༄༅༎དྲིན་ཆེན་ཨ་མ་གཙོས་པའི་བུད་མེད་ཡོངས་ལ་ཕུལ། 

ལྷ་ཆེན་ཚངས་པས་བཟོས་པ་མ་ཡིན་པའི། 
ལྷ་མོ་ཉུའུ་ཝས་བསྐྲུན་པ་མ་ཡིན་པའི། 
འཇིག་རྟེན་བྱེད་པོས་བསྐྱེད་པ་མ་ཡིན་པའི། 
གནམ་ནས་ལྷུང་བ་མ་ཡིན་པའི། 
ས་ནས་སྐྱེས་པ་མ་ཡིན་པའི། 
ང་ཚོ་གང་ནས་ཡོང་བ་ཡིན་ནམ། 
མཛེས་སྡུག་གི་ཚེ་སྲོག་རེ་རེ། 
ཡིད་འོང་གི་སྲོག་ལྡན་རེ་རེ། 
སུ་ཞིག་གིས། 
དམྱལ་བ་མངོན་མཐོང་གི་སྡུག་བསྔལ་མྱངས་ནས། 
གང་ཞིག་གིས། 
ཕོ་གཤགས་གློ་འདོན་གྱི་ན་ཟུག་མྱངས་ནས། 
ཉིན་དཀར་དང་མཚན་མོ་རེ་རེ། 
ཟླ་བ་དང་དུས་ཚིགས་རེ་རེ། 
སྡུག་བསྔལ་དང་རེ་བའི་མཚམས་ནས། 
དངངས་སྐྲག་དང་དགའ་སྤྲོའི་བར་ནས། 
སེམས་ཀྱི་མི་མོ་དེ་ཚོ། སེམས་ཀྱི་ལྷ་མོ་དེ་ཚོས། 
ང་ཚོ་སྐྱེ་ཟུག་དང་བཅས། 
ང་ཚོ་དགོད་འཛུམ་དང་བཅས། 
ང་ཚོ་ངུ་སྐད་དང་བཅས། 
འཇིག་རྟེན་འདི་རུ་བསུས་པ་མ་ཡིན་ནམ། 
སེམས་ཀྱི་མི་མོ་དེ་ཚོ། སེམས་ཀྱི་ལྷ་མོ་དེ་ཚོ། 

སྒྱུ་འཕྲུལ་མ་ནི་བུད་མེད་ཅིག་ཡིན། 
མྱང་ཚ་དཀར་རྒྱན་ཡང་བུད་མེད་ཅིག་ཡིན། 
ཀྲང་ཞིའི་རྒྱལ་མོ་ནི་བུད་མེད་ཅིག་ཡིན། 
ཁྲི་མ་ལོད་ཀྱང་བུད་མེད་ཅིག་ཡིན། 
ངའི་ཨ་མ་ནི་བུད་མེད་ཅིག་ཡིན། 
ཁྱོད་ཀྱི་ཆུང་མའང་བུད་མེད་ཅིག་ཡིན། 
ཁོའི་བུ་མོ་ཡང་བུད་མེད་ཅིག་ཡིན། 
བུད་མེད་ནི་གནམ་གྱི་ཕྱེད་ཀ་ཡིན་མིན་མི་ཤེས་མོད། 
བུད་མེད་ནི་གནམ་ས་མ་སྟོངས་བར་དུ། 
ང་ཚོ་ལག་པས་གཉོར་ཞིང་སེམས་པས་འཚོས་ཏེ། 
དྲོད་ལམ་ལམ་གྱི་གཞིས་ཁྱིམ་ང་ཚོར་བསྐྲུན་མཁན། 
སྙན་ལྷང་ལྷང་གི་སྙིང་གཏམ་ང་ཚོར་བརྗོད་མཁན། 
འོད་ལམ་ལམ་གྱི་འཛུམ་མདངས་ང་ཚོར་སྟོན་མཁན། 
སེམས་ཀྱི་མི་མོ་དེ་ཚོ། སེམས་ཀྱི་ལྷ་མོ་དེ་ཚོ། 

བུད་མེད་ནི། 
ང་ཚོའི་ཨ་མ་དང་སྲིང་མོ་ཡིན། 
ཆུང་མ་དང་བུ་མོ་ཡིན། 
དེ་བས་ན། 
ང་ཚོས་བུད་མེད་ཀྱི་འཇིག་རྟེན་དུ་འཚོ་བ་རོལ། 
ང་ཚོ་བུད་མེད་ཀྱི་ནུ་ཞོས་གསོས། 
ང་ཚོས་བུད་མེད་ཀྱི་ལག་ཟས་ཟོས། 
ང་ཚོ་བུད་མེད་དང་བརྩེ་བ་ཆགས། 
ང་ཚོ་བུད་མེད་དང་འབྲལ་ཐབས་མེད་པས། 
འདི་ནི་བུད་མེད་ཀྱི་འཇིག་རྟེན་ནོ། ། 
འཇིག་རྟེན་འདི་ནི་བུད་མེད་ཀྱིའོ། ། 
སྒྲོལ་མ་ལྷ་མོ་ཡང་མི་མཐོང་བའི་དབྱིངས་སུ་མི་འདུག
ཚངས་སྲས་བུ་མོ་ཡང་སྒྱུ་འཕྲུལ་གྱི་གུར་དུ་མི་འདུག
མཁའ་འགྲོའི་ཚོགས་ཀྱང་འཇའ་འོད་ཀྱི་ཕོ་བྲང་དུ་མི་འདུག
དེ་དག་ང་ཚོའི་ཉེ་འཁོར་ན། 
དེ་དག་སྐད་ཅིག་ཙམ་ལ་འང་ཁྱོད་དང་མི་འབྲལ་བར། 
བྱམས་པའི་འཛུམ་ཆུང་སྟོན་པའི་ཁྱོད་ཀྱི་ཨ་མ་རེད། 
བརྩེ་བའི་ཟུར་མིག་འཕེན་པའི་ཁྱོད་ཀྱི་ཆུང་མ་རེད། 
པྲ་ཆལ་སྙིང་དུ་སྡུག་པའི་ཁྱོད་ཀྱི་བུ་མོ་རེད། 
སེམས་ཀྱི་མི་མོ་དེ་ཚོ། སེམས་ཀྱི་ལྷ་མོ་དེ་ཚོ།