སྙན་ངག་པ་ཐོ་ཡོར་གྱི«ཞོགས་པ»གླེང་བ། སྒྲེན་པོ།

རྣམ་ཀུན་ལྟར་འཁོར་བའི་དུས་ཚོད
སྐད་ཆ་ཁ་ཤས་ཀྱི་སྐྱེ་ཤི

གཞོན་པའི་ལུས་པོ་འདིས
དོན་གང་ཞིག་འབྱུང་བར་སྒུག་གིན་འདུག

ཀླག་ཅོར་དང་ཐག་རིང་བའི་ཞོགས་པ
མི་རྣམས་ལ་ཀླན་ཀ་འཚོལ་བྱེད་དུ་སྐྱེས

ཤེས་རབ་དང་བྲལ་བའི་ཁུག་མ་ཞིག
མཚན་གང་གི་འཁྲུལ་སྣང་གིས་གཏམས

ང་རང་ཞོགས་པར་སྐྱེལ་མཁན་ནི
ང་རང་གཞན་ཞིག་སྟེ
བདག་མེད་པའི་དྲང་ཐད་ནས་བལྟས་ན་མཐོང་ཐུབ་པའོ།།

ཕྲན་དཔྱད།
       དེའང་སློབ་དཔོན་དབྱུག་པ་ཅན་གྱིས་སྙན་ངག་མེ་ལོང་མའི་རྩ་བ་རུ། སྙན་ངག་མཛེས་པར་བྱེད་པ་ཡི། །ཆོས་རྣམས་རྒྱན་ཞེས་རབ་ཏུ་བརྗོད། །དེ་ནི་ད་ལྟའང་རྣམ་རྟོག་སྟེ། །དེ་དག་མ་ལུས་སུས་འཆད་ནུས། །འོན་ཀྱང་རྣམ་རྟོག་ས་བོན་ནི། །སྔོན་གྱི་སློབ་དཔོན་རྣམས་ཀྱིས་བསྟན། །དེ་ཉིད་རབ་ཏུ་ལེགས་སྦྱར་ཕྱིར། །ཡོངས་སུ་ངལ་འདི་བདག་གིའོ། །ཞེས་བཀོད་ཡོད་ཅིང་། སྙན་ངག་མེ་ལོང་མའི་གཞུང་དངོས་ཀྱི་རྩ་བ་འདི་ལ་འབྲུག་ཁམས་སྤྲུལ་བསྟན་འཛིན་ཆོས་ཀྱི་ཉི་མས་འདི་ལྟར་འགྲེལ་ཡོད་དེ། རྒྱན་དེ་ལ་རྣམ་གྲངས་ཅི་ཙམ་ཡོད་ཅེ་ན། དབྱེ་བ་ཕྲ་མོ་ནི་སྔོན་ཐོག་མའི་དུས་ནས་བརྩམས་ཏེ་ད་ལྟའི་བར་དུའང་རྣམ་རྟོག་གི་སྒོ་ནས་ཐ་དད་པ་དུ་མ་བྱུང་ལ། ད་ལྟ་ཡང་སྙན་ངག་མཁན་མཁས་པ་རྣམས་ཀྱིས་སྙན་ངག་མཛེས་པར་བྱེད་པ་སྦྱོར་ཚུལ་སྔར་མ་གྲགས་པ་གཅིག་བཀོད་ན་རྒྱན་དུ་འགྱུར་ཞིང་། དེ་བཞིན་དུ་དུས་མ་འོངས་པ་ལའང་དེས་རིགས་འགྲེ་བས། མདོར་ན་དུས་གསུམ་གྱི་སྙན་ངག་མཁན་ཇི་ཙམ་པ་དེ་ཙམ་པའི་རྣམ་རྟོག་གི་རྗེས་སུ་འགྲོ་བའི་ཕྱིར། དེ་ལྟ་བུའི་རྒྱན་མ་ལུས་པ་ནི་ཚུ་རོལ་མཐོང་བའི་བྱིས་པ་སུས་འཆད་པར་ནུས་ཏེ་མི་ནུས་སོ། །འོ་ན་རྒྱན་མཐའ་ཡས་པས་མཐའ་དག་བརྗོད་པར་མི་ནུས་ན་གཞུང་རྩོམ་པའི་ངལ་བས་ཅི་བྱ་ཞེ་ན། དེ་ལྟ་ནའང་གཙོ་བོ་བསྡུ་བའམ་མཚན་ཉིད་རྒྱན་ཀུན་གྱི་རྟོག་དཔྱོད་ཀྱི་རྩ་བའམ་རྣམ་རྟོག་གི་ས་བོན་ཙམ་སྔོན་གྱི་སློབ་དཔོན་སྙན་ངག་གི་མཚན་ཉིད་མཛད་པ་པོ་རྣམས་ཀྱིས་བསྟན་ཏོ། །དེ་ལྟར་ས་བོན་བསྟན་པ་དེ་ཉིད་ཀྱང་གཞུང་ཆེན་པོ་རྣམས་ལ་ཤིན་ཏུ་རྒྱ་ཆེ་ཞིང་འཐོར་བའི་ཚུལ་གྱིས་ཡོད་པ་འདིར་བསྡུ་བ་དང་། མི་གསལ་བ་གསལ་བར་བྱ་བ་ཚིག་ཉུང་ངུ་བ་དེ་དག་གི་དོན་རྒྱ་ཆེན་པོ་རྣམས་བདེ་བླག་ཏུ་རྟོགས་པར་བྱ་ནུས་པའི་ཚུལ་དུ་རབ་ཏུ་ལེགས་པར་སྦྱར་ཏེ་དབྱུག་པ་ཅན་བདག་གིས་འབད་ཅིང་ཡོངས་སུ་ངལ་བས་འདི་རྩོམ་པ་ཡིན་གྱི། རྒྱན་ཐམས་ཅད་བརྗོད་པའི་ཆེད་དུ་མ་ཡིན་ཏེ་མཐའ་ཡས་པས་མི་ནུས་པའི་ཕྱིར་རོ། །ཞེས་བཀོད་པ་ནང་བཞིན། མིའི་རྣམ་རྟོག་དང་ཡིད་འགྱུར་དམིགས་ཡུལ་དུ་འཛིན་པའི་རྣམ་པ་ཞིག་ལ་སྒྱུ་རྩལ་ཞེས་བསྙད་ཆོག་ཅིང་། སྒྱུ་རྩལ་གྱི་གསང་བའང་མཐར་ཐུག་ན་མཛེས་དཔྱོད་རིག་པའི་ངོས་ནས་མཛེས་པ་དང་མཛེས་རྟོག་ཅེས་པའི་གསང་བའི་མཐིལ་རྟོགས་ཐུབ་མིན་ལ་རག་ལས་འདུག་སྙམ།
       མི་རྣམས་ཀྱིས་རང་སོ་སོའི་ཡིད་འགྱུར་དང་རྣམ་རྟོག་ཅི་རིགས་མི་གཞན་ལ་བསྟན་ནས་མཉམ་འུར་དང་ཚོར་གདུང་གཅིག་འདྲ་བསྐྱེད་པར་བྱེད་པ་ཡིན་ལ། རྩོམ་རིག་བརྩམས་ཆོས་ནི་རྩོམ་པ་པོའི་ནང་སེམས་ཀྱི་རྣམ་རྟོག་ཅི་རིགས་ཕྱུང་སའི་སྒེའུ་ཁུང་ལྟ་བུ་ཡིན།མིའི་ཡིད་འགྱུར་དང་ཚོར་འདུ་ནི་རང་སྣང་ཡུལ་ཅན་ནམ་མིའི་ནང་སེམས་ལ་ཕྱོགས་པ་ཅན་གྱི་སེམས་འགྱུ་ཞིག་ཡིན་པས། ཡིད་འགྱུར་དེའི་རིགས་ལ་མི་གཞན་གྱིས་གདུང་སེམས་མཉམ་སྐྱེད་དང་མཉམ་འུར་ཡོང་བར་བྱེད་པ་ལ་ཅིས་ཀྱང་ལྟ་མཁན་གྱིས་བལྟས་ན་ཚོར་སླ་ཞིང་དང་ལེན་བྱེད་བདེ་བའི་ཐབས་ལམ་ཞིག་ལ་འཁེན་ནས་བཤད་ན་གཞི་ནས་དམིགས་འབྲས་དེ་མངོན་དུ་འགྱུར་ཐུབ། དམིགས་འབྲས་དེ་ནི་བརྩམས་ཆོས་རང་གི་སྒྱུ་རྩལ་གྱི་ཐབས་ལམ་སམ་རྩོམ་ཐབས་ཡིན། དེར་བརྟེན་རྩོམ་རིག་ལ་བློ་སྦྱོང་སྔོན་སོང་ཅན་ཞིག་ཡིན་ན། ཁོས་ཅི་ཞིག་འབྲི་བའི་བརྗོད་སྙིང་གཙིགས་ཆེན་དུ་མི་འཛིན་པར་ཇི་ལྟར་འབྲི་བའི་རྩོམ་ཐབས་ལ་མཐོང་ཆེན་གང་ལེགས་བྱེད་ངེས།མདོར་དེད་ན་རང་སེམས་གསལ་སྟོན་བྱ་རྒྱུ་རང་གི་དམིགས་ཡུལ་དུ་བསྒྱུར་ནས་མཚོན་པ་ལས་མ་འདས་སྙམ། དབྱིན་ཇིའི་སྙན་ངག་པ་གྲགས་ཅན་ཨེ་ལའེ་ཐི་ཡིས་བརྩེ་དུང་མཚོན་པའི་ཐབས་ལམ་ཉག་ཅིག་ནི་བརྩེ་དུང་གི་ཆེད་དུ་ཕྱི་རོལ་ཡུལ་གྱི་ལྟོས་ཟླའི་དངོས་པོ་འཚོལ་རྒྱུ་དེ་ཡིན་ཞེས་པའི་བཞེད་དགོངས་བཏོན་ཡོད།
       ད་ནི་དཔྱད་པར་བྱ་བའི་གཞི་སྙན་ངག་པ་ཐོ་ཡོར་གྱི་སྙན་ངག་ཞོགས་པ་ཞེས་པར་བལྟས་ན། སྙན་ངག་འདིའི་ཁ་བྱང་ལ་ཞོགས་པ་ཞེས་བཏགས་འདུག ཞོགས་པ་ནི་དུས་ཀྱི་ཆ་ནས་བཤད་ན། ཉིན་གཅིག་ཕྱེད་གསུམ་དུ་བགོས་པའི་ནངས་སྔ་མོའི་ཆ་ཡིན་ལ། རྟགས་དང་མཚན་མའི་ཆ་ནས་བཤད་ན། རང་རེའི་བོད་ཀྱིས་ཞོགས་པ་ཞེས་པའི་གདགས་གཞི་འདི་ལ་རྟེན་འབྲེལ་དང་ཚོར་གདུང་གང་ཇི་སྙེད་ཅིག་བསྩལ་ཡོད། དཔེར་ན་ལྷ་བསང་གཏོང་བ་དང་རླུང་རྟ་སྤུར་བ། གསོལ་འདེབས་ཞུ་བ་སོགས་ཆོ་ག་མང་པོ་ཞིག་ཞོགས་པར་སྤེལ་དགོས་པ་ལྟ་བུར་གྲུབ་འདུག རང་རེའི་བོད་མིའི་སྣང་ངོར་ཞོགས་པ་ནི་ཉིན་མོ་གསར་རྐྱང་ཞིག་དང་འཚོ་བའི་གདོད་མ་ཞིག ཡང་ན་བབ་གཙང་གི་ཞིང་བཀོད་ཅིག་ལ་གོ་བཞིན་ཡོད།
       སྙན་ངག་གི་ཚན་པ་དང་པོའི་ནང་རྒྱུན་གོམས་སུ་གྱུར་པའི་ལྟ་ལུགས་མྱོང་ལུགས་ཤིག་དང་ཡང་ན་བལྟས་ན་དུས་ལྟར་བར་མེད་དུ་འཁོར་བཞིན་པའི་དུས་ཚོད་ཀྱི་རྒྱུན་ཞིག་དང་། སྐད་ཅིག་མ་རེ་རེ་ནས་འགྱུར་ཏེ་འཇིག་གིན་པའི་འདི་སྣང་གི་རྟེན་དང་བརྟེན་པ་ཞིག་ཁ་གཏད་དུ་ལངས་པར་བྱས་ནས་བྲིས་ཡོད་ལ། རྒྱུན་རིང་མོ་ཞིག་དང་དུས་ཡུན་སྐད་ཅིག་མ་གཅིག་གི་སྐྱེ་འཇིག་བྲིས་ཏེ་ལྟ་ལུགས་མཐོང་ལུགས་ཡན་གར་བ་ཞིག་སྟོན་པར་བློས་བསླངས་ཀྱི་ས་བོན་ལྟ་བུ་བཏབ་འདུག
       ཚན་པ་གཉིས་པས་ད་ལྟའི་ལུས་པོ་འདིས་འབྱུང་འགྱུར་ལ་སྒུག་བཞིན་པའི་ཆ་ཞིག་བྲིས་འདུག་ལ། ཁ་ཇེ་གསལ་དུ་བཏང་ནས་བཤད་ན། ད་ལྟའི་རང་ལ་ཡོད་པའི་གཞོན་པའི་ལུས་པོ་འདིས་མི་འདོད་བཞིན་དུ་བཙན་གྱིས་མ་འོངས་པར་དོན་གང་ཞིག་འབྱུང་བར་སྒུག་བཞིན་པ་ལས་བྱ་ཐབས་བྲལ་བའི་གཞན་དབང་གི་ཆ་ཞིག་བྲིས་འདུག
       མི་མང་ཆེ་བའི་སྣང་ངོར་ཞོགས་པ་ནི་དབེན་འཇགས་དང་ཁུ་སིམ་ལྟ་བུར་སྣང་ནའང་། ཚན་པ་གསུམ་པར་སྙན་ངག་པས་ཀླག་ཅོར་དང་ཁ་ཐག་རིང་བའི་ཞོགས་པ་དེ་མི་རྣམས་ལ་རྩོད་པ་སློང་བྱེད་ལྟ་བུར་གྲུབ་འདུག་ཅེས་སྤྱིར་བཏང་གི་མིའི་སྣང་ངོར་གྲུབ་པའི་ཞོགས་པ་ལས་ལྡོག་པ་ཞིག་བྲིས་འདུག སྤྱིར་ན་རྣ་བར་གཟན་པའི་སྒྲ་སྣ་ཚོགས་གྲག་རྒྱུ་མེད་པའི་ཁུ་སིམ་གྱི་ཞོགས་པ་ནི་མི་རྣམས་ལ་མཚོན་ན་བདེ་སྣང་དང་རྒྱུན་གོམས་ལྟ་བུར་མཐུན་སྣང་དུ་གྲུབ་ནའང་། སྙན་ངག་པས་དབེན་འཇགས་ཀྱི་ཞོགས་པ་དེ་ཆེད་དུ་མི་རྣམས་ལ་རྩོད་པ་སློང་བྱེད་དུ་སྐྱེས་པ་ལྟ་བུ་ཞིག་བྲིས་འདུག
       ཚན་པ་བཞི་པར་ཤེས་རབ་ཟབ་མོ་མི་ལྡན་པའི་མི་ལ་མཚོན་ན་གང་སྣང་གང་མྱོང་ཐམས་ཅད་གཉིད་ལོག་པའི་སྐབས་ཀྱི་རྨི་ལམ་དང་འཁྲུལ་སྣང་འབའ་ཞིག་ཏུ་གྲུབ་འདུག་པ་ལས་གང་སྣང་གང་མྱོང་གི་རང་ཞལ་ངོ་མ་དང་བདེན་ལུགས་ངོ་མ་དུས་ནམ་ཡང་མཐོང་ཐུབ་ཀྱིན་མེད་པའི་ཆ་ཞིག་བྲིས་འདུག
       ཚན་པ་ལྔ་པར་སྙན་ངག་པས་ཁོ་རང་གོང་གི་ཚན་པ་བཞི་ཡིས་བཞེངས་བཀོད་བྱས་པའི་ཞོགས་པ་དེ་ལྟ་བུ་རུ་འཕེན་མཁན་ནི། ཁོ་རང་གཞན་ཞིག་ཡིན་ལ། དེའང་བདག་མེད་པའི་ལྟ་བའི་ངོས་ནས་བལྟས་ན་ཧ་ཅང་གསལ་བོ་རེད་ཅེས་བྲིས་འདུག དེའང་ཁ་ཇེ་གསལ་དུ་བཏང་ནས་བཤད་ན། བདག་མེད་རྟོགས་པའི་ཤེས་རབ་ཀྱི་ངོས་ནས་བལྟས་ན། ང་རང་ཞོགས་པ་དེ་ལྟ་བུ་ཞིག་ལ་སྐྱེལ་མཁན་ནི་ལས་ཉོན་གྱི་གཞན་དབང་དུ་གྱུར་པའི་ང་གཞན་ཞིག་གིས་བཟོས་པ་རེད་ཅེས་བསྟན་འདུག
       སྙན་ངག་གི་ཚན་པ་ལྔ་པོ་གུང་བསྒྲིགས་ནས་བལྟས་ན། སྙན་ངག་པས་ནང་བསྟན་མཚན་ཉིད་རིག་པའི་ལྟ་བ་ཞིག་སྟོན་བྱེད་ལ་ཞོགས་པ་ཞེས་པའི་ཕྱི་རོལ་ཡུལ་གྱི་ཆོས་དངོས་ཤིག་ཞིབ་འབྲི་བྱས་ཏེ། ཞོགས་པ་དེ་ཞིབ་འབྲི་དང་དེའི་སྟེང་དུ་རང་སྣང་ཡུལ་ཅན་གྱི་བསམ་བཀོད་ཚང་མ་བཞག་ནས། ཕུགས་ཀྱི་བསྟན་དོན་ནི་བདག་མེད་པའི་ལྟ་བའམ་ཡང་ན་བདག་མེད་རྟོགས་པའི་ཤེས་རབ་ཀྱིས་བལྟས་ན་རྒྱུན་གོམས་སུ་སོང་བའི་ཞོགས་པ་དེ་ལ་ལྟ་ལུགས་གསར་པ་ཞིག་དང་མྱོང་ལུགས་གསར་པ་ཞིག་གིས་ལྟ་ཐུབ་པའི་གཟུགས་འདས་རིག་པ་དང་ཡང་ན་ནང་བསྟན་མཚན་ཉིད་རིག་པའི་གནད་ཅིག་མངོན་ཆུང་གིས་ཀེར་འདུག་སྙམ། སྙན་ངག་འདིའི་སྲོག་ལྟ་བུ་ནི་ཁ་བྱང་དུ་གྱུར་པའི་ཞོགས་པ་རེད་ལ། ཞོགས་པ་བྲིས་པའི་ཕུགས་ལ་ཆོས་ཀྱི་བདག་མེད་དང་གང་ཟག་གི་བདག་མེད་གཉིས་ཆ་རྟོགས་པའི་ཤེས་རབ་ཟབ་མོ་སྟེ། བདག་མེད་རྟོགས་པའི་ཤེས་རབ་ཀྱིས་བལྟས་ན་རྒྱུན་གོམས་རྒྱུན་ལྡན་དུ་སྣང་བ་ཐམས་ཅད་སྨུག་པས་གངས་རི་སྒྲིབ་པ་ལྟ་བུའམ། ཡང་ན་བཟི་སྣང་གིས་དབང་རྩ་སྤྲིད་པར་བྱས་པ་ནང་བཞིན། འདི་སྣང་གང་ཤར་གྱི་དངོས་པོའི་རང་ཞལ་ངོ་མ་མཐོང་བར་གེགས་བྱས་འདུག་ཅིང་། དངོས་པོའི་རང་ཞལ་ངོ་མ་མཐོང་བ་ལ་ཅིས་ཀྱང་བདག་མེད་རྟོགས་པའི་ཤེས་རབ་བཙལ་ནས་རྙེད་དགོས་པའི་གནད་ཀ་ལྟ་བུ་ཞིག་ཤུགས་ལ་བསྟན་འདུག་སྙམ། སྙན་ངག་འདིས་སྙག་ངག་པ་མང་པོ་བཀོལ་བར་དགའ་བའི་ཚོར་གདུང་ཐད་ཀར་སྟོན་པ་དང་ཡང་ན་ལྗོངས་རྣམ་ཞིག་གཡར་ནས་དེའི་སྟེང་ནས་ཚོར་བ་སྟོན་པ་ལྟ་བུ་མ་ཡིན་པར། བསམ་བློ་དང་ཡིད་འགྱུར་ཅི་རིགས་ལྗོངས་རྣམ་ཞིབ་བརྗོད་བྱེད་པའི་ཁྲོད་དུ་ཡིབ་ནས་མངོན་ཆུང་གིས་བསྟན་ཡོད་ཅིང་། རྩོམ་ཐབས་འདི་ནི་སུའེ་ཏེན་གྱི་སྙན་ངག་མཁན་ཐི་ལང་ཟི་ཐི་ལའོ་མུའུ་ཡི་སྙན་ངག་གི་བཞེད་དགོངས་སྟེ། སྙན་ངག་ནི་བྱ་དངོས་ལ་བཅངས་པའི་མྱོང་ཚོར་ཞིག་ཡིན་པས། དེ་ནི་ངོས་འཛིན་ཞིག་མ་ཡིན་པར་འཆར་སྣང་ཞིག་ཡིན། སྙན་ངག་གི་ལས་འགན་གཙོ་བོ་ནི་བསམ་པའི་འཚོ་བ་གསར་བཟོ་དང་ལྐོག་གྱུར་གསལ་སྟོན་བྱ་རྒྱུ་དེ་ཡིན་ཞེས་པའི་དགོངས་པ་དང་གཅིག་མཐུན་ལྟ་བུར་སྣང་འདུག་གོ །
        མཁས་དབང་དུང་དཀར་རིན་པོ་ཆེའི་གྲུབ་མཐའི་སྐོར་གྱི་རྣམ་བཤད་ལས། དབུ་མ་ཐལ་འགྱུར་པའི་ཐུན་མོང་མ་ཡིན་པའི་ཁྱད་ཆོས་བརྒྱད་བགྲངས་པའི་ཁྲོད་ཀྱི་ཁྱད་ཆོས་དྲུག་པ་རུ་འདི་ལྟར་བཞེད་ཡོད་དེ། དབུ་མ་ཐལ་འགྱུར་བས་ཆོས་ཀྱི་བདག་འཛིན་ཟེར་བ་དེ་ཉོན་མོངས་ཡིན་པར་འདོད་དེ། གང་ལགས་ཤེ་ན། གང་ཟག་གི་བདག་མེད་ཆ་ཚང་བ་ཡག་པོ་ཞིག་རྟོགས་དགོས་ན་ཆོས་ཀྱི་བདག་མེད་རྟོགས་དགོས། ཆོས་ཀྱི་བདག་མེད་མ་རྟོགས་ན་གང་ཟག་གི་བདག་མེད་ཆ་ཚང་བ་ཞིག་རྟོགས་མི་ཐུབ། དེའི་རྒྱུ་མཚན་ནི། གང་ཟག་ཡིན་ནའང་འདྲ། ཆོས་ཡིན་ནའང་འདྲ། དེ་རང་བཞིན་གྱིས་གྲུབ་པ་རེད་བསམ་པའི་བསམ་བློ་དེ་ཡོད་ན་རང་གི་སེམས་རྒྱུད་ཀྱི་ཉོན་མོངས་དེ་མེད་པ་བཟོ་ཐུབ་མེད། ཕྱི་རོལ་གྱི་ཡུལ་དེ་རང་གི་མཚན་ཉིད་ཀྱིས་གྲུབ་པ་རེད་བསམ་པའི་བསམ་བློ་ཡོད་ཕྱིན་འདོད་ཆགས་དང་ཞེ་སྡང་། གཏི་མུག་སོགས་ཚང་མ་མེད་པ་བཟོ་མི་ཐུབ། འདོད་ཆགས་སྐྱེ་སའི་ཡུལ་དང་ཞེ་སྡང་སྐྱེ་སའི་ཡུལ། གཏི་མུག་སྐྱེ་སའི་ཡུལ་དེ་ཚོ་ཚང་མ་ཕྱི་རོལ་གྱི་ཡུལ་ངོས་ནས་གྲུབ་པའི་བསམ་པའམ་འཆར་སྣང་ཡོད་ཕྱིན་ཆད་ལ། རང་གི་སེམས་རྒྱུད་ལ་ཉོན་མོངས་མེད་པ་ཞིག་རྩ་བ་ནས་ཡོང་མི་ཐུབ་པས་ཕྱི་རོལ་གྱི་ཡུལ་དེ་རང་བཞིན་གྱིས་གྲུབ་པ་རེད་སྙམ་པའི་བསམ་བློ་དེ་ཉོན་མོངས་ཡིན་པ་དེ་དེ་ནས་གཏན་འཁེལ་བ་རེད། དེར་བརྟེན་ཉོན་མོངས་སྐྱེ་སའི་རྩ་བ་དེ་ཆོས་ཀྱི་བདག་འཛིན་དང་གང་ཟག་གི་བདག་འཛིན་ལ་ཐུག་ཡོད་སྟབས་འཁོར་བ་ནས་ཐར་བ་དང་ཉོན་མོངས་སྤོང་དགོས་ན་ངེས་པར་དུ་ཆོས་ཀྱི་བདག་འཛིན་སྤོང་དགོས་པ་དང་ཆོས་ཀྱི་བདག་མེད་རྟོགས་དགོས་པ་ཡིན་པས་ཆོས་ཀྱི་བདག་འཛིན་ཉོན་མོངས་ཡིན་པའི་རྒྱུ་མཚན་དེ་འདྲ་ཡིན་ཟེར་ཞེས་གསལ་བོར་བཀོད་འདུག མ་རིག་པའི་དབང་གིས་ལས་དང་ཉོན་མོངས་བསགས། ཉོན་སྒྲིབ་དང་ཤེས་སྒྲིབ་མ་ཟད་ཀྱི་བར་དུ་རྒྱུན་གོམས་སུ་སྣང་བའི་འཁོར་བ་འདིའི་ངོ་བོ་ཀ་དག་དེ་མཐོང་མི་ཐུབ། ལས་ཉོན་གྱི་གཉེན་པོ་ལྟ་བུ་དང་ནད་བརྒྱ་འཇོམས་པའི་སྨན་དཀར་པོ་ཆིག་ཐུབ་ལྟ་བུ་ནི་བདག་མེད་རྟོགས་པའི་ཤེས་རབ་ཡིན་པར་བརྟེན། བདག་མེད་རྟོགས་པའི་ཤེས་རབ་ཀྱི་ངོས་ནས་བལྟས་ན་ལས་ཉོན་གྱི་གཞན་དབང་དུ་མ་གྱུར་བའི་བདག་གསར་པ་ཞིག་དང་ཞོགས་པ་ཡན་གར་པ་ཞིག་མཐོང་ཐུབ་པའི་གནད་ཀ་ལྟ་བུ་ཞིག་སྙན་ངག་པས་ཞོར་ལ་བསྟན་འདུག་སྙམ། ཐོ་ཡོར་ལགས་ནི་གྲྭ་བཙུན་སྙན་ངག་པ་ཞིག་ཡིན་པའི་ཆ་ནས། བོད་རྩོམ་གྱི་སྙན་ངག་གསར་པའི་སྡིངས་ཆ་རུ་ནང་བསྟན་མཚན་ཉིད་རིག་པའི་ཉི་འོད་ཀྱི་ཟེར་མ་ཕྲ་མོ་རེ་སྤྲོ་ཐུབ་ན་ཡག་ཐོག་ཡག་བརྩེགས་ལས་མ་འདས་སྙམ་མོ། །