ཆོས་དབྱིངས་རྒྱ་མཚོའི་སྒྲུང་ཐུང«ང་རང་སྨྱོན་པར་གྱུར་དོན»བཀླགས་པའི་གཏམ།

འབྲོང་བུ་རྡོ་རྗེ་རིན་ཆེན། མཚོ་སྔོན་གཅན་ཚ་རྫོང་ཀླེ་ཆེན་སྡེ་བར་སྐྱེས།  མཚོ་སྔོན་ཞིང་ཆེན་རྩོམ་པ་པོ་མཐུན་ཚོགས་ཀྱི་ཚོགས་མི་ཡིན། བརྩམས་ཆོས་རེ་འགའ་ཕྱི་གླིང་གི་ཡི་གེར་བསྒྱུར་ནས་བཀྲམ་ཡོད། སྙན་ངག«བཀྲ་ཤིས་རྟགས་བརྒྱད་དང་སྦྱར་བའི་བསྔགས་ཚིག»ལ«སྦྲང་ཆར»གྱི་ཕུལ་བྱུང་རྩོམ་ཡིག་བྱ་དགའ་ཨང་གསུམ་པ་དང་། བརྩམས་སྒྲུང«གཞིས་བྱེས་ལྷན་འཛོམས»ལ«སྦྲང་ཆར»རྩོམ་སྒྲིག་པུས་བསྡུས་པའི“མི་རིགས་མཐུན་སྒྲིལ་དང་ཡར་ཐོན”གྱི་བྱ་དགའ་ཨང་དང་པོ། དཔྱད་རྩོམ«སྟག་འབུམ་རྒྱལ་གྱི་ཁྱིའི་སྒྲུང་གཏམ་བཀླགས་པའི་མྱོང་ཚོར»ལ་སྐབས་བརྒྱད་པའི“སྦྲང་ཆར་དཔྱད་བརྗོད་བྱ་དགའ”བཅས་ཐོབ་མྱོང་ཞིང་། བརྩམས་དེབ་ཏུ་ལོ་རྒྱུས་སྒྲུང་རིང«གངས་ཅན་བོད་ཡུལ་དུ་སྤྲིངས་པའི་འཕྲིན་ཡིག»དང«དུར་ཐང» «རྩོམ་ལ་འཇུག་པའི་སྒོ» «འབྲོང་བུ་རྡོ་རྗེ་རིན་ཆེན་གྱི་དཔྱད་རྩོམ་ཕྱོགས་བསྒྲིགས»སོགས་ཡོད། གཞན་ཡང་ཨའེ་ལུན•ཕུའི་བརྩམས་སྒྲུང་ཕྱོགས་བསྒྲིགས«བྱི་ལ་ནག་པོ»དང་། ཞུས་ཀྲུང་ལིན་གྱི«ལྷ་རུ་བསྐོས་པའི་སྒྲུང»སོགས་ཀྱིས་མཚོན་པའི་རྒྱབ་ཁབ་ཕྱི་ནང་གི་གྲགས་རྩོམ་དེབ་འགའ་ཡང་བོད་ཡིག་ཏུ་བསྒྱུར་ཏེ་མཚོ་སྔོན་མི་རིགས་དཔེ་སྐྲུན་ཁང་ནས་པར་སྐྲུན་བྱས་ཡོད།

       བརྩམས་སྒྲུང་འདི་ལ་ང་ཚོས་ཕྱོགས་མང་པོ་ནས་དཔྱད་བརྗོད་དང་དབྱེ་ཞིབ་བྱེད་ཆོག
       གཅིག བརྗོད་བྱ་གཙོ་བོ་དང་བརྩེ་དུང་།
       ༡ ཁྱིམ་ཚང་ཐོར་བའི་སྡུག་བསྔལ། བརྩམས་སྒྲུང་འདིས་ཕ་མ་གཉིས་གཉེན་འཐོར་བའི་དོན་དག་ཅིག་དོན་རྐྱེན་གྱི་ལྟེ་བར་བཟུང་ནས། གཉེན་ཐོར་བའི་བརྒྱུད་རིམ་འདིས་བྱིས་པ་ལ་བཟོས་པའི་སེམས་ཁམས་ཀྱི་རྨ་ཁ་ཆེན་པོ་བསྟན་ཡོད། འཇིག་རྟེན་ཁ་དཔེར། ཕ་ཡོད་ན་གནམ་ཡོད། མ་ཡོད་ན་ཁྱིམ་ཡོད་ཟེར་བ་ལྟར། ཁྱིམ་ཚང་ནི་མ་གཞི་ནས་བྱིས་པའི་བདེ་སྐྱིད་ཀྱི་གནས་མལ་ཡིན་དགོས་མོད། འོན་ཀྱང་ཕ་མ་གཉིས་ཁ་བྲལ་བ་དེས་བདེ་སྐྱིད་ཀྱི་གནས་མལ་འདི་གློ་བུར་དུ་བརྡིབས་སུ་བཅུག་པ་དང་། བྱིས་པ་ནི་ཉེས་མེད་ཀྱི་གནོད་འཚེ་ཐེབས་མཁན་དུ་གྱུར་པར་མ་ཟད། བྱིས་པའི་ནང་སེམས་ཀྱི་སྡུག་བསྔལ་དང་སྨྲེང་བ། མགོན་མེད་སྐྱབས་མེད་ཀྱི་ཁེར་རྐྱང་གི་མནར་གཅོད་ཀྱི་བརྒྱུད་རིམ་དེ་རྩོམ་གྱི་ཐོག་མཐའ་བར་གསུམ་དུ་ཁྱབ་པས། ཀློག་པ་པོར་ཁྱིམ་ཚང་གི་ཆ་ཚང་རང་བཞིན་གྱི་གལ་ཆེའི་རང་བཞིན་ལ་བསམ་གཞིགས་བྱེད་དུ་བཅུག
       ༢ གཉེན་ཉེའི་འབྲེལ་བའི་འཁྱོག་འགྱུར། ཨ་མས་རང་གི་བཟའ་ཚང་ལ་ཁ་བྲལ་རྗེས་མགྱོགས་མྱུར་ངང་སྐྱེས་པ་གསར་བ་ཞིག་ཁྱིམ་དུ་བསུས་ཡོང་བས། སྔར་ཡོད་ཀྱི་ཁྱིམ་ཚང་གི་སྒྲིག་གཞི་དང་གཉེན་ཉེའི་འབྲེལ་བ་མཐའ་དག་རྨང་ནས་གཏོར་མགོ་བརྩམས་ཤིང་། བྱིས་པ་ནི་དང་ཐོག་ཨ་མའི་བྱ་སྤྱོད་དེ་རིགས་ལ་སོམ་ཉིའི་དྲ་བར་ཚུད་པ་དང་མཐའ་མར་རེ་ཐག་ཆད་ནས་མ་གཞི་མཛའ་བརྩེ་ཟབ་པའི་མ་བུའི་འབྲེལ་བ་ཁ་ཐོར་དུ་བྱུང་བ་དང་། དེ་དང་ཆབས་ཅིག་སྐྱེས་པ་རྒན་པ་དེས་བྱིས་པར་འཛིན་པའི་རྣམ་འགྱུར་མི་ལེགས་པ་དེས་གཉེན་ཉེའི་བརྩེ་དུང་གི་གས་ཁ་དེ་སྔར་ལས་ཆེ་རུ་བསྐྱེད་དེ་བྱིས་པར་ཁྱིམ་ཚང་གི་ཁོར་ཡུག་གསར་པའི་ནང་གནོན་ཤུགས་དང་ཁེར་རྐྱང་གི་ཚོར་སྣང་ཆེན་པོ་བྱུང་བ་དང་ཁྱིམ་ཚང་གི་འགྱུར་ལྡོག་གིས་གཉེན་ཉེའི་འབྲེལ་ཐག་ལ་གཏོར་བཤིག་ཚབས་ཆེན་ཕོག་པའི་ཚད་མངོན་གསལ་དོད་པོར་གྱུར།
       ༣ འཚར་ལོངས་ཀྱི་དཀའ་ངལ་དང་འཕག་འཚག སྒྲུང་གཏམ་གྱི་སྤྲོས་བརྗོད་བྱེད་མཁན་ནི་གཏམ་རྒྱུད་ཀྱི་མི་སྣ་གཙོ་བོ་ཡིན་པའི་ཆ་ནས། ཁྱིམ་ཚང་གི་འགྱུར་ལྡོག་ཆེན་པོར་ཁ་གཏད་སྐབས་རྙོག་འཛིང་ཆེ་བའི་བརྩེ་དུང་གི་འགྱུར་ལྡོག་རབ་དང་རིམ་པ་བརྒྱུད་དེ་ཐོག་མའི་རྟོགས་དཀའ་བའི་གསང་བ་ནས་རྗེས་ཀྱི་སྡུག་བསྔལ་དང་ཁོང་ཁྲོ། དེ་ནས་མཐའ་མའི་རེ་ཐག་ཆད་པའི་བར་གྱི་བྱུང་བ་ཚང་མ་ནི་ཁོ་རང་འཚར་ལོངས་ཡོང་བའི་བརྒྱུད་རིམ་ནང་དུ་ཕྲད་པའི་དམིགས་བསལ་གྱི་དཀའ་ངལ་ཤ་སྟག་རེད། ཁོས་ཕ་མའི་བྱ་སྤྱོད་ལ་རྒྱུས་ལོན་དང་གུ་ཡངས་བྱེད་རྩིས་བྱས་ཀྱང་དོན་དངོས་ཀྱི་གནས་བབ་མཐའ་དག་དང་ལེན་བྱེད་ཐབས་བྲལ་བ་དང་། ནང་སེམས་སུ་འཕག་འཚག་རྒྱུན་ཆད་མེད་པར་བརྒྱབ་པ་དེའི་ཐོག་ནས་ཁྱིམ་ཚང་ལ་ཆག་གྲུམ་ཤོར་བའི་རྒྱབ་ལྗོངས་འོག་གི་དཀའ་ཚེགས་ཆེ་བའི་བྱིས་པའི་འཚར་ལོངས་ཀྱི་བརྒྱུད་རིམ་མཚོན་ཡོད་ལ།  ཀློག་པ་པོར་དམིགས་བསལ་ཁྱིམ་ཚང་གི་ཁོར་ཡུག་འོག་ཏུ་གཞོན་ནུ་ལོ་ཆུང་གི་སེམས་ཁམས་བདེ་ཐང་ངང་འཚར་ལོངས་ཡོང་བའི་གནད་དོན་ལའང་དོ་ཁུར་བྱེད་དུ་བཅུག་ཡོད།
       གཉིས། མི་སྣའི་སྣང་བརྙན།
       ༡ སྒྲུང་གཏམ་གྱི་སྤྲོས་བརྗོད་པ། (བྱིས་པ)ཁོ་ནི་གཏམ་རྒྱུད་ཧྲིལ་བོའི་བརྩེ་དུང་གི་ལྟེ་བ་ཡིན་པས། ཀློག་པ་པོས་ཁོའི་མཐོང་སྣེ་བརྒྱུད་ནས་ཁྱིམ་ཚང་གི་འགྱུར་ལྡོག་ལས་བྱུང་བའི་ཕོག་ཐུག་ཚོར་ཐུབ། སྒྲུང་གཏམ་དུ་ཁོའི་རྣམ་རིག་དང་ཉམ་ཆུང་གི་རང་གཤིས། དེ་བཞིན་ཁྱིམ་ཚང་ལ་དྲོ་སྐྱིད་ཐོབ་འདོད་ཀྱི་ཁོའི་རེ་འདོད་མཐའ་དག་གསལ་རྗེན་དུ་བྲིས་པས་ཀློག་པ་པོས་ཁོ་དང་མཉམ་དུ་སྐྱིད་སྡུག་མཉམ་མྱོང་གི་ཐོག་ནས་ཁྱིམ་ཚང་གི་ཁོར་ཡུག་གིས་བྱིས་པའི་གཤིས་ཀ་དང་སེམས་ཁམས་འཕེལ་རྒྱས་ལ་ཤུགས་རྐྱེན་ཟབ་མོ་ཐེབས་པའི་མྱོང་ཚོར་དག་རྒྱུད་ལ་སྐྱེ་བར་བྱེད།
       ༢ ཨ་མ། ཨ་མའི་སྣང་བརྙན་ནི་ཅུང་ཟད་རྙོག་འཛིང་ཆེ། ཁོ་མོས་གཉེན་སྒྲིག་ཁྲོད་ཀྱི་ཐག་གཅོད་ཀྱི་གོ་གནས་གཙོ་བོ་བཟུང་ཡོད་པ་དང་། བཟའ་ཚང་དང་ཁ་བྲལ་རྗེས་མགྱོགས་མྱུར་ངང་གཏན་གྲོགས་གསར་བ་བཙལ་ནས་རང་ཉིད་ཀྱི་བདེ་སྐྱིད་ཁོ་ནར་རེ་སྙེག་བྱེད་པར་མངོན་མོད། འོན་ཀྱང་འདིས་ཀྱང་ཚད་ངེས་ཅན་ཞིག་གི་སྟེང་ནས་བྱིས་པའི་བདེ་སྡུག་གི་ཚོར་བ་སྣང་མེད་དུ་བསྐྱུར་འདུག་པ་རེད། ཁོ་མོའི་བྱ་སྤྱོད་ནི་འཚོ་བར་ཐབས་ཟད་པའི་གདམ་ག་ཞིག་ཡིན་སྲིད་ལ། མི་སྒེར་གྱི་རིན་ཐང་ལྟ་བའི་མཚོན་ཚུལ་ཞིག་ཡིན་སྲིད་ཀྱང་། གང་ལྟར་ཁྱིམ་ཚང་དང་བྱིས་པར་གནོད་འཚེ་ཆེན་པོ་བཟོས་པས་དེ་ལ་མི་ཆོས་རིག་པའི་སྟེང་ནས་བསམ་བློ་གཏིང་ཟབ་མོ་གཏོང་དགོས་པར་མངོན།
       ༣ སྐྱེས་པ་རྒན་པ། བཟའ་ཚང་གི་བར་དུ་འཚང་བའི་མི་སྣ་ཞིག་ཡིན་པའི་ཆ་ནས། ཁོས་སྤྲོས་བརྗོད་བྱེད་མཁན་གྱི་བྱིས་པ་དེ་ལ་བཟུང་བའི་རྣམ་འགྱུར་ངན་པ་དེ་གཏམ་རྒྱུད་ཀྱི་འགལ་བའི་འཕེལ་རྒྱས་ལ་སྐུལ་འདེད་གཏོང་བའི་གནད་འགག་གི་རྒྱུ་རྐྱེན་དུ་གྱུར་ཡོད། ཁོ་ཁྱིམ་ཚང་འདིར་ཐོན་པ་དེས་སྔར་ཡོད་ཀྱི་ཁྱིམ་ཚང་གི་སྒྲིག་གཞིར་གཏོར་བཤིག་བཏང་བར་མ་ཟད། ད་དུང་བྱིས་པའི་འཚོ་གནས་ཀྱི་ཁོར་ཡུག་སྔར་བས་ཇེ་སྡུག་ཏུ་ཕྱིན། དེའི་ཐོག་ནས་ཁྱིམ་ཚང་བསྐྱར་སྒྲིག་བྱེད་པའི་བརྒྱུད་རིམ་ནང་དུ་ཐོན་པའི་ལྡོག་ཕྱོགས་ཀྱི་རྒྱུ་རྐྱེན་སྣ་ཚོགས་མཚོན་པ་དང་གཏམ་རྒྱུད་ཀྱི་སྐྱོ་གར་གྱི་རྣམ་པ་ཡང་གཏིང་ཇེ་ཟབ་ཏུ་ཕྱིན་ཡོད།
གསུམ། བྱུང་རིམ་བཀོད་སྒྲིག
       ༡ ཚགས་དམ་ཞིང་རྐྱོང་ཤུགས་ལྡན་པ། བརྩམས་སྒྲུང་འདིའི་བྱུང་རིམ་ནི་ཕ་མ་གཉིས་གཉེན་འཐོར་བ་དང་དེའི་རྗེས་མཐུད་ཀྱི་ཁྱིམ་ཚང་གི་འགྱུར་ལྡོག་ལ་དམིགས་ནས་སྤེལ་བ་ཞིག་ཡིན་ལ། བྱུང་རིམ་ཕྲ་རབ་གཅིག་ལ་གཅིག་འབྲེལ་དང་སྟངས་སྟབས་ཚགས་དམ་པོ་ཞིག་ཏུ་སྣང་། ཕ་མས་བཟའ་ཚང་ཁ་འབྲལ་རྒྱུའི་ཐག་གཅོད་བྱེད་སྐབས་ཀྱི་གདོང་ཐུག་དྲག་པོ་ནས་སྐྱེས་པ་རྒན་པ་དེ་ཁྱིམ་ཚང་དུ་འཛུལ་རྗེས་ཀྱི་གདོང་ཐུག་སྣ་ཚོགས་བར་གྱི་གནས་ཚུལ་ཚང་མར་བྲེལ་འཚུབ་ཀྱི་ཚོར་སྣང་གིས་ཁེངས་ནས་ཀློག་པ་པོའི་ཡིད་དབང་འཕྲོག་པ་དང་ཀློག་པ་པོ་རྣམས་གཏམ་རྒྱུད་ནང་མགོ་འཁོར་ནས་དེའི་རྗེས་མཐུད་ཀྱི་འཕེལ་རྒྱས་ལ་རྒྱུས་མངའ་ལོན་པའི་འདུན་པ་དྲག་པོ་སློང་བར་བྱེད།
       ༢ བྱུང་རིམ་ཕྲ་རབ་ཀྱི་ཞིབ་འབྲི་གསོན་ཉམས་ལྡན་པ་སྟེ། རྩོམ་པ་པོས་ཡུལ་དངོས་ཀྱི་རྣམ་པ་དང་མི་སྣའི་འགུལ་སྐྱོད། རྣམ་འགྱུར་སོགས་བྱུང་རིམ་ཕྲ་རབ་དག་ཞིབ་འབྲི་ཞིབ་ཚགས་སུ་སྤེལ་བ་དཔེར་ན། ཨ་མས་ཚལ་གྲི་བཟུང་ནས་འཇིགས་སྣང་སྐུལ་བའི་རྣམ་པ་དང་། སྐྱེས་པ་རྒན་པས་བྱིས་པར་འགྲམ་ལྕག་གཞུས་པ་དང་གཤེ་གཤེ་གཏོང་བའི་དུམ་ཚན་སོགས་ལ་བརྟེན་ནས་གཏམ་རྒྱུད་ཀྱི་ཚོར་སྣང་ངོ་མ་དང་ཡིད་དབང་འགུག་ཤུགས་ཆེ་རུ་བཏང་བ་དང་། ཀློག་པ་པོ་རྣམས་རང་གི་ཡུལ་དངོས་སུ་སླེབས་པ་ལྟར་སྣང་ཞིང་། དེ་དག་ཐམས་ཅད་དངོས་སུ་མཐོང་བ་དང་། བྱིས་པའི་མྱངས་པའི་སྡུག་བསྔལ་ལ་ལྷག་པར་སྙིང་རྗེའི་ཚོར་བ་དྲག་པོ་སྐྱེད་པར་བྱེད།
       ༣ སྒྱུ་རྩལ་གྱི་སྟོང་ཆ། སྒྲུང་གཏམ་སྤྱི་ཡོངས་ཀྱི་གནས་ཚུལ་ནི་དངོས་ཡོད་འཚོ་བའི་ཁྲོད་ཀྱི་ཁྱིམ་ཚང་འཐོར་བའི་རྒྱུན་མཐོང་གི་འཕེལ་ཕྱོགས་དང་ཅུང་མཐུན་མོད།འོན་ཀྱང་དེའི་ཁྲོད་ཀྱི་ཞིབ་ཕྲའི་ཐག་གཅོད་ལ་སྔར་བཞིན་སྐོར་བ་རྒྱག་ཆོག་ས་ཡོད། དཔེར་ན། ཨ་ཕ་དུས་སྐབས་ག་གེ་མོ་ཞིག་ལ་བྱུང་བ་དང་མེད་པར་གྱུར་བ་དེས་གཏམ་རྒྱུད་ལ་སེམས་ཁུར་དང་ངེས་གཏན་མེད་པའི་རང་བཞིན་ངེས་ཅན་ཞིག་བསྣན་པ་དང་། གནས་ཚུལ་སྤྱིར་བཏང་ཡིན་དྲགས་མི་སྲིད་པ་དང་། ཀློག་པ་པོའི་མཚར་སྣང་དང་དཔེ་ཀློག་གི་སྤྲོ་སྣང་ལ་སྐུལ་སློང་བྱས་པ་རེད།
       བཞི། རྩོམ་འབྲིའི་ཁྱད་ཆོས།
       ༡ སྐད་ཆ་བབ་ཆགས་ཤིང་དོན་དངོས་ཡིན་པ་སྟེ། རྩོམ་པ་པོས་སྟབས་བདེ་ཞིང་ཁ་གསལ་བའི་སྐད་ཆས་གཏམ་རྒྱུད་ཐབས་མཁས་ཀྱིས་བརྗོད་པ་དང་། ཚིག་རྒྱན་དང་གཏམ་དཔེ་མང་པོ་སྤྱད་མེད་མོད། འོན་ཀྱང་ཡང་དག་པའི་སྒོ་ནས་མི་སྣའི་བརྩེ་དུང་དང་ནང་སེམས་ཀྱི་འཇིག་རྟེན་བརྒྱུད་བསྒྲགས་བྱས། བབ་ཆགས་ཀྱི་ཉམས་འགྱུར་དེ་རིགས་འཚོ་བའི་དོན་དངོས་དང་དེ་བས་ཉེ་བཅར་ཐུབ་པ་བྱུང་ཡོད་ཅིང་། ཀློག་པ་པོ་རྣམས་བག་ཕེབས་ངང་གཏམ་རྒྱུད་ཀྱི་གནས་ཚུལ་ནང་དུ་ཞུགས་ཐུབ་པ་དང་དེའི་ནང་འདུས་པའི་ལྷད་མེད་ཀྱི་བརྩེ་དུང་ཚོར་ཐུབ་པ་བྱུང་ཡོད།
       ༢ དོན་བརྗོད་ཀྱི་མཐོང་སྣེ་ཐུན་མོང་མ་ཡིན་པ་སྟེ། སྐྱེས་བུ་བདག་བརྗོད་ཀྱི་སྒྲའི(第一人称)སྤྲོས་བརྗོད་བྱེད་ཐབས་སྤྱད་ཡོད་ཅིང་། བྱིས་པའི་མཐོང་སྣེ་ཡིས་ཉེ་འཁོར་གྱི་ཡོད་ཚད་ལ་ལྟ་ཞིབ་བྱས་ཏེ། ཀློག་པ་པོ་རྣམས་ལ་ཐད་ཀར་མི་སྣ་གཙོ་བོའི་བསམ་བློ་དང་མྱོང་ཚོར་ལ་འབྲེལ་འདྲིས་བྱེད་དུ་བཅུག་པ་དང་། གཏམ་རྒྱུད་ཀྱི་དོན་དངོས་རང་བཞིན་དང་ཡིད་རྟོན་རང་བཞིན་ཇེ་དྲག་ཏུ་བཏང་། དུས་མཚུངས་སུ་ཀློག་པ་པོ་རྣམས་བྱིས་པའི་ལངས་ཕྱོགས་སུ་འགྲེང་ནས་གནད་དོན་ལ་བསམ་གཞིགས་སྔར་ལས་ལྷག་པར་བྱེད་སླ་བ་དང་། དེ་ནས་སྤྱི་ཚོགས་ཀྱི་དོན་དངོས་ནང་དུ་དེ་དང་འདྲ་བའི་ཁྱིམ་ཚང་གི་སྣང་ཚུལ་ལ་དོ་ཁུར་དང་གདུང་སེམས་སྐྱེས་སུ་བཅུག
       སྤྱིའི་ཆ་ནས་བཤད་ན། བརྩམས་སྒྲུང་འདིས་བྱིས་པ་ཞིག་གི་མཐོང་སྣེ་བརྒྱུད་དེ། གསོན་ཉམས་ལྡན་པའི་སྒོ་ནས་ཁྱིམ་ཚང་ཐོར་བའི་གནས་ཚུལ་དེས་བྱིས་པར་བཟོས་པའི་ཤུགས་རྐྱེན་ཟབ་མོ་མངོན་ཐབས་བྱས་པ་དང་། དེང་རབས་སྤྱི་ཚོགས་ཁྲོད་ཀྱི་ཁྱིམ་ཚང་གི་འབྲེལ་བའི་རྙོག་འཛིང་རང་བཞིན་དང་མི་གཤིས་ཀྱི་ཕྱོགས་མང་རང་བཞིན་གསལ་སྟོན་བྱས་ཡོད། དེས་མི་རྣམས་ལ་མི་སྒེར་གྱི་བདེ་སྐྱིད་ཁོ་ན་དོན་དུ་གཉེར་བ་དང་ཆབས་ཅིག་ཁྱིམ་ཚང་གི་ཁོངས་མི་དང་ལྷག་པར་དུ་བྱིས་པའི་མྱོང་ཚོར་ལ་སྣང་ཆུང་བྱེད་མི་རུང་བའི་དྲན་སྐུལ་བྱས་པ་དང་། ཁྱིམ་ཚང་བརྟན་ལྷིང་ཡོང་བ་བྱ་རྒྱུ་དེ་ནི་མི་ཚང་མ་འཚར་ལོངས་དང་འཕེལ་རྒྱས་འགྲོ་རྒྱུར་གལ་འགངས་ཤིན་ཏུ་ཆེ་བ་ཞིག་ཡིན་པའི་གནས་ལུགས་བསྟན་པ་རེད།