ཕ་རྒན་དྲན་གླུ།

　　　　　　　　　　རི་རབ་གཙང་པོ་ཡི་ཕར་རོལ་དེ་ན།
　　　　　　　　　　མཐའ་མེད་སྤང་ཐང་གི་འཇིག་རྟེན་ངོགས་ན།
　　　　　　　　　　རྟ་ཕོའི་གོམ་ལག་ལྷན་ལང་ཚོ་རྒས་པས།
　　　　　　　　　　བྱམས་ཆེན་ཕ་ལོ་ལགས་སྙིང་ནས་དྲན་བྱུང་།།

　　　　　　　　　　
　　　　　　　　　　ཉི་ཟླའི་འཁོར་བསྐྱོད་ཀྱི་རྒྱུ་པས་་གནས་ན།
　　　　　　　　　　གངས་རྒན་རི་བོ་ཡིས་བསྐོར་བའི་ཡུལ་་ན།
　　　　　　　　　　འགྱུར་མེད་བརྟན་བརླིང་གི་འབྲོག་མི་རྒད་པོ།
　　　　　　　　　　བྱམས་ཆེན་ཕ་ལོ་ལགས་སྙིང་ནས་དྲན་བྱུང་།

　　　　　　　　　　
　　　　　　　　　　མཚོ་མོ་ཁྲི་ཤོར་དང་ཉེ་བའི་ཡུལ་གྱི།
　　　　　　　　　　རྨ་སོག་རྩྭ་ཐང་གི་མཛེས་སྡུག་གཞི་ན།
　　　　　　　　　　ཕྱུགས་རིག་ཁྱུ་ཚོགས་ཀྱི་རྫི་བོ་རྒན་པ།
　　　　　　　　　　བྱམས་ཆེན་ཕ་ལོ་ལགས་སྙིང་ནས་དྲན་བྱུང་།།

　　　　　　　　　　
　　　　　　　　　　སོག་གུར་གོར་མོ་ཡི་དྲོད་ཁྱིམ་ཕུག་གི།
　　　　　　　　　　བདེ་སྡུག་གང་ཡོད་ཀྱང་ཕྲག་ལ་ལེན་མཁན།
　　　　　　　　　　དཀའ་ཐུབ་སྡུག་རུས་གྱི་སྤོབས་པའི་ཁེངས་པས།།
　　　　　　　　　　བྱམས་ཆེན་ཕ་ལོ་ལགས་སྙིང་ནས་དྲན་བྱུང་།།

　　　　　　　　　　
　　　　　　　　　　ཨ་མའི་ཚེ་གང་གི་གཏན་གྱི་སྐྱ་ཡ།
　　　　　　　　　　བུ་ངའི་སེམས་ཁོང་གི་རྒྱབ་རི་སྨུག་པོ།།
　　　　　　　　　　ཁྱིམ་འདིའི་དྲོད་ཁོལ་གྱི་ཉི་མ་སེར་བོ།
　　　　　　　　　　བྱམས་ཆེན་ཕ་ལོ་ལགས་སྙིང་ནས་དྲན་བྱུང་།།

　　　　　　　　　　
　　　　　　　　　　འདས་སོང་ལོ་ཟླ་ཡི་བཞུད་ངོགས་ཁྲོད་ནས།
　　　　　　　　　　བུ་རྣམས་མ་ཡུམ་གྱི་སློབ་གྲྭར་བཅུག་སྟེ།
　　　　　　　　　　དུས་བཞིའི་དཀའ་སྡུག་གྱི་གདུང་ལ་འབུད་མཁན།
　　　　　　　　　　བྱམས་ཆེན་ཕ་ལོ་ལགས་སྙིང་ནས་དྲན་བྱུང་།།

　　　　　　　　　　
　　　　　　　　　　ལྷན་པ་དགུ་བརྩེགས་ཀྱི་རྩག་ཧྲུལ་གོན་ནས།།
　　　　　　　　　　ངན་ངོན་འཚོ་བ་དེ་རང་གི་རོལ་ནས།།
　　　　　　　　　　གང་ཡག་གང་ཞིམ་དེ་བུ་ལ་གནང་མཁན།།
　　　　　　　　　　བྱམས་ཆེན་ཕ་ལོ་ལགས་སྙིང་ནས་དྲན་བྱུང་།།

　　　　　　　　　　
　　　　　　　　　　རྒྱང་བཞུད་བས་མཐའ་ཡི་མི་ཡུལ་གནས་སུ།
　　　　　　　　　　གྲོགས་མེད་སྤུན་མེད་ངང་གཅིག་པུ་འཁྱམས་དུས།
　　　　　　　　　　བུ་ངའི་ཁེན་ས་ཡི་རྒྱབ་དཔུང་བརྟན་པོ།།
　　　　　　　　　　བྱམས་ཆེན་ཕ་ལོ་ལགས་སྙིང་ནས་དྲན་བྱུང་།།

　　　　　　　　　　
　　　　　　　　　　འཇིག་རྟེན་གནས་ལུགས་ཀྱི་དོན་དམ་ངོ་མ་།
　　　　　　　　　　རང་ཚུགས་བཟོད་བསྲན་གྱི་མི་གཤིས་བཟང་པོ།
　　　　　　　　　　བུ་ངའི་སེམས་རྒྱུད་ལ་ཆོས་བཞིན་གནང་མཁན།
　　　　　　　　　　བྱམས་ཆེན་ཕ་ལོ་ལགས་སྙིང་ནས་དྲན་བྱུང་།།

　　　　　　　　　　
　　　　　　　　　　བརྩེགས་པའི་ལོ་ཟླ་ཡི་ཕྲེང་རིམ་བར་ནས།།
　　　　　　　　　　ནག་སྣུམ་སྐྲ་ལོ་ལ་ཁ་བ་བབས་ཞིང་།།
　　　　　　　　　　དཀྱིལ་ཆེ་དབུ་ཐོད་ལ་གཉེར་མའི་ཁེངས་པས།
　　　　　　　　　　བྱམས་ཆེན་ཕ་ལོ་ལགས་སྙིང་ནས་དྲན་བྱུང་།།

　　　　　　　　　　
　　　　　　　　　　དྭངས་གསལ་གསུང་སྐད་ཀྱི་སྨྲ་མཁས་འཇམ་པོ།།
　　　　　　　　　　གཅེས་ལོ་གཅེས་ཕྲུག་གི་དབྱངས་རྟ་སྙན་མོ།།
　　　　　　　　　　རྒྱུན་འཇགས་སེམས་རྩ་ལ་དྲོད་ཁོལ་གནང་མཁན།
　　　　　　　　　　བྱམས་ཆེན་ཕ་ལོ་ལགས་སྙིང་ནས་དྲན་བྱུང་།།

　　　　　　　　　　
　　　　　　　　　　མ་མཇལ་ཕ་ལོ་ཡི་ཞལ་རས་གོར་མོ།
　　　　　　　　　　མཁའ་དབྱིངས་དྭངས་གསལ་གྱི་དུང་ཟླ་ལྟ་བུར།
　　　　　　　　　　འགྱུར་མེད་ནག་ནོག་གི་དྲི་མའི་དབེན་པས།
　　　　　　　　　　བྱམས་ཆེན་ཕ་ལོ་ལགས་སྐུ་ཚེ་བརྟན་ཤོག །

　　　　　　　　　　
　　　　　　　　　　མ་ཐོས་ཕ་ལོ་ཡི་ཞལ་གསུང་དྲོན་པོ།།
　　　　　　　　　　དཔྱིད་གསུམ་ཟླ་བ་ཡི་ཁུ་བྱུག་སྐད་ལྟར།།
　　　　　　　　　　འགགས་མེད་དྲུག་འགྱུར་གྱི་དབྱངས་རྟ་སྒྲོག་ནས།
　　　　　　　　　　བྱམས་ཆེན་ཕ་ལོ་ལགས་སྐུ་ཚེ་བརྟན་ཤོག།

　　　　　　　　　　
　　　　　　　　　　མ་ཐུག་ཕ་ལོ་ཡི་བརྩེ་བ་ཟབ་མོ།།
　　　　　　　　　　འཁྱིལ་བའི་མཚོ་ཆུང་གི་ཉ་མོ་བཞིན་ཏུ།།
　　　　　　　　　　ལྷན་འཛོམས་བདེ་སྐྱིད་ཀྱི་དུས་བཟང་ཤར་པར།
　　　　　　　　　　བྱམས་ཆེན་ཕ་ལོ་ལགས་སྐུ་ཚེ་བརྟན་ཤོག།

　　　　　　　　　　　　　　　　　　　　2013ཟླ6པའི་ཚེས20ཉིན་རང་ཤག་ནས་བྲིས།