བཞི་མདོ་ན་ཁྱོད་ཀྱི་ཅི་ཞིག་ལུས་ཡོད།

བཞི་མདོ་ན་ཁྱོད་ཀྱི་ཅི་ཞིག་ལུས་ཡོད།

༡

　　　　ཁྱོད་དང་འུ་གཉིས་ངོ་ཤེས་བ་ནི་ན་ནིང་དོ་ཚིགས་ཤིག་མ་རེད
　　　　ཁྱོད་བཞི་མདོ་དེ་ནས་ལངས་བའང་ཁ་སང་དེ་རང་ཞིག་ག་ལ་ཡིན
　　　　བཞི་མདོ་དེ་ན་ཁྱོད་ཀྱི་ཅི་ཞིག་ལུས་ཡོད

༢

　　　　ཁྱོད་ཀྱིས་བཞི་མདོ་ན་ལས་དབང་ཟེར་བའི་བུ་མོ་དེར་སྒུག་ཡོད་དམ
　　　　ཁྱོད་ཀྱིས་བཞི་མདོ་ན་གོ་སྐབས་ཟེར་བའི་རླངས་འཁོར་དེར་སྒུག་ཡོད་དམ
　　　　བཞི་མདོ་འདི་འདུ་འཛི་ཆེ

　　　　ཕྱོགས་བཞིར་བསྐྱོད་པའི་མི་དང་རླངས་འཁོར་མང་བས་འདུ་འཛི་ཆེ
　　　　ཉི་མའང་ནུབ་ལ་ཁད་རེད
　　　　ཁྱོད་ད་དུང་བཞི་མདོ་དེ་ན་གོམ་གང་ཡང་སྤོ་བའི་སྟ་གོན་མི་འདུག
　　　　བཞི་མདོ་དེ་ན་ཁྱོད་ཀྱི་ཅི་ཞིག་ལུས་ཡོད

༣

　　　　བཞི་མདོ་ནམ་ཡང་ལྷིང་འཇགས་མིན   ཡིན་ཡང
　　　　ལྷིང་འཇགས་མིན་པའི་བཞི་མདོ་ཡིས
　　　　ཀྲོང་ངེར་བཞི་མདོ་རུ་ལངས་ཡོད་པའི་ཁྱོད་ཀྱི་ལྷིང་འཇགས་དེ་དཀྲོགས་མ་ཐུབ
　　　　ཁྱོད་རང་ཕྱོགས་གང་ཞིག་ནས་འོངས་བ་ཡིན
　　　　ཁྱོད་རང་ཕྱོགས་གང་ཞིག་ལ་འགྲོ་དགོས་སམ
　　　　ལྷིང་འཇགས་པ   བཞི་མདོ་དེ་ན་ཁྱོད་ཀྱི་ཅི་ཞིག་ལུས་ཡོད

༤

　　　　ཁྱོད་རང་བཞི་མདོ་ནས་ལངས་ཡུན་རིང་བས་ཁ་ཕྱོགས་ནོར་སོང་ན་ཐང
　　　　ཁྱོད་རང་བཞི་མདོ་ནས་བསྡད་ཡུན་རིང་བས་སའང་རུབ་ན་ཐང
　　　　བཞི་མདོ་ནས་གོམ་གང་མདུན་དུ་སྤོས་ན་བཞི་མདོ་མིན
　　　　བཞི་མདོ་ནས་བསམ་གཞིགས་ཞིབ་མོ་བཏང་ན་རང་སེམས་ཀྱི་ཁ་ཕྱོགས་རྙེད་སྲིད
　　　　བཞི་མདོ་ནས་ཁྱོད་ཀྱིས་རང་གི་གློག་སྒྲོན་་གཟིམས་པས
　　　　ཁྱོད་ཀྱི་ཁ་དབྱིངས་ལ་བཞི་མདོ་ནས་ས་རུབ་སོང

༥

　　　　བཞི་མདོ་ན་ཤར་ལྷོ་ནུབ་བྱང་གི་ཁ་ཕྱོགས་གསལ་བོ་བྲིས་ཡོད
　　　　ཡིན་ཡང  ཁྱོད་ཀྱིས་བཞི་མདོ་ནས་རང་གི་ཁ་ཕྱོགས་བོར་ཡོད
　　　　བཞི་མདོ་ལ་གྲང་རླུང་ལྡང་ཡང་སྲིད
　　　　བཞི་བདོ་ནས་ཁྱོད་ལ་མིག་ཆུ་བཞུར་ཡང་སྲིད

༦

　　　　ཉི་མ་ནུབ་ལ་ཁད་རེད
　　　　ཁྱོད་ཀྱིས་སྒུག་ཡོད་པའི་བུ་མོ་བུད་སོང་ན་ཐང
　　　　རླངས་འཁོར་ཡང་བུད་སོང་ན་ཐང
　　　　ཁྱོད་ད་དུང་བཞི་མདོ་ན་ཀྲོང་ངེར་ལངས་ཡོད
　　　　བཞི་མདོ་ན་ཁྱོད་ལ་ད་དུང་གོམ་སྤོ་བའི་སྟ་གོན་མི་འདུག

༧

　　　　བཞི་མདོ་ནས་གོམ་གང་མདུན་དུ་སྤོས་ན་བཞི་མདོ་རང་བཞི་མདོ་མིན
　　　　བསམ་གཞིགས་ཞིབ་མོ་རེ་བཏང་ན་རང་གི་ཁ་ཕྱོགས་རྙེད་སྲིད
　　　　བཞི་མདོ་ནས་ཁྱོད་ཀྱིས་གྲང་ངར་མྱོང་ཡང་སྲིད
　　　　བཞི་མདོ་ནས་ཁྱོད་ལ་ས་རུབ་ན་ཐང 
　　　　བཞི་མདོ་ན་ཁྱོད་ཀྱི་ཅི་ཞིག་ལུས་ཡོད

2011-6-2ཕྱི་དྲོ་ཤར་མར་སྦྱར།