དོར་ཞི་གདོང་དྲུག་སྙེམས་བློའི《དྲང་གཏམ་རྨ་ཐོག་གཙགས་འདེབས》
འགྲོ་བའི་སྐྱབས་གཅིག་ཐུབ་དབང་ལྷ་ཡི་ལྷ། །དེ་ཡི་རྗེས་འཇུག་བསྟན་འཛིན་རྒྱལ་བའི་སྲས། །གྲུབ་མཐའ་རིས་མེད་གོས་མདོག་མི་གཅིག་པའི། །སྐྱ་སེར་ཕོ་མོ་གང་ཡང་ཕྱག་གི་ཡུལ། །མཆོག་གསུམ་སྐྱབས་བསྟེན་ལྟ་བའི་ཕྱག་རྒྱ་བཞི། །ཁས་ལེན་གང་ཟག་ཐམས་ཅད་ནང་བ་ཡིན། །ནང་བའི་གྲུབ་མཐའ་ཐམས་ཅད་རང་རང་གི། །དམ་པ་གོང་མའི་ཆོས་ཀྱི་རྒྱུན་བཟང་བོ། །ཆུ་ལམ་ཞུགས་དང་རྡོ་ལག་བརྒྱུད་ཀྱི་ཚུལ། །འཛིན་ཅིང་མི་ཉམས་གོང་འཕེལ་གཏོང་བ་གཅེས། །རང་སྟོང་གཞན་སྟོང་ཕྱག་ཆེན་རྫོགས་ཆེན་སོགས། །གང་ལ་མོས་ན་དེ་ཉིད་སྒོམ་པས་འཐུས། །ཆོས་ཀྱི་རྩ་བ་སྙིང་རྗེ་ཆེན་པོ་ཡིས། ། དྲང་བའི་གཞན་ཕན་སེམས་དང་བདག་མེད་ལྟ། །དེ་ལ་གྲུབ་མཐའི་ཁྱད་པར་ཡོད་མིན་པས། །དེ་ཡི་སྟེང་ནས་བསམ་པ་གཅིག་སྒྲིལ་གཅེས། །དེ་མིན་རང་ལྟར་ཞེན་པའི་འདོད་ཆགས་དང་། །གཞན་ལྟར་སྡང་བའི་ཞེ་སྡང་ཕྲག་དོག་སོགས། །ཆོས་ཀྱི་སྤང་བྱ་ཉམས་ལེན་སྙིང་བོ་རུ། །བཟུང་ནས་བདག་བསྟོད་གཞན་ལ་སྨོད་པ་སོགས། །བསྟན་པ་ནང་དཀྲུགས་བྱེད་པའི་བདུད་ཀྱི་ལས། །བདུད་ཚར་གཅོད་པའི་སྔགས་ཀྱིས་བཟློག་པར་འོས། །རི་དྭགས་རྒྱལ་བོ་ཁོག་གི་འབུ་ཡིས་བསད། །དཔའ་མཁར་བཙན་རྫོང་ནང་གི་དགྲ་ཡིས་བརླག །རྒྱལ་བའི་བསྟན་པ་ནང་ནས་མ་རུལ་ན། །ཕྱི་ཡི་རྐྱེན་ངན་རླུང་གིས་བཤིག་མི་ནུས། །དཔེར་ན་མེ་འཇིག་ཐེབས་པའི་རྩི་ཤིང་བཞིན། །སྔར་ལོ་འཚིག་པ་ཕྱིར་ལོ་སླར་ཡང་སྐྱེ། །གལ་ཏེ་རྩད་པ་རུལ་ལམ་འབུས་ཟོས་ན། །ཕྱི་ཡི་གནོད་པ་མེད་ཀྱང་རང་ཉིད་སྐམ། །ཚེ་སྔོན་བགས་ཆག་སད་དམ་སྦྱངས་ཐོབ་ཀྱི། །ལུང་རྟོགས་ཡོན་ཏན་ཕལ་ལས་ལྷག་ཅིག་དང་། །བསྟན་དང་འགྲོ་ལ་ཕན་པའི་ལག་རྗེས་གཉིས། །སྤྲུལ་སྐུའི་གོ་སར་གནས་པ་ཀུན་ལ་དགོས། །མཚན་ཉིད་དེ་ལྡན་ཕྱི་ཡི་ཆ་ལུགས་ལ། །ཁྱིམ་པ་རབ་བྱུང་གང་བྱེད་ངེས་པ་མེད། །དཔེར་ན་བླ་མ་མར་བ་འབྲོམ་སྟོན་བཞིན། །དེ་མིན་ཁྲི་ཁར་བཞུགས་པའི་འཇིམ་གཟུགས་བཞིན། །བརྟན་པོར་གནས་ཀྱང་བསྟན་ལ་ཕན་མེད་ཀྱང་། །གནོད་པ་མེད་པས་མ་མཐའ་དེ་ཙམ་དགོས། །གྲྭ་བ་ཟེར་བའང་གྲྭ་རྟགས་གཟན་ཤམ་ཞིག །གོན་པས་མི་ཆོག་བསླབ་གསུམ་ཡོན་ཏན་དགོས། །གྲྭ་བའི་བྱ་བ་ཁྲིམས་སྲུང་གཞིར་བྱས་ནས། །འཆད་ཉན་སྒོམ་སྒྲུབ་ལས་ལ་གཞོལ་བ་ཡིན། །མ་མཐའ་རྩ་བཞི་ཆང་བཅས་སྲུང་བ་ཡི། །དགེ་འདུན་ཞབས་འདེགས་སྒྲུབ་མཁན་ཉན་ཡང་རུང་། །མ་མཐའི་སྲུང་བྱ་དེ་ཡང་མ་ནུས་ན། །བསླབ་བ་ཕུལ་ནས་སྐྱ་སར་བབས་ན་གཙང་། །ལ་ལས་གོས་རྟགས་གྲྭ་ཆས་མ་དོར་བར། །གྲུབ་ཆེན་ཡིན་ཁུལ་ཆང་དང་བུད་མེད་སོགས། །ངོ་ཚ་མེད་པར་བག་མེད་སྤྱོད་པ་དང་། །ལུང་བསྟན་དབང་སྐུར་རྫུན་མས་མགོ་སྐོར་གཏོང་། །ལ་ལས་བླ་རྟགས་གོས་སེར་ལུས་ལ་གཡོགས། །བླ་སྤྲུལ་དགེ་བཤེས་མཁན་པོ་ཡིན་ཟེར་ནས། །རྒྱ་ཡུལ་གྲོང་ཁྱེར་རིག་རིག་ཁྱི་ལྟར་ཉུལ། །ཆོས་རྒྱུས་མེད་པའི་བླུན་པོ་རྨོངས་དད་ཅན། །རྒྱ་དང་རྒྱ་མོ་མང་བོ་འཁོར་དུ་བསྡུས། །ཆོས་དང་དབང་སྐུར་རྫུན་མས་ནོམ་རྫས་སྡུད། །བསྟན་པའི་བླ་བཙོང་ཆོས་ཀྱི་སྲོག་གཅོད་པའི། །མི་ངན་སྤྱོད་ངན་ས་སྟེང་ཀུན་ཏུ་ཁྱབ། །བསྟན་སྲུང་རྒྱ་མཚོ་གཟིམས་སུ་ཤོར་མེད་ན། །དེ་དག་དག་ཐེར་བྱེད་པའི་དུས་ལ་བབས། །བླ་སྤྲུལ་དགེ་བཤེས་རྫུན་མའི་སྤྱོད་ངན་དག །རྟགས་སུ་བཀོད་ནས་བོད་རྒྱུད་ནང་བསྟན་ནི། །བསྣུབ་པར་འོས་པའི་ཆོས་ལོག་ཡིན་ཟེར་བའི། །བརྙས་སྨོད་རྩོམ་འཆལ་ཐེ་ཝན་ཡུལ་དུ་བྱུང་། །དེ་ཡི་ལན་ལ་ཁོ་བོས་རྒྱ་ཡིག་གི། །བདུད་སྡེ་ཚར་གཅོད་རྡོ་རྗེ་མདའ་ཆར་ཞེས། །དགག་ཡིག་བརྩམས་ནས་རྒྱ་ཡུལ་ཀུན་ཏུ་བཀྲམས། །ལྟ་བའི་ཆ་ནས་བླུན་པོའི་བརྡོལ་གཏམ་དག །ཚར་གཅོད་སུན་འབྱིན་བྱེད་པར་སླ་མོད་ཀྱང་། །རང་གི་ཕྱོགས་ལ་འབབ་པའི་སྤྱོད་པའི་སྐྱོན། །སྤྱི་ལ་མ་ཁྱབ་ན་ཡང་བྱེ་བྲག་ལ། །སྐྱོན་དེ་ཡོད་པ་མངོན་སུམ་བསྙོན་མི་ནུས། །དེ་ནི་བསྟན་པར་གཅེས་སེམས་ཡོད་པ་ཡི། །གྲུབ་མཐའ་སོ་སོའི་བླ་སྤྲུལ་གྲྭ་རིགས་ཀུན། །ཐུགས་བསམ་ཞིབ་ཏུ་བཞེས་དགོས་གནས་ཤིག་ཡིན། །སངས་རྒྱས་བཅོམ་ལྡན་འདས་ཀྱི་རྗེས་འཇུག་གི། །གྲལ་དུ་གནས་པའི་གྲུབ་མཐའ་གང་ཡིན་ཀྱང་། །བསམ་པ་དང་ནི་ཀུན་སྤྱོད་གང་ཅིའི་ཐད། །སྟོན་པས་དགག་སྒྲུབ་གནང་གསུམ་མཛད་པ་ཀུན། །ཐམས་ཅད་སྒྲུབ་མ་ནུས་ཀྱང་སྤང་བླང་གི། །མ་མཐའི་སྲུང་མཚམས་དེ་ལས་འདའ་སོང་ན། །མི་སྟེགས་ཕྱི་རོལ་བ་དང་ཁྱད་མེད་པའམ། །དེ་ལས་ཀྱང་ནི་ཐ་ཆད་ཏུ་འགྱུར་ཕྱིར། །སྟོན་པའི་ཞལ་ངོ་ས་ལ་འཕང་བ་ཡི། །བསྟན་བཤིག་སྤྱོད་པར་དོགས་ཟོན་བྱེད་པ་གལ། །བར་སྣང་ཁམས་སུ་ཉི་ཟླ་འོད་ཟེར་འཕྲོ། །ས་ཡི་སྟེང་འདིར་རྒྱལ་བསྟན་གཟི་བརྗིད་འབར། །བསྟན་འདིར་དོན་གྱིས་ཞུགས་སམ་མིང་ཡང་རུང་། །མཆོག་གསུམ་ལས་འབྲས་དམྱལ་བ་ཡི་དྭགས་སོགས། །དད་པ་དང་ནི་ཡིད་ཆེས་མེད་ན་ཡང་། །མི་ཞིག་ཡིན་ན་ཁྲེལ་དང་ངོ་ཚ་དགོས། །ངོ་ལྤགས་བཤུས་ནས་གཡོ་སྒྱུ་ཁྲམ་གསུམ་ཀྱིས། །རྙེད་དང་བཀུར་སྟིར་ཁྱི་ལྟོགས་ཟས་འཕྲོག་ཚུལ། །ཆོས་དང་འཇིག་རྟེན་གཉིས་ཀར་ངན་པར་བརྩི། །དམ་པའི་ཆོས་ནི་ལུས་ངག་ཡིད་གསུམ་གྱིས། །དངོས་སུ་སྒྲུབ་བྱ་ཡིན་ལ་ཆོས་ཚིག་ཙམ། །ཀློག་འདོན་དང་ནི་ཁ་བཤད་ཙམ་ཞིག་མིན། །སྡིག་སྤོང་དགེ་སྒྲུབ་ལག་ལེན་མ་བྱས་ན། །ཁ་ནས་འདོན་པ་རྫུན་དུ་འགྱུར་ཉེན་ཡོད། །རྫུན་དུ་མི་འགྱུར་བ་ཞིག་གནད་དུ་ཆེ། །གཞན་ཕན་སྒྲུབ་པ་ཕར་ཞོག་ཕན་སེམས་ཙམ། །སྐྱེ་བའང་སངས་རྒྱས་མཆོད་ལས་ལྷག་གསུངས་པས། །ཁ་ནས་སེམས་ཅན་ཟེར་ཞིང་བསམ་བྱ་དང་། །བསྒྲུབ་བྱ་རང་དོན་ཁོ་ན་ག་ལ་འོས། །སློབ་གྲྭ་སྨན་ཁང་རྒན་པོ་གཉོར་སྐྱོང་ཁང་། །དབུལ་སྐྱོབ་སྙིང་རྗེ་ཚོགས་པ་སོགས་བཙུགས་ནས། །སྤྱི་ཚོགས་ཕན་བདེའི་ཞབས་འདེགས་སྒྲུབ་པ་ནི། །སངས་རྒྱས་བྱང་སེམས་དགྱེས་པའི་མཆོད་པ་དང་། །སེམས་ཅན་ཕན་བདེ་སྒྲུབ་པའི་ཐབས་མཆོག་ཡིན། །རྒྱ་སེར་ཆོས་ལུགས་དེ་ལྟར་བྱེད་འདུག་པས། །གཞན་ཕན་གཙོར་བྱེད་ནང་བའི་ཆོས་ལུགས་ཀྱིས། །དེ་ལྟར་བྱེད་དགོས་མི་དགོས་ཐེ་ཚོམ་ཅི། །མདོར་ན་བསྟན་པའི་རྗེས་འཇུག་སྐྱ་སེར་ཀུན། །བསྟན་པའི་གནད་རྣམས་ཤེས་ནས་བསྟན་པ་ལ། །བཅོས་མིན་དད་མོས་དང་ནི་གཅེས་སེམས་ཀྱིས། །ཆོས་མཐུན་ལྟ་སྤྱོད་གོང་དུ་སྤེལ་བ་དང་། །བསྟན་པའི་སྲོག་རྩར་རྒོལ་བའི་ལྟ་ངན་དང་། །སྤྱོད་ངན་ཚར་གཅོད་སུན་འབྱིན་དུས་ལ་བབས། །ཞེས་པ་འདི་ཡང་ཉིས་སྟོང་དྲུག་གི་ལོར། །རྒྱལ་བའི་བསྟན་ལ་དད་དང་གཅེས་སེམས་ཀྱི། །མེ་སྟག་ཕྲ་མོ་ཁོང་ནས་མ་ཉམས་པ། །དོར་ཞི་གདོང་དྲུག་སྙེམས་བློར་འབོད་པས་བྲིས། །
