའི་མཐོང་སྣང་དང་མཛེས་དཔྱོད་ཀྱི་མཐོང་སྣེ་ལས་རྩོམ་པ་པོའི་བློ་རྒྱ་དང་། སེམས་ཁམས། ཕུགས་བསམ། འཚོལ་སྙེག མི་གཤིས་སོགས་རང་བཞིན་ངང་མྱོང་ཐུབ། ལྷག་པར་དུ་ཁོང་གིས་མི་རིགས་ཀྱི་ལོ་རྒྱུས་རིག་གནས་དང་། ཡུལ་སྲོལ་གོམས་གཤིས། མ་འོངས་ཁ་ཕྱོགས་སོགས་ལ་ཡར་བརྩོན་དང་ཧུར་བརྩོན་གྱི་རེ་བས་ཕྱུག་པར་བྱས་ཏེ། ཀློག་པ་པོར་བག་ཆགས་གཏིང་ཟབ་པོ་འཇོག་ཐུབ་པ་བྱུང་ཡོད། ལྷུག་རྩོམ་འདིའི་སྤྱིའི་སྒྲིག་གཞི་ནི་ལྷུག་ཆ་ཆེ་ཞིང་གོ་རིམ་དང་ལྡན་ལ། སྐད་ཆའི་འགྲོས་སྙན་ཞིང་འཕར་ཆག་དང་དམ་ལྷོད་རན་པ། བརྗོད་པ་རིང་ཐུང་ཕན་ཚུན་བསྣོལ་སྡེབ་ཀྱི་སྒོ་ནས་ཡར་འཕར་མར་འཇགས་ཀྱི་ཚོར་འདུ་ཟབ་པར་མཐོང་ཞིང་། ཡིག་འབྲུའི་བར་གསེང་ལས་ལྷང་ལྷང་དུ་འཐུལ་བའི་བྲོ་བ་ནི་ཁོང་གིས་རྩྭ་ཐང་འདི་ཉིད་རང་ཉིད་ཀྱི་དྲོ་ཞིང་སྐྱིད་པའི་ཕ་ཡུལ་དུ་འཛིན་པ་དང་། འབྲོག་པའི་སྒོ་ཁྱི་ཡང་རང་གི་གྲོགས་པོ་བཟང་པོ་ཞིག་ཏུ་རྩི་བཞིན་ཡོད། བརྩེ་བ་ཟབ་ཅིང་རྨང་གཞི་ཚུགས་ཐུབ་པ་གང་ཞིག  འཚོ་བའི་དྲི་བསུང་ལྷང་ལྷང་དུ་འཐུལ་འོང་བ་དང་། མགོ་ནས་མཇུག་བར་དུ་བྱམས་དང་སྙིང་རྗེ་ཁོ་ནའི་བརྗོད་དོན་བསྐྱར་ཟློས་ཙམ་མིན་པར། དུས་རབས་ཀྱི་གོམ་འགྲོས་དང་སྤྱི་ཚོགས་ཀྱི་འགྱུར་ལྡོག་འགྲོ་བའི་སྣང་ཚུལ། བརྩེ་སེམས་ཀྱི་གྲུབ་ཆའི་འཕོ་འགྱུར་སོགས་ཀྱང་མངོན་ཆུང་ངང་མཚོན་ཐུབ་པ་ནི་དམིགས་བསལ་གྱི་ཁྱད་ཆོས་ཤིག་ཏུ་མཐོང་།        ཁོང་གིས་རང་ཉིད་ཀྱིས་བྲིས་པའི་རྩྭ་ཐང་སྐོར་གྱི་ཡིག་འབྲུ་རེ་རེ་ནི། སྨོན་འདུན་དང་། བཀའ་དྲིན། ལྷད་མེད་ཀྱི་ལྷག་བསམ། ཚེ་གང་གི་བླ་སྲོག་ལྟ་བུ་ཡིན་ཞེས་གསུངས་ཤིང་། ཁོང་ནི་འདབ་རྒྱ་ལྷུག་པོར་གྲོལ་བའི་རྩྭ་ཐང་གི་སྤང་རྒྱན་མེ་ཏོག་ཅིག་དང་འདྲ་བར། འཚོ་བའི་བརྒྱུད་རིམ་ཁྲོད་ཐོབ་པའི་ཤེས་རབ་དང་ཚོར་འདུ་གང་ཡོད་ཡིད་སེམས་འགུགས་པའི་ལྷུག་རྩོམ་རེ་རེར་དྲངས་ཡོད།
       ཨ་ཅང་ཅང་། ལྷ་གཡང་ནོར་བུའི་ལྷུག་རྩོམ་གྱི་གསར་རྩོམ་ཐད། ད་དུང་མི་འདང་བའི་ཆ་ཡང་འགའ་ཤས་མཆིས་ཏེ། ཐོག་མར་རྩོམ་རིག་གྱི་སྐྱེ་ཁམས་དང་རང་བྱུང་སྐྱེ་ཁམས་གཉིས་གཅིག་མཐུན་གྱི་འདུ་ཤེས་ད་དུང་གཏིང་ཟབ་པོ་མེད་ཅིང་། ངེས་པར་དུ་དུངས་བརྗོད་ཀྱི་རྣམ་པ་ལས་རྗེས་དཔག་གི་ཤེས་པ་ཟབ་ཏུ་གཏོང་རྒྱུར་འབད་དགོས། དེ་རྗེས་སྤྱི་ཚོགས་ཀྱི་རིག་གནས་འདུ་ཤེས་དེ་ཉིན་རེ་བཞིན་ཕུན་སུམ་ཚོགས་ཤིང་རྙོག་འཛིང་ཆེ་ལ་སྣེ་མང་ཅན་དུ་འགྱུར་བ་དང་། འགྱུར་ལྡོག་དེ་དང་སྲོལ་རྒྱུན་རིག་གནས་དབར་གྱི་འབྲེལ་བ་དང་ཤུགས་རྐྱེན་ཐེབས་ཕྱོགས་ལ་བསམ་གཞིག་བྱེད་པའི་གཏིང་ཚད་དང་ཞིབ་ཚད་ལའང་ཤུགས་སྣོན་རྒྱག་དགོས། གཞན་ཡང་རྩོམ་ཡིག་རེ་ཟུང་གི་བརྗོད་བྱ་དང་སྒྱུ་རྩལ་གཉིས་ཀའི་ཟབ་ཚད་མི་འདང་བ་དང་སྦྲགས། ཅུང་གཏིང་ཟབ་ཅིང་ལྗིད་ཚད་ཆེ་བའི་བརྗོད་སྙིང་དང་སྒྱུ་རྩལ་མཚོན་ཐབས་འཚོལ་ཞིབ་བྱ་རྒྱུར་དེ་བས་ཤུགས་སྣོན་རྒྱག་དགོས།
       འདིར་དམིགས་སུ་བཀར་ནས་གླེང་དགོས་པ་ཞིག་ལ། ཁོང་གི་བརྩམས་ཆོས་ལས་མངོན་པའི་སྐྱེ་ཁམས་ཀྱི་འདུ་ཤེས་མཚོན་པའི་མྱུ་གུ་འབུས་པ་ནས། རང་འགུལ་གྱི་སྐྱེ་ཁམས་འདུ་ཤེས་འཛུགས་སྐྱོང་བྱ་བར་ད་དུང་ལམ་ཐག་རིང་པོ་ཞིག་བགྲོད་དགོས་ལ། སྐྱེ་ཁམས་ཀྱི་བསམ་གཞིག་ནས་རྩོམ་རིག་གིས་འཚོལ་ཞིབ་བྱེད་པར་ཡང་ད་དུང་རྒྱུན་ཆད་མེད་པའི་ཞུན་བརྡར་ནན་པོ་བྱེད་དགོས། ཉེ་བའི་ལོ་ཤས་རིང་ལྷ་གཡང་ནོར་བུས་རྩོམ་སྒྲིག་གི་ལས་འགན་ལྕི་ནའང་རྩོམ་ཡིག་སྤུས་དག་རེ་འགའ་གསར་རྩོམ་བྱེད་མུས་ཡིན་པས། མ་འོངས་པར་ཁོང་གི་གསར་རྩོམ་ཐད་ཐོད་བརྒལ་གསར་པ་ཞིག་ཡོང་རྒྱུར་རེ་སྒུག་འཆང་བཞིན་ཡོད་ལ། ལྷ་གཡང་ནོར་བུར་བོད་ཀྱི་ལྷུག་རྩོམ་གསར་རྩོམ་གྱི་མདུན་ལྗོངས་ཡངས་མོར། མུ་མཐུད་འབད་བརྩོན་དང་འཚོལ་ཞིབ་གང་མང་དང་། རང་ཉིད་ཁོ་ནར་དབང་བའི་གསར་རྩོམ་གྱི་ཉམས་ལེན་དང་ཁྱད་འཕགས་དགེ་མཚན་མངོན་ཞིང་། གསར་རྩོམ་གྱི་བྱ་གཞག་ལ་འབྲས་བུ་བཟང་པོ་འཐོབ་རྒྱུའི་རེ་སྒུག་འཆང་བཞིན་ཡོད།