རྔ་ཆེན་རོལ་དབྱངས་ཀྱི་ལོ་རྒྱུས་རྒྱབ་ལྗོངས། དཔའ་རྩེ།

       «རྔ་ཆེན་རོལ་དབྱངས»ནི་སྐུ་ཞབས་ཡི་དམ་ཚེ་རིང་ལགས་ཀྱིས༡༩༨༥ལོའི་ཟླ༥བར་རྒྱ་ཡིག་གིས་བརྩམས་པ་ཞིག་ཡིན་ལ་ད་ལྟའི་བར་དུ་སྙན་ངག་འདིར་འགྱུར་གཉིས་ཡོད། གཅིག་ནི་ལྷོ་ནུབ་མི་རིགས་སློབ་ཆེན་གྱི་དགེ་རྒན་བན་ཁོ་དང་གཞན་ཞིག་ནི་ནུབ་བྱང་མི་རིགས་སློབ་ཆེན་གྱི་དགེ་རྒན་ཁ་སྒང་བཀྲ་ཤིས་ཚེ་རིང་གིས་བོད་ཡིག་ཏུ་བསྒྱུར་བ་རེད། འདིར་བཀོད་པ་ནི་རྒན་བན་ཁོ་ལགས་གྱི་འགྱུར་དེ་ཡིན།
       སྙན་ངག་འདི་བརྩམས་པའི་ལོ་རྒྱུས་རྒྱབ་ལྗོངས་ནི༡༩༨༥ལོའི་ཟླ༥བར་པེ་ཅིན་དུ་རྒྱལ་ཡོངས་གྲངས་ཉུང་མི་རིགས་ཀྱི་རྩོམ་རིག་དཔྱད་གླེང་ཚོགས་འདུ་ཞིག་བསྡུས་པ་དང་། ཚོགས་འདུའི་སྟེང་མི་རིགས་སོ་སོའི་མཐུས་མི་ཡིས་རང་གི་མི་རིགས་ཀྱི་རྩོམ་རིག་གནས་བབ་དང་མ་འོངས་པའི་དམིགས་འབེན་སོགས་ངོ་སྤྲོད་བྱས། དུས་དེར་མཚོན་ན་སོག་རིགས་དང་ཁྲོའོ་ཞན་རིགས་སོགས་མི་རིགས་གཞན་གྱི་རྩོམ་རིག་ནི་བོད་རིགས་ལས་འཕེལ་རྒྱས་ཅུང་ཆེ། སྐུ་ཞབས་ཡི་དམ་ཚེ་རིང་གིས་ཀྱང་བོད་ཀྱི་རྩོམ་རིག་གིས་ངེས་པར་དུ་འཕེལ་རྒྱས་ཀྱི་གོམ་ཁ་ཇེ་མགྱོགས་སུ་གཏོང་དགོས་པའི་རེ་སྨོན་བཏོན་ཞིང་འབོད་སྐུལ་བསྒྲགས་ལ། དོན་དམ་དུ་སྐབས་དེའི་བོད་ཀྱི་རྩོམ་རིག་གསར་རྩོམ་དེ་མི་རིགས་གཞན་ལས་ཅུང་ཞན་པ་ལྟར་སྣང་ཡང་སྔོན་བྱོན་མཁས་དབང་དག་གི་རྩོམ་རིག་བརྩམས་ཆོས་ནི་གཞན་ལས་མི་དམན་པའི་ལྟ་ཚུལ་བཏོན། དེར་མ་ཟད་བོད་ཀྱི་རྩོམ་རིག་གསར་བ་དེ་གཉིད་ལས་སད་པའི་སེང་གེ་བཞིན་དུ་མ་འོངས་པར་འཕེལ་རྒྱས་སུ་འགྲོ་ངེས་པའི་མདུན་ལམ་མཐོང་ཞིང་གྲུབ་འབྲས་ལེགས་པོ་ཐོན་ངེས་པའི་སྡོམ་ཚིག་བཀོད།
       སྙན་ངག་འདིར“ཁྲང་པེ་རི་བོའི་རྒྱ་སྟག་ཁྲ་བོའི་ངར་སྐད”ཀྱིས་ཁྲོའོ་ཞན་རིགས་ཀྱི་རྩོམ་རིག་གི་གནས་བབ་མཚོན་ལ། སྙན་ངག་པ་ཁོང་གིས་ཁྲོའོ་ཞན་རིགས་ཀྱི་རྩོམ་རིག་གི་འཕེལ་རྒྱས་མཐོང་བས་རང་ཅག་བོད་ཀྱི་རྩོམ་རིག་ལའང་དེ་འདྲའི་འཕེལ་རྒྱས་ཡོད་ན་ཅི་མ་རུང་སྙམ་པའི་རེ་སྨོན་ནམ་ལ་རྒྱ་བཅངས་པ་སྟེ་སྙིང་ཁོང་གི“ལ་རྒྱའི་མཚོ་མོ་དགུང་དུ་འཕྱུར”བ་དང་། “ཞི་ཧྲོང་པན་ནའི་གླང་ཆེན”གྱིས་ཏེ་རིགས(傣族)དང་མོའོ་རིགས(苗族)སོགས་ཡུན་ནན་གྱི་མི་རིགས་གྲངས་ཉུང་གི་རྩོམ་རིག་གི་འཕེལ་རྒྱས་དགེ་མཚན་མཚོན་ལ“རྐང་འོག་ས་གཞི་སྔངས་ཤིང་འདར་་་་་་་”ཞེས་པའི་ཚིག་གིས་འཕེལ་རྒྱས་ཀྱི་གྲུབ་འབྲས་ལྕི་ཞིང་གཡུར་དུ་ཟ་བས་ས་གཞི་ཡང་འདར་ཞེས་རྟོག་བཏགས་ཀྱིས་བརྗོད་པའོ། །འདིར་བདུད་རྩི་སྨན་ལྗོངས་ཅེས་པས་ཞི་ཧྲོང་པན་ནར་རྩི་ཤིང་དང་སྐྱེས་དངོས་ཀྱི་རིགས་མང་པ་མཚོན། དེ་བཞིན་དུ“ནང་སོག་རྩྭ་ཐང་སྟེང་གི་རྟ་མཆོག་གི་འཚེར་སྐད”ཀྱིས་སྐབས་དེའི་སོག་རིགས་ཀྱི་རྩོམ་རིག་མཚོན་ལ། སྙན་ངག་པས“གློ་བུར”རམ་ཐེངས་དེར་སོག་རིགས་ཀྱི་རྩོམ་རིག་གནས་བབ་དང་འཕེལ་རྒྱས་ཀྱི་རྣམ་པ་མཐོང་། དེ་མཐོང་བ་ལ་རྐྱེན་བྱས་ཏེ་བོད་རང་གིས་ཀྱང་བརྩོན་ཤུགས་བསྐྱེད་དགོས་པའི་སྤོབས་པ་རྙེད་པ་སྟེ་ཁོག་དཔུང་ལ་རྒྱ་དེ་གཡུ་རལ་གསིག་པའི་སེང་གེ་བཞིན་དུ་སེམས་ཀྱི་གངས་རི་ན་འཕྱོ་ཞེས་པའོ། །
       ཚན་པ་བར་མའི་ཚིག་རྐང་གཅིག་པོ་དེ་ཡིས་ཐེངས་དེའི་རྩོམ་རིག་དཔྱད་གླེང་ཚོགས་འདུའི་སྟེང་མི་རིགས་སོ་སོའི་མཐུས་མི་ཡིས“མཁས་བརྒྱ་འགྲན་གླེང་དང་མེ་ཏོག་མཉམ་བཞད”ཀྱི་ཚུལ་གྱིས་ཀྲུང་གོའི་མི་རིགས་གྲངས་ཉུང་གི་རྩོམ་རིག་ལ་དབྱེ་ཞིབ་བྱས་པའི་དགེ་མཚན་བརྗོད་ལ། མི་རིགས་སྲིད་ཇུས་ལག་བསྟར་བྱས་ཟིན་པའི་ལོ་རབས་བརྒྱད་ཅུ་བའི་སྟོད་དེ་ནི“དཔྱིད་ཀ་སླེབས་པ”ལྟ་བུའི་བསྐལ་བ་བཟང་པོ་ཞིག་དང་རིགས་སོ་སོའི་རྩོམ་པ་པོའི་བརྩམས་ཆོས་ནི“དཔྱིད་ཀྱི་འཇོལ་མོ་སོགས་བྱ་དང་བྱེའུ་ཡི་སྐད་”དང་འདྲ་བར་སྙན་ལ་ཡིད་དབང་འཕྲོག་པས། མི་རྣམས་ཀྱིས་བརྩམས་ཆོས་ལ་རོལ་བའམ“ཉན་པར་སྤྲོ”འོས་པ་ནི་འཇིག་རྟེན་ཆོས་ཉིད་དང་མཐུན་ཞེས་པ་སྟེ་གཙོ་བོ་དུས་ཀྱི་བསྐལ་བ་བཟང་བོ་དང་རྩོམ་རིག་གི་གྲུབ་འབྲས་ལ་བསྟོད་པའོ། །
       ཚན་པ་རྗེས་མ་དེའི་མཚོན་དོན་ནི་སྐབས་དེའི་ཚོགས་འདུའི་སྟེང་མི་རིགས་སོ་སོའི་རྩོམ་པ་པོས་རང་མི་རིགས་ཀྱི་ལོ་རྒྱུས་དང་གནས་བབ་མཚོན་པའི་སྙན་ངག་གྱེར་འདོན་བྱས་པ་ཡིན་ལ་སྐུ་ཞབས་ཁོང་གིས་ཀྱང“ཨ་མའི་སྙིང་ནས་གདམས་པའི་གླུ”སོགས་སྙན་ངག་གྱེར་འདོན་བྱས། སྙན་ངག་དེ་དག་གིས་བོད་དང་བཅས་པའི་མི་རིགས་སོ་སོའི་ཕྱི་རབས་པ་རྣམས་ཀྱི་ཡིད་ངོར་རང་རང་གི་རྒྱལ་ཁབ་བམ་མི་རིགས་ཀྱི་སྔར་སོང་ལོ་རྒྱུས་ཀྱི་མཛེས་པའི་སྣང་བརྙན་གསོན་པོ་ཞིག་བཞག་སོང་ཞེས་རྗེས་རབས་པ་རྣམས་ལ་ལོ་རྒྱུས་ཀྱི་དྲན་པ་གསོས་ཡོད་པ་མཚོན།
       སྒྱུ་རྩལ་མཚོན་ཐབས་ཀྱི་ཆ་ནས་བཤད་ན་སྙན་ངག་འདི་སྐུ་ཞབས་ཁོང་གིས༡༩༨༠-༡༩༨༡སྐབས་སུ་གསར་གཏོད་བྱས་པའི་རྩོམ་ལུས“བཞི་གཅིག་གཉིས”ཅན་གྱི་འབྲི་སྟངས་སྤྱད་ཡོད་ཅིང་ཁོང་གིས་སྐུ་ཚེ་གང་བོར“བཞི་གཅིག་གཉིས”ཅན་གྱི་སྙན་ངག༡༨༥བརྩམས་ཡོད་ཅིང་། རྩོམ་སྟངས་དེ་ཚན་པ་གསུམ་གྱིས་གྲུབ་ལ་ཚན་པ་དང་པོར་ཚིག་རྐང་བཞི་དང་ཚན་པ་གཉིས་པར་ཚིག་རྐང་གཅིག ཚན་པ་གསུམ་པ་ཚིག་རྐང་གཉིས་སུ་བྱས་ཡོད།
       ཚན་པ་དང་པོའི་ཚིག་རྐང་བཞི་ཡིས་སྤྱིར་བཏང་བྱ་དངོས་སམ་དངོས་ཡོད་སྣང་ཚུལ་མཚོན་པ་ཡིན་ལ། དེ་ནི་སྙན་ངག་ཧྲིལ་བོའི་གླེང་སློང་ངམ་མ་གདན་ལྟ་བུར་བྱས་ཡོད། ཚན་པ་གཉིས་པའི་ཚིག་རྐང་གཅིག་པོ་དེ་ཡིས་ཚན་པ་དང་པོ་རུ་བྱུང་བའི་བྱ་དངོས་ཀྱི་ངོ་བོའམ་སྣང་ཚུལ་རྗེན་པར་མཚོན་པ་ཡིན། ཚན་པ་རྗེས་མའི་ཚིག་རྐང་གཉིས་ནི་སྙན་ངག་ཧྲིལ་བོར་བཀོད་པའི་ལེགས་བཤད་དམ་སྡོམ་ཚིག་གི་རྣམ་པ་ཡིན་ལ་དེས་སྙན་ངག་ལ་ངང་ངམ་ཤུགས་ཀྱིས་བདེན་པའི་གནས་ལུགས་ཀྱི་ཆ་ལྡན་པར་བྱས་ཡོད་དོ། །