བླ་མ་མ་ཎི།

དགུན་དུས་ཀྱི་ཞོགས་པ་དེར།
ཁང་པའི་ནང་གི་ཚ་དྲོ་མ་ལུས་ཤེལ་དྲའི་ངོས་སུ་འབྱར།
རི་དང་གཙང་བོ་ཡོད་ཚད་ཀྱང་ཤེལ་དྲའི་ངོས་སུ་བཙངས།
ཧད་དེ་བསྡད་པའི་ཉི་འོད་ཀྱི་ལག་པ་ཁོ་ནས།
རླངས་པ་ཕྱིས་ཏེ་གྲིབ་མ་འཛིན།

ལྷ་ཐེ་བོང་འདྲ་ཞིག་སེམས་ལ་བསྒོམས་རྗེས།
ཆོས་ཀྱི་ཆོ་ག་གང་དེའི་མགོ་མཇུག་དབར་གསུམ་པོ།
རང་ཁོ་ནར་དབང་བའི་དག་སྣང་གིས།
ལྷ་སྐུ་དེར་ཁ་མིག་ལྷ་མ་ཞིག་བྲིས།

ཀ་ཏོ་རའི་ནང་གི་གདོང་དང་སྙིགས་ཆུ་གཉི་ག་བཤོས་རྗེས།
ས་འོག་གི་སྦུ་གུའི་ནང་ནས་རང་ཉིད་འཚོལ་དོན་ག་རེ་ཡིན་ན།
རྡོ་བའི་ཁོག་གི་འོད་ཟེར་རུལ་སོང་བ་དེའང་།
རླངས་པར་གྱུར་དོན་ག་རེ་ཡིན་ན།

ལྷ་སའི་རུམ་ཁ་ནས་འོད་ཟེར་འཁྲུངས་ཀྱང་།
ཁ་གྲགས་དུས་རྫིག་ཉམས་ཆེ་བའི་སྐུ་ཞབས་ཁོང་གིས་ཀྱང་།
གྱད་མིའི་ཚུགས་ཀ་ཤོར།

བླ་མ་མ་ཎིའི་ངག་གི་གཤོག་པ་ལས་རྒྱ་ཡན་དུ་ཤོར་བ།
སངས་རྒྱས་ཁོ་ནས་མཐོང་བའི་ལྷ་སའི་ས་ཁྲ་ཡིན་ནམ།
མཆོད་ཁང་དགོན་པར་བཅོལ་ཡོད།
ལྷ་ཁང་སྲུང་མཁན་ཨེ་ཡོད།

ཁ་རླངས་ཀྱི་ནུས་པ་ཟད་རྗེས།
ཀོ་ཐུམ་བརྒྱབ་པའི་སྐད་གདངས་ཆ་མེད་དེ།
སྒྲ་ཡི་སྣེ་མོར་འཇུས་ཏེ་ང་ཡི་སེམས་རྩ་དྲུད།
འོད་ལ་ཞེད་པའི་རྣམ་ཤེས་ཤིག
ལུས་ཀྱི་དཀྱིལ་འཁོར་ལས་ཕྱིར་བུད།

གྲིབ་མས་དྲུད་པའི་རླུང་བུ་ཞིག་གིས།
ལས་ཀྱི་སླེ་བོ་ལས་རྡོ་བ་ཞིག་ས་རུ་ཕོག

ངལ་བས་ལུས་པོ་སྦྲིད་ཀྱང་།
སེམས་གཅོང་གནང་དོན་མི་འདུག
རྡོ་བར་སེམས་པ་མེད་ཀྱང་།
ལས་ཀྱི་གྲུ་ཁ་ལྟ་བུའི་ཚེ་ཡི་མཐུད་མཚམས་འདི་ནས།
བྱ་རྡོ་ལམ་ནས་ཕྲད་པ་ལྟར།
གྲིབ་མའི་གྲིབ་མ་དེ་ཡིས།
བྲང་གི་སྒྲོག་གུ་གྲོལ་ལོ།།
                              ༢༠༡༧།༩།༢༥། ལྷ་ས། མཆིན་པས་ནང་ཁོག་ཏུ་གཙེས་པའི་ཚ་བ་ཆེ་རུ་ཕྱིན་སོང་ངམ།
ཁ་འདོན་གྱི་མཚམས་དེ་གང་ལ་ཐུག་སོང་།

དོ་ནུབ་ང་རང་གཞི་ནས་གྲང་བ་ཚོར་བྱུང་།
ཁྱོད་ཀྱི་ཤ་ཁྲག་གི་ཚ་དྲོད་ལ་ང་ཡིས་སེམས་པ་སྦྱར་མྱོང་བས།
རུས་པའི་གཏིང་ནས་གྲང་བྱུང་།

སྡིག་པའི་ནང་ནས་སྐྱེས་པའི་ངས།
ཁྱོད་རང་སེམས་སུ་མེ་སྒོང་ལྟར་དུ་བརྒྱབ།
ཚ་བེར་བེར་གྱི་ལག་པ་དེ་ལས་ཡལ་སོང་བའི།
རྡོ་བ་གྲང་མོར་ཆགས་སོང་སྐད།

ཁོ་མོའི་གྲོད་ཁོག་ནང་གི་མེ་ཚ་མོ་དེ།
ཁ་རླངས་བཞིན་དུ་གྲང་རྗེས།
སུ་ཞིག་གིས་ཁྱོད་ཀྱི་སྐུ་ཚབ་བྱས་ཏེ།
ཁོ་མོའི་ལག་པ་དྲོའམ།

དོ་ནུབ་ང་རང་གཞི་ནས་གྲང་བ་ཚོར་བྱུང་།
ཁ་འདོན་གྱི་མཚམས་དེ་གང་ལ་ཐུག་སོང་།

ཚེ་ཡི་ལ་མོ་བརྒལ་རུང་།
མིག་གིས་ཕར་ལ་གཟིགས་དང་།
མཆོད་མེ་བརྒྱ་རྩ་དེ་ཡིས།
ཨ་མའི་རུམ་ཁ་རྙེད་ཡོང་།
                              ༢༠༡༧།༨།༢༧། ལྷ་ས། སངས་རྒྱས་ནི་འཁོར་བའི་ནང་གི་མི་ཞིག་ཏེ།
བློས་བསླངས་ལ་ཤིན་ཏུ་མཁས་པའི་འཇིག་རྟེན་བ་ཞིག་གོ།

དམྱལ་བར་བྱུགས་པའི་དྲི་མ་དེ།
བདེ་བ་ཅན་གྱི་གཏམ་དང་ལྷན།
དྲ་བ་གཅོད་པའི་རལ་གྲི་བཞིན།
ངར་གྱིས་ནུས་ན་བདེ་བ་རྙེད།

རྒྱུ་འབྲས་ཁ་ཡིག་གསལ་ན།
འཁོར་བ་རང་ལ་དབང་།
                                ༢༠༡༧། ལྷ་ས། ང་ནི་མིང་ཚིག་གིས་བཞུས་པའི་འཇའ་ཡི་ཁང་པ་ཞིག་སྟེ།
དབུལ་ཕོངས་ལས་རྟེན་འབྲེལ་གྱི་མིག་སྣེ་གསེད།
ཆུ་ལ་ལྷུང་བའི་ཟླ་བ་དེ།
འུར་ཆའི་སྒྲ་ཡིས་ཧྲག་གེར་བཅག

ས་དང་རྡོ་ལས་གྲུབ་པའི་རི་དང་ལུང་པའི་བརྡ་སྤྲོད།
སེན་མོས་བཤུས་པའི་སེམས་ཀྱི་པགས་པ།
འཆི་བ་བོར་བའི་རྟ་ཕོ་ཞིག་གིས་རླུང་གི་གཤོག་པ་བཅད།
མེ་ཏོག་པདྨའི་ཡལ་ག་དག་ལས་རྡོ་བ་འབུས།

སྨུག་པ་རི་རྩེར་ཞོན་པའི་རྟ་པ་འདྲ།
རླུང་བུས་སྲབ་མདའ་ཇི་ལྟར་ཀློད་ཀྱང་རུང་།
མཚན་མོའི་གཙང་བོ་དཀར་པོ་དེ།
དགུན་གྱི་ཁ་བ་བཞིན་ང་ཡི་སྙིང་གི་རྫ་ལ་ཆགས།
སོ་ཡིས་བསྣུན་པའི་སྣང་བའི་རྨི་ལམ་ཡང་།
ཇི་ལྟ་ཇི་སྙེད་གང་དེ་མ་ལུས་པ།
དབྱིག་ནོར་ཁང་གི་རྫས་སུ་གྱུར།

ཤ་དང་པགས་པའི་གསེང་དུ་འཛུལ་བའི་ལག་པ།
མེ་བཙའ་རུས་ལ་ཟུག་པ་ལྟར་ང་ཡི་སྙིང་གི་རུས་པ་གས།
མེ་ཏོག་གི་ལོ་མ་ལས་མཆི་མ་འཁྲུངས།

བྲང་ངོར་ཟུག་པའི་དྲན་པ་དཀར་པོ།
ཚོན་གྱིས་མ་གྲུབ་གཟུགས་ལས་འདས་པས།
བསུབས་པའི་འོད་ལ་གྲིབ་མ་མེད་ཀྱང་།
ཚིག་གི་བརྡ་ལ་སྒྲ་ཡིས་རྒྱན་ནོ།།
                                               ༢༠༡༧།༩།༣། གཡོས་ཁང་། སྡིག་པའི་ཝ་མོ་རྒོད་ཚུལ་ག་ལེར་གསུང་དང་།
ལག་པའི་རི་མོས་བཞེངས་པའི་ལྷ་ཁང་དེ་ཡང་།
མིག་ཚེ་ནང་གི་སྒམ་དུ་བཅུག་པ།
གསང་བའི་མགུར་ལ་བརྒྱུས་པའི་གཡུ་ཆུང་འདྲ་ལེ།

ཚིག་གི་ཁན་དས་སྦྱར་བའི་སེམས་ཀྱི་རི་མོ།
ཁང་གསར་དག་པའི་ཞིང་དུ་ཡིད་གཞུངས་འཁྱིལ་འདྲ།
རུས་པའི་ངལ་བ་ངག་གིས་གསོལ་ཏེ།
ཁྲུང་བཞེས་གནང་དང་།

མུན་པའི་གསེབ་ཏུ་སྐྱེས་པའི་གཟི་འོད་དྭངས་མོ།
ཕ་ལམ་ས་ལ་ཐོར་བའི་མགུལ་རྒྱན་འདྲ་ལེ།

སྲོག་ལ་གླན་པའི་ལྷན་པ།
སྐར་ཆུང་སྒྲོག་གུ་འདྲ་བྱུང་།
ལེགས་ཚོགས་འཛོམས་པོ་བྱུང་ན།
ཤི་རུང་དམྱལ་བར་ཅི་སྐྲག
                                  ༢༠༡༧། གཡོས་ཁང་། ཚེ་སྲོག་གི་ལོངས་སྤྱོད་ལས་མ་སྨིན་པའི་རྡོ་བ་དེ།
ས་དང་རྡོ་ཡིས་བརྩིགས་པའི་སྙིང་སྲོ་བྱེད་ཀྱི་ཐབ་ཀ་དེའོ།།

རྩེ་སྐོར་གྱི་མི་ཚོགས་ནི་ཁབ་དང་སྐུད་པ་འདྲ་ལེ།
ཞོལ་དང་ཀླུ་ཁང་གཉིས་པོ་འཚེམ་བཞིན་གདའ།
ལག་སྣེར་འཇུས་པའི་རླུང་བུ་འདི་ཡང་།
ས་ཡི་རླངས་པར་ཆགས་པའི་མེ་ཏོག་གི་འདབ་མ་འདྲ།

སེམས་ཀྱི་མ་རིག་པ་མང་པོའི་མཐོང་སྣེ་བསྡོགས་ཏེ།
ཚེ་རབས་འདིར་ཚིག་གིས་མེ་ཁ་གསོ།

ལག་སྣེ་ཕར་ལ་བསྲིངས་པས།
གཡུ་ཐོག་ཟམ་པར་རེག་བྱུང་།
སེམས་པ་དེ་རུ་སྦས་ཀྱང་།
ཆང་མ་ལགས་དང་མ་མཇལ།
ཆང་ལ་མིག་ཆུ་ཡོད་ན།
མིག་མཐའ་སེམས་ཀྱིས་དབྱི་ཆོག

ང་ནི་མ་གཞི་ནས་རྡོ་ཡི་ཁང་སྟོང་ཞིག་སྟེ།
སྒོ་དང་སྒེའུ་ཁུང་གཉི་ཀ་མེད་པའི།
ལྷ་ཁང་སྟོང་པ་དེའོ།།
                                   ༢༠༡༧། ལྷ་ས།                   
བརྙན་འཕྲིན་གྱི་འཆར་ངོས་ནས་ཡར་བའི་མིག་ཆུ་གཅིག་གིས།
དབྱངས་ཀྱི་སྐུད་པ་ང་དྲུག་ཧད་ཀྱིས་བཅད།

འཆི་བའི་ཞེད་སྣང་ལས་ཐར་བ་ཐོབ་པའི་ཡུལ་འདིས།
ཡུལ་དེའི་འཆི་བ་འགོག་མ་ནུས།

ང་རང་ཤན་པ་ལ་མི་སྐྲག  
གྲི་རྡུང་མཁན་གྱི་མགར་བ་ལ་སྐྲག

རང་དབང་གི་ནམ་མཁའ་ནས་བབས་པའི་མདེའུ་དེ།
གལ་སྲིད་ཁ་བ་ཡིན་ན།

ནམ་མཁའ་དཀར་པོའི་ངག་ནས།
ཁྲག་གི་དབྱངས་གྱེར་མི་སྲིད།
                                          ༢༠༡༧།༡༠།༣། གཡོས་ཁང་། དུ་བའི་གོས་ཐང་ངོས་ཀྱི་ཉི་འོད་དེ་སྐམ་སོང་།
ལག་རས་གསར་པའི་ཁུག་གི་ཆུ་ཐིགས་ཤིག་དང་འདྲ་བར།
སྐུད་པས་མ་ཟོས་པར་རྡུལ་ལ་ཐིམ།

ཁ་རླངས་ཀྱིས་བསྲོས་པའི་རྡོ་བ་དེ།
བྱ་རྒོད་ཀྱི་གཤོག་པར་འཇུས་ཏེ་རྒྱང་ནས་རྒྱང་དུ་ཡལ།
དུ་བའི་སྐུད་པ་ཕྲ་ཞིང་ཕྲ་བ་དག
ཡི་གེའི་ངག་ལ་བརྒྱུས།

རི་མོ་ལས་ལྷ་འབབ་སའི་སྐས་འཛེག་བཙལ་མཁན་གྱི་མི་དེ།
ཤན་པ་ཞིག་གི་སྒོ་ཁ་ནས་སངས་རྒྱས།

ཤིང་ལེབ་ངོས་ཀྱི་ཟླ་བར་གསེར་གྱི་མིག་གཉིས་ཕུལ་ན་ཡང་།
མུན་པའི་གསེང་གི་སྒྲོག་གུ་དེ་སྐར་ཚོགས་ཀྱིས་ང་ལ་གནང་།
འོད་ལ་རེ་བའི་ལུས་པོ་འགུལ་ཙམ་གྱིས།
ངག་གི་ཕྱུ་བ་ཐལ་བས་མནན།

གའུའི་ནང་གི་ལྷ་སྐུ་སྐྱ་ཐིག་ཅན་དེ།
གཙང་བོའི་རླབས་ལས་ཡར་ཡར་འཕག་ཀྱང་།
རྒྱུ་སྣེ་རྣག་གིས་ཟིན་པས།
དབུགས་ཆད་དོ།།
                                       ༢༠༡༧།༡༠།༡༠། གཡོས་ཁང་། སྒྲུང་གི་ཤང་རྟ་ལས་བབས་པའི་མགྲོན་པོ་སྐོར་ཞིག་ང་ཡི་རུམ་ཁར་འབྱོར།
གོས་ཆེན་ལྗང་སེར་གྱོན་པའི་བུ་མོ་དེ་གནས་མ་ཞིག་རེད་བཞག

མེ་ཏོག་གི་མཆུ་སྒྲོས་ལ་འགོས་པའི་ཟིལ་བ་རླུང་གིས་ཁྱེར་རྗེས།
ང་ཡི་བྲང་རུས་ལ་གས་ཀ་ཤོར།

ར་སའི་སྤྱི་གཙུག་ཏུ་བབས་པའི་ན་རོ་དེ་ནམ་མཁར་གཤེགས་པ་ནས།
འདི་གའི་རྒྱ་མཚོའི་ངོས་ཀྱི་རླངས་པ་སྐམ།

ཡི་གེ་དག་རེ་རེ་བཞིན་ངག་མི་སྨྲ་བར།
ཁ་རླངས་ཀྱི་གསེང་དུ་འཛུལ།

འཁོར་བའི་ངོ་བོ་ལྟར་གྲུབ་པའི་ང་ཡི་ལག་པ་ཡ་གཅིག
གཟུགས་འདས་ཀྱི་ངལ་བས་བསྒུལ།

གྲོགས་པོ་ཚོས་རང་རང་གི་འཇུར་སྒྲོག་གི་སྣེ་མོར་འཇུས་ཏེ།
ཉི་མའི་འོད་ཟེར་གྱིས་དེད་པའི་ཆུ་རིས་འགམས།

འཁོར་བ་ལས་བྲོས་ནས་ཐར་བའི་རྟ་བ་དེ།
ང་ཡི་རྨི་ལམ་དུ་ཕེབས།

འདབ་མའི་སྟེང་གི་ཟིལ་བ་ཁོ་ནས།
ནམ་མཁའ་སྲུང་ནས་བསྡད།
                                     ༢༠༡༧།༡༠།༡༥། གཡོས་ཁང་། 

ས་དམར་གྲགས་པ། ཀྲུང་གོའི་རྩོམ་པ་པོའི་མཐུན་ཚོགས་ཀྱི་ཚོགས་མི། ལོ་རབས་བརྒྱད་བཅུ་པའི་ནང་སྐྱེས། རྩོམ་རིག་གི་བྱས་འབྲས་སུ་བོད་རྒྱ་ཡིག་རིགས་གཉིས་ཀྱི་དུས་དེབ་དང་ཚགས་ཤོག་སྟེང་སྙན་ངག་གཙོ་བོས་བརྩམས་ཆོས་དྲུག་བརྒྱ་ལྷག་བཀོད། སྔ་རྗེས་སུ་སྐབས་གསུམ་པའི་ཟླ་ཟེར་རྩོམ་རིག་བྱ་དགའ་དང་། རྒྱལ་ཡོངས་སྐབས་དང་པོའི༼ཐུ་བྷོད་སྙན་ངག་མཁན་པོའི༽མཚན་སྙན་བྱ་དགའ་དང་། ༢༠༢༠ལོའི་དབྱི་ཐ་ལིའི”རྒྱལ་སྤྱིའི་གསེར་སྨྱུག་བྱ་དགའ”སོགས་ཐོབ། ལྷུག་རྩོམ་སྙན་ངག་དེབ༼སེམས་ཚེགས༽དང་། སྙན་ངག་དེབ༼རྨི་ལམ་ནང་གི་འོད་ཁང་༽དང་། ༼གཡོས་ཁང་གི་མདོ༽དང་། རྒྱ་ཡིག་གི་སྙན་ངག་དེབ༼འོད་ཀྱི་སྒྲོག་གུ༽སོགས་དེབ་བཞི་པར་དུ་བསྐྲུན། བརྩམས་ཆོས་རེ་འགའ་ཨིན་སྐད་དང་། དབྱི་ཐ་ལིའི་སྐད། སུར་པཱན་གྱི་སྐད་སོགས་ཡིག་རིགས་བདུན་ལ་བསྒྱུར་ཡོད་དོ།།