བོད་ལྗོངས་སློབ་ཆེན་ནས་མཆེད་པའི་སྐོར་བྲོའི་འོད་ཞགས།
བོད་ལྗོངས་སློབ་ཆེན་ནས་མཆེད་པའི་སྐོར་བྲོའི་འོད་ཞགས།
འབའ་ཚེ་སྨྱོན།
བོད་ལྗོངས་སློབ་ཆེན་གྱི་དཀྱུས་དབུས་ནས་མཆེད་ཅིང་།
ཝ་པ་སྤྱི་གླིང་གི་དགའ་ཚལ་ན་དགུང་དུ་འཕྱུར་བཞིན་པའི་སྐོར་བྲོའི་མེ་ལྕེ།
ཨ་ལོང་བཞིན་སྒོར་བའི་མི་ཚོགས་ཀྱི་སྙིང་དབུས་ནས་མངར་ཇའི་དྲི་ཞིམ་དེ་ནང་བཞིན།
སྐོར་བྲོ་བ་ཚོའི་ཁྲག་རྩར་རྒྱུད་ཐེངས་རེར། སེམས་ཁོང་གི་སྡུག་ཡུས་ཐ་དག
ཉེ་ལོགས་ཀྱི་སྐྱིད་ཆུའི་རླབས་འགྲོས་དང་བསྟུན་ནས་སྐད་ཅིག་གིས་འཁུར་འགྲོ་ལ།
ཤུལ་དུ་ལུས་པའི་དགའ་སྐྱིད་ཀྱི་འཛུམ་མདངས་དེ་ལའང་།
གསོན་ཤུགས་ཀྱི་དམར་མདངས་ངང་གིས་རྒྱས་བྱུང་།
སྐོར་བྲོའི་མེ་ལྕེ་སྔར་བཞིན་དགུང་དུ་མཆེད་བཞིན་ཡོད་ལ།
སྐོར་བྲོ་བ་ཚོས་སྔར་བཞིན་ཨ་ལོང་སྒོར་སྒོར་ཞིག་བྲིས་འདུག
གློག་སྡོང་གི་འོག་ཏུ་བབ་བརླིང་གིས་འཁྱིལ་བའི་བརྩེ་དུང་གི་མཚོ་མོ།
འཇིག་རྟེན་པའི་སེམས་ལ་ཁ་བ་བཞིན་མར་མར་འབབ་དུས།
དགུང་དུ་མཆེད་ཀྱིན་པའི་མེ་ལྕེའི་ཆེ་ཆུང་དང་།
བསྲེག་འགྲོ་བའི་སྔངས་སྐྲག་གི་འཕྲིན་པ།
སྔ་མོ་ནས་བོར་ཚར་ལ། རྔམ་མཐུག་པའི་མཚན་མོའི་འབོད་བརྡ་དེ་བསུ་ཞོར།
འཇམ་ཅག་གེར་སོ་སོའི་ཚང་མལ་དུ་བཞུར་ཚར།
སྐོར་བྲོའི་མེ་ལྕེ་སྔར་བཞིན་དགུང་དུ་མཆེད་བཞིན་ལ།
སྐྱིད་ཆུ་སྔོན་མོ་སྔར་ནས་གཉིད་དུ་ཡུར་ཟིན།
སྐོར་བྲོ་བ་ཚོས་སྔར་བཞིན་ཨ་ལོང་སྒོར་སྒོར་ཞིག་བྲིས་འདུག
༢༠༡༡ ༧ ༡ཉིན་གྱི་མཚན་མོར་ཚེ་སྨྱོན་གྱིས།
