གྱིན་འདའ་བའི་སྙན་ངག་བདམས་བཀོད།

ཡུལ་ཤུལ་དང་བཞི་གཅིག་བཞི།

                                                                                            གྱིན་འདའ་བ།   ཁྲི་འདུ།

ཡུལ་ལ་ཕྱི་སྣོད་ཀྱི་ཕུན་ཚོགས་འཁོར་ཞིང་།།

     ཡུལ་འདིར་ནང་བཅུད་ཀྱི་དྲོད་ཁོལ་འཁྱིལ་དུས།།

  ཡུལ་འདིའི་བཀྲ་ཤིས་ཀྱི་དགེ་མཚན་བ་དན།།

 ཡུལ་གྲུ་རྒྱལ་ཁམས་ན་བསྒྲེངས་བ་མྱོང་ལོ།།

ཡུལ་ལ་བདེ་སྐྱིད་ཀྱི་ཕྱྭ་གཡང་ཆགས་ཤིང་།།

     ཡུལ་ཁམས་བཀྲ་ཤིས་ཀྱི་དགེ་ལེགས་འབར་དུས།།

         ཡུལ་འབངས་རྒན་གཞོན་གྱིས་ལས་འབྲས་སྣོག་པས།།

       ཡུལ་ནས་ཧམ་སེམས་ཀྱིས་འགྲན་རྩོད་བྱས་སོང་།།

     ཡུལ་འཁོར་རིན་ཆེན་གྱི་ནོར་བུ་བཙོངས་ཤིང་།།

    ཡུལ་གཞོངས་མཛེས་སྡུག་གི་ཕ་ས་བསློགས་ཏེ།།

  ཡུལ་རྫས་དངོས་ཟོག་གི་རིན་ཐང་བོར་བས།།

  ཡུལ་གྱི་སྣོད་བཅུད་ལ་ཕམ་ཁ་བཟོས་སོང་།།

    ཡུལ་ལྷ་གཞི་བདག་ལ་ཕོག་ཐུག་བཏང་ཞིང་།།

  ཡུལ་སྲུང་ཆོས་སྐྱོང་གི་དམ་ཚིག་འགལ་ཏེ།།

       ཡུལ་སྲོལ་གོམ་གཤིས་ཀྱང་གཞི་ནས་བསྒྱུར་བས།།

     ཡུལ་སྡེའི་ཆབ་འབངས་ཀྱི་རླུང་རྟ་རྒུད་སོང་།།

      ཡུལ་འདིའི་རྨང་ལམ་ཡང་རྨིས་མྱོང་མེད་པའི།།

    ཡུལ་གྱི་ལྷིང་འཇགས་ཀྱི་སྐྱ་རེངས་འོག་ནས།།

   ཡུལ་ཟླའི་བཞི་གཅིག་གི་བཞི་ཚེས་ཉིན་དེ།།

        ཡུལ་ཤུལ་ཆགས་འཇིག་གི་དངོས་འབྲས་ཡིན་ནོ།།

ཡུལ་འདིའི་ས་ཆེན་གྱིས་ངར་སྒྲ་ཕྱུང་སྟེ།།

        ཡུལ་ལུང་རྡུལ་སྨིག་གིས་གོས་ནག་འགེམས་ཤིང་།།

 ཡུལ་ནས་མྱ་ངན་གྱི་འོ་དོད་འབོད་དུས།།

        ཡུལ་མིའི་གཅེས་སྲོག་གི་རྣམ་ཤེས་བརླགས་སོང་།།

        ཡུལ་གཞིས་སྡུག་བསྔལ་གྱི་གཅོང་སྐད་ཟང་ཟིང་།།
ཡུལ་ལ་སྨྲེང་ངག་གི་མིག་ཆུ་ཤུར་ཤུར།།

       ཡུལ་གྲུའི་སྣང་ཁམས་སུ་སེམས་སྟོང་ལྷང་ལྷུང་།

      ཡུལ་ཤུལ་གཤིན་པོ་ཚོར་རྗེས་དྲན་ཞུས་ཡོད།།

ཡུལ་གྱི་གོད་ཆགས་དེ་སྡུག་གི་མིག་ཆུ།།

 ཡུལ་མིའི་ད་ཕྲུག་ཚོ་དྲན་པའི་མིག་ཆུ།།

ཡུལ་ཤུལ་ས་ཡོམ་དེ་ལོ་ཟླའི་མིག་ཆུ།།

       ཡུལ་གྲོང་གསར་བ་འདིའི་དེབ་ཐེར་ཡིན་ནོ།།

2017.4. 14 ཉིན་བྱང་ཉི་མ་བླ་བྲང་ནས་བྲིས།

 ཕ་ཡུལ་གྱི་སྙན་ངག

སྐྱ་རེངས་འཛུམ་དཀར་དྲོན་མོའི་ཞལ་ཁ་དེ་ཕྱེས་དུས།།

འཆར་ཁའི་འོད་ཀྱི་གོང་བུ་རྨང་ལམ་ནས་གྲོལ་སོང་།།

ལྷིང་འཇགས་རུ་སིལ་དམར་པོའི་གསང་ལམ་གྱི་མདོ་ནས།།

འདབ་དྲུག་ཁ་བའི་མེ་ཏོག་མར་མར་རུ་བྱོ་སྟེ།།

སྨུག་སྤྲིན་ན་བུན་སྟུག་པོ་རི་སྐེད་དུ་ཉལ་རུང་།།

རླུང་བུའི་རེག་བྱ་གྲང་མོའི་གཤོག་སྒྲ་ཡི་འོག་ནས།།

མཛེས་པ་གོས་སུ་གྱོན་པའི་རུ་གྲོང་གི་ཁ་དོག།

ཟླ་འོད་སྣེ་རུ་འཇུས་པའི་རྨི་ལམ་ལ་འཐིམས་སོང་།།

ཉི་མའི་རྣ་ཆ་སྤུད་པའི་ཕ་ཡུལ་གྱི་ལྷོ་སྤྲིན།།

འཇའ་ཡི་ཟམ་ཆེན་སྟེང་གི་འོད་ཁྱིམ་དུ་འཛུལ་དུས།།

དབང་གི་དར་ལྕོག་དམར་པོ་བསྟིས་པ་ཡི་འོག་ནས།།

འོད་ཀྱི་ཐིགས་པ་དྲོན་མོ་ས་ཆེན་ལ་འབྱར་ཞིང་།།

ཁ་བའི་མུ་ཏིག་ཚོམ་བུའི་ཟེར་མདངས་དེ་མཆེད་པས།།

འཁྲུལ་བའི་འཇིག་རྟེན་ཁྲ་ཁྲའི་འཚུབ་ཆ་ཡི་འོག་ནས།།

ཚོར་བའི་མིག་ཟུང་ཡང་པོ་རྒྱང་རིང་ལ་ཅེར་དུས།།

ཕ་ཡུལ་གངས་གྲོང་འདི་ལ་སྙན་ངག་ཅིག་བཞད་འདུག།

2017.3. 11 ཕ་ཡུལ་ནས།

མཚོ་ཁའི་གཞས་ཆུང་།

མཚོ་མཐའི་སྨུག་སྤྲིན་དམར་པོ།།
མཚོ་མོའི་རླབས་ལས་བརྒལ་དུས།།
མཚོ་བྱ་ངང་བ་སེར་པོ།།
མཚོ་ལམ་བརྒྱུད་ནས་འཕུར་སོང་།།

མཚོ་ལ་མཚོ་མདངས་ཡག་པ།།
མཚོ་མོའི་འདབས་སུ་འཁྱིལ་དུས།།
མཚོ་གླུ་གཞས་ཆུང་རིང་མོ།།
མཚོ་མོའི་རླབས་སུ་འདྲེས་སོང་།།

མཚོ་ཉ་གཤོག་དྲུག་ཅན་པོས།།

མཚོ་ལ་སེམས་པ་འཁྲེང་ན།།

མཚོ་མཐའི་སེམས་པོ་འཁྱམ་པོས།།

མཚོ་ལ་ལེ་གདའ་མ་གནོངས།།

མཚོ་མོར་དར་ཁ་འགྲིམས་དུས།།

མཚོ་བྱ་གཞན་ཡུལ་འཕུར་འགྲོ།།

མཚོ་ཁའི་མེ་ཏོག་དམར་པོས།།

མཚོ་ལ་མིག་ཆུ་མ་བཏོན།།

མཚོ་ཁའི་སྨུག་སྤྲིན་ཟབ་མོས།།

མཚོ་ལ་འཇའ་ཟམ་ཕུབ་དུས།།

མཚོ་མོའི་རླབས་ཕྲེང་ངོགས་སུ།།

མཚོ་ཡི་མཛེས་པ་འཁྱིལ་འདུག།

མཚོ་དབུས་མུ་ཏིག་ཕྲ་ཚོམ།།

མཚོ་མོའི་རླབས་སུ་རྩེན་དུས།།

མཚོ་རིས་མཚོ་ཡི་བཀོད་པ།།

མཚོ་ཁའི་དབྱིངས་སུ་འཁྱིལ་འདུག།

མཚོ་རླངས་སྨུག་གི་གསེང་ནས།།

མཚོ་བྱུང་་རླབས་ཀྱི་ཟེགས་མས།།

མཚོ་ཆེན་གཤོག་གླུའི་དབར་ནས།།

མཚོ་ལ་སྙན་ངག་བྲིས་སོང་།།

མཚོ་ཁའི་ལུག་རྫིའི་བུ་མོས།།

མཚོ་གཞས་དབྱིངས་སུ་གྱེར་དུས།།

མཚོ་དང་ངང་བའི་ཟློས་གར།།

མཚོ་ལ་གཏམ་རྒྱུད་ཕབ་འདུག།

མཚོ་མོའི་རླབས་སྒྲའི་འོག་གི།

མཚོ་ཁའི་སྒྱུ་མའི་གླིང་བུས།།

མཚོ་མཐའི་རྨི་ལམ་དམར་པོ།།

མཚོ་འགྲམ་དེ་ནས་དཀྲོགས་སོང་།།

2016.6.23 ཉིན་མཚོ་སྔོན་པོའི་རྣ་ལུང་ཁ་ནས།