ཆབ་འགག་རྡོ་རྗེ་ཚེ་རིང་གི་གླུ་ཚིག

                       སིལ་ཏོག་གླིང་ག
                      རླབས་དཀར་ཕྲེང་བ་གཡོ་བའི། །
                      རྨ་ཀླུང་སྒེག་མོའི་འགྲམ་ན། །
                      བཙན་པོ་ལྷ་གསུམ་དགྱེས་ས། །
                      གཉན་པོ་གདོང་གསུམ་བསྟོད་ས། །
                      མེ་ཏོག་མཆོད་པ་བཤམ་ས། །
                      ཤིང་ཏོག་འབྲས་བུ་སྨིན་ས། །
                      ཁྲི་ཀ་གསེར་མོ་གཞོང་གི །
                      སིལ་ཏོག་གླིང་ག་ཡིན་སོང་། །
                      རྔམ་བརྗིད་མཁའ་ལ་འགྱིང་བའི། །
                      སྐྱེས་ལྷ་སྲིན་པོའི་འདབས་ན། །
                      འགངས་ཆེན་རྟེན་གསུམ་བཞུགས་ས། །
                      དད་པས་ཕྱག་གསུམ་འཚལ་ས། །
                      མེ་ཏོག་མིག་ལ་མཛེས་ས། །
                      ཤིང་ཏོག་ཁ་ལ་ཞིམ་ས། །
                      ཁྲི་ཀ་གསེར་མོ་གཞོང་གི །
                      སིལ་ཏོག་གླིང་ག་ཡིན་སོང་། །

                      འབྲུག་མོའི་མཆོད་པ།

                      ངའི་དུང་མཚོ་དཀར་མོའི་མཚོ་ཁ་ནས།
                      མ་ཆུ་ཁུར་བཞི་ལ་ལམ་ནས་ཐུག
                      ཁྱིམ་གྲུ་བཞི་སྐྱིད་པོའི་རྟེན་འབྲེལ་རེད།
                      ངས་མཆོད་གཅིག་མཆོད་མགོ་གནམ་ལ་མཆོད།
                      གནམ་འཁོར་ལོ་རྩིབས་བརྒྱད་མ་མཆོད་ན།
                      སྐྱིད་ཉི་མ་འཆར་ས་ཨ་སྔོན་དགུང་།
                      དགུང་ཨ་སྔོན་སྐྱིད་ཀྱི་ལྷ་ཡུལ་རེད།
                      སྐྱིད་ལྷ་ཡུལ་རྟག་པའི་བཀྲ་ལ་ཤིས།

                      ངའི་དུང་མཚོ་དཀར་མོའི་མཚོ་ཁ་ནས།
                      མ་ཆུ་ཁུར་བཞི་ལ་ལམ་ནས་ཐུག
                      ཕྱུགས་རྐང་བཞི་འཕེལ་པའི་རྟེན་འབྲེལ་རེད།
                      ངས་མཆོད་གཅིག་མཆོད་གཉིས་བར་ལ་མཆོད།
                      བར་བཀྲ་ཤིས་རྟགས་བརྒྱད་མ་མཆོད་ན།
                      ཆར་བསིལ་མ་འཇོ་ས་བར་སྣང་ཁམས།
                      མཐོངས་བར་སྣང་སྐྱིད་ཀྱི་མགོ་སྦྲ་རེད།
                      སྐྱིད་མགོ་སྦྲ་རྟག་པའི་བཀྲ་ལ་ཤིས།

                      ངའི་དུང་མཚོ་དཀར་མོའི་མཚོ་ཁ་ནས།
                      མ་ཆུ་ཁུར་བཞི་ལ་ལམ་ནས་ཐུག
                      ཡུལ་ཕྱོགས་བཞི་བདེ་བའི་རྟེན་འབྲེལ་རེད།
                      ངས་མཆོད་གཅིག་མཆོད་གསུམ་ས་ལ་མཆོད།
                      ས་པད་མ་འདབ་བརྒྱད་མ་མཆོད་ན།
                      འབྲུ་ལོ་ཏོག་འཁྲུངས་ས་དོག་མོ་ས།
                      ས་དོག་མོ་སྐྱིད་ཀྱི་འཇིག་རྟེན་རེད།
                      སྐྱིད་འཇིག་རྟེན་རྟག་པའི་བཀྲ་ལ་ཤིས།

                      ཕ་མའི་ཁ་ཏ།

                      བུ་མོ་ལོ་ན་ཆུང་དུས། །
                      ནུ་ཞོ་འོ་མས་གསོ་མཁན། །
                      བཀའ་དྲིན་ཅན་གྱི་ཨ་མས། །
                      ང་ལ་འདི་སྐད་གསུངས་སོང་། །
                      དམར་ཆུང་སྙིང་གི་སྐྱ་ཡ། །
                      ཁྲ་ཆེན་མིག་གི་ཆ་ཡ། །
                      ཨ་མའི་ལོ་ལོའི་རྒྱུད་ལ། །
                      ཡ་རབས་བྱམས་བརྩེ་འབྱོར་དགོས། །
                      བུ་མོ་ཁྱོད་ཀྱི་ཁོག་ན། །
                      ཡབ་མེས་སྲོལ་བཟང་མེད་ན། །
                      གཡུ་དང་བྱུ་རུའི་རྒྱན་ཆ། །
                      རྒྱབ་ལ་བཏགས་ཀྱང་མི་མཛེས། །

                      བུ་ཆུང་ལོ་ན་ཕྲ་དུས། །
                      ཁ་ཏ་སློབ་གསོ་གཏོང་མཁན། །
                      བཀའ་དྲིན་ཅན་གྱི་ཨ་ཕས། །
                      ང་ལ་འདི་སྐད་གསུངས་སོང་། །
                      དམར་ཆུང་སྙིང་གི་སྐྱ་ཡ། །
                      ཁྲ་ཆེན་མིག་གི་ཆ་ཡ། །
                      ཨ་ཕའི་གཅེས་ཕྲུག་རྒྱུད་ལ། །
                      རིག་གནས་ཤེས་བྱ་འབྱོར་དགོས། །
                      བུ་ཆུང་ཁྱོད་ཀྱི་ཁོག་ན། །
                      ཡབ་མེས་སྲོལ་བཟང་མེད་ན། །
                      ཕྱུགས་ཟོག་རྟ་ནོར་ལུག་གསུམ། །
                      སྒོ་ན་ཡོད་ཀྱང་མི་ཕྱུག །

                     ལྷ་བྱ་སྤུན་གསུམ།

                      ཕ་ཡུལ་གངས་ཅན་ལྗོངས་ནས།
                      གསེར་གྱི་མཚོ་ཞིག་འཁྱིལ་ཡོད།
                      གསེར་གྱི་མཚོ་མོའི་ནང་ལ།
                      གསེར་བྱ་ངང་བ་བབས་ཡོད།
                      གསེར་བྱ་ངང་བ་སེར་པོ།
                      བན་ཆུང་སེར་མོའི་ལྷ་བྱ།
                      གསུང་སྐད་མགུར་ལས་སྙན་སོང་།
                      བློ་སེམས་ཆོས་ལ་འཁོར་སོང་།

                      ཕ་ཡུལ་གངས་ཅན་ལྗོངས་ནས།
                      དུང་གི་རི་ཞིག་འགྱིང་ཡོད།
                      དུང་རི་དཀར་པོའི་མགོ་ལ།
                      དུང་བྱ་ཁྲུང་ཁྲུང་བབས་ཡོད།
                      དུང་བྱ་ཁྲུང་ཁྲུང་དཀར་མོ།
                      སྟག་ཤར་གཞོན་ནུའི་ལྷ་བྱ།
                      གསུང་སྐད་དུང་ལས་སྙན་སོང་། 
                      སེམས་ཁམས་བདེ་ལ་བཀོད་སོང་།

                      ཕ་ཡུལ་གངས་ཅན་ལྗོངས་ནས།
                      གཡུ་ཡི་ནགས་ཀླུང་རྒྱས་ཡོད།
                      གཡུ་ཡི་ནགས་ཀླུང་དཀྱིལ་ལ།
                      གཡུ་བྱ་ཁུ་བྱུག་བབས་ཡོད།
                      གཡུ་བྱ་ཁུ་བྱུག་སྔོན་མོ།
                      སྨན་ཆུང་བུ་མོའི་ལྷ་བྱ།
                      གསུང་སྐད་གླུ་ལས་སྙནསོང་།
                      ཡིད་སེམས་སྐྱིད་ལ་རོལ་སོང་།

                     དགེ་བའི་མཆོད་པ།

                      ཕ་ཡུལ་གངས་ཅན་ལྗོངས་ཀྱི། །
                      བདག་པོ་སྟག་ཤར་གཞོན་ནུ། །
                      ཕ་བཟང་བུ་ཚ་ཨེ་ཡིན། །
                      ཕ་བཟང་བུ་ཚ་ཡིན་ན། །
                      ཕ་མེས་ཡ་རབས་སྲོལ་བཟང་། །
                      ཀུན་ཕན་ལྷག་བསམ་དཀར་པོ། །
                      མ་བརྗེད་སེམས་ནས་ཡོད་ན། །
                      དགེ་བའི་མཆོད་པ་ཡིན་སོང་། །

                      ཕ་ཡུལ་གངས་ཅན་ལྗོངས་ཀྱི། །
                      བདག་མོ་སྨན་ཤར་མཛེས་མ། །
                      མ་བཟང་བུ་མོ་ཨེ་ཡིན། །
                      མ་བཟང་བུ་མོ་ཡིན་ན། །
                      མ་མེས་ཡ་རབས་སྲོལ་བཟང་། །
                      བྱམས་བརྩེའི་ལྷག་བསམ་དཀར་པོ། །
                      མ་བརྗེད་སེམས་ནས་ཡོད་ན། །
                      དགེ་བའི་མཆོད་པ་ཡིན་སོང་། །
                                       ཞེས་པའི་གླུ་ཚིག་འདི་ཁ་བ་ཅན་བོད་གཙོད་བྱམས་བརྩེ་ཚོགས་པར་ཆེད་དུ་བྲིས་པའོ། །

                      ཨ་མྱེས་སྲིན་པོ།

                      ཁྲི་ཀ་གསེར་མོ་ལྗོངས་ནས། །
                      རྔམ་བརྗིད་མཁའ་ལ་འགྱིང་བའི། །
                      སྐྱེས་ལྷ་ཨ་མྱེས་སྲིན་པོ། །
                      ཡབ་མེས་བླ་རི་སྨུག་པོ། །
                      དགྲ་ལྷའི་དཔའ་མཁར་མཐའ་ནས། །
                      འཇའ་རིས་དར་རྡང་གཡོ་སོང་། །
                      ཁ་ལས་རླུང་རྟ་བསྐྱོད་ནས། །
                      ཡུལ་ལྷ་གཞི་བདག་དགའ་སོང་། །
                      ལྷ་རི་ཨ་མྱེས་སྲིན་པོ། །
                      སེམས་ནས་གསོལ་བ་འདེབས་ཞོར། །
                      ལྷ་བསང་སྔོན་མོ་བཏང་ན། །
                      མགོན་སྐྱབས་འཕྲིན་ལས་མྱུར་དགོས། །

                      ཁྲི་ཀ་གསེར་མོ་ལྗོངས་ནས། །
                      རྔམ་བརྗིད་མཁའ་ལ་འགྱིང་བའི། །
                      སྐྱེས་ལྷ་ཨ་མྱེས་སྲིན་པོ། །
                      ཡབ་མེས་བླ་རི་སྨུག་པོ། །
                      དལ་འགྲོ་རྨ་ཀླུང་སྒེག་མོའི། །
                      རླབས་དཀར་ཕྲེང་བ་མཛེས་སོང་། །
                      མེ་ཏོག་མཆོད་པ་མཐོང་ནས། །
                      ལྷ་མིའི་སེམས་པ་སྐྱིད་སོང་། །
                      ལྷ་རི་ཨ་མྱེས་སྲིན་པོ། །
                      སྙིང་ནས་དད་པ་བྱེད་ཞོར། །
                      མཚན་ནས་ཐེངས་གསུམ་བོས་ན། །
                      སེམས་ཀྱི་རེ་བ་འགྲུབ་དགོས། །

                   རྨི་ལམ་ནང་དུ་མཇལ་ཆོག

                      སྟོན་གསུམ་སྟོན་འགོ་ཚུགས་ནས། །
                      བད་དཀར་ས་ལ་ལྷུང་སོང་། །
                      ཁུ་བྱུག་སེམས་པ་སྐྱོ་བཞིན། །
                      མི་འཕུར་རང་དབང་མེད་སོང་། །
                      ལྷ་བྱ་ཁུ་བྱུག་སྔོན་མོ། །
                      ཡ་ཆུང་སེམས་པ་མ་སྐྱོ། །
                      མི་རྟག་སྒྱུ་མའི་འགྱུར་ལྡོག །
                      དུས་ཀྱི་ཆོས་ཉིད་ཡིན་རུང་། །
                      གཅིག་སེམས་གཅིག་ལ་མཐུན་ན། །
                      རྨི་ལམ་ནང་ནས་མཇལ་ཆོག།

                      སྟོན་གསུམ་སྟོན་མཇུག་ཚར་ནས། །
                      མེ་ཏོག་འདབ་མ་ལྷུང་སོང་། །
                      གསེར་སྦྲང་སེམས་པ་སྐྱོ་བཞིན། །
                      མི་འཕུར་རང་དབང་མེད་སོང་། །
                      སེམས་ཀྱི་གསེར་སྦྲང་སེར་པོ། །
                      ཡ་ཆུང་སེམས་པ་མ་སྐྱོ། །
                      མི་རྟག་སྒྱུ་མའི་འགྱུར་ལྡོག །
                      སྔོན་བསགས་ལས་དབང་ཡིན་རུང་། །
                      གཅིག་སེམས་གཅིག་གིས་ཤེས་ན། །
                      རྨི་ལམ་ནང་ནས་མཇལ་ཆོག །

                    སེམས་ཀྱི་དུངས་པ།

                      མདོ་སྨད་ས་ཡི་ཐིག་ལེ། །
                      ཆབ་འགག་གསེར་གཞོངས་ཐང་ནས། །
                      རྔམ་བརྗིད་མཁའ་ལ་འགྱིང་བའི། །
                      རི་བོ་བློན་པོ་གསེར་ཆེན། །
                      ཡབ་མེས་བླ་རི་སྨུག་པོ། །
                      སྙིང་གི་སྐྱེས་རི་དཀར་པོ། །
                      ཁྱོད་ཀྱི་བརྗོད་མི་ཚར་བའི། །
                      ཡིད་འཕྲོག་གཏམ་རྒྱུད་རེ་རེ། །
                      ནམ་ཡང་བྲིས་མི་ཚར་བའི། །
                      དར་རྒུད་རི་མོ་རེ་རེ། །
                      སེམས་ཀྱི་བློན་པོ་གསེར་ཆེན། །
                      ལོ་རྒྱུས་རྡོ་རིང་ཡིན་སོང་། །
                      མཇལ་བ་ལན་ཅིག་མིན་རུང་། །
                      དུངས་པ་ཚེ་གཅིག་ཡིན་སོང་། །

                      མདོ་སྨད་ས་ཡི་ཐིག་ལེ། །
                      གསེར་ཆེན་་གཡེར་མོ་ཐང་ནས། །
                      རླབས་ཕྲེང་ཟེགས་མ་འཕྱོ་བའི། །
                      མཚོ་མོ་ཁྲི་ཤོར་རྒྱལ་མོ། །
                      ཡབ་མེས་བླ་མཚོ་ཕྱུག་མོ། །
                      སྙིང་གི་ལྷ་མཚོ་སྔོན་མོ། །
                      ཁྱོད་ཀྱི་བརྗོད་མི་ཚར་བའི། །
                      ངོ་མཚར་གཏམ་རྒྱུད་རེ་རེ། །
                      ནམ་ཡང་བྲིས་མི་ཚར་བའི། །
                      མཛེས་སྡུག་རི་མོ་རེ་རེ། །
                      སེམས་ཀྱི་ཁྲི་ཤོར་རྒྱལ་མོ། །
                      སྐྱིད་སྡུག་འཚོ་བ་ཡིན་སོང་། །
                      མཇལ་བ་ལན་ཅིག་མིན་རུང་། །
                      དུངས་པ་ཚེ་གཅིག་ཡིན་སོང་། །

                     མེ་ཏོག་གི་ཕ་ཡུལ།

                      དཔྱིད་ཀྱི་ལང་ཚོ་སླེབས་སོང་། །
                      གཡུ་འབྲུག་སྐད་སྒྲ་སྙན་སོང་། །
                      སྦྲང་མའི་ཆར་བ་བབས་སོང་། །
                      འཇའ་ཚོན་སྣ་ལྔ་ཤར་སོང་། །
                      ས་གཞིའི་ཁ་དོག་འགྱུར་སོང་། །
                      དཔྱིད་གསུམ་མེ་ཏོག་མཛེས་སོང་། །

                      དབྱར་གྱི་ལང་ཚོ་སླེབས་སོང་། །
                      ཁུ་བྱུག་སྤང་ནས་གྲག་སོང་། །
                      སྤང་ལྗོངས་ཚོས་ལ་བསྒྱུར་སོང་། །
                      ནོར་ལུག་རྦ་རླབས་འཕྱུར་སོང་། །
                      འོ་མས་རྒྱ་མཚོ་བསྐྱིལ་སོང་། །
                      དབྱར་གསུམ་མེ་ཏོག་མཛེས་སོང་། །

                      སྟོན་གྱི་ལང་ཚོ་སླེབས་སོང་། །
                      གསེར་མདོག་ཉི་མ་ཤར་སོང་། །
                      ས་གཞི་གསེར་ལ་འདྲེས་སོང་། །
                      གསེར་སྙེའི་རླབས་ཕྲེང་འཕྱུར་སོང་། །
                      འབྲུ་རིགས་སྣ་ལྔ་འཁྲུངས་སོང་། །
                      སྟོན་གསུམ་མེ་ཏོག་མཛེས་སོང་། །


                      དགུན་གྱི་ལང་ཚོ་སླེབས་སོང་། །
                      དུང་མདོག་ཁ་བ་བབས་སོང་། །
                      རི་བོ་ཁ་བས་གཡོགས་སོང་། །
                      མཚོ་མོ་གཉིད་ལ་ཤོར་སོང་། །
                      གཙང་བོ་དར་ལ་འཐིམ་སོང་། །
                      དགུན་གསུམ་མེ་ཏོག་མཛེས་སོང་། །

                          བྱ་ཁུ་ལོ།

                      བཀྲ་ཤིས་ཀི་གསོམ་དཀར་མགོ་ནས། །
                      གཡུ་དྲུག་དཀར་འདྲ་གི་ཁུ་ལོ། །
                      གསུང་སྙན་མོ་རྣ་བས་གོ་ན། །
                      དབྱར་ཕ་མ་འདྲ་བོ་ཐོན་ཡོད། །
                      ཆར་བསིལ་མ་ས་ལ་བབས་སོང་། །
                      སྤང་མཛེས་སྡུག་མེ་ཏོག་བཞད་སོང་། །
                      ཚེ་རིང་གི་ཁུ་བྱུག་སྔོན་མོ། །
                      སྐད་གོ་ན་སྣང་བ་སྐྱིད་སོང་། །

                      བཀྲ་ཤིས་ཀི་གསོམ་དཀར་མགོ་ནས། །
                      གཡུ་དྲུག་དཀར་འདྲ་གི་ཁུ་ལོ། །
                      གསུང་སྙན་མོ་གོ་རྒྱུ་མེད་ན། །
                      དགུན་རྒྱ་སྟག་འདྲ་བོ་ཐོན་ཡོད། །
                      སྤང་མེ་ཏོག་བཙག་གིས་སྐམ་སོང་། །
                      མགོ་འབྲས་བུ་ས་ལ་ཐོར་སོང་། །
                      ཚེ་རིང་གི་ཁུ་བྱུག་སྔོན་མོ། །
                      ཁྱོད་མེད་ན་སེམས་པ་སྐྱོ་སོང་། །  

                    ཁྲུང་ཁྲུང་དཀར་མོ།

                      ཡར་བལྟས་ཨ་སྔོན་དགུང་གི །
                      ལྷ་བྱ་ཁྲུང་ཁྲུང་དཀར་མོ། །
                      ད་ནངས་གང་ནས་འཕུར་ཡོང་། །
                      ཕ་ཡུལ་ཕྱོགས་ནས་ཡོང་ན། །
                      བདག་གི་ཆུང་འདྲིས་མཛའ་མོའི། །
                      སྐྱིད་སྡུག་གནས་ཚུལ་གསུངས་རོགས། །
                      ཆུང་འདྲིས་མཛའ་མོ་དྲན་ནས། །
                      སྙིང་གི་རུས་པ་ཆག་སོང་། །

                      ཡར་བལྟས་ཨ་སྔོན་དགུང་གི །
                      ལྷ་བྱ་ཁྲུང་ཁྲུང་དཀར་མོ། །
                      དོ་ནུབ་གང་ལ་འཕུར་འགྲོ། །
                      ཕ་ཡུལ་ཕྱོགས་ལ་འཕུར་ན། །
                      ཡ་ཆུང་སྙིང་གི་སེམས་གཏམ། །
                      མ་བརྗེད་མཛའ་མོར་གསུངས་རོགས། །
                      ཆུང་འདྲིས་མཛའ་མོ་དྲན་ནས། །
                      སེམས་ལ་སེར་ག་ཤོར་སོང་། །

                          འགྱོད་པ།
      
                      ཚེ་གཅིག་ལུས་གཅིག་འདི་ལ། །
                      གཞོན་དུས་བསམ་མེད་དབང་གིས། །
                      རྟ་ཕོ་རང་ལ་དབང་དུས། །
                      རྟ་ཕོའི་བཟང་ཐང་མ་ཤེས། །
                      རྟ་ཕོ་གཞན་ལ་བཙོངས་རྗེས། །
                      མི་ཚེ་གཅིག་གི་འགྱོད་པ། །

                      ཚེ་གཅིག་ལུས་གཅིག་འདི་ལ། །
                      གཞོན་དུས་བསམ་མེད་དབང་གིས། །
                      མཛའ་མོས་རང་ལ་དུངས་དུས། །
                      མཛའ་མོའི་བརྩེ་དུང་མ་ཤེས། །
                      མཛའ་མོ་གཞན་ལ་སོང་རྗེས། །
                      མི་ཚེ་གཅིག་གི་འགྱོད་པ། །

                   བརྗེད་ཐབས་མི་འདུག

                      ས་ཆ་གང་ལ་སོང་ཡང་། །
                      སེམས་ནས་བརྗེད་ཐབས་མེད་པ། །
                      དྲིན་ཆེན་ཨ་མས་བརྫིས་པའི། །
                      སྦྲང་དཀར་རྩམ་པ་ཡིན་སོང་། །
                      བལྟས་ན་མིག་ལ་ཡག་པོ། །
                      ཐུག་ན་ལག་ནས་འཇམ་པོ། །
                      ཟོས་ན་ཁ་ལ་ཞིམ་པོ། །
                      སྦྲང་དཀར་རྩམ་པ་ཡིན་སོང་། །

                      ས་ཆ་གང་ལ་སོང་ཡང་། །
                      སེམས་ནས་བརྗེད་ཐབས་མེད་པ། །
                      དྲིན་ཆེན་ཨ་ཕས་བཟོས་པའི། །
                      ལུག་ཆུང་ཚ་རུ་ཡིན་སོང་། །
                      བལྟས་ན་མིག་ལ་ཡག་པོ། །
                      ཐུག་ན་ལག་ནས་འཇམ་པོ། །
                      གོན་ན་སེམས་ནས་དྲོན་པོ། །
                      ལུག་ཆུང་ཚ་རུ་ཡིན་སོང་། །

                            དྲན་གདུང་།

                      ཆུང་འདྲིས་བྱམས་པའི་དབྱར་ས། །
                      རྫ་ལུང་སྨུག་ལུང་ཁྲོད་ནས། །
                      ནག་མོ་ནོར་གྱི་ཁྱུ་ཚོགས། །
                      བྲེ་སེར་འབྲོང་ལ་འདྲེས་སོང་། །
                      སེམས་ཀྱི་ཆུང་འདྲིས་བྱམས་པ། །
                      སྙིང་གི་མཛའ་མཐུན་བུ་མོ། །
                      དྲན་གདུང་སེམས་ཀྱི་རི་མོ། །
                      ཞལ་རས་ངོ་ལ་བྲིས་ཡོད། །

                      ཆུང་འདྲིས་བྱམས་པའི་སྟོན་ས། །
                      རི་ལུང་ཨ་ལོང་ནང་ནས། །
                      འདོ་རིག་རྟ་ཕོའི་ཁྱུ་ཚོགས། །
                      ཁ་དཀར་རྐྱང་ལ་འདྲེས་སོང་། །
                      སེམས་ཀྱི་ཆུང་འདྲིས་བྱམས་པ། །
                      སྙིང་གི་མཛའ་མཐུན་བུ་མོ། །
                      དྲན་གདུང་སེམས་ཀྱི་རི་མོ། །
                      ཞལ་རས་ངོ་ལ་བྲིས་ཡོད། །

                      ཆུང་འདྲིས་བྱམས་པའི་དགུན་ས། །
                      སྤང་ལུང་མེ་ལོང་ཐང་ནས། །
                      གཡང་དཀར་ལུག་གི་ཁྱུ་ཚོགས། །
                      རི་དྭགས་རྒོ་བར་འདྲེས་སོང་། །
                      སེམས་ཀྱི་ཆུང་འདྲིས་བྱམས་པ། །
                      སྙིང་གི་མཛའ་མཐུན་བུ་མོ། །
                      དྲན་གདུང་སེམས་ཀྱི་རི་མོ། །
                      ཞལ་རས་ངོ་ལ་བྲིས་ཡོད། །