ཚིགས་བཅད་སྙན་ངག《ཞུ་འཕྲིན་བུང་བ་གཞོན་ནུའི་གླུ་དབྱངས》།

                                           ཇུས་བཟང་ཉི་མའི་དཀྱིལ་འཁོར་མཁར་འཕགས་ཀྱང་།།
                                           ལོག་སྒྲུབ་སྤྲིན་སྣ་འགྱུ་བའི་འགྲོས་རྩུབ་མོས།།
                                           རེ་བའི་ལྗོན་བཟང་རྩད་ནས་ཕྱུང་བའི་ཆ།།
                                           སྙིང་གི་ཁོང་ལ་སོས་མེད་ནད་དུ་ཆེ།།
                                           ཁ་ནས་གཞན་ཕན་དུང་གི་སྒྲ་སྒྲོག་ཀྱང་།།
                                           ཁོག་ལ་གཡོ་སྒྱུའི་འབུ་སྲིན་སྟོང་ཞུགས་པས།།
                                           འདུན་པའི་རི་རབ་རྨེག་མེད་འཇོམས་པ་ལ།།
                                           གཅིག་ཏུ་གཞོལ་བས་ས་སྟེང་ཁྱབ་འདིར་སྐྱོ།།
                                           ལྷག་པར་སྲིད་པའི་བདེ་སྡུག་བློས་བཏང་ཡང་།།
                                           ཡང་དག་གཞུང་ལུགས་རྒྱ་མཚོར་མི་རོལ་པར།།
                                           བར་མཚམས་བྲལ་བ་གཅོང་རོང་འཕྲང་ཉུལ་བས།།
                                           བས་མཐའི་གཉེན་གྱི་ཟུངས་ཁྲག་གཞིབ་པ་མང་།།
                                           ཀྱེ་མ་འདི་དག་སྔོན་བསྐྱོད་གོམ་པའི་འགྲོས།།
                                           ཡང་དག་བསྡམས་པའི་ལྕགས་ཀྱི་སྒྲོག་ལགས་ན།།
                                           གང་གི་འཆད་རྩོད་རྩོམ་པའི་རྣམ་ཐར་ནི།།
                                           ཀུན་འབྱེད་འཕྲུལ་གྱི་ལྡེ་མིག་གཅིག་པུར་འཁུམས།།
                                           དུས་ངན་མུན་པ་གནས་སའི་ཁྱོན་འཁྲིགས་ཏེ།།
                                           གཙུག་ལག་ཆུ་སྐྱེས་འདབ་མའི་ཁ་ཟུམ་པ།།
                                           ཤེས་རབ་ཉི་མ་གཅིག་ཏུ་བསྡུམས་པའི་གཟིས།།
                                           བསྐྱངས་པའི་ངོ་མཚར་་འཇིག་རྟེན་རྒྱན་དུ་སོན།།
                                           རྣམ་སྲས་མཛད་སྒོ་ཕྱེ་འདྲའི་ཕུན་ཚོགས་ནོར།།
                                           མཆིལ་མའི་ཐལ་བ་བཞིན་དུ་ཡལ་བོར་གནས།།
                                           ཆར་རྗེས་མྱུ་གུ་འཛུམ་འདྲའི་རིགས་ཀྱི་བུས།།
                                           ས་སྟེང་ཁྱབ་པར་བྱས་ལ་སུ་མི་གུས།།
                                           འགྲོ་མང་ཡིད་ཀྱི་མེ་ལོང་འོད་འབར་བར།།
                                           གདོད་ནས་ཆགས་པའི་རྙིང་ཞེན་རྡུལ་གྱི་རིས།།
                                           ཕྱིས་ལས་ལེགས་ཚོགས་དྲི་བསུང་འབུམ་དཀྲིགས་པས།།
                                           མགོན་ཁྱོད་ཐུགས་རྗེའི་ལྷོ་རིའི་ཕང་བར་ངེས།།
                                           ཟབ་བརླིང་ཚིག་གི་ཆ་ཤས་རེ་རེར་ཡང་།།
                                           སྙན་འགྱུར་འབུམ་གྱི་རོལ་མོས་ལེགས་འཁྱུད་ཅིང་།།
                                           ཚངས་སྲས་སྒེག་མོས་མཆོད་པའི་སྤྲིན་སྤྲོ་ན།།
                                           གཟུར་གནས་དགྱེས་པའི་ཡོན་དུ་ཅིས་མི་འགྱུར།།
                                           དེ་ལྟའི་ཕྱིར་ན་བདག་སེམས་གླང་བོའི་འགྲོས།།
                                           ཡང་དག་མཁས་པའི་བཤུལ་ལམ་ཡངས་པོའི་ལྟོར།།
                                           བཀྲི་མཛད་བསླབ་བྱ་ལྕགས་ཀྱུའི་རྗེས་འགྲོ་བ།།
                                           མི་འགྱངས་བསྐུར་བའི་རེ་བ་སྙིང་ནས་ཞུ།།
                                           ཉམ་ཐག་རྔེའུ་སྟོར་བའི་མ་མ་བཞིན།།
                                           གང་ཁྱོད་སྙིང་ནས་དྲན་པའི་གདུང་བ་ནི།།
                                           དྭངས་གསལ་རྙོག་མས་བཏང་བའི་མཚོ་རྫིང་ལ།།
                                           རབ་དཀར་ཟླ་གཟུགས་འཕོས་པའི་ཚུལ་ལས་འགོངས།།
                                           མིའུ་ཐུང་གོམ་པའི་སྟབས་ཀྱིས་གཞལ་བ་ལྟར།།
                                           དཔག་ཚད་ཁྲི་ཕྲག་ས་ཡིས་བསྐལ་ན་ཡང་།།
                                           མཛའ་གཅུགས་རི་མོ་གསལ་བའི་འཕྲིན་གྱི་སྐྱེས།།
                                           ཡིད་སེམས་སྦྲེལ་ལ་ཀླུང་བརྒྱའི་རྒྱུན་བཞིན་སྩོལ།།
                                           ཚུལ་འདིས་འདོད་པའི་དགའ་ཚལ་ཡོད་འོང་བར།།
                                           རེ་བའི་མེ་ཏོག་ཁྲི་ཕྲག་བཞད་གྱུར་ཏེ།།
                                           རྫོགས་ལྡན་ཉི་མ་བསིལ་ལྡན་ལྟོ་བ་རུ།།
                                           འདྲེན་པའི་ཤིང་རྟ་ཆེན་པོར་ཁྱོད་གྱུར་ཅིག།