དམ་བཅའ་དང་རྩོམ་རིག ལྡོང་ལྕགས།

       གནའ་མཁར་འདྲེ་བཞི་ཟེར་བ་དེ་དེ་སྔོན་བཤད་ཚུལ་འདྲ་མིན་མཆིས་མོད། ད་ཆ་དཔེ་དེབ་དེ་མཐོང་བ་ལས། དེ་དག་ནི་ཞི་བདེ་ཉི་མ་དང་འབྲོང་། གཅན་མེ་སྟག རྡོ་གྲགས་སོགས་བཞི་ལས་གྲུབ་པའི་ལོ་རབས་དགུ་བཅུའི་སྐབས་ཀྱི་བོད་ཡིག་གི་དེང་རབས་སྙན་ངག་གི་གསར་རྩོམ་ཚོགས་ཆུང་ཞིག་ཡིན་པ་གཞི་ནས་ཤེས།
       སྤྱིར་གནའ་མཁར་འདྲེ་བཞི་ཡི་མི་རེ་རེ་བཞིན་རྒྱུས་ལོན་ཞིག་བྱས་ཚེ། དེ་དག་གིས་གསར་རྩོམ་གནང་བའི་སྙན་ངག་དང་གློག་བརྙན། གཞས་ཚིག ཟློས་གར་སོགས་ནི་དངོས་ནས་མི་རབས་ཤིག་གི་རྟགས་མཚན་དང་གསར་གཏོད། སྟོང་ཆ་སོགས་ལ་གྲུབ་ཡོད་པ་དེ་དུས་ཚོད་དང་སྤྱི་ཚོགས་ཀྱི་རིན་ཐང་ཐད་ནས་ཀྱང་མིག་མཐོང་ལག་ཟིན་ཡིན་པ་སྨྲ་མི་དགོས་པ་ཞིག་ཡིན་ལ། རྩོད་གླེང་ཅི་ཡང་མེད་པའི་དངོས་ཡོད་ཀྱི་སྣང་ཚུལ་ཞིག་ཀྱང་ཡིན་པ་ལོ་རབས་ཀྱིས་བསྡོམ་ཚིག་བཞག་ཚར་བ་རེད།
       ལྷག་པར་དུ། གནའ་མཁར་འདྲེ་བཞིའི་དཔེ་དེབ་ཀྱི་མདུན་ཤོག་ནང་ཁོ་ཚོས་རྩོམ་རིག་གི་ཆེད་དུ་བཞག་པའི་མནའ་ཡིག་གམ་ཆོད་ཡིག་དེ།གནའ་དེང་བོད་ཀྱི་རིག་གནས་ལོ་རྒྱུས་སྟེང་བྱུང་མ་མྱོང་བ་ཞིག་ཡིན་ལ། རྩོམ་རིག་གསར་རྩོམ་གྱི་ཆེད་དུ་ཤི་གསོན་གྱི་མནའ་མཆེད་བསྒྲིགས་པའི་འགྱུར་མེད་བརྟན་ཚིགས་དེ་ནི་ངོ་མ་སྨྲ་མི་ཤེས་པའི་རིག་གནས་ཀྱི་སྣང་ཚུལ་ཡ་མཚན་ཞིག་ཏུ་རྩིས་ཆོག        གནའ་མཁར་འདྲེ་བཞིའི་ཞི་བདེ་ཉི་མ་ལགས་ཀྱང་སྙན་ངག་དང་སྒྱུ་རྩལ་གྱི་ཆེད་དུ་གསོན་པ་དང་འདྲ་བར། ལོ་ན་རྒས་པར་ཆགས་ཀྱང་བསམ་བློ་དང་གསར་རྩོམ་གྱི་བློ་སྤོབས་སྔར་བཞིན་མ་ཉམས་པར། ཁོང་གི་སྙན་ངག་དང་གློག་བརྙན། འཁྲབ་སྟོན། གཞས་ཚིག་སོགས་ལ་གཞན་དང་མི་མཚུངས་པའི་ཐོད་རྒལ་གྱི་འདུ་ཤེས་ལྡན་ལ། ཁོང་གི་སྙན་ངག་ནི་ནམ་ཡང་བསམ་བློ་སྔོན་བརྒལ་དང་། དོགས་སློང་དང་བློ་འབྱེད། དགག་སྒྲུབ་ཀྱི་བསམ་བློ་ལྡན་པའི་དེང་རབས་རིང་ལུགས་པའི་སྙན་ངག་པ་དངོས་མ་ཞིག་ལ་བགྲང་ཆོག་པའི་མི་བུ་ཞིག་རེད།
       འབྲོང་ངམ་འབྲུག་ལྷ་རྒྱལ་ལགས་ཀྱི་དུངས་བརྗོད་སྙན་ངག་གིས་མི་རབས་གཅིག་གི་བར་སྟོང་ལ་ལང་ཚོ་དང་འཆར་ཡན་སྐྲུན་མྱོང་ཞིང་། ཁོང་གིས་སྐྱེས་ཕོ་རབས་ཤིག་གི་རང་གཤིས་འཛོམས་པའི་སྐད་ངག་གིས་སྒྲ་སྡུད་འཁོར་ལོའི་འགྲམ་གྱི་ལྟ་མཁན་དང་ཉན་མཁན་མང་པོའི་སེམས་པ་སྒུལ་མྱོང་ཞིང་། རང་གཤིས་ལྡན་པའི་གཞས་ཚིག་དེ་དག་བོད་ཀྱི་གཞས་དབྱངས་སྒྱུ་རྩལ་གྱི་གར་སྟེགས་སྟེང་འོད་འཚེར་བའི་སྐར་ཆེན་ཞིག་ཅི་ལ་མིན།
       གནའ་མཁར་འདྲེ་བཞིའི་གཅན་མེ་སྟག་གིས་མི་ཚེ་གཅིག་ལ་སྙན་ངག་བྲིས་ཏེ། ཁོང་གི་ཚེ་ཡི་འཕེན་པའང་སྙན་ངག་ཁྲོད་མཇུག་རྫོགས་པའི་སྙན་ངག་གི་སྲས་པོ་ཞིག་ཡིན་ལ། ཁོང་གི་བརྩམས་ཆོས་དག་ནི་མི་རབས་ཤིག་གི་སེམས་སྐད་རེད་ཅེས་གླེང་ནའང་མི་ཆོག་རྒྱུ་ག་ལ་ཡོད།
       གནའ་མཁར་འདྲེ་བཞིའི་རྡོ་གྲགས་ལགས་ཀྱི་སྙན་ངག་དང་གཞས་ཚིག གློག་བརྙན་སོགས་ལ་ལྟ་མཁན་ཁྲི་འབུམ་མང་པོས་ཡིད་དབང་འགུགས་དང་འགུག་བཞིན་ཡོད་ལ། ཁོང་ནི་བརྙན་འཕྲིན་ལས་རིགས་ཐད་ལ་མི་ཚེ་གཅིག་གི་ལང་ཚོ་བསྟིམས་པའི་མི་བུ་འཇོན་ཐང་ཅན་ཞིག་གོ །
       མདོར་ན། གནའ་མཁར་འདྲེ་བཞིའི་གསར་རྩོམ་ལམ་བུ་དེ། མི་རབས་ཤིག་གི་རྩོམ་རིག་གསར་རྩོམ་གྱི་ལམ་བུ་ཞིག་དང་། ཁོ་ཚོའི་ལྷད་མེད་བརྟན་བརླིང་གི་རིག་གནས་སྙིང་སྟོབས་དེ་ཡང་མི་རབས་ཤིག་གི་རྩོམ་རིག་སྒྱུ་རྩལ་ལ་བཅངས་པའི་ཆེས་དྭངས་གཙང་གི་སྙིང་སྟོབས་ཤིག་རེད།
       གནའ་མཁར་འདྲེ་བཞི་ཡི་བརྩམས་ཆོས་དག་ལ་ཞིབ་ཀློག་ཐེངས་ཤིག་བྱས་ཚེ། དངོས་ནས་བསམ་བློའི་ཟབ་ཚད་དང་སྒྱུ་རྩལ་གྱི་བློ་སྦྱོང་ངེས་ཅན་ཞིག་ལྡན་པ་དེ་གདོན་མི་ཟ་ལ། གནའ་མཁར་འདྲེ་བཞིའི་ཁྲག་མཐེལ་ཅན་གྱི་མནའ་ཡིག་དེ་ཡང་བློ་སྟོབས་དང་འགྱུར་མེད་ཀྱི་ཚེ་གཅིག་ལུས་གཅིག་གི་ཚེ་སྲོག་གི་དམ་བཅའ་གསོན་པོ་ཞིག་ཀྱང་ཡིན་ནོ། །