དུར་བྱང་གི་ཉེ་དུས་ཀྱི་སྙན་རྩོམ་ཁག་བཅུ་གཉིས།

                                                མིག་གི་སྐར་མ།

        དུར་བྱང་། (དཀར་མཛེས།)

གལ་ཏེ་ནམ་མཁའ་ཁྱོད་རང་ཡིན་ན། །
སྤྲིན་དང་སྨུག་པ་འཁྲིགས་པའི་ཀློང་ནས། །
ཨ་ཅག་ཁོ་ཚོའི་མིག་གི་སྐར་མ། །
ས་གཞིའི་མེ་ཏོག་འཁྲུངས་ས་དེ་རུ། །
མི་ཏིག་བཞིན་དུ་ཕྲེང་བར་བསྟར་ན། །
ས་ལ་ལྷུང་བའི་ཟེའུ་འབྲུ་ཆ་གཅིག །
སྙིང་གི་སྟེང་སར་སིམ་ནས་བུད་འགྲོ། །

2015/6/16ལ།

                                                གཏམ་རྒྱུད་ཀྱི་སེམས་ཁྲལ།
སེམས་པ་དེ་གས་སྨྲེང་གླུ་ཐོ་རུ་གྱེར་ན། །
ཞིང་གྲོང་བུ་མོའི་ལག་པའི་ཕྱི་ནིང་རྩེད་ཆོག །
ལོ་ཟླའི་ཕུགས་སུ་བསྙལ་བའི་ས་སྲོད་ཅིག་ལ། །
སྙན་ངག་ཟོ་བ་གང་གི་སྡིག་སྒྲིབ་ཁྱེར་ནས། །
ངལ་གསོ་ཕྲན་ཙམ་ཡིད་ཀྱི་གཏིང་ན་བྱས་འདུག །
ང་རང་ལམ་འགྲམ་དེ་ཡི་སྤྲང་པོ་ཞིག་རེད། །
མིག་གིས་རྒྱང་ལ་ཅེར་ནས་རི་ལམ་བསྙེགས་ཡོད། །
ཐོ་རངས་སྐྱ་ཀའི་རྨི་ལམ་འཁོར་ཚུལ་ཅི་བཞིན། །
ལོ་ཟླའི་ས་སྲོད་ཅིག་ལ་རེ་བས་འཁྲེང་ཡོད། །
སང་ལོའི་དཔྱིད་ཀྱི་དཔལ་ཡོན་རི་ལ་འཐེན་ན། །
སྨུག་པར་འདྲེས་པའི་གཏམ་གྱི་ཡོལ་བ་ཕྱེས་ཤོག །

2015ལོའི་ཟླ7པའི་ཚེས3ཉིན་བྲིས།

                                                མིག་གི་ཁམས་ལ།
དབུ་སྐྲ་ཕར་ལ་འཁྱིལ་དུས་གཙང་བོ་བྲུག །
གཙང་བོའི་གཞུང་ལ་བརྩེ་བ་ཆར་དུ་སྙིལ། །
མིག་གི་ཁམས་ལ་རྒྱང་རིང་མཛའ་མོ་ཞིག །
ཕར་ལ་བལྟས་ཙམ་ཡིད་ལ་མེ་ཏོག་གད། །
ཆར་བ་ཟམ་ཟིམ་རླུང་བུ་འཇམ་ཐང་ཐང་། །
གཤོག་པ་ཆུ་ལ་བསྙལ་བའི་བྱེའུ་ཆུང་དེ། །
འགྲོ་དྲུག་གར་ལ་རྩེན་པའི་བར་མཚམས་དེར། །
རླུང་དང་སྒྲ་དབྱངས་སྟོང་བའི་ནམ་མཁའ་ལ། །
སྤྲིན་དང་སྨུག་པས་བལྡག་པའི་གྲིབ་མ་འཁོར། །

2015ལོའི་ཟླ6པའི་ཚེས19ཉིན་གྱི་ཞོགས་པར།

                                                རྨི་ལམ་འཁྲུལ་ཚུལ།
མེ་ཏོག་འདབ་མ་བརྒྱད་ལ། །
ནམ་མཁའི་རྒྱུ་སྐར་འཕྲོས་ན། །
གཟུགས་དང་མཚན་མ་ལྡོག་སྟེ། །
རྨི་ལམ་འཁྲུལ་ཚུལ་རྟོགས་ངེས། །
འཁྱག་རོམ་རྒྱ་ལས་གྲོལ་ཚུལ། །
ཏག་ཏག་དཔྱིད་ཀྱི་བུ་མོས། །
ས་གཞི་གཙང་བོའི་ངོས་ལ། །
སྣུམ་ཚོན་སྐྲ་ཡི་ལོ་མས། །
རྒྱུ་མའི་གར་དང་སྡེབས་སྟེ། །
ལམ་གྱི་གོ་རིམ་བསྟན་ན། །
རྒྱ་ལས་གྲོལ་བའི་འཁྱག་རོམ། །
དངུལ་གྱི་ཟླ་བའི་གསེབ་ལ། །
ཚ་བའི་སྡུག་བསྔལ་སྦྱར་ནས། །
འཆི་ཁའི་མེ་རུ་གདབ་ཆོག །

2015/6/16ལ།

                                                ཁྱོད་ལ་སྦྱར་བའི་སྙན་ངག་ཅིག
ཉི་མ་རེ་རེ་འདས་ཚུལ་རེ་རེ་མོག་མོག་ཅིག །
དུས་ཚོད་འདི་ལ་ཁྱོད་ཉིད་གར་སྟབས་གང་དུ་བསྒྱུར། །
ཁྱོད་ཀྱི་ས་ཡི་ནམ་མཁའ་རེ་དང་སྤྲིན་པ་རེ་ལ། །
བརྩེ་བའི་ཆར་དང་བདུད་རྩི་འཇོ་བ་ན་ཟུག་ཅིག །
བར་ཐག་རེ་ལ་དགུ་ཆུའི་བཅད་ན་ཚེ་སྲོག་ཅིག །
རྨི་ལམ་གཞུང་ལ་དགུན་ཁ་བཞད་པའི་དངངས་སྐྲག་ཡོད། །
འཇིག་རྟེན་འདི་ན་དབྱངས་ཀྱི་སྙན་ཚིག་ལྷིང་འཇགས་རེ། །
དུངས་ཞེན་ལོ་མའི་ཚངས་དབྱངས་གླིང་བུ་འབུད་པའི་སྲོལ། །
ཡིད་འོང་ལྷ་མོར་སྐད་ངག་དམའ་མོས་ལན་འགར་གཏོང་། །
གལ་ཏེ་འཇིག་རྟེན་ཁྱོད་རང་ཡིན་ན་དབྱངས་ཅན་མར། །
མལ་ཁྲིའི་སྟེང་གི་རྨི་ལམ་ཡོད་ཚད་མཇུག་བསྡུས་ཤིག །

2015/6/167ཉིན་ཕ་ཡུལ་ནས།

                                                རྒྱུ་མའི་ལན་བུ།
རྒྱུ་མའི་ལན་བུ་ཕར་ལ་བསྐྱོད་ཙམ་བྱས་ན། །
གཤོག་པའི་སྟེང་ལ་དངུལ་གྱི་ཁ་བ་བབས་ཡོང་། །
ལུས་སེམས་རྩེ་ལ་ཟུག་པའི་རླུང་བུ་ལྡང་ན། །
ང་ནི་མེ་ལོང་ནང་གི་ཆར་ཟིམ་དེའོ། །
ཉི་མའི་གཙང་བོ་དེའང་སྐེ་རག་བྱེད་འདོད། །
གཙང་བོའི་མེ་ཏོག་རེ་རེ་སྤྲུག་སྤྲུག་བྱས་ན། །
ལོ་མ་ཙམ་ཞིག་ཁུར་ནས་རི་ལ་ཆས་འགྲོ། །
འཇིག་རྟེན་མདུན་རྒྱབ་འབྲེལ་བའི་སྐུད་པ་དེའང་། །
རང་བྱུང་འཇའ་ཡི་རྨུ་ཐག་འཁྲུལ་བར་བཟོས་ན། །
ལས་ཀྱི་གཙང་བོར་བྲིས་པའི་སྣང་བ་ཕྲ་མོ། །
སྒེའུ་ཁུང་འགྲམ་ནས་འཕུར་བའི་སྦྲང་མ་ཡིན་སྲིད། །
གློ་བ་ཆུང་ཆུང་ཞིག་གི་ཉིན་སྲིབ་བར་ལ། །
རི་དང་རྩྭ་ཐང་ཀུན་པོ་དབྱིངས་ལ་བཏེགས་ཡོད། །
ཟླ་བ་ཁོ་ནས་མདུན་གྱི་རླུང་བུ་དེ་ལ། །
མིག་ཤེལ་ངོས་ཀྱི་སྤྲིན་དང་སྨུག་པ་རིང་ཚུལ། །
འཁོར་བའི་གཏམ་སྒྲུང་བཞིན་དུ་ཡི་གེར་ཕབ་ཆོག །

2015/6/15དགོང་མོར་བྲིས།